1. Hana wa lö ifaedo-faedogö ita Yehowa ba niha böʼö?

LÖ OMASI Yehowa na fagölö manö fefu gomböila dangania. Tola oroma daʼö moroi ba ngawalö niwöwöinia, simane urifö, sinanö, hegöi niha gulidanö. No faböʼö-böʼö fefu ita ero zamösana. Börö daʼö, lö irai ifaedo-faedogö ndraʼugö Yehowa ba niha böʼö. Tola aboto ba dödönia haniha ndraʼugö zindruhunia. (1 Sa. 16:7) Iʼila hadia zi tola öfalua, si tebai öfalua, hegöi waö-waö waʼaurimö ba zilalö. Lö iʼandrö khöu zi töra moroi ba zi tola öbeʼe. Börö daʼö, moguna taʼoʼö lala wamaigi Yehowa yaʼita. Na tafalua daʼö, tola tafaigi ita ”ndrohu-ndrohu zinangeania”, lö talafo taʼalawaʼö ita mazui talafo taʼide-ideʼö.​—Rom. 12:3.

2. Hana wa tebai tafaedo-faedogö ita ba niha böʼö?

² Sindruhu sa, tola tafahaʼö ita moroi ba duma-duma niha böʼö. (Heb. 13:7) Duma-dumania, enaʼö onekhe ita ba wanuriaigö, tola tafahaʼö ita khö ndra talifusöda sonekhe manuriaigö. (Fil. 3:17) Hizaʼi, lö fagölö ira woloʼö duma-duma niha böʼö faoma na tafaedo-faedogö ita khöra. Na tafaedo-faedogö ita ba niha böʼö, tola manö so khöda waʼafökhö dödö, faʼide-ide dödö, mazui tawaʼö tödöda wa lö eluaha waʼaurida. Baero daʼö, simane nitutunöda ba artikel si no numalö, tola manö omasi ita fahindri khö ndra talifusöda irege tekiko wahuwusada khö Yehowa. Börö daʼö, iʼamenesi ita Yehowa si fao faʼomasi, ”Yamufareso nifaluania zamösana, ba omuso dödönia ba nifaluania andrö, tenga börö me ifaedo-faedogö ia ba niha böʼö.”​—Gal. 6:4.

3. Hadia manö waʼatedoumö ba wamati sangaʼasogö khöu faʼomuso dödö?

 ³ Omasi Yehowa na öʼomusoiʼö dödöu ba waʼatedoumö samösa ba wamati. Duma-dumania, tola omuso dödöu na no tebayagö ndraʼugö idanö. Yaʼugö samösa zangai angetula simane daʼö börö me öʼomasiʼö Yehowa. Angeragö atö hadia manö waʼatedou ba wamati si no öforomaʼö iʼotarai me tebayagö ndraʼugö idanö. Hadia itugu omasiʼö wombaso Sura Niʼamoniʼö hegöi ba wamalua famahaʼö samösa? Hadia itugu moʼeluaha wangandröu ba öfaʼema ia soroi ba dödö? (Si. 141:2) Hadia itugu aoha khöu iadaʼa ba wamörögö fahuhuosa ba wanuriaigö ba itugu onekhe ndraʼugö wangogunaʼö fakake nihenaigö khöda? Börö wanolo Yehowa, hadia itugu sökhi wamaluau noro dödö tobali foʼomo ira matua, foʼomo ira alawe, mazui satua? Tola omuso dödöu na no mofozu ndraʼugö ba wamalua daʼö fefu.

4. Hadia nitutunöda ba artikel daʼa?

⁴ Tola tatolo niha böʼö enaʼö omuso dödöra ba waʼatedoura samösa ba wamati. Tola göi tatolo ira enaʼö lö lafaedo-faedogö ira ba niha böʼö. Ba artikel daʼa, tatutunö hadia manö zinangea lafalua ira satua ba wanolo iraonora, hewisa enaʼö tola latolo nawöra zamösana si sambua fongambatö, ba hewisa lala ndra satua sokubaloi hegöi niha böʼö ba wanolo ira talifusöra enaʼö lö lafaedo-faedogö ira ba niha böʼö. Safuria, tatutunö ösa goi-goi Zura Niʼamoniʼö sanolo yaʼita ba wotatugöi ohitö dödö si tola takhamö.

5. Moloʼö Efeso 6:4, hadia zinangea latimbagö ira satua?

⁵ Moguna laʼangenanöi ira satua faböi lafaedo-faedogö ndraonora ba niha böʼö mazui laʼandrö khöra wamalua si töra moroi ba zi tola lafalua. Hadia mbörö? Börö me tola ide-ide dödö ndraonora na lafalua daʼö. (Baso Efeso 6:4.) Imane talifusöda ira alawe sotöi Sachiko, * ”Latötöna ira samahaʼö yaʼo ba zekola enaʼö abölö onekhe ndraʼo moroi khö ndra awö-awögu. Iʼandrö göi khögu mamagu enaʼö egebua fotegu ba zekola. Omasi ia na tobali famaduhuʼö daʼö khö ndra samahaʼö yaʼo hegöi khö bapagu si tenga samosumange Yehowa. Itötöna göi khögu enaʼö 100 fotegu ero na ujian, hewaʼae sindruhunia tebai ukhamö daʼö. Börö zalua andrö, itaria aombö dödögu hadia no obönö ba wamaigi Yehowa fefu zi no uforege ba wamosumange yaʼia.”

6. Hadia wamahaʼö si tola lahalö ira satua moroi ba Zinunö 131:1, 2?

 ⁶ So wamahaʼö si tohude si tola lahalö ira satua moroi ba Zinunö 131:1, 2. (Baso.) Iwaʼö Razo Dawido wa lö ’idöna-döna zabölö alawa’, mazui ngawalö zi tebai ifalua. Börö me so khönia wangide-ngideʼö, tola ’terara dödönia ba ihonogö gera-erania’. Hadia wamahaʼönia khö ndra satua? Moguna laforomaʼö wangide-ngideʼö, ba lö latötöna khö ndraonora hegöi khöra samösa ba wamalua si töra moroi ba zi tola lafalua. Tola labeʼe wamarou dödö khö ndraonora ira satua na aboto ba dödöra hadia zi tola hegöi si tebai lafalua, aefa daʼö latolo ndraonora andrö ba wotatugöi ohitö dödö si tola lakhamö. Imane talifusöda ira alawe sotöi Marina, ”Lö irai ifaedo-faedogö ndraʼo mamagu khö ndra talifusögu si datölu mazui ba ndraono tanö böʼö. Ifahaʼö ndraʼo wa no faböʼö-böʼö zi tola lafalua niha ero zamösana ba no sebua böli ita fefu ba wamaigi Yehowa. Börö nifaluania andrö, lö asese ufaedo-faedogö ndraʼo ba niha böʼö.”

7-8. Hewisa lala woʼomo ira matua ba wangoromaʼö wa iʼameʼegö tödö woʼomonia?

⁷ Moguna iʼameʼegö tödö ba ifosumange woʼomonia si samösa talifusöda ira matua. (1 Fe. 3:7) Iforomaʼö ba gamuatania wa tohude sibai woʼomonia andrö ba wamaiginia. Lö itötöna khö woʼomonia ba wamalua si töra moroi ba zi tola ifalua, ba lö göi ifaedo-faedogö ia khö ndra alawe tanö böʼö. Hadia lua-luania na ifalua daʼö si samösa foʼomo ira matua? Nehegö zi no irai alua khö dalifusöda ira alawe sotöi Rosa. Tenga Samaduhuʼö Yehowa woʼomonia, ba asese ifaedo-faedogö ia foʼomonia andrö khö ndra alawe tanö böʼö. Börö wehede sagafökhö nifaʼema woʼomonia, asese ide-ide dödö Rosa ba aombö dödönia hadia so niha sangomasiʼö yaʼia mazui löʼö. Imane, ”Moguna asese mufasugi ba dödögu wa iʼomasiʼö ndraʼo Yehowa.” Iforege si samösa Samaduhuʼö Yehowa ba wamosumange foʼomonia ira alawe börö me aboto ba dödönia wa tola molua-lua daʼö ba gamakhaitania khö woʼomonia hegöi khö Yehowa. *

⁸ Na ifosumange woʼomonia si samösa ira matua, moguna isuno woʼomonia andrö ba ifaduhuʼö wa iʼomasiʼö ba iʼameʼegö tödö ia. (Amd. 31:28) Daʼö nifalua woʼomo Katerina, si no mututunö ba artikel si no tataluʼi. Itolo ia foʼomonia andrö ero na irasoi wa si lö eluaha waʼaurinia. Me ide-ide Katerina, asese iʼailasi ia mamania ba ifaedo-faedogö ia ba ndraono tanö böʼö, tefarahu ba daʼö ndra si fahuwu khönia. Lua-luania, ibörögö ifaedo-faedogö ia Katerina ba niha böʼö, ba lö tebulö ifalua daʼö hewaʼae na no tobali ia Samaduhuʼö Yehowa. Itolo ia foʼomonia ba wamöhöli daʼö hegöi ba wangokhögö lala wangera-ngera si tefaudu sanandrösa ba waʼaurinia. Imane Katerina, ”Iʼomasiʼö sibai ndraʼo, isuno ngawalö zi sökhi si no ufalua, ba mangandrö ia salahigu. Ifasugi göi ba dödögu mbua-bua Yehowa sahöli-höli dödö ba itolo ndraʼo ba wanimbagö lala wangera-ngera si lö tefaudu.”

9-10. Hewisa lala ndra satua sokubaloi ba wanolo si samösa talifusöda ira alawe enaʼö lö ifaedo-faedogö ia ba niha böʼö?

⁹ Hewisa lala ndra satua sokubaloi ba wanolo niha samaedo-maedogö yaʼira ba niha böʼö? Nehegö zi no irai alua khö dalifusöda ira alawe sotöi Hanuni. Me ide-ide ia, lö asese lasuno ia. Imane, ”Tobali ndraʼo niha saila-aila ba uwaʼö tödögu wa abölö onekhe ndraono tanö böʼö moroi khögu. No ibörögö ufaedo-faedogö ndraʼo ba niha böʼö iʼotarai me ide-ide ndraʼo.” Hewaʼae na no tobali ia Samaduhuʼö Yehowa,  lö iböhöli Hanuni ba wamaedo-maedogö yaʼia ba niha böʼö. Lua-luania, iwaʼö tödönia wa si lö eluaha fefu nifaluania ba mbanua niha Keriso. Hizaʼi iadaʼa, omuso dödönia wangai halöwö tobali samösa perintis. Hadia zanolo yaʼia ba wombulöʼö lala wangera-ngerania?

¹⁰ Itutunö Hanuni wa latolo ia ira satua sokubaloi soʼameʼegö tödö yaʼia. Lafaduhuʼö ba dödönia wa laʼameʼegö tödö halöwö nifaluania ba mbanua niha Keriso, ba lasuno ia ba duma-duma waʼalöfaröi niforomaʼönia. Imane Hanuni, ”Itaria laʼandrö tolo khögu ira satua sokubaloi ba wameʼe famarou dödö khö ndra talifusöda ira alawe tanö böʼö. Börö me labeʼe khögu halöwö simane daʼö, urasoi wa moguna ba niha böʼö wanolo moroi khögu. Itörö tödögu me laʼandrö khögu saohagölö ira satua sokubaloi safönu faʼomasi, börö me no ubeʼe wamarou dödö khö ndra talifusöda ira alawe si bohou ebua. Aefa daʼö, labaso khögu 1 Tesalonika 1:2, 3. Omuso sibai dödögu ba nifaluara andrö! Börö waʼomasi niforomaʼöra, tola aboto ba dödögu iadaʼa wa tenga si lö eluaha ndraʼo ba mbanua niha Keriso.”

11. Simane nitutunö ba Yesaya 57:15, hewisa lalada ba wanolo niha si no ”arasa tödö ba sangide-ngideʼö yaʼia”?

¹¹ Baso Yesaya 57:15. Iʼameʼegö tödö sibai Yehowa niha si no ”arasa tödö ba sangide-ngideʼö yaʼia”. Hewaʼae na tenga satua sokubaloi ita, tola tatolo ndra talifusöda sorasoi simane daʼö. Sambua lala si tola tafalua ba wanolo yaʼira yaʼia daʼö na taforomaʼö wa taʼameʼegö tödö ira. Omasi Yehowa na taforomaʼö khöra wa iʼomasiʼö sibai ira. (Amd. 19:17) Tola göi tatolo ndra talifusöda na taforomaʼö wangide-ngideʼö, ba lö tasuno-suno ita föna niha böʼö. Lö taforege enaʼö ahöli-höli dödö niha khöda faböi tumbu ba dödöra waʼafökhö dödö. Hizaʼi, taʼogunaʼö waʼabölöda hegöi faʼatua-tuada ba wamarou tödö niha böʼö.​—1 Fe. 4:10, 11.

12. Hana wa omasi niha si numana fariawö khö Yesu? (Faigi gambara ba guli majalah.)

¹² Oya wamahaʼö si tola tahalö moroi ba gamuata Yesu khö ndra soloʼö khönia. Hewaʼae na yaʼia andrö niha fondrege zatua-tua ba gulidanö, ’ebolo dödönia ba lö fayawa ia’. (Mat. 11:28-30) Lö irai isuno-suno waʼonekhe hegöi faʼaboto ba dödö niʼokhögönia. Iʼogunaʼö ngawua wehede hegöi duma-duma salio aboto ba dödö niha si numana. (Luk. 10:21) Faehu sibai Yesu khö ndra sondröniaʼö ba agama sangoromaʼö fayawasa. Itolo niha enaʼö larasoi wa no sebua böli ira ba wamaigi Yehowa. (Yoh. 6:37) Iʼameʼegö tödö niha niʼaohasi ba dödö.

13. Hewisa wangoromaʼö Yesu faʼasökhi dödö hegöi faʼomasi khö ndra nifahaʼönia?

¹³ Tola oroma waʼasökhi dödö hegöi faʼomasi niʼokhögö Yesu moroi ba gamuatania khö ndra nifahaʼönia. Aboto ba dödönia wa no faböʼö-böʼö zi tola lafalua hegöi salua ba waʼaurira. Börö daʼö, lö fagölö-gölö noro dödö si tola lafalua, ba faböʼö-böʼö göi zi tola lakhamö ba wanuriaigö. Hewaʼae simanö, omuso dödönia khöra ero zamösana na laforege ba wamalua fondrege zi sökhi. Tola oroma daʼö moroi ba duma-duma nitutunönia sanandrösa ba talenta. Ira matua nitutunö ba duma-duma andrö, ibeʼe halöwö khö ndra sawuyunia ”dali waʼasagu khöra zamösana”. Moroi ba gotalua zawuyu sowölö-ölö si darua, so samösa zanema talenta sabölö oya. Hewaʼae simanö, fagölö-gölö imane khöra sokhö yaʼira, ”Sökhi sibai, sawuyu si sökhi ndraʼugö ba lö faröi!”​—Mat. 25:14-23.

14. Hewisa woloʼöda amuata Yesu ba niha böʼö?

¹⁴ Lö tebulö iforomaʼö khöda Yesu waʼasökhi dödö hegöi faʼomasi. Aboto ba dödönia wa no faböʼö-böʼö zi tola tafalua hegöi salua khöda, ba omuso dödönia na tafalua wondrege zi sökhi. Moguna taʼoʼö gamuata Yesu andrö. Böi taʼasogö ba dödö ndra talifusöda wa si lö  eluaha ira mazui taʼailasi ira börö me abölö oya zi tola lafalua niha böʼö moroi khöra. Hizaʼi, dataʼalui lala ba wanuno ira talifusöda samalua fondrege zi sökhi ba wamosumange Yehowa.

15-16. Hadia mbua nitema zi samösa talifusöda ira alawe börö me ifaudugö gohitö dödönia ba zi tola ifalua?

¹⁵ Na so gohitö dödöda ba wamati, tola itugu moʼeluaha ba mofozu waʼaurida. Hizaʼi, na tatatugöi gohitö dödöda, moguna tafaudugö daʼö ba zi tola tafalua, tenga ba zi tola lafalua niha böʼö. Na tafalua daʼö, tola manö afatö dödöda ba ide-ide dödöda. (Luk. 14:28) Nehegö atö duma-duma dalifusöda ira alawe sotöi Midori, sangai halöwö tobali perintis.

¹⁶ Me iraono nasa Midori, asese iʼailasi ia bapania si tenga Samaduhuʼö Yehowa. Ifaedo-faedogö ia bapania andrö khö ndra talifusönia hegöi ira awönia ba zekola. Imane Midori, ”Urasoi wa hulö zi lö eluaha waʼaurigu.” Hizaʼi, me no itugu ebua-bua ia, tola itayaigö waʼide-ide dödö nirasoinia. Imane, ”Börö me ubaso Zura Niʼamoniʼö ero maʼökhö, tola so khögu waʼahono dödö ba urasoi wa iʼomasiʼö ndraʼo Yehowa.” Baero daʼö, itatugöi gohitö dödönia ba wamati si tefaudu ba zi tola ifalua, ba iʼandrö wanolo moroi khö Yehowa enaʼö tola ikhamö gohitö dödönia andrö. Buania, tola omuso dödö Midori ba waʼatedounia samösa ba wamati.

17. Hewisa enaʼö ’lö tebulö tebohouni lala wangera-ngerada’, ba hadia mbuania na tafalua daʼö?

¹⁷ Tola manö lö iʼanemaiʼö taya lala wangera-ngera si lö tefaudu niʼokhögöda. Börö daʼö, iʼamenesi ita Yehowa, ”Yalötebulö tebohouni lala wangera-ngerami.” (Ef. 4:23, 24) Enaʼö tola tafalua daʼö, böi taböhöli wangandrö, famahaʼö ba Zura Niʼamoniʼö, hegöi foʼangerönusi. Andrö wanolo moroi khö Yehowa, ba hasambalö  itolo ndraʼugö ehehania niʼamoniʼö enaʼö lö öfaedo-faedogö ndraʼugö ba niha böʼö. Itolo göi ndraʼugö Yehowa ba wangiʼila na ibörögö so khöu waʼafökhö dödö mazui fayawasa, ba ibeʼe khöu waʼabölö ba wanayaigö bua-bua si lö sökhi andrö.

18. Hana wa tola möi famarou dödöu wehede nisura ba 2 Ngaʼötö 6:29, 30?

¹⁸ Baso 2 Ngaʼötö 6:29, 30. Aboto ba dödö Yehowa hadia nirasoida. Iʼila göi wa taforege sibai ba wolawa fondrönisi dödö ba gulidanö andre hegöi falömoʼahonoada samösa. Me iʼila Yehowa wamorege nifaluada ba wolawa fefu daʼö, itugu iʼomasiʼö ita.

19. Hadia duma-duma niʼogunaʼö Yehowa ba wanutunö hewisa dödönia khöda?

¹⁹ Enaʼö taʼila hewisa dödö Yehowa khöda, iʼogunaʼö duma-duma sanandrösa ba waʼomasi zi samösa ina khö nononia. (Yes. 49:15) Nehegö atö zi no irai alua khö zi samösa ina sotöi Rachel. Imane, ”Tumbu nonogu sotöi Stephanie me lö nasa ikhamö siwa waŵa ia ba dalu. Me awena sibai uʼila Stephanie, ide-ide sibai ia ba tebai mbotonia. Latehegö khögu ira doto ba wosekhei hegöi ba wotalagui yaʼia ero maʼökhö, sagötö labeʼe ia ba inkubator ba zi sara waŵa faʼara. Daʼö mbörö wa itugu ahatö ndraʼaga. Iadaʼa, no önö fakhe ndröfinia, ba abölö ide-ide mbotonia moroi ba zi fagölö döfi khönia. Hewaʼae simanö, uʼomasiʼö sibai ia börö me iforege ba wondrorogö faʼaurinia ba oya waʼomuso dödö niʼasogönia ba waʼaurigu.” Tatu terara sibai dödöda me taʼila wa simane daʼö göi dödö Yehowa khöda. Iʼomasiʼö sibai ita me iʼila wa taforege sibai wamalua fondrege zi sökhi ba wamosumange yaʼia!

20. Hana wa omuso dödö ndra samosumange Yehowa?

²⁰ Börö me samosumange Yehowa ndraʼugö, no tobali ndraʼugö ösi nomonia sebua böli si faböʼö moroi ba niha böʼö. Idöni ndraʼugö Yehowa tobali ono mbanuania, tenga börö me abölö tohude ndraʼugö moroi ba niha böʼö. Iʼila nösi dödömö ba aboto ba dödönia wa yaʼugö andrö niha sangokhögö fangide-ngideʼö, ba omasiʼö ötema wamahaʼö moroi khönia hegöi ba wombulöʼö faʼaurimö. (Si. 25:9) Yafaduhu dödöu wa iʼameʼegö tödö sibai wamorege nifaluamö ba wameʼe fondrege zi sökhi ba wamosumange yaʼia. Börö me so khömö waʼanau gölö ba faʼalöfaröi, tola oroma wa yaʼugö andrö niha ”si sökhi ba satulö tödö”. (Luk. 8:15) Börö daʼö, böi tebulö öbeʼe wondrege zi sökhi khö Yehowa. Buania, tola ’omuso dödöu ba nifaluamö andrö’.