1. Hana wa mangandrö sibai saohagölö ndraʼugö khö Yehowa?

HEWISA wa tola tobali Samaduhuʼö Yehowa ndraʼugö? Ba wamobörö, tola manö örongo ”duria somuso dödö” moroi khö zatuamö, awöu wohalöwö, awöu sekola, mazui moroi khö Zamaduhuʼö Yehowa si möi manuriaigö ba nomomö. (Mrk. 13:10) Aefa daʼö, oya ginötö niʼogunaʼönia hegöi famorege nifaluania ba wondröniaʼö khöu famahaʼö ba Zura Niʼamoniʼö. Me no öfahaʼö ndraʼugö, tumbu ba dödöu waʼomasi khö Yehowa ba aboto ba dödöu wa iʼomasiʼö göi ndraʼugö. Ba gafuriata, tobali ndraʼugö nifahaʼö Yesu ba öʼokhögö dötönafö faʼauri si lö aetu. (Yoh. 6:44) Tatu öʼandrö sibai saohagölö börö me no idöni ndraʼugö Yehowa tobali ono mbanuania. Iʼogunaʼö samösa niha ba wamahaʼö yaʼugö ba zindruhu ba itemaʼö ndraʼugö tobali ono mbanuania.

2. Hadia manö nitutunö ba artikel daʼa?

² Börö me no aboto ba dödöda zindruhu, tebeʼe khöda noro dödö si tohude ba wanolo niha böʼö enaʼö tola latörö lala saekhu ba waʼauri. Tola manö no toʼölö ita weʼamöi manuriaigö, hizaʼi te abua khöda wamarou tödö niha ba wamahaʼö yaʼira ba Zura Niʼamoniʼö, ba abua göi khöda wondröniaʼö khöra famahaʼö. Hadia örasoi göi zimane daʼö? Na yaʼia, tola möi fanolou wanuturu lala si so ba artikel daʼa. Tatutunö hadia zamarou tödöda ba wombaliʼö nifahaʼö. Tatutunö göi hewisa lala ba wangasiwai taha-taha sangaʼasogö khöda faʼaombö dödö ba wondröniaʼö famahaʼö ba Zura Niʼamoniʼö. Si oföna, datatutunö ua hana wa tenga ha fanuriaigö nifaluada, hizaʼi tafahaʼö göi niha böʼö sanandrösa ba duria somuso dödö.

3. Hana wa möi ita manuriaigö?

³ Me so Yesu ba gulidanö, so dombua halöwö nibeʼenia khö ndra nifahaʼönia. Si oföna, iʼandrö khöra ba wanuriaigö Famatörö  Lowalangi ba iforomaʼö khöra hewisa lala ba wamalua daʼö. (Mat. 10:7; Luk. 8:1) Duma-dumania, ifatunö khöra Yesu hadia zinangea lafalua na so niha sanemaʼö mazui sanimbagö turia nifaʼemara. (Luk. 9:2-5) Ifatunö göi wa hasambalö mofozu ndra nifahaʼönia ba wamaʼema ”famaduhuʼö ba ngawalö soi”. (Mat. 24:14; Hal. 1:8) Börö daʼö, gofu hewisa wanemaʼö niha turia nifaʼemada, moguna tafatunö khöra sanandrösa ba Wamatörö Lowalangi ba hadia nifalua Wamatörö andrö ba zi so miföna.

4. Moloʼö Mataiʼo 28:18-20, hadia nasa zinangea tafalua baero halöwö fanuriaigö?

⁴ Hadia halöwö si dua nibeʼe Yesu khöda? Iʼandrö khö ndra soloʼö khönia enaʼö lafahaʼö niha böʼö ba wamalua fefu niwaʼönia khöra. Hizaʼi so ösa zangumaʼö, ha ba niha Keriso me abad siföföna tebeʼe halöwö ba wanuriaigö hegöi ba wamahaʼö. Hadia atulö daʼö? Löʼö. Iforomaʼö Yesu wa lö tebulö mufalua halöwö si tohude andre ”irugi gamozua götö daʼa”. (Baso Mataiʼo 28:18-20.) Ibeʼe Yesu halöwö andrö te me ifalukhaisi ndra nifahaʼönia si töra 500 niha. (1 Ko. 15:6) Ba gafuriata, me ibeʼe gangilata khö Yohane, iforomaʼö Yesu wa omasi ia na lafahaʼö niha sato ira nifahaʼönia maʼafefu sanandrösa khö Yehowa.​—Fam. 22:17.

5. Hadia duma-duma niʼogunaʼö Waulo ba wanutunö amakhaita halöwö fanuriaigö hegöi famahaʼö? (1 Korindro 3:6-9)

⁵ Ifagölösi halöwö fombaliʼö nifahaʼö Faulo ba halöwö fondrorogö sinanö, tenga ha ba wananö yaʼia. Ibeʼe wamasugi ba dödö khö ndra niha Keriso si so ba Gorindro, ”Yaʼodo zananö, Afolo zombuwui . . . Yaʼami nowi Lowalangi.” (Baso 1 Korindro 3:6-9.) Yaʼita andre sohalöwö ba ”nowi Lowalangi”. Na möi ita manuriaigö, hulö zananö sinanö ita. Ba na tafahaʼö niha, hulö zombuwui sinanö andrö ita. (Yoh. 4:35) Hizaʼi, aboto ba dödöda wa Lowalangi zanolo si samösa niha enaʼö tedou ba wamati.

6. Hadia manö zinangea tafalua ba wanolo niha nifahaʼöda ba Zura Niʼamoniʼö?

⁶ Omasi ita taʼalui ”niha si sökhi amuata somasi manöndra faʼauri si lö aetu”. (Hal. 13:48) Enaʼö tola tebayagö ira idanö, moguna tatolo ira (1) ba wangokhögö faʼaboto ba dödö, (2) ba wanemaʼö, hegöi (3) ba wamalua hadia zi no lafahaʼö yaʼira moroi ba Zura Niʼamoniʼö. (Yoh. 17:3; Kol. 2:6, 7; 1 Te. 2:13) Fefu zi farahu ba mbanua niha Keriso, tola göi fao ira ba wanolo niha nifahaʼöda na faoma laforomaʼö waʼomasi ba latemaʼö ira ba ginötö möi ira ba gangowuloa. (Yoh. 13:35) Baero daʼö, te oya zinangea taforege ba wanolo niha nifahaʼöda enaʼö tola iröi waʼafaduhu dödö mazui si toʼölö mufalua ’si no aro’ bakha ba dödönia. (2 Ko. 10:4, 5) Tola manö oya ginötö sinangea muʼogunaʼö ba wanolo niha nifahaʼöda ba wombulöʼö lala waʼaurinia irege tola tebayagö ia idanö. Hizaʼi, tenga zaya-zaya gölö wamorege nifaluada andrö.

7. Hana wa omasi ita weʼamöi manuriaigö hegöi ba wamahaʼö niha?

⁷ Hana wa omasi ita weʼamöi manuriaigö hegöi ba wamahaʼö niha? Si oföna, börö me taʼomasiʼö Yehowa. Na sindruhu-ndruhu taʼomasiʼö Lowalangi, hasambalö taforege wamalua oroisania ba weʼamöi manuriaigö hegöi ba wamahaʼö niha. (1 Yo. 5:3) Angeragö atö: Börö me öʼomasiʼö Yehowa, terou dödöu weʼamöi manuriaigö. Hizaʼi, hadia aoha wamalua daʼö? Tola manö löʼö. Hewisa dödöu me awena sibai möiʼö manuriaigö? Te ataʼu ndraʼugö. Hewaʼae simanö, lö öböhöli wanuriaigö börö me omasiʼö öfalua niwaʼö Yesu. Arara manö, lö saʼae  ataʼu ndraʼugö weʼamöi manuriaigö. Hewisa göi dödöu ba wamahaʼö niha ba Zura Niʼamoniʼö? Tola manö ataʼu göi ndraʼugö ba wamalua yaʼia. Hizaʼi, tola öʼandrö wanolo moroi khö Yehowa ba wolawa faʼataʼumö andrö. Hasambalö itolo ndraʼugö Yehowa enaʼö tola barani ndraʼugö ba wombaliʼö nifahaʼö.

8. Moloʼö Mareko 6:34, hadia nasa zamarou yaʼita ba wamahaʼö niha böʼö?

⁸ Si dua, omasi ita tafahaʼö niha sanandrösa ba zindruhu börö me taʼomasiʼö nawöda niha. Angeragö atö duma-duma nibeʼe Yesu. Samuza inötö, erege dödönia hegöi ira nifahaʼönia börö me no maʼö-maʼökhö manuriaigö ira. Me edöna molombase ira, ato sibai niha sangondrasi yaʼira. Börö waʼahakhö dödö Yesu, ”oya” wamahaʼö nifaʼemania khöra. (Baso Mareko 6:34.) Hewaʼae na erege sibai dödönia, omasi ia ifahaʼö ira. Hadia mbörö? Börö me ikhalaigö Yesu hadia nirasoi niha sato andrö. Aboto ba dödönia wa tefakao sibai ira ba moguna khöra wanötöna. Daʼö mbörö wa omasi ia itolo ira. Simane daʼö göi zalua ba niha ba götöda andre. Hewaʼae na so ösa ba gotaluara zomuso tödö ba sowua-wua tödö ba wamaigida, sindruhunia tefakao sibai ira ba moguna khöra wanötöna. Yaʼira andrö hulö mbiri-biri selungu si lö kubalo. Itutunö Faulo wa yaʼira andrö niha si lö faʼaboto ba dödö sanandrösa khö Lowalangi ba si lö fanötöna. (Ef. 2:12) No so ira ba ”lala saekhu ba waʼatekiko”! (Mat. 7:13) Börö daʼö, khalaigö waʼauri niha si so ba zi fasuida si lö faʼaboto ba dödö sanandrösa khö Lowalangi. Börö me taʼomasiʼö ira ba ahakhö dödöda khöra, omasi ita tatolo ira. Lala sabölö sökhi ba wanolo yaʼira yaʼia daʼö tafarou dödöra ba wamahaʼö yaʼira ba Zura Niʼamoniʼö.

9. Moloʼö Filifi 2:13, hadia nifalua Yehowa ba wanolo yaʼugö?

⁹ Na tafahaʼö zi samösa niha sanandrösa ba Zura Niʼamoniʼö, oya ginötö sinangea tatehegö ba wamaʼanö yaʼita hegöi ba wamahaʼö yaʼia. Börö daʼö, te so ösa ba gotaluada zataʼu ba wamarou tödö niha enaʼö lafahaʼö ira ba Zura Niʼamoniʼö. Na daʼö nirasoimö, tutunö khö Yehowa nösi dödömö, ba andrö khönia wanolo enaʼö terou dödöu ba wamahaʼö niha. (Baso Wilifi 2:13.) Ifatunö khöda sinenge sotöi Yohane wa hasambalö ifondrondrongo wangandrö simane daʼö Yehowa, börö me tefaudu daʼö ba zomasi ia. (1 Yo. 5:14, 15) Yafaduhu dödöu wa hasambalö ibeʼe khöu Yehowa waʼedöna ba wamahaʼö niha ba Zura Niʼamoniʼö.

10-11. Hadia zi tobali taha-taha khöda ba wondröniaʼö famahaʼö ba Zura Niʼamoniʼö?

¹⁰ Oya zi tobali taha-tahada irege abua khöda ba wombaliʼö nifahaʼö. Hizaʼi, aboto ba dödöda wa moguna sibai tafahaʼö niha. Börö daʼö, datatutunö hadia manö daha-taha nitaögöda ba hewisa lala ba wangasiwai yaʼia.

¹¹ Lö oya zi tola tafalua ba wanuriaigö. Duma-dumania, so ösa zanuriaigö si no alawa döfi mazui si göna fökhö irege lö oya zi tola lafalua ba wanuriaigö. Hadia simane daʼö göi zalua khömö? Na yaʼia, angeragö atö hewisa wamaluada halöwö fanuriaigö sagötö alua pandemi COVID-19. No taʼila samösa wa tola mofozu ita wondröniaʼö famahaʼö ba Zura Niʼamoniʼö, hewaʼae na lö fatutu bawa ita ba niha nifahaʼöda, duma-dumania na taʼogunaʼö HP-da mazui perangkat elektronik tanö böʼö. Börö daʼö, tola öfahaʼö niha moroi ba nomomö samösa. Baero daʼö, te so niha somasi lafahaʼö ba Zura Niʼamoniʼö, hizaʼi ha ba zihulö wongi sibai so ginötöra mazui ba waʼalawa mbongi. Si toʼölönia, tenga ba ginötö simane daʼö manuriaigö ita. Tobali, hadia tola öfahaʼö niha ba ginötö simane daʼö? Me föna, ifahaʼö Nikodemo Yesu ba zi bongi, börö me daʼö ginötö si tefaudu khö Nikodemo.​—Yoh. 3:1, 2.

12. Hadia manö zanolo yaʼita enaʼö faduhu dödöda wa tola tafahaʼö niha ba Zura Niʼamoniʼö?

 ¹² Ambö faduhu dödöda wa tola tafahaʼö niha ba Zura Niʼamoniʼö. So ösa zangumaʼö wa moguna ua ladouʼö waʼaboto ba dödö niʼokhögöra hegöi faʼonekhera ba wamahaʼö, fatua lö lafahaʼö niha ba Zura Niʼamoniʼö. Na daʼö nirasoimö, so tölu ngawalö zi möi fanolou enaʼö faduhu dödöu wa tola öfahaʼö niha böʼö. Si oföna, faduhu dödö Yehowa wa tola öfahaʼö niha böʼö. (2 Ko. 3:5) Si dua, samaduhusi tödö khöu halöwö daʼa yaʼia daʼö Yesu, sangokhögö ”fefu waʼabölö ba zorugo hegöi ba gulidanö”. Faduhu dödönia wa tola öfalua daʼö. (Mat. 28:18) Si tölu, tola öfahaʼö ndraʼugö khö Yehowa hegöi khö ndra talifusöda. Iwaʼö Yesu wa moroi khö Namania fefu wamahaʼö nifaʼemania. Simane Yesu, oya göi wamahaʼö si tola tahalö moroi khö Yehowa. (Yoh. 8:28; 12:49) Baero daʼö, enaʼö öʼila hewisa lala ba wamörögö hegöi ba wondröniaʼö famahaʼö ba Zura Niʼamoniʼö, tola öʼandrö wanolo khö pengawas kelompok dinas lapangan, khö ndra perintis si no ara mangai halöwö, mazui khö ndra sanuriaigö sonekhe. Tola göi fao ndraʼugö khöra na ladöniaʼö wamahaʼö ba Zura Niʼamoniʼö.

13. Hana wa moguna tafaudugö lala wamahaʼö nifaluada?

¹³ Abua khöda wangogunaʼö publikasi hegöi lala wamahaʼö si bohou. Iadaʼa, no tebulö lala niʼogunaʼöda ba wondröniaʼö famahaʼö ba Zura Niʼamoniʼö. Publikasi sabölö taʼogunaʼö ba wamahaʼö yaʼia daʼö Lala ba Wanöndra Faʼohahau Dödö Sagötö Faʼara! Lö oya-oya ngenolinia ba moguna asese manofu ita ba niha nifahaʼöda. Baero daʼö, oya göi video hegöi fakake tanö böʼö si tola taʼogunaʼö si no tehenaigö ba situs webda hegöi JW Library^®. Börö daʼö, moguna tafaudugö lalada ba wamaʼanö yaʼita hegöi ba wondröniaʼö famahaʼö. Na lö öʼila hewisa lala ba wangogunaʼö fefu wakake si bohou, andrö wanolo ba niha böʼö. Sindruhu sa, abölö omasi ita wamalua hadia zi no toʼölö tafalua. Daʼö mbörö wa abua khöda wangogunaʼö lala si bohou. Hizaʼi, börö wanolo Yehowa hegöi ira talifusöda tanö böʼö, tola aoha khöu ba wangogunaʼö lala si bohou ba itugu owua-wua dödöu ba wamahaʼö niha. Itutunö samösa perintis wa ”itugu owua-wua dödöda hegöi niha nifahaʼöda börö lala wamahaʼö si bohou andre”.

14. (a) Na ato niha si lö adöni tödö ba wamahaʼö yaʼira ba Zura Niʼamoniʼö, hadia zinangea tatörö tödöda? (b) Hewisa wa tola möi famarou dödöda wehede nisura ba 1 Korindro 3:6, 7?

¹⁴ Ato niha ba zi fasuida si lö adöni tödö ba wamahaʼö yaʼira ba Zura Niʼamoniʼö. Te so ösa zi lö adöni tödö mazui si fatuwu ba duria nifaʼemada. Na simane daʼö zalua ba zi fasuimö, hewisa enaʼö lö tebulö faduhu dödöu wa hasambalö so zomasi mamondrongo turia nifaʼemau? Törö tödöu wa alio sibai tebulö zalua ba niha börö me afönu abula dödö gulidanö andre. Hewaʼae na lö adöni dödöra ba wamobörö, tola manö aboto ba dödöra ba gafuriata wa moguna khöra wanuturu lala moroi khö Lowalangi. (Mat. 5:3) Niha si lö irai manemaʼö publikasi nibeʼeda ba zilalö, tola manö latema wamahaʼö ba Zura Niʼamoniʼö ba gafuriata. Hadia nasa zi tola möi famarou dödöda? Aboto ba dödöda wa Yehowa Zokhö basitö. (Mat. 9:38) Omasi ia na lö taböhöli wananö hegöi ba wombuwui, ba yaʼia dania zamanöi. (1 Ko. 3:6, 7) Börö daʼö, hewaʼae na lö hadöi niha nifahaʼöda iadaʼa, lö moguna ide-ide dödöda. Ifahowuʼö ita Yehowa moloʼö famorege nifaluada, tenga moloʼö faʼato niha nifahaʼöda ba Zura Niʼamoniʼö! *

15. Hewisa dödö Yehowa na so niha sanemaʼö sindruhu moroi ba Zura Niʼamoniʼö ba ifalua hadia zi no ifahaʼö yaʼia?

¹⁵ Omuso dödö Yehowa na so niha sanemaʼö sindruhu moroi ba Zura Niʼamoniʼö, aefa daʼö itutunö ba niha hadia zi no ifahaʼö yaʼia. (Amd. 23:15, 16) Omuso göi dödö Yehowa me iʼila wa owölö-ölö sibai nono mbanuania iadaʼa ba wanuriaigö hegöi ba wamahaʼö! Duma-dumania, nehegö hadia manö zi no takhamö sagötö tahun dinas 2020. Hewaʼae na so pandemi, so 7.705.765 niha nifahaʼö ndra Samaduhuʼö Yehowa ba Zura Niʼamoniʼö, ba so 241.994 niha nibayagö idanö. Fefu niha sawena tebayagö idanö andrö, hasambalö fao göi ira ba wombaliʼö nifahaʼö. (Luk. 6:40) Yafaduhu dödöu, omuso sibai dödö Yehowa me iʼila wa fao ita ba halöwö fombaliʼö nifahaʼö.

16. Hadia gangetula nihalöu?

¹⁶ Sindruhu sa, tenga saoha wamalua halöwö fombaliʼö nifahaʼö. Hizaʼi, börö wanolo moroi khö Yehowa, tola fao ita ba wamahaʼö niha ba wangomasiʼö Amada si so ba zorugo. Börö daʼö, hadia tola öbörögö ba ödöniaʼö si löʼö-löʼönia sambua wamahaʼö ba Zura Niʼamoniʼö? Tandraigö farou dödö fefu niha nifalukhaisimö ba wanuriaigö enaʼö lafahaʼö ira ba Zura Niʼamoniʼö. Tola manö tokea ndraʼugö ba mbua nitemamö. Yafaduhu dödöu wa hasambalö ifahowuʼö Yehowa wamorege nifaluamö.

17. Hadia nirasoida na tadöniaʼö wamahaʼö ba Zura Niʼamoniʼö?

¹⁷ No tebeʼe khöda döi si sökhi ba wanuriaigö hegöi ba wamahaʼö niha sanandrösa ba Zura Niʼamoniʼö. Iʼasogö khöda waʼomuso dödö halöwö daʼa. Daʼö nirasoi zinenge sotöi Faulo sanolo niha sato ba Desalonika enaʼö tobali nifahaʼö Keriso. Imane, ”Na tenga yaʼami, haniha nasa nitötönama mazui somuso dödöma mazui takula niʼalawaʼöma föna Zoʼaya Yesu na tohare ia? Yaʼami lakhömi ba faʼomuso dödöma.” (1 Te. 2:19, 20; Hal. 17:1-4) Simane Faulo, ato göi ndra talifusöda sorasoi faʼomuso dödö börö me fao ira ba wombaliʼö nifahaʼö. Samösa ba gotaluara yaʼia daʼö Stéphanie. No ato niha nitolonia hegöi foʼomonia irege tebayagö idanö. Imane, ”Lö hadöi si tola mangaʼasogö khöda faʼomuso dödö sabölö ebua moroi ba wanolo niha ba wolulu faʼaurira khö Yehowa.”