1. Hadia lua-luania ba niha na so khöra wahindrisa?

BA GULIDANÖ andre, ato sibai niha si fahindri ba laʼalui lala enaʼö abölö tohude ira moroi ba niha böʼö. Duma-dumania, tola manö iʼobousi nawönia pengusaha si samösa niha enaʼö yaʼia zabölö mofozu. Te iʼodödögö si samösa pemain bola ba wanifa ahe lawania irege fabesu enaʼö yaʼia zi möna. Ba tola manö manali zi samösa ono sekola enaʼö yaʼia nitema ba universitas si tehöngö, tenga iraono tanö böʼö. Yaʼita niha Keriso, no aboto ba dödöda wa fasala gamuata simane daʼö ba tefarahu ia ba ”mbua-bua nösi”. (Gal. 5:19-21) Hizaʼi, hadia tola manö tumbu ba dödöda wahindrisa ba mbanua niha Keriso ba zi lö taʼodödögö? Moguna taʼangeragö wanofu daʼa, börö me tola manö aboto wahasara dödöda na so wahindrisa.

2. Hadia nitutunöda ba artikel daʼa?

² Ba artikel daʼa, tatutunö dania hadia manö gamuata si lö sökhi sondrönisi tödöda enaʼö fahindri khö ndra talifusöda. Tafahaʼö göi ita moroi ba duma-duma nono mbanua Lowalangi ba Zura Niʼamoniʼö si lö tedönisi ba wamalua fahindrisa ba niha böʼö. Hizaʼi si oföna, datafahaʼö ita ba wamareso ohitö dödöda.

3. Hadia manö wanofu sinangea taʼangeragö?

³ Moguna asese tafareso hadia gohitö dödöda ba wamalua hadia ia. Duma-dumania, tola tasofu khöda samösa, ’Hadia awena ahono dödögu na tohude ndraʼo moroi ba niha böʼö? Hadia uforege wohalöwö ba mbanua niha Keriso ha enaʼö tohude  ndraʼo moroi khö zi samösa talifusöda? Mazui hadia omasido ubeʼe wondrege zi sökhi khö Yehowa?’ Moguna taʼangeragö wanofu-nofu andrö. Hadia mbörö?

4. Simane niwaʼö ba Galatia 6:3, 4, hadia mbörö wa tebai tafaedo-faedogö ita ba niha böʼö?

⁴ Iʼamenesi ita Sura Niʼamoniʼö enaʼö lö tafaedo-faedogö ita ba niha böʼö. (Baso Galatia 6:3, 4.) Hadia mbörö? Na tawaʼö tödöda wa abölö tohude ita moroi ba niha böʼö, tola manö fayawa ita. Hizaʼi, na tarasoi wa abölö tohude ira moroi khöda, tola manö ide-ide dödöda. Na so khöda wangera-ngera simane daʼö, lö taʼila tafaigi ita ndrohu-ndrohu zinangeania. (Rom. 12:3) Imane si samösa talifusöda ira alawe sotöi Katerina * si toröi ba Yunani, ”Omasido ufaedo-faedogö ndraʼo ba niha böʼö sabölö baga-baga moroi khögu, sabölö onekhe manuriaigö, hegöi sabölö onekhe fariawö. Lua-luania, iwaʼö tödögu wa lö eluaha waʼaurigu.” Moguna tatörö tödöda wa idöni ita Yehowa tobali ono mbanuania, tenga börö waʼasökhi zikhalada, börö waʼonekheda fahuhuo, mazui börö me tehöngö ita. Hizaʼi, nifaigi Yehowa yaʼia daʼö faʼaterou dödöda ba wangomasiʼö yaʼia hegöi ba wamondrondrongo niwaʼö Nononia.​—Yoh. 6:44; 1 Ko. 1:26-31.

5. Hadia wamahaʼö nihalöu moroi ba zalua khö dalifusöda Hyun?

⁵ Fanofu tanö böʼö sinangea tasofu khöda samösa yaʼia daʼö: ’Ba wamaigi ndra talifusöda, yaʼodo andre niha solohe faʼatulö mazui niha sasese fatiti ba niha böʼö?’ Nehegö zalua khö zi samösa satua sokubaloi sotöi Hyun, si toröi ba Korea Selatan. No irai omasi ia fahindri khö ndra talifusöda sangai halöwö ba mbanua niha Keriso. Imane, ”Uʼalu-alui sibai zalara, ba asese lö fao dödögu ba mbua gera-erara.” Hadia lua-luania? Imane, ”Börö nifaluagu andrö, lö hadöi fahasara dödö ba mbanua niha Keriso si farahu yaʼo.” Ba gafuriata, latolo ia ira awö-awönia irege aboto ba dödönia wa fasala nifaluania andrö. Börö daʼö, ibulöʼö gamuatania, ba no tobali ia satua sokubaloi si sökhi iadaʼa. Hadia wamahaʼönia? Na ibörögö omasi ita fahindri ba niha böʼö, moguna iʼanemaiʼö tabulöʼö gamuatada ba tobali ita solohe faʼatulö.

6. Moloʼö Galatia 5:26, hadia manö gamuata sondrönisi tödöda ba wamalua fahindrisa?

⁶ Baso Galatia 5:26. Hadia manö gamuata sondrönisi tödöda ba wamalua fahindrisa? Si oföna, fayawasa. Niha si fayawa, ha yaʼia manö niʼera-erania ba lö ibeʼe dödönia niha böʼö. Si dua, faʼafökhö dödö. Na afökhö dödö zi samösa niha, tenga ha omasi ia iʼokhögö hadia niʼokhögö niha böʼö, hizaʼi omasi ia na taya niʼokhögö niha andrö. Börö daʼö, na afökhö dödöda ba niha, sindruhunia no fatiu dödöda khöra. Tatu omasi ita tatimbagö gamuata si lö sökhi andre, simane na tatimbagö wökhö salio fatöfa ba niha!

7. Hadia lua-luania na so khöda wayawasa ba faʼafökhö dödö? Beʼe duma-duma.

⁷ Faʼafökhö dödö ba fayawasa andrö hulö gera si manga töla geu. Ba wamobörö, tola manö lö iʼanemaiʼö asoʼa geu daʼö. Hizaʼi ba gafuriata, börö me no ahori iʼa dölania era, asoʼa geu daʼö ba mate. Simane daʼö göi zalua ba niha si fayawa hegöi safökhö tödö. Ba wamobörö, tola manö lö iböhöli wamosumange Yehowa. Hizaʼi, hasambalö awuwu ia ba gafuriata. (Amd. 16:18) Iböhöli wamosumange Yehowa, ba iʼasogö gabula dödö ba waʼaurinia samösa hegöi ba niha böʼö. Na simanö, hadia zinangea tafalua enaʼö lö  tumbu ba dödöda wayawasa ba faʼafökhö dödö?

8. Hadia zinangea tafalua enaʼö lö tumbu ba dödöda wayawasa?

⁸ Enaʼö lö tumbu ba dödöda wayawasa, moguna itörö tödöda mene-mene nibeʼe zinenge sotöi Faulo ba niha Wilifi, ”Böi mifaʼudu mazui miʼosebua. Si sökhinia miʼide-ideʼö ami, enaʼö alawa niha böʼö miwaʼö tödömi.” (Fil. 2:3) Na tawaʼö tödöda wa abölö alawa niha böʼö moroi khöda, lö fahindri ita ba niha sabölö onekhe moroi khöda. Omuso dödöda na mofozu ira, mendrua manö na laʼogunaʼö waʼatua-tuara andrö ba wamosumange Yehowa. Simanö göi, na laʼoʼö mene-mene nibeʼe Waulo ira talifusöda andrö, tatu laʼameʼegö tödö gamuata si sökhi niʼokhögöda. Buania, tola tarorogö waʼatulö ba fahasara dödö ba mbanua niha Keriso.

9. Hewisa enaʼö tola tatimbagö waʼafökhö dödö?

⁹ Tola tatimbagö waʼafökhö dödö na taʼila wa so ösa zi tebai tafalua. Na aboto ba dödöda daʼö, lö taforege wangoromaʼö wa yaʼita zabölö onekhe moroi ba niha böʼö. Hizaʼi, taʼalui lala enaʼö tola tafahaʼö ita moroi ba niha sabölö onekhe moroi khöda. Duma-dumania, na sökhi wamaʼema zi samösa talifusöda huhuo sebua nifaʼanönia, tola tasofu khönia hewisa wamaʼanönia huhuo andrö. Na so dalifusöda ira alawe sonekhe mondrino, tola tasofu khönia hewisa göi enaʼö onekhe ita wondrino. Mazui, na so dalifusöda si bohou ebua si lö onekhe fariawö, tola iʼandrö wanuturu lala moroi khö dalifusöda sonekhe fariawö. Na tafalua daʼö, lö tumbu ba dödöda waʼafökhö dödö, hizaʼi itugu tedou waʼatua-tuada.

10. Hadia gabula dödö salua khö Gideono?

¹⁰ Nehegö atö zalua ba gotalua Gideono moroi ba mado Manase hegöi niha sato moroi ba mado Geferai. Börö wanolo moroi khö Yehowa, tola möna Gideono hegöi ira saradadunia si 300 faʼato me lasuwö nudu nono mbanua Lowalangi. Hewaʼae simanö, lö fayawa ira. Me larongo daʼö ira niha Geferai, möi ira laʼondrasi Gideono tenga ba wanuno yaʼia, hizaʼi ba  wabuʼa-buʼasa khönia. Te mofönu ira börö me lö niʼohe Gideono ira fasuwö ba wamobörö. Niʼera-era niha Geferai ha lakhömi madora samösa. Olifu ira zabölö moguna, yaʼia daʼö wa no ifolakhömi döi Yehowa Gideono ba ilumöʼö nono mbanuania.​—Sangu. 8:1.

11. Hewisa lala Gideono ba wameʼe fanema li ba niha Geferai?

¹¹ Si fao fangide-ngideʼö, imane Gideono ba niha Geferai, ”Hadia tenga no abölö ebua nifaluami moroi ba nifaluagu?” Aefa daʼö, itötöi khöra hadia manö howu-howu si no ibeʼe Yehowa ba mado Geferai. Buania, ”alö saʼae wönura”. (Sangu. 8:2, 3) Iforomaʼö wangide-ngideʼö Gideono enaʼö tola terorogö waʼatulö ba gotalua nono mbanua Lowalangi.

12. Hadia wamahaʼö si tola tahalö moroi ba zalua khö Gideono hegöi niha Geferai?

¹² Hadia wamahaʼö si tola tahalö moroi ba zalua andre? Lö omasi ita simane niha Geferai, sabölö mangofönaiʼö lakhömira samösa moroi ba lakhömi Yehowa. Na no tobali ita högö yomo ba nomo mazui satua sokubaloi, tola tafahaʼö ita moroi khö Gideono. Na abao dödö niha böʼö khöda, hadia nifaluada? Forege enaʼö aboto ba dödöu hadia nirasoinia, ba suno ia ba ngawalö zi sökhi si no ifalua. Sindruhu sa, moguna khöda wangide-ngideʼö ba wamalua daʼö, mendrua manö na yaʼia zi fasala. Hizaʼi, böi olifu ita wa abölö moguna tarorogö waʼatulö moroi na taforomaʼö wa tenga yaʼita zi fasala.

13. Hadia gabula dödö nitaögö Khana, ba hadia nifaluania?

¹³ Iadaʼa, angeragö duma-duma Khana. No mangowalu ia khö niha Lewi sotöi Elikana. No göi mangowalu Gelikana khö ndra alawe böʼö sotöi Fenina, hewaʼae simanö abölö iʼomasiʼö Khana moroi khö Wenina. Börö me ”so nono Wenina, hizaʼi lö hadöi ono Khana”, lö iböhöli Fenina ”wangoʼaya Khana enaʼö alangu dödönia”. Hadia nirasoi Khana? Abu sibai dödönia irege ’meʼe ia ba lö manga’. (1 Sa. 1:2, 6, 7) Hizaʼi, lö irai iwaʼö Sura Niʼamoniʼö wa iforege Khana ba wolau balönia khö Wenina. Itutunö fefu nösi dödönia khö Yehowa ba faduhu dödönia wa hasambalö itolo ia Yehowa. Hadia tebulö gamuata Wenina ba gafuriata? Lö nitutunö Zura Niʼamoniʼö. Si no taʼila ua, ifuli ohahau dödö Khana ba irasoi waʼomuso dödö. Imane Sura Niʼamoniʼö, ”Lö saʼae ifangerau mbawania.”​—1 Sa. 1:10, 18.

14. Hadia wamahaʼö si tola tahalö moroi ba duma-duma Khana?

¹⁴ Hadia wamahaʼö si tola tahalö moroi ba duma-duma Khana? Na so niha böʼö somasi fahindri khöu, böi tedönisi dödöu irege fahindri göi ndraʼugö khönia. Moroi na ösulöni zi lö sökhi faoma si lö sökhi, alui lala enaʼö ifuli atulö ndraʼugö khönia. (Rom. 12:17-21) Buania, hewaʼae na lö ibulöʼö gamuatania, lö  tebulö örasoi waʼohahau dödö hegöi faʼomuso dödö.

15. Hadia waʼafagölö ba gotalua Afolo hegöi Faulo?

¹⁵ Iadaʼa, datafahaʼö ita moroi ba duma-duma Afolo hegöi sinenge sotöi Faulo. Sindruhu-ndruhu aboto ba dödöra nösi Mbuku Niʼamoniʼö. Onekhe göi ira mamahaʼö ba tehöngö sibai ira. Baero daʼö, ato niha nitolora irege tobali nifahaʼö Keriso. Hewaʼae simanö, lö faoma fahindri ira khö nawöra.

16. Hewisa sibai Afolo andrö?

¹⁶ Afolo andrö samösa nifahaʼö ”si otarai Alesandria”, tehöngö sibai mbanua daʼa me abad siföföna börö me ato zi möi sekola ba daʼö. Onekhe sibai ia fahuo-huo ba ”oya niʼilania sanandrösa ba Mbuku Niʼamoniʼö”. (Hal. 18:24) Me so ia ba Gorindro, so ösa zi farahu ba mbanua niha Keriso sabölö mangomasiʼö yaʼia moroi khö Waulo hegöi ira talifusöda tanö böʼö. (1 Ko. 1:12, 13) Hadia Afolo zamarou tödö niha wamalua simane daʼö? Tenga. Sindruhunia, lö ara me no mofanö Afolo moroi ba Gorindro, ifarou ia Faulo enaʼö mangawuli ia ba daʼö. (1 Ko. 16:12) Tatu lö ifalua daʼö Faulo na iforege Afolo ba wamoto fahasara dödö ba mbanua niha Keriso. Ba daʼa taʼila wa iʼogunaʼö waʼatua-tuania Afolo ba lala si sökhi, yaʼia daʼö ba wanuriaigö turia somuso dödö hegöi ba wangabölöʼö ira talifusönia. Baero daʼö, so khönia wangide-ngideʼö. Duma-dumania, lö nitutunö Zura Niʼamoniʼö wa abao dödönia me laʼombakhaʼö khönia ira Akila hegöi Firisikila ”zabölö tefaudu sanandrösa ba lala Lowalangi”.​—Hal. 18:24-28.

17. Hadia nifalua Waulo ba wangaʼasogö faʼatulö?

¹⁷ Aboto ba dödö Waulo wa no oya halöwö si sökhi si no ifalua Afolo. Hizaʼi, lö irai tumbu ba dödö Waulo fahindri khönia. Moroi  ba zura nifaʼoheʼönia ba mbanua niha Keriso si so ba Gorindro, tola taʼila wa so wangide-ngideʼö khö Waulo. Iʼila ndrohu-ndrohu waʼabölönia ba iʼokhögö lala wangera-ngera si tefaudu. Duma-dumania, lö omasi ia na so zangumaʼö, ”Khö Waulo ndraʼo.” Hizaʼi, khö Lowalangi Yehowa hegöi khö Yesu Keriso ifanandrösa wanuno nitemania.​—1 Ko. 3:3-6.

18. Moloʼö 1 Korindro 4:6, 7, hadia wamahaʼö si tola tahalö moroi ba duma-duma Afolo hegöi Faulo?

¹⁸ Hadia wamahaʼö si tola tahalö moroi ba duma-duma Afolo hegöi Faulo? Te no taforege wangai halöwö khö Yehowa mazui no ato niha nitoloda irege tedou ira ba wamati ba tebayagö idanö. Hizaʼi sindruhunia, tola tafalua daʼö fefu ha börö wanolo moroi khö Yehowa. Famahaʼö tanö böʼö si tola tahalö yaʼia daʼö na itugu oya halöwö niʼokhögöda ba mbanua niha Keriso, itugu oya ginötöda ba wangaʼasogö faʼatulö. Tatu taʼandrö sibai saohagölö me fao ndra satua sokubaloi hegöi ira enoni ba wangaʼasogö faʼatulö awö wahasara dödö ba mbanua niha Keriso. Lö tebulö laʼogunaʼö Daromali Lowalangi ba ginötö labeʼe mene-mene. Baero daʼö, lö laʼalui lala enaʼö tohude ira moroi ba niha böʼö. Hizaʼi, latolo fefu ndra talifusöda ba mbanua niha Keriso enaʼö lafalua niwaʼö Yesu ba laʼoʼö duma-dumania.​—Baso 1 Korindro 4:6, 7.

19. Hadia zi tola tafalua? (Faigi göi kotak ” Böi Asogö Wahindrisa”.)

¹⁹ Fefu ita no faböʼö-böʼö mbuala hegöi faʼabölö nitemada moroi khö Lowalangi. Tola taʼogunaʼö daʼö ba ’wanolo awöda’. (1 Fe. 4:10) Hadia öwaʼö tödöu wa lö oya zi tola öfalua ba mbanua niha Keriso? Törö tödöu wa tola tefazökhi zi sambua baru börö mbalö-mbalö nukha si no mufatohu. Simanö göi, tola so wahasara dödö ba mbanua niha Keriso börö halöwö side-ide si no öfalua. Dataforege ba wanimbagö fahindrisa ba niha böʼö. Datahalö gangetula ba wangaʼasogö faʼatulö hegöi fahasara dödö ba mbanua niha Keriso.​—Ef. 4:3.