1. Lö ara me no aekhu ba horö Gadamo faoma Khawa, hadia nifalua Yehowa? (1 Moze 3:15)

 LÖ ARA me no aekhu ba horö Gadamo faoma Khawa, ibeʼe sambua wamaʼeleʼö sahöli-höli dödö Yehowa irege so wanötöna ba ngaʼötöra maʼafefu. Tesura wamaʼeleʼö daʼö ba 1 Moze 3:15.—Baso.

2. Hadia mbörö wa moguna sibai wamaʼeleʼö nisura ba 1 Moze 3:15?

² Moguna sibai khöda wamaʼeleʼö nisura ba mbuku siföföna si so ba Zura Niʼamoniʼö. Hadia mbörö? Börö me famaʼeleʼö daʼö moʼamakhaita ia ba mbuku tanö böʼö si so ba Zura Niʼamoniʼö. Tobali, fagölö fefu duho mbuku si so ba Zura Niʼamoniʼö: So samösa Zangefaʼö dania nifatenge ba wangohori Afökha ba fefu zoloʼö khönia. * Na alua daʼö, tatu omuso sibai dödö niha sangomasiʼö Yehowa!

3. Hadia manö wanofu-nofu nitutunöda ba artikel daʼa?

³ Ba artikel daʼa, tasöndra dania wanema li moroi ba wanofu-nofu andre: Haniha manö nitutunö ba wamaʼeleʼö 1 Moze 3:15? Hewisa waʼalua wamaʼeleʼö daʼö? Ba hadia manö gunania khöda wamaʼeleʼö andrö?

4. Haniha ”gulö” nitutunö ba wamaʼeleʼö andrö, ba hezo taʼila?

⁴ Nitutunö ba 1 Moze 3:14, 15, yaʼia daʼö (1) ʼulö’, (2) ʼmaʼuwu’ gulö andrö, (3) ʼira alawe’, ba si (4) ʼmaʼuwu’ ndra alawe andrö. Moroi ba Zura Niʼamoniʼö, tola aboto ba dödöda haniha manö ira. * Databörögö moroi ba faosatö siföföna yaʼia daʼö ’ulö’. Tatu manö tenga sindruhu-ndruhu ulö daʼa, börö me lö aboto ba dödö gulö hadia niwaʼö Yehowa ba Kabu Edena. Börö daʼö, ulö niʼelifi Yehowa yaʼia daʼö samösa niwöwöinia sangokhögö faʼatua-tua. Haniha ia? Ifatunö khöda wanema linia ba Wamaʼeleʼö 12:9. Itutunö ba ayati daʼö wa ’ulö satua’ andrö yaʼia daʼö Afökha ba Satana. Na simane, haniha maʼuwu gulö andrö?

5. Haniha manö zi farahu ba maʼuwu gulö andrö?

⁵ Ba Zura Niʼamoniʼö ngawua wehede ’maʼuwu’ itaria lafoʼeluaha ia niha si fagölö lala wangera-ngera hegöi amuata simane amara. Börö daʼö, maʼuwu gulö andrö yaʼia daʼö, ira malaʼika hegöi niha solawa Lowalangi Yehowa awö nono mbanuania, fagölö simane Satana. Duma-dumania, ba götö Noakhi mböröta so ndra malaʼika sondröi faʼaurira ba zorugo ba möi ira ba gulidanö. Simanö göi niha si lö sökhi amuata simane amuata namara, Afökha.—1 Mo. 6:1, 2; Yoh. 8:44; 1 Yo. 5:19; Yud. 6.

6. Hadia mbörö wa tenga khö Khawa manandrösa ngawua wehede ”ndra alawe” andrö?

⁶ Iadaʼa, dataʼalui haniha ”ndra alawe” nitötöi ba wamaʼeleʼö andrö. Tatu manö wa tenga khö Khawa manandrösa daʼö. Hadia mbörö? Datafaigi wanema linia. Iwaʼö ba wamaʼeleʼö daʼö wa maʼuwu ndra alawe andrö  dania ”zomama” högö gulö. Simane sawena tatutunö, ulö andrö eluahania Satana, sangokhögö boto eheha. Börö me niha si lö moʼahonoa maʼuwu Khawa, andrö wa tebai lamama högö Zatana.

7. Simane nitutunö ba Wamaʼeleʼö 12:1, 2, 5, 10, haniha ndra alawe nitötöi ba 1 Moze 3:15?

⁷ Ba mbuku safuria ba Zura Niʼamoniʼö, ifatunö khöda haniha ndra alawe nitötöi ba 1 Moze 3:15. (Baso Wamaʼeleʼö 12:1, 2, 5, 10.) Yaʼia andrö tenga ira alawe si toʼölö manö! Barö gahenia so mbaŵa ba no ifake dakula moroi ba zi 12 ndröfi. Baero daʼö, iʼadonogö nono fondrege zi tohude, yaʼia daʼö Famatörö Lowalangi. Börö me ba zorugo so Wamatörö andrö, tatu göi ira alawe daʼö ba zorugo so ia. Ira alawe andrö eluahania faosatö organisasi Yehowa si so ba zorugo, yaʼia daʼö ira malaʼika si lö faröi.—Gal. 4:26.

8. Haniha maʼuwu siföföna, ba hamega tobali ia maʼuwu ndra alawe daʼö? (1 Moze 22:15-18)

⁸ Itolo ita Taromali Lowalangi enaʼö aboto ba dödöda haniha maʼuwu siföföna khö ndra alawe daʼö. Moloʼö sambua famaʼeleʼö, tumbu ia moroi ba ngaʼötö Gaberahamo. (Baso 1 Moze 22:15-18.) Simane si no tefaʼeleʼö andrö, tumbu Yesu moroi ba ngaʼötö Gaberahamo. (Luk. 3:23, 34) Baero daʼö, börö me maʼuwu ndra alawe andrö dania zamufu högö Zatana, daʼö zangoromaʼö waʼabölö ia moroi ba niha si toʼölö. Me 30 fakhe ndröfi Yesu, tebayoini mazui tefataro ia faoma eheha niʼamoniʼö. Me luo daʼö tobali maʼuwu siföföna Yesu moroi khö ndra alawe andrö. (Gal. 3:16) Me no aefa mate Yesu ba tesusugi ia, ’ifotakula ia Lowalangi faoma lakhömi ba sumange’ ba ibeʼe khönia ”fefu waʼabölö ba zorugo hegöi ba gulidanö”, farahu ba daʼö kuaso ”ba wamakiko halöwö Gafökha”.—Heb. 2:7; Mat. 28:18; 1 Yo. 3:8.

9-10. (a) Haniha nasa zi farahu ba hamega tobali ira maʼuwu ndra alawe andrö? (b) Hadia nitutunöda nasa aefa daʼa?

⁹ Baero Yesu, so nasa zi farahu ba maʼuwu ndra alawe andrö. Nehegö atö hadia wehede zinenge sotöi Faulo khö ndra niha Keriso nibayoini ba götönia, he si otarai ba soi Yahudi hegöi moroi ba soi böʼö. Imane, ”Na okhöta Keriso ami, sindruhu-ndruhu wa maʼuwu Gaberahamo ami ba tola mitema gondröita nifabuʼu andrö.” (Gal. 3:28, 29) Ba ginötö ibayoini zi samösa niha Yehowa faoma eheha niʼamoniʼö, ba ginötö daʼö tobali ia maʼuwu ndra alawe andrö. Börö daʼö, maʼuwu ndra alawe andrö yaʼia daʼö Yesu Keriso hegöi si 144.000 niha si fao khönia ba wamatörö. (Fam. 14:1) Laforege ba woloʼö amuata Namara, Lowalangi Yehowa.

¹⁰ No aboto ba dödöda, haniha nitutunö ba 1 Moze 3:15. Iadaʼa, datatutunö hewisa wozara-zara Yehowa wamalua si no tefaʼeleʼö andrö ba hadia gunania khöda wamaʼeleʼö daʼö iadaʼa.

11. Hadia geluahania mudou ’mbörö sisi’ maʼuwu ndra alawe andrö?

¹¹ Moloʼö famaʼeleʼö si no tesura ba 1 Moze 3:15, ulö andrö dania zondrou börö sisi maʼuwu ndra alawe andrö. Alua wamaʼeleʼö daʼö, yaʼia me iʼogunaʼö niha Yahudi Satana hegöi niha Romawi ba wamunu Ono Lowalangi. (Luk. 23:13, 20-24) Na mesokho mbörö sisi zi samösa niha, tatu tebai mofanö ia gasa-gasa. Simane daʼö göi, börö me no mate Yesu ba lafadölö ia ba lewatö mato tölu hari waʼara, tebai ifalua hadia ia ba zi sabata.—Mat. 16:21.

12. Hewisa ba hawaʼara mufufu hegöi gulö andrö?

¹² Moloʼö famaʼeleʼö si no tesura ba 1 Moze  3:15, maʼuwu ndra alawe andrö dania zamufu högö gulö. Eluahania, döhö zesokho ba mbörö sisi Yesu mazui tesusugi ia. Sindruhu, daʼö zalua ba ngaluo si tölu me no mate ia! Tesusugi ia ba mboto eheha ba lö saʼae itörö waʼamate. Aefa daʼö, ba ginötö si no ihonogöi Lowalangi, ihori dania Zatana andrö Yesu. (Heb. 2:14) Niha si fao ba wamatörö awö Keriso fao ira göi ba wangohori fefu nudu Lowalangi, yaʼia daʼö maʼuwu gulö andrö.—Fam. 17:14; 20:4, 10. *

13. Hadia manö mbua nitemada me no alua zi no tefaʼeleʼö andre?

¹³ Na no ölulu waʼaurimö khö Lowalangi, tatu manö örasoi mbua moroi ba zi no tefaʼeleʼö andrö. Me möi Yesu ba gulidanö ba tobali ia niha, moʼahonoa woloʼönia amuata Namania. (Yoh. 14:9) Börö me no tafahaʼö ita sanandrösa khö Yesu, daʼö mbörö wa aboto ba dödöda ba taʼomasiʼö Lowalangi Yehowa. Baero daʼö, tatema mbua moroi ba wamahaʼö hegöi fanuturu lala nibeʼe Yesu si tobali Sondröniaʼö ba mbanua niha Keriso. No ifahaʼö ita hewisa lala ba wangomusoiʼö tödö Yehowa ba waʼaurida sero maʼökhö. Tatema göi mbua moroi ba waʼamate Yesu si no amaedola zokho ba mbörö sisinia. Me no aefa tesusugi Yesu, itema Yehowa zumange nibeʼenia yaʼia daʼö höli soʼahonoa irege ’teʼefaʼö fefu horöda’.—1 Yo. 1:7.

14. Hezo taʼila wa lö iʼanemaiʼö alua me luo daʼö nifaʼeleʼö Yehowa ba Gedena? Tutunö.

¹⁴ Hadia zi no ifaʼeleʼö Yehowa ba Gedena mböröta, daʼö zangoromaʼö wa lö iʼanemaiʼö alua zi no tefaʼeleʼö andrö me luo daʼö. Moguna ginötö irege tohare maʼuwu ndra alawe andrö si no tefabuʼu, irege no iʼowuloi zoloʼö khönia Afökha, ba irege faʼudu ira maʼadarua. Börö zi no tefaʼeleʼö andrö, aboto ba dödöda wa ulidanö nifatörö Zatana sindruhu-ndruhu fatuwu ia ba nono mbanua Yehowa. Ba no göi ibeʼe wamangelama simane daʼö Yesu khö ndra nifahaʼönia. (Mrk. 13:13; Yoh. 17:14) No taʼila hewisa waʼalua daʼö, mendrua manö barö zi 100 fakhe andre. Hadia manö zalua?

15. Hadia mbörö wa fatiu sibai gulidanö andre khöda, ba hadia mbörö wa lö ataʼu ita?

¹⁵ Lö ara me no tefataro Yesu tobali Razo ba Wamatörö Lowalangi me döfi 1914, tetiboʼö Zatana moroi ba zorugo. Iadaʼa, ha tö ba gulidanö so ia, ba aboto ba dödönia wa lö ara tö tehori ia. (Fam. 12:9, 12) Hizaʼi, lö ilau zahono-hono manö. Mofönu sibai Zatana, ba ilau mbakhu dödönia ba nono mbanua Lowalangi. (Fam. 12:13, 17) Daʼö mbörö wa itugu fatiu dödö niha gulidanö andre ba nono mbanua Lowalangi. Hizaʼi, lö moguna ataʼu ita khö Zatana hegöi si fao khönia. Faduhu göi dödöda simane faʼafaduhu dödö niʼokhögö Waulo me imane, ”Na fao khöda Lowalangi, haniha zolawa yaʼita?” (Rom. 8:31) Sindruhu-ndruhu wa tola tafaduhusi tödö Yehowa. Hadia mbörö? Simane si no tatutunö arakhagö no alua wamaʼeleʼö si no tesura ba 1 Moze 3:15.

16-18. Hadia mbua nirasoi Curtis, Ursula, hegöi Jessica moroi ba wamaʼeleʼö si no tesura ba 1 Moze 3:15?

¹⁶ Buʼusa li Yehowa nisura ba 1 Moze 3:15, tola ibeʼe khöda waʼanau gölö ba wanaögö ngawalö gabula dödö salua. Imane Curtis, sangai halöwö tobali utusan injil ba Guam, ”Itaria göna ndraʼo abula dödö ba afatö dödögu, ba tobali fanandraigö waʼalöfaröigu daʼö khö Yehowa. Hizaʼi, uʼangerönusi wamaʼeleʼö ba 1 Moze 3:15. Buania, lö tebulö waʼafaduhu dödögu khö Namagu si so ba zorugo.”  Ibalo-baloi Curtis hawaʼara ginötö si no itatugöi Yehowa ba wangeheta ngawalö gabula dödöda.

¹⁷ Samösa dalifusöda ira alawe sotöi Ursula si toröi ba Bavaria, iwaʼö wa famaʼeleʼö nisura ba 1 Moze 3:15 daʼö zameʼe khönia faʼafaduhu dödö wa Sura Niʼamoniʼö andrö moroi khö Lowalangi. Adöni sibai dödönia börö me iʼila wa fefu wamaʼeleʼö tanö böʼö moʼamakhaita ia ba wamaʼeleʼö daʼö. Imane nasa, ”Asöndru sibai dödögu börö me iʼanemaiʼö ihalö gangetula Yehowa enaʼö so wanötöna ba niha gulidanö.”

¹⁸ Imane Jessica moroi ba Mikronesia, ”Lö olifu ndraʼo hewisa dödögu me awena sibai uʼila zindruhu! No uʼila samösa hewisa me alua zi no tefaʼeleʼö ba 1 Moze 3:15. Daʼö zameʼe khögu famasugi ba dödö wa faʼauri safönu abula dödö iadaʼa tenga daʼö waʼauri sindruhunia. Famaʼeleʼö daʼö göi zameʼe khögu faʼafaduhu dödö na ufosumange Yehowa iadaʼa, sindruhu-ndruhu wa usöndra waʼomuso dödö ba mendrua manö saʼae ba zi so miföna.”

19. Hana wa faduhu dödöda wa hasambalö alua faosatö safuria moroi ba wamaʼeleʼö andrö?

¹⁹ No tatutunö hewisa waʼalua wamaʼeleʼö nisura ba 1 Moze 3:15. No aboto ba dödöda, haniha maʼuwu ndra alawe ba haniha göi maʼuwu gulö andrö. Yesu, maʼuwu siföföna khö ndra alawe daʼö, no tefadöhö zokho ba mbörö sisinia. Iadaʼa, no teʼalawaʼö ia tobali Razo ba no tebeʼe khönia mboto si tebai mate. Baero daʼö, arakhagö fefu no mufili niha si farahu tobali ngaʼötö ndra alawe andrö. Sindruhu, no alua faosatö siföföna moroi ba wamaʼeleʼö andrö. Börö daʼö, faduhu göi dödöda wa hasambalö alua faosatö safuria moroi ba wamaʼeleʼö daʼö. Hasambalö mumama dania högö gulö andrö. Ba ginötö tehori dania Zatana, omuso-muso dödö nono mbanua Lowalangi. Gasa-gasa wombaloida daʼö, böi awuwu ita. Hasambalö ifalua mbuʼusa linia Lowalangi. Moroi ba maʼuwu ndra alawe andrö, ifahowuʼö ”fefu soi ba gulidanö” ba fahöna wameʼenia khöra howu-howu.—1 Mo. 22:18.