1. Hadia zi faduhu dödöda ba ginötö taʼila zalua ba gulidanö andre, ba hadia mbörö?

 NA ÖʼILA fefu zalua ba gulidanö andre, hadia abua khömö ba wondrorogö fangera-ngera satulö? Iadaʼa, ato niha zi lö saʼae mangoromaʼö faʼomasi yomo ba nomo. Itugu lö sökhi göi niha, afaito, ba ha tana khöra laʼalui. Baero daʼö, ato niha si lö saʼae faduhu tödö khö ndra samatörö. Hizaʼi, na taʼila fefu daʼö, itugu faduhu dödöda wa no ahatö gamozua gulidanö andre. Hadia mbörö? Börö me fagölö sibai gamuata niha iadaʼa simane si no ifaʼeleʼö Sura Niʼamoniʼö sanandrösa ba ”ngaluo safuria”. (2 Ti. 3:1-5) Fefu niha sangokhögö fangide-ngideʼö, tola laʼila wa sindruhu-ndruhu no alua zi no mufaʼeleʼö andrö. Ba faʼalua zi no tefaʼeleʼö andrö, daʼö zangoromaʼö wa no ibörögö mamatörö Yesu Keriso tobali Razo ba Wamatörö Lowalangi. Baero daʼö, oya nasa wamaʼeleʼö tanö böʼö soʼamakhaita ba Wamatörö Lowalangi, ba alua fefu daʼö ba ngaluo safuria andre. Na tatutunö ia, hasambalö itugu aro wamatida.

2. Hadia nitutunöda ba artikel daʼa, hana wa moguna tatutunö ia? (Faigi ba beʼe mbua gera-erau ba gambara si so ba guli majalah.)

² Ba artikel daʼa, tatutunö dania (1) famaʼeleʼö sanolo yaʼita enaʼö taʼila hamega ibörögö tefasindro Wamatörö Lowalangi, (2) famaʼeleʼö sanolo yaʼita enaʼö taʼila wa no tobali Razo  Yesu ba Wamatörö Lowalangi ba zorugo, ba (3) famaʼeleʼö sangoromaʼö hadia nifalua Wamatörö Lowalangi ba wangohori udunia. Simane akhökhöla gambara si no muʼosambuaʼö, famaʼeleʼö daʼa zanolo yaʼita enaʼö taʼila wa lö ara tö tohare gamozua andrö simane nifabuʼu Yehowa.

3. Hadia zi faduhu dödöda ba wamaʼeleʼö si no tesura ba Danieli 7:13, 14?

³ Famaʼeleʼö nisura ba Danieli 7:13, 14, daʼö zameʼe khöda faʼafaduhu dödö wa tefaudu sibai na Keriso Yesu zi tobali Razo ba Wamatörö Lowalangi. Fefu niha moroi ba ngawalö soi ”lafosumange ia” si fao faʼomuso dödö ba lö niha si möi fangalinia tobali Razo. Famaʼeleʼö tanö böʼö ba mbuku Danieli, daʼö zangoromaʼö wa no ibörögö mamatörö Yesu ba gangohorita zi fitu götö. Hadia tola taʼila hamega sindruhunia alua zi möi fangomuso dödö andrö?

4. Hewisa Danieli 4:10-17 möi fanoloda enaʼö taʼila hamega tefataro Yesu tobali Razo? (Faigi nisura ba gahe zura.)

⁴ Baso Danieli 4:10-17 hegöi nisura ba gahe zura ba ayati 16. Si ”fitu götö” fagölö ira zi 2.520 fakhe. Tebörögö ginötö daʼö me 607 SM, me tohare niha Mbabilona ba wokalaisi razo safuria ba Yeruzalema si no tobali salahi wamatörö Yehowa. Ba teʼasiwai ginötö daʼö me döfi 1914 M me tohare ”zindruhu zokhö”, yaʼia daʼö Yesu nifataro Yehowa tobali Razo ba Wamatörö Lowalangi. *—Hez. 21:25-27.

5. Hadia gunania khöda na aboto ba dödöda wamaʼeleʼö sanandrösa ba zi ”fitu götö”?

⁵ Hadia gunania khöda wamaʼeleʼö andrö? Na no aboto ba dödöda wamaʼeleʼö sanandrösa ba zi ”fitu götö”, itugu aro waʼafaduhu dödöda wa hasambalö ifalua mbuʼusa linia Yehowa ba ginötö si no itatugöi. Me mböröta, no itatugöi hawaʼara ibörögö tefasindro Wamatörönia, ba alua daʼö tefaudu ba ginötö si no itatugöi. Börö daʼö, faduhu dödöda wa hasambalö göi ifalua wamaʼeleʼö tanö böʼö ba ginötö si no itatugöi. Sindruhu wa alua ngaluo Yehowa ba ginötö si ”no muhonogöi”! —Hab. 2:3.

6. (a) Hadia manö zalua sangoromaʼö wa no mamatörö Keriso ba zorugo? (b) Hewisa wamaʼeleʼö nisura ba mbuku Wamaʼeleʼö 6:2-8, ifaduhuʼö wa hasambalö alua daʼö fefu?

⁶ Ba gafuriata me mangai halöwö Yesu ba gulidanö, ifatunö khö ndra nifahaʼönia wa so ösa zalua sangoromaʼö wa no ibörögö mamatörö ia ba zorugo. Duma-dumania, itutunö sanandrösa ba wasuwöta, bawa lofo, mazui duru danö. Ifaʼeleʼö göi wa ’alua misa’ wökhö waba ba zi sagörö ulidanö. Sambua duma-dumania yaʼia daʼö pandemi COVID-19 salua barö-barö daʼa. Moloʼö Sura Niʼamoniʼö fefu zalua andrö no ’tandra’ weʼaso Keriso. (Mat. 24:3, 7; Luk. 21:7, 10, 11) Töra ba zi 60 fakhe me no mate Yesu ba mangawuli ia ba zorugo, ibeʼe gangilata khö zinenge sotöi Yohane ba wamaduhuʼö wa hasambalö alua daʼö. (Baso Wamaʼeleʼö 6:2-8.) Ba sindruhu wa no alua daʼö iʼotarai me mamatörö Yesu tobali Razo me döfi 1914.

7. Me mamatörö Yesu tobali Razo, hana wa itugu lö sökhi zalua ba gulidanö andre?

⁷ Me mamatörö Yesu tobali razo, hana wa itugu lö sökhi zalua ba gulidanö andre? Moloʼö Famaʼeleʼö 6:2, si oföna sibai nifalua Yesu me tobali ia razo yaʼia daʼö fasuwö. Haniha  nilawania? Afökha hegöi ira malaʼika si lö sökhi si fao khönia. Moloʼö Famaʼeleʼö faza 12, kala Zatana, ba mutiboʼö ia hegöi ira malaʼika si lö sökhi ba gulidanö. Andrö wa mofönu sibai ia. Ifalua mbakhu dödönia andrö ba niha irege faʼafawuka zalua ba gulidanö.—Fam. 12:7-12.

8. Hadia gunania khöda me taʼila hewisa waʼalua wamaʼeleʼö sanandrösa ba Wamatörö Lowalangi?

⁸ Hadia gunania khöda wamaʼeleʼö andrö? Börö me itugu fawuka gulidanö andre ba itugu lö sökhi gamuata niha iadaʼa, andrö wa itugu aro waʼafaduhu dödöda wa no mamatörö Yesu tobali Razo. Börö daʼö, lö moguna abao dödöda na taʼila wa itugu lö sökhi niha ba ha tana khöra laʼalui. Moguna tatörö tödöda wa amuatara andrö zangoromaʼö no alua nifaʼeleʼö Zura Niʼamoniʼö. Sindruhu-ndruhu no tefasindro Wamatörö Lowalangi! (Si. 37:1) Baero daʼö, aboto göi ba dödöda wa no itugu ahatö Hamagedo ba itugu lö sökhi zalua ba gulidanö andre. (Mrk. 13:8; 2 Ti. 3:13) Tatu taʼandrö sibai saohagölö khö Namada safönu faʼomasi me no itolo ita irege taʼila hana wa itugu lö sökhi zalua ba gulidanö andre.

9. Hewisa wamaʼeleʼö nisura ba Danieli 2:28, 31-35 wanutunö haniha kuaso gulidanö safuria, ba hamega ibörögö mamatörö ia?

⁹ Baso Danieli 2:28, 31-35. Taʼila wa alua wamaʼeleʼö daʼa ba götöda iadaʼa. Ba wangifi Nebukanesa ifaʼeleʼö hadia dania zalua ba ”gafuriata ginötö andrö”, yaʼia me no ibörögö mamatörö Keriso. Sambua moroi ba gotalua nudu Yesu ba gulidanö yaʼia daʼö kuaso gulidanö safuria si no mufaʼeleʼö ba Zura Niʼamoniʼö. Kuaso gulidanö andre muʼamaedolagö ia ’tete kahe nadu Nebukanesa si no mufaruka siʼöli ba tambu laʼuri’. No so ia iʼotarai me alua  Wasuwöta Gulidanö si I, me ibörögö falulu fohalöwö Inggris faoma Amerika Serikat, mufotöi ira Anglo-Amerika. Moroi ba nadu Nebukanesa andre, tola taʼila wa si löʼö-löʼönia so dombua gamaehuta kuaso gulidanö daʼa moroi ba kuaso gulidanö fatua lö yaʼia.

10. (a) Hana wa tefaudu sibai geluaha wamaʼeleʼö Danieli sanandrösa ba Kuaso Gulidanö Inggris-Amerika? (b) Hadia zinangea taʼangelamaisi? (Faigi kotak ” Angelama ba Wondrönisi Dödö Nibeʼe ’Dambu Laʼuri’!”)

¹⁰ Si oföna, tenga simane kuaso gulidanö fatua lö yaʼia, Kuaso Gulidanö Inggris-Amerika andre lö muʼamaedolagö ia moroi ba zi sambua logam simane anaʼa mazui firö. Hizaʼi, muʼamaedolagö ia simane siʼöli si faruka tambu laʼuri. Tambu laʼuri eluahania ”niha si toʼölö”. (Dan. 2:43) Simane niʼilada iadaʼa, ebua sibai lua-lua gangetula nihalöra ba pemilihan umum. Lafalua göi kampanye, demo, ba lahalö wahasara dödö ba wamazökhi serikat buruh enaʼö latema dana khöra. Daʼö fefu mbörö wa abua ba Kuaso Gulidanö Inggris-Amerika ba wogamö ohitö dödöra ba politik.

11. Hana wa faduhu dödöda wa no so ita ba götö safuria?

¹¹ Si dua, Inggris-Amerika niʼamaedolagö tete kahe nadu sebua andrö, daʼö kuaso gulidanö safuria nifaʼeleʼö Zura Niʼamoniʼö. Lö hadöi kuaso gulidanö tanö böʼö si tobali fangalinia. Ba Hamagedo, tohare Wamatörö Lowalangi ba wangohori kuaso gulidanö andre hegöi famatörö niha gulidanö maʼafefu. *—Fam. 16:13, 14, 16; 19:19, 20.

12. Hadia dandra-tandra tanö böʼö ba wamaʼeleʼö Danieli sameʼe khöda fondrara dödö hegöi tötönafö?

¹² Hadia gunania khöda wamaʼeleʼö andrö? Ibeʼe khöda dandra-tandra tanö böʼö famaʼeleʼö Danieli sangoromaʼö wa no auri ita ba götö safuria. Töra 2.500 fakhe silalö, no ifaʼeleʼö Danieli na no aefa dania mamatörö Mbabilona, so öfa tö kuaso gulidanö samatörö ba ebua sibai lua-luania ba nono mbanua Lowalangi. Itutunö göi famaʼeleʼö Danieli wa Kuaso Gulidanö Inggris-Amerika, daʼö kuaso safuria moroi ba zi öfa kuaso gulidanö andrö. Tobali ba zi lö ara tö, tohare Wamatörö Lowalangi ba wangohori famatörö niha, ba mamatörö ia ba zi sagörö ulidanö. Tatu möi fondrara dödöda daʼö ba ibeʼe khöda dötönafö.—Dan. 2:44.

13. Hadia niʼamaedolagö ”razo si walu” hegöi ”si dafulu razo” nitötöi ba Wamaʼeleʼö 17:9-12, ba hewisa waʼalua wamaʼeleʼö sanandrösa khöra?

¹³ Baso Wamaʼeleʼö 17:9-12. Börö me ebua sibai lua-lua Wasuwöta Gulidanö si I, so sambua zalua si tefaudu ba wamaʼeleʼö tanö böʼö sanandrösa ba ngaluo safuria. Omasi sibai ndra sondröniaʼö ba gulidanö andre ba wangaʼasogö faʼatulö ba zi sagörö ulidanö. Börö daʼö, me baŵa si Sara 1920, lafasindro Liga Bangsa-Bangsa. Hizaʼi, me baŵa si Fulu 1945 lafaböʼöni döinia tobali Perserikatan Bangsa-Bangsa (PBB). Ifotöi organisasi daʼa Sura Niʼamoniʼö ”razo si walu”. Hizaʼi, organisasi daʼa tenga kuaso gulidanö, börö me faʼebua kuasonia teʼodaligö daʼö khö ndra samatörö sotuhini yaʼia. Ba Zura Niʼamoniʼö, muʼamaedolagö ndra samatörö andrö ’si fulu razo’.

14-15. (a) Hewisa waʼalua Wamaʼeleʼö 17:3-5 sanandrösa ba ’Mbabilona Sebua’? (b) Hadia zalua ba niha sotuhini agama sofaya iadaʼa?

¹⁴ Baso Wamaʼeleʼö 17:3-5. Ba zi sambua angilata nitema zinenge sotöi Yohane moroi khö Lowalangi, iʼila zi samösa sohorö-horö nifotöi ”Babilona Sebua”. Muʼamaedolagö zohorö-horö andrö fefu organisasi agama sofaya ba gulidanö andre. Hewisa waʼalua gangilata andrö? Iʼotarai mböröta, organisasi agama sofaya latuhini ndra samatörö ba gulidanö ba falulu fohalöwö ira. Hizaʼi, ba zi  lö ara tö ifarou dödö ndra samatörö andrö Yehowa ”ba wamalua ohitö dödönia”. Hadia lua-luania? Ira samatörö andrö si no amaedola ’zi fulu razo’, lasuwö mangawuli organisasi agama sofaya ba lahori.—Fam. 17:1, 2, 16, 17.

¹⁵ Hezo tola taʼila wa tedudugö Mbabilona Sebua ba zi lö ara tö? Enaʼö taʼila wanema linia, moguna tatörö tödöda wa banua Mbabilona me götö föna no ifasui ia ungo nidanö sebua yaʼia daʼö Ungo Nidanö Oiferati solumöʼö banua daʼö. Ba mbuku Wamaʼeleʼö, zuta niha si no amaedola ’nidanö’ sotuhini ba solumöʼö Babilona Sebua. (Fam. 17:15) Hizaʼi, ba mbuku Wamaʼeleʼö iforomaʼö göi khöda wa ”ogöʼö” dania nidanö andrö. Eluahania ato niha si lö saʼae manuhini agama sofaya. (Fam. 16:12) Simane si no mufaʼeleʼö andrö, ato niha iadaʼa zi lö saʼae faduhu tödö ba agama ba laʼalui lala tanö böʼö ba wangasiwai abula dödöra.

16. Hadia gunania khöda me no aboto ba dödöda wamaʼeleʼö sanandrösa ba PBB hegöi faʼadudu Mbabilona Sebua?

¹⁶ Hadia gunania khöda wamaʼeleʼö andrö? Itugu faduhu dödöda wa no auri ita ba ngaluo  safuria börö me no mufasindro PBB ba itugu ato niha si lö saʼae motuhini agama sofaya. Hewaʼae ato niha si lö saʼae manuhini Babilona Sebua, tenga daʼö mbörö wa tehori agama sofaya. Hizaʼi, simane si no mututunö moroi yawa, Yehowa zamarou tödö ’zi fulu razo’ yaʼia daʼö ira samatörö sotuhini PBB ”ba wamalua ohitö dödönia”. Yaʼira dania zangohori agama sofaya ba zi lö mudöna-döna. * (Fam. 18:8-10) Ebua sibai lua-lua nifaluara andrö ba niha fefu ba tola manö oya iʼasogö gabula dödö. Hizaʼi, omuso dania dödö nono mbanua Lowalangi, si löʼö-löʼönia so dombua mbörö: Tehori sagötö faʼara agama sofaya si no ara tobali udu Lowalangi Yehowa, ba lö ara tö teʼefaʼö ita ba gulidanö si lö sökhi andre!—Luk. 21:28.

17-18. (a) Hewisa enaʼö lö tebulö taʼaroʼö wamatida? (b) Hadia nitutunöda ba artikel aefa daʼa?

¹⁷ No ifaʼeleʼö Danieli wa ”fahöna dania waʼaboto ba dödö”. Daʼö göi nirasoida iadaʼa! No aboto ba dödöda ngawalö wamaʼeleʼö sanandrösa ba götöda. (Dan. 12:4, 9, 10) Sindruhu-ndruhu no alua wamaʼeleʼö andrö irege monönö waʼahöli-höli dödöda khö Yehowa hegöi ba Daromalinia. (Yes. 46:10; 55:11) Börö daʼö, böi tebulö aroʼö wamatiu. Hewisa lalania? Yaʼowölö-ölö ndraʼugö ba wamahaʼö yaʼugö ba Zura Niʼamoniʼö, ba tolo niha böʼö enaʼö fahuwu ira khö Yehowa. Yafaduhu dödöu, na sindruhu-ndruhu öʼodaligö Yehowa hasambalö ilumöʼö ndraʼugö ba lö tebulö ibeʼe khöu waʼahono dödö.—Yes. 26:3.

¹⁸ Ba artikel aefa daʼa, tatutunö wamaʼeleʼö sanandrösa ba mbanua niha Keriso ba götö safuria. Tafahaʼö göi ita hewisa wamaʼeleʼö andrö tobali tandra wa no auri ita ba götö safuria. Baero daʼö, tatutunö dania dandra-tandra tanö böʼö sangoromaʼö wa Yesu, Razoda, sindruhu-ndruhu yaʼia zondröniaʼö niha soloʼö khönia si lö faröi.