Omasi Yehowa na omuso dödö zi darua niha si no mangowalu ba laʼokhögö wahuwusa saro sagötö faʼara. (Mat. 19:4-6) Na omasiʼö mangowalu, hewisa enaʼö tola ösöndra woʼomo si sökhi? Börö me Yehowa Zomböi yaʼita, iʼila hadia zi tobali fanolo ba niha si fakawa hegöi si no mangowalu. Börö daʼö, na öʼoʼö goi-goi moroi khö Yehowa, tola ösöndra waʼomuso dödö. Faigi atö goi-goi nitutunö aefa daʼa.

Si oföna, moguna aboto ba dödöda daʼa, ”No tefuyu dödö niha ba si lö sökhi moroi ba danö böʼö fefu.” (Yer. 17:9) Na falukha zi darua niha somasi mangowalu ba ibörögö fakawa ira, aoha manö khöra wangodaligö tödöra. Na alua daʼö, abua khöra wangai angetula si tefaudu. Na mangowalu ira ha börö waʼomasi si sabata, lua-luania larasoi waʼafökhö dödö mazui faʼafatö dödö. (Amd. 28:26) Daʼö mbörö wa moguna sibai aboto ba dödöra nawöra zamösana fatua lö lafatunö nösi dödöra mazui fawuʼu li ira.

Imane ba Gamaedola 22:3, ”Niha satua-tua ibiniʼö ia na so deʼala, hizaʼi niha si lö faʼaboto ba dödö itörö manö ba iluʼi lua-luania.” Na simanö, hadia lua-luania na taʼogunaʼö aplikasi hegöi situs cari jodoh? So ösa niha si faʼila ba Internet, aefa daʼö fakawa ira. Hizaʼi ba gafuriata, afatö dödöra börö me no telimo ira. Baero daʼö, so ösa zi lö mamatunö haniha ira zindruhunia ba wolimo niha böʼö ha börö gefe. Itaria lawaʼö wa yaʼira andrö Samaduhuʼö Yehowa.

Angeragö nasa deʼala tanö böʼö. So ösa aplikasi hegöi situs cari jodoh sangogunaʼö program komputer ba wamaedogö si darua niha. Hulö moadu sibai ira na mufaigi. Hizaʼi, lö hadöi dane-dane ba wamaduhusi tödö program komputer simane daʼö. Tebai tafaduhusi tödö program komputer nifazökhi niha ba wangai angetula sabölö moguna ba waʼaurida, simane ba wangalui foʼomo. Ha goi-goi Zura Niʼamoniʼö zi tola taʼodaligö börö me abölö tohude ia moroi ba program komputer simane daʼö.​—Amd. 1:7; 3:5-7.

So goi-goi Zura Niʼamoniʼö ba Gamaedola 14:15, ”Niha sambö tödö ifaduhusi tödö fefu wehede, hizaʼi niha satua-tua ihaogö ifatimbaisi mbekania.” Fatua lö öhalö  gangetula hadia tola tobali foʼomo si sökhi zi samösa niha, moguna aboto ba dödöu haniha ia zindruhunia. Hizaʼi, abua wamalua daʼö ba Internet. Hewaʼae na faʼoma miʼila informasi sanandrösa khö nawömi zamösana ba asese fahuo-huo ami ba Internet, tenga daʼö geluahania wa sindruhu-ndruhu no aboto ba dödöu ia. So ösa zangumaʼö wa no lasöndra waʼomasi sindruhu. Hizaʼi, tokea sibai ira ba gafuriata me falukha ira.

Imane sanura sinunö, ”Lö fariawö ndraʼo ba niha si falimo, ba uʼaröuʼö ndraʼo ba niha saminiʼö haniha ia zindruhunia.” (Si. 26:4) Ato zangumaʼö wa lö fasala na lasura informasi si lö atulö ba profilra ha enaʼö adöni dödö niha khöra. Tola manö labiniʼö gamuatara si lö sökhi, mazui ambö oroma gamuatara andrö ba ginötö lafaʼoheʼö pesan ba niha böʼö. So göi ösa zangumaʼö wa yaʼira andrö Samaduhuʼö Yehowa. Hizaʼi, hadia sindruhu-ndruhu no tebayagö ira idanö? Hadia aro ira ba wamati? Hadia fahuwu ira khö Yehowa? Hadia sökhi duriara ba mbanua niha Keriso? Hadia tobali ira duma-duma si sökhi, mazui hadia si fahuwu si lö sökhi ira andrö? (1 Ko. 15:33; 2 Ti. 2:20, 21) Hadia sinangea na mangowalu ira moloʼö goi-goi Zura Niʼamoniʼö? Moguna öʼalui wanema li moroi ba wanofu-nofu daʼö. Tola aoha khöu wanöndra fanema linia na ösofu khö ndra talifusöda si no ara faʼila khönia. (Amd. 15:22) Tatu manö, lö irai tumbu ba dödö nono mbanua Yehowa si lö faröi ba wangowalu ba niha si tenga si sara lala wamati khöra.​—2 Ko. 6:14; 1 Ko. 7:39.

Ba daʼa taʼila wa tola teʼala ita na taʼogunaʼö aplikasi hegöi situs cari jodoh. Sindruhunia, so lala tanö böʼö sabölö sökhi na omasi ita taʼalui ba taʼila haniha zi tola tobali foʼomoda. Duma-dumania, me tola nasa owulo ita ba zilalö ba gangowuloa, angowuloa sebua, hegöi angowuloa tanö böʼö, tola fariawö ita khö ndra talifusöda ba taʼila haniha ira zindruhunia.

Hizaʼi, na tebai tafalua gangowuloa simane si toʼölö, duma-dumania sagötö pandemi COVID-19 andre, taʼogunaʼö video-conference ba wamalua angowuloa. Tola öʼogunaʼö ginötö daʼö ba wangiʼila ira talifusöda si lö sangowalu. Tola öfondrondrongo huhuo sebua nifaʼemania ba gangowuloa ba öʼila hawaʼaro wamatinia me ifaehagö mbua gera-erania. (1 Ti. 6:11, 12) Tola göi fahuhuoʼö khönia ba breakout room na no awai gangowuloa. Baero daʼö, tola öʼila hewisa zindruhunia gamuata niha sadöni dödömö andrö na fariawö ia khö ndra talifusöda ba gangowuloa tanö böʼö nifalua secara online. (1 Fe. 3:4) Ba gafuriata, na no aboto ba dödömö hewisa ia zindruhunia, awena tola öʼila hadia fagölö gohitö dödömi ba hadia tola tobali ami foʼomo si sökhi.

Na so niha si lö sangowalu somasi mangalui haniha zi tola tobali foʼomonia, moguna iʼalui wanolo moroi ba goi-goi Zura Niʼamoniʼö. Na ifalua daʼö, tola isöndra waʼomuso dödö ba wongambatönia. Tefaudu daʼö simane niwaʼö ba Zura Niʼamoniʼö, ”Niha sanöndra foʼomo ira alawe [mazui foʼomo ira matua] si sökhi, ba no isöndra zabölö ebua böli, ba falukha ia waʼebua dödö Yehowa.”​—Amd. 18:22.