1. Hewisa dödöda me no itehegö khöda Yehowa mangandrö ita khönia?

 SAMAZÖKHI banua si yawa awö danö, no ibeʼe khöda mbuala sebua böli yaʼia daʼö itehegö khöda mangandrö ita khönia. Angeragö atö: Tola tatutunö nösi dödöda khö Yehowa gofu hawaʼara manö ba gofu hadia li niʼogunaʼöda. Lö moguna fazazi ita khönia sakali fatua lö taʼondrasi ia ba wangandrö. Tola mangandrö ita khönia na so ita ba rumah sakit mazui bakha ba gurunga. Ba faduhu dödöda wa ifondrondrongo wangandröda Amada sebua faʼomasi. Tatu manö taʼandrö sibai saohagölö ba mbuala nibeʼenia andrö!

2. Hewisa wangoromaʼö Razo Dawido fangandrö saohagölö ba mbuala fangandrö?

² Iʼandrö sibai saohagölö Razo Dawido mbuala fangandrö. Manunö ia khö Yehowa, ”Yahulö zumange somuhua wangandrögu, si no mufaʼanö tanö fönau.” (Si. 141:1, 2) Ba götö Dawido, laʼogunaʼö zumange somuhua ira ere ba wamalua famosumange satulö ba lahaogö sibai wamaʼanö. (2 Mo. 30:34, 35) Simane niha sangehaogö mamaʼanö sumange somuhua, simanö göi Dawido. Ihaogö iʼangeragö sibai hadia wehedenia na mangandrö ia khö Namania si so ba zorugo. Tatu omasi göi ita tafalua zimane daʼö enaʼö omuso dödö Yehowa ba wangandröda.

3. Hewisa zinangeania gamuatada na mangandrö ita khö Yehowa, ba hadia mbörö?

³ Na mangandrö ita khö Yehowa, moguna taforomaʼö wa tafosumange sibai ia. Angeragö atö gangilata sahöli-höli dödö  nitema Yesaya, Hezekieli, Danieli, hegöi Yohane. Hewaʼae no faböʼö-böʼö gangilata nitemara, hizaʼi so sambua zi fagölö. Ba gangilatara, lafaduhuʼö wa Yehowa andrö Razo sebua lakhömi. Iʼila Yesaya wa ”no modadao Yehowa ba dadaoma sebua ba salawa”. (Yes. 6:1-3) Iʼila Hezekieli no modadao Yehowa ba gureta wasuwöta khönia si no ’ifasui haga si hulö ndrumi’. (Hez. 1:26-28) Iʼila Danieli ”Zi No Alawa Döfi” samake nukha safusi ba so galitö moroi ba dadaomania. (Dan. 7:9, 10) Iʼila Yohane wa no modadao Yehowa ba dadaomania ba so zi hulö ndrumi sowugeʼe zamurudi ba zi fasui dadaomania. (Fam. 4:2-4) Me no taʼila hawaʼebua lakhömi Yehowa, daʼö zamasugi ba dödöda enaʼö taʼandrö sibai saohagölö me no itehegö khöda Yehowa ba wangondrasi yaʼia ba wangandrö ba moguna tafalua ia si fao famosumange. Hizaʼi, hewisa zinangeania na mangandrö ita?

4. Hadia wamahaʼö si tola tahalö moroi ba ngawua wehede siföföna ba duma-duma wangandrö nisura ba Mataiʼo 6:9, 10?

⁴ Baso Mataiʼo 6:9, 10. Ba Huhuo Yesu ba Hili, ifahaʼö ndra nifahaʼönia hewisa zinangeania wangandröra enaʼö omuso dödö Lowalangi. Me no aefa iwaʼö ”mimane wangandrö”, itohugö wangombakha khöra Yesu hadia zabölö moguna niʼohera ba wangandrö soʼamakhaita ba gohitö dödö Yehowa, yaʼia daʼö fangamoniʼö töinia, faʼatohare Wamatörönia sangohori udunia, hegöi howu-howu salua ba zi so miföna ba gulidanö hegöi ba niha. Na taʼohe daʼö ba wangandröda, no taforomaʼö wa ohitö dödö Lowalangi zabölö moguna ba waʼaurida.

5. Hadia ifondrondrongo Yehowa na taʼohe ba wangandrö gabula dödöda samösa?

⁵ Ba dohu-tohu wangandrö nifahaʼönia aefa daʼö, ifatunö Yesu wa tola göi taʼohe ba wangandrö gabula dödöda samösa. Tola taʼandrö khö Yehowa enaʼö itolo ita ba wangalui soguna khöda ero maʼökhö, iʼefaʼö zalada, ilumöʼö ita moroi ba wanandraigö, ba iʼefaʼö ita moroi ba zi lö sökhi. (Mat. 6:11-13) Na taʼohe ba wangandrö khö Yehowa ngawalö zalua andrö, no tafaduhuʼö wa moguna khöda wanolo moroi khönia ba omasi ita taʼomusoiʼö dödönia.

6. Hadia ha ngawalö nitötöi ba duma-duma wangandrö andre awai zi tola taʼohe ba wangandröda? Tutunö.

 ⁶ Lö iʼandrö khö ndra nifahaʼönia Yesu enaʼö latanö ba dödöra duma-duma wangandrö andre ba lafuli latöi-töi na mangandrö ira. Na mangandrö Yesu, tenga ha daʼö-daʼö manö niʼangandröinia. Duma-dumania, me mangandrö Yesu ba ginötö tanö böʼö, iʼohe ba wangandrönia hadia zoguna khönia me luo daʼö. (Mat. 26:39, 42; Yoh. 17:1-26) Simanö göi ita, tola taʼohe ba wangandröda gofu hadia zabu dödöda. Duma-dumania, fatua lö tahalö gangetula, tola taʼohe ba wangandrö enaʼö iʼamualagö khöda waʼatua-tua ba faʼaboto ba dödö. (Si. 119:33, 34) Ba ginötö tebeʼe khöda halöwö sabua, tola taʼohe ba wangandrö khönia enaʼö itolo ita irege taʼila hadia zinangea tafalua. (Amd. 2:6) Satua tola mangandrö ira salahi ndraonora, iraono göi tola mangandrö ira salahi zatuara, ba fefu ita moguna taʼohe ba wangandrö niha nifahaʼöda ba Zura Niʼamoniʼö hegöi niha samondrongo turia somuso dödö nifaʼemada. Tatu manö, ösi wangandröda tenga ha ba wangandrö fanolo.

7. Hadia mbörö wa tasuno Yehowa ba wangandröda?

⁷ Tebai taʼolifugö wanuno Yehowa ba wangandröda. Lö sabölö tasuno baero Lowalangida. Yaʼia andrö ’si sökhi tödö ba sangefaʼö sala’. Yaʼia andrö ’sahakhö tödö ba si sökhi böwö, lö alio mofönu ba fahöna waʼomasinia si lö faröi ba faʼaduhu’. (Si. 86:5, 15) Tatu manö, no sinangea tasuno Yehowa börö gamuatania si sökhi hegöi ngawalö zi sökhi nifaluania.

8. Hadia manö zinangea taʼandrö saohagölö khö Yehowa? (Sinunö 104:12-15, 24)

⁸ Na mangandrö ita tenga ha asala tasuno manö Yehowa, hizaʼi terou göi dödöda ba wangandrö saohagölö khönia ba ngawalö zahöli-höli dödö si no ihenaigö. Duma-dumania, tola tafaʼema khönia wangandrö saohagölö ba ngawalö laʼa-laʼa mbunga si no ifazökhi, ngawalö gö sami si no ibeʼe, hegöi faʼomuso dödö niʼokhögöda börö me so zi fahuwu khöda. Ibeʼe khöda daʼö Amada sebua faʼomasi enaʼö omuso dödöda ba oya danö böʼö nasa nihenaigönia khöda. (Baso Zinunö 104:12-15, 24.) Sabölö tohude yaʼia daʼö taʼandrö saohagölö börö me fahöna gö ba wamati si  no ihenaigö hegöi tötönafö niʼokhögöda dania ba zi so miföna.

9. Hadia zanolo yaʼita enaʼö lö olifu ita wangandrö saohagölö khö Yehowa? (1 Tesalonika 5:17, 18)

⁹ Alio sibai olifu ita wangandrö saohagölö khö Yehowa ba ngawalö zi no ifalua khöda. Hadia zanolo yaʼita enaʼö lö olifu ita wangandrö saohagölö khönia? Tola tasura hadia manö niʼandröda khö Yehowa ba tafaigi ero inötö hewisa wameʼenia fanema li ba niʼandröda andre. Aefa daʼö, taʼandrö khönia saohagölö wanolo si no ibeʼe. (Baso 1 Tesalonika 5:17, 18.) Angeragö daʼa: Omuso sibai dödöda ba tarasoi wa lafosumange ita, na so niha sangandrö saohagölö ba ngawalö zi no tafalua. Simane daʼö göi, na lö olifu ita wangandrö saohagölö khö Yehowa me no ifondrondrongo wangandröda tobali fangomuso dödönia daʼö. (Kol. 3:15) Hadia mbörö nasa wa moguna sibai taʼandrö saohagölö khö Lowalangi?

10. Moloʼö 1 Fetero 2:21, hadia mbörö wa taʼandrö saohagölö khö Yehowa me no ifatenge Yesu ba gulidanö?

¹⁰ Baso 1 Fetero 2:21. Taʼandrö sibai saohagölö khö Yehowa börö me no ifatenge Nono niʼomasiʼönia ba wamahaʼö yaʼita. Na tafahaʼö ita ba waö-waö waʼauri Yesu, itugu aboto ba dödöda sanandrösa khö Yehowa ba taʼila lala hewisa wangomusoiʼö tödönia. Na taforomaʼö wamati ba höli nibeʼe Keriso, tola taʼokhögö wahuwusa si sökhi khö Lowalangi Yehowa ba tola göi atulö ita khönia.—Rom. 5:1.

11. Hadia mbörö wa tafaʼema wangandröda ba döi Yesu?

¹¹ Taʼandrö sibai saohagölö khö Yehowa börö me tola tafaʼema wangandröda ba döi Nononia. Yesu niʼogunaʼö Yehowa ba wameʼe fanema li ba wangandröda. Ifondrondrongo wangandröda Yehowa ba ibeʼe wanema li na tafaʼema ba döi Yesu. Imane Yesu, ”Fefu hadia niʼandrömi ba döigu hasambalö ufalua, enaʼö tefolakhömi Nama börö Nono.”—Yoh. 14:13, 14.

12. Hadia mbörö tanö böʼö wa taʼandrö sibai saohagölö khö Yehowa me no ifatenge Nononia?

¹² Iʼefaʼö horöda Yehowa börö höli nibeʼe Yesu. Itutunö khöda Sura Niʼamoniʼö wa Yesu andrö ’ere sebua sodadao ba gambölö lakhömi Lowalangi Sebua Lakhömi si so ba zorugo’. (Heb. 8:1) Yesu andrö ’sanolo yaʼita si fao khö Nama’. (1 Yo. 2:1) Taʼandrö sibai saohagölö khö Yehowa me no ibeʼe khöda Gere Sebua safönu faʼaboto ba dödö ba waʼambö faʼabölöda ba ”ilului wangandrö salahida”! (Rom. 8:34; Heb. 4:15) Yaʼita andre niha si lö moʼahonoa. Na lö hadöi itehegö Yesu tobali höli salahida, tebai tafahatö ita ba wangandrö khö Yehowa. Börö daʼö, tatu taʼandrö sibai saohagölö waʼebua waʼomasi si no iforomaʼö khöda Yehowa börö me no itehegö Nono niʼomasiʼönia.

13. Hewisa wangoromaʼö Yesu faʼomasi khö ndra nifahaʼönia ba mbongi fatua lö mate ia?

¹³ Ba mbongi fatua lö mate ia, anau sibai wangandrö Yesu sanandrösa khö ndra nifahaʼönia, iʼandrö khö Namania enaʼö ’ilumöʼö ira moroi khö Zatana’. (Yoh. 17:15) Sindruhu-ndruhu iʼomasiʼö sibai ira Yesu! Hewaʼae iʼila wa lö ara tö göna ia fanandraigö sabölö-bölö, hizaʼi iʼangeragö nasa hewisa waʼauri ndra nifahaʼönia.

14. Hewisa wangoromaʼöda faʼomasi khö ndra talifusöda?

¹⁴ Simane nifalua Yesu, lö taʼosambuaʼö dödöda ba zoguna khöda samösa. Hizaʼi, sökhi na asese mangandrö ita salahi ndra talifusöda. Na tafalua daʼö, no taʼoʼö niwaʼö Yesu enaʼö  faoma taʼomasiʼö nawöda ba no göi taforomaʼö khö Yehowa wa taʼomasiʼö ndra talifusöda si sara lala wamati. (Yoh. 13:34) Tenga zaya-zaya gölö na mangandrö ita salahira. Ifatunö khöda Sura Niʼamoniʼö wa ”mofaʼabölö wangandrö niha satulö”.—Yak. 5:16.

15. Hana wa moguna mangandrö ita salahi ndra talifusöda?

¹⁵ Börö me oya wanandraigö salua khö ndra talifusöda, andrö wa moguna mangandrö ita salahira. Tola taʼandrö khö Yehowa ba wanolo yaʼira na göna ira fökhö, bencana alam, fasuwöta, famakao, mazui abula dödö tanö böʼö. Tola göi mangandrö ita salahi ndra talifusöda sameʼe fanolo ba mbanua si no göna bencana. Te so ösa ndra talifusöda niʼilamö sanaögö abula dödö simane daʼö. Hadia tola öʼohe ira ba wangandrö? No taforomaʼö waʼomasi khö ndra talifusöda na taʼandrö khö Yehowa enaʼö ibeʼe khöra waʼanau gölö.

16. Hadia mbörö wa moguna mangandrö ita salahi ndra talifusöda sondröniaʼö?

¹⁶ Mangandrö saohagölö ndra talifusöda sondröniaʼö yaʼita na taʼohe ira ba wangandrö ba tobali fanolora wangandröda andre. Sindruhu daʼö simane niwaʼö zinenge sotöi Faulo. Imane, ”Miʼangandrö salahigu enaʼö tola ubokai mbawagu ba wahuhuosa ba lö ataʼu ndraʼo wangombakha si tobini niʼamoniʼö andrö sanandrösa ba duria somuso dödö.” (Ef. 6:19) Ba ginötöda andre, ato ndra talifusöda samorege wamalua halöwöra ba wondröniaʼö yaʼita. No taforomaʼö waʼomasida khöra na taʼandrö khö Yehowa enaʼö ifahowuʼö halöwö nifaluara.

17-18. Hadia ginötönia laʼandrö khöda ba wosalahi niha böʼö ba wangandrö, ba hadia zinangea itörö tödöda?

¹⁷ Itaria laʼandrö khöda ba wosalahini niha böʼö ba wangandrö. Duma-dumania, samösa dalifusöda ira alawe samahaʼö niha ba Zura Niʼamoniʼö, te iʼandrö khö dalifusöda ira alawe si fao khönia ba wamaʼema fangandrö. Hizaʼi, te abölö sökhi na ba gafuriata ifaʼema wangandrönia talifusöda andrö börö me lö iʼila sibai niha nifahaʼö andrö. Börö daʼö, tola ifaudugö wangandrönia moloʼö soguna khö niha nifahaʼö ba Zura Niʼamoniʼö.

¹⁸ Tola manö muʼandrö khö zi samösa talifusöda ira matua ba wamaʼema fangandrö na  inötö mufalua gangowuloa mazui na möi manuriaigö. Ira talifusöda samaʼema fangandrö, moguna itörö tödöra hadia gohitö dödö wa mufalua gangowuloa andrö. Tebai laʼogunaʼö ginötö wangandrö ba woʼamenesi mazui ba wamaʼema angombakhata ba mbanua niha Keriso. Ba zi hawaʼoya mbanua niha Keriso, laʼogunaʼö lima menit ginötö ba wanunö hegöi ba wangandrö. Börö daʼö, tebai ’anau wangandrö’ dalifusöda samaʼema fangandrö, mendrua manö na awena mubörögö gangowuloa andrö.—Mat. 6:7.

19. Hadia zanolo yaʼita enaʼö tefaʼanö ita ba ngaluo wanguhuku nifalua Yehowa?

¹⁹ Böi taböhöli wangandrö mendrua manö me no itugu ahatö ngaluo wanguhuku andrö moroi khö Yehowa. Imane Yesu, ”Börö daʼö, miʼangelama ba miʼangandrö enaʼö tola teʼorifi ami moroi ba ngawalö zalua andrö dania.” (Luk. 21:36) Sindruhu, na lö taböhöli wangandrö itugu aro wamatida ba no tefaʼanö ita na tohare ngaluo wanguhuku andrö moroi khö Lowalangi.

20. Hewisa enaʼö simane sumange somuhua wangandröda?

²⁰ Hadia zi no tatutunö? Taʼandrö sibai saohagölö ba mbuala fangandrö. Sabölö taʼofönaiʼö ba wangandröda yaʼia daʼö ngawalö zoʼamakhaita ba gohitö dödö Yehowa. Taʼandrö sibai saohagölö me no ifatenge Nononia Lowalangi ba ifataro tobali Razo. Baero daʼö, moguna göi mangandrö ita salahi ndra talifusöda si sara lala wamati. Tatu manö, tola taʼangandröi zoguna khöda hegöi soguna ba wamatida samösa. Na tahaogö taʼangeragö hadia zinangea tafaʼema ba wangandröda, no taforomaʼö wa taʼandrö sibai saohagölö ba mbuala sahöli-höli dödö andre. Fangandrö simane daʼö no amaedola zumange somuhua si möi ”fangomuso dödönia”.—Amd. 15:8.