1. Hadia gohitö dödö Yehowa iadaʼa?

 OMASI Lowalangi na teturiaigö duria somuso dödö sanandrösa ba Wamatörönia ba zi sagörö ulidanö. (Mrk. 13:10; 1 Ti. 2:3, 4) Daʼö halöwö nibeʼe Yehowa khöda iadaʼa. Daʼa halöwö sabölö moguna. Börö daʼö, no ifili Nono niʼomasiʼönia tobali sondröniaʼö halöwö daʼa. Ha Yesu zondröniaʼö fondrege zi sökhi. Börö daʼö, fatua lö tohare gamozua andrö hasambalö wa no teʼasiwai wamalua halöwö fanuriaigö tefaudu ba gohitö dödö Yehowa.—Mat. 24:14.

2. Hadia nitutunöda ba artikel daʼa?

² Ba artikel daʼa, tatutunö dania hewisa wangogunaʼö Yesu ira ’sawuyu si lö faröi ba satua-tua’ ba wangehenaigö gö ba wamati hegöi ba wameʼe fanuturu lala khö ndra nifahaʼönia ba wamalua halöwö fanuriaigö fondrege zebua sagötö sejarah. (Mat. 24:45) Tatutunö göi hadia zi tola tafalua ba wotuhini Yesu hegöi ira sawuyu si lö faröi.

3. Hadia kuaso nibeʼe khö Yesu?

³ Faduhu dödöda wa Yesu zondröniaʼö halöwö fanuriaigö. Hadia mbörö? Lö ara fatua lö manahae ia ba zorugo, falukha ia khö ndra nifahaʼönia si lö faröi ba zi sambua hili ba Galilaia. Ifatunö khöra, ”No tebeʼe khögu fefu waʼabölö ba zorugo hegöi ba gulidanö.” Nehegö hadia niwaʼönia aefa daʼö: ”Börö daʼö, miʼae mibaliʼö nifahaʼögu fefu niha moroi ba ngawalö soi.” (Mat. 28:18, 19) Sindruhu wa no tebeʼe khö Yesu kuaso ba wondröniaʼö halöwö fanuriaigö.

4. Hadia mbörö wa faduhu dödöda wa Yesu nasa zondröniaʼö halöwö fanuriaigö ba götöda andre?

 ⁴ Iwaʼö Yesu wa ira nifahaʼönia dania zamalua halöwö fanuriaigö ba labaliʼö nifahaʼönia fefu niha moroi ba ”ngawalö soi”. Iwaʼö göi wa fao ia khöra ”irugi gamozua götö daʼa”. (Mat. 28:20) Eluahania, Yesu nasa zondröniaʼö halöwö fanuriaigö ofeta ba götöda iadaʼa.

5. Hadia nifaluada irege no fao ita wamalua si no tefaʼeleʼö ba zura Zinunö 110:3?

⁵ Faduhu dödö Yesu wa ato dania niha si fao ba halöwö fanuriaigö ba ginötö safuria andre. Iʼila Yesu wa alua dania zi no tefaʼeleʼö ba mbuku Zinunö: ”Ba ginötö ödöniaʼö ndra saradadu ba wasuwöta, ba aoha gölö nono mbanuamö weʼamöi.” (Si. 110:3) Na fao ndraʼugö ba halöwö fanuriaigö, eluahania no ötuhini Yesu hegöi ira sawuyu si lö faröi. Ba no fao göi ndraʼugö ba wamalua si no tefaʼeleʼö andrö. Lö si tebato nasa halöwö fanuriagö, hizaʼi so daha-taha si lö tola löʼö tataögö.

6. Hadia gabula dödö nitaögöda yaʼita sanuriaigö turia somuso dödö?

⁶ Sambua gabula dödö si lö tola löʼö tataögö yaʼita sanuriaigö turia somuso dödö yaʼia daʼö folohi moroi ba niha böʼö. Oya sibai duria fangobousi sanandrösa khöda nifaʼema niha sondröi sindruhu, sondröniaʼö ba agama, hegöi ira samatörö. Tola manö faduhu dödö nösi nomoda, si fahuwu khöda, hegöi awöda wohalöwö ba walimosa daʼö. Lua-luania, te lafaso ita enaʼö taböhöli wamosumange Yehowa hegöi fanuriaigö. Ba zi hauga soi, so ndra talifusöda nifetaʼu-taʼu, niraʼu hegöi nibeʼe ba gurunga. Hizaʼi, lö ahöli dödöda na alua daʼö, börö me no ihenaigö ifaʼeleʼö Yesu, ”Dozi soi fatiu dödöra khömi börö döigu andrö.” (Mat. 24:9) Folohi salua khöda, daʼö zangoromaʼö wa no taʼoʼö duma-duma nibeʼe Yesu ba taʼomusoiʼö dödö Yehowa. (Mat. 5:11, 12) Aboto ba dödöda wa börö Gafökha wa tola alua fefu ngawalö wolohi andre. Hizaʼi, lö irai möna ia ba wolawa Yesu! Itugu ato niha misa ba ngawalö soi samondrongo turia somuso dödö börö wanolo nibeʼe Yesu.

7. Hadia dandra wa no alua wamaʼeleʼö si no tesura ba mbuku Wamaʼeleʼö 14:6, 7?

⁷ Abula dödö tanö böʼö nitaögöda yaʼita sanuriaigö turia somuso dödö, yaʼia daʼö faʼafaböʼö ngawalö li. Hizaʼi, ba gangilata nibeʼe Yesu khö zinenge sotöi Yohane, ifaʼeleʼö wa ba ginötöda andre, teturiaigö duria somuso dödö ba niha fefu gofu hadia ia li niʼogunaʼöra. (Baso Wamaʼeleʼö 14:6, 7.) Hewisa waʼalua zi no tefaʼeleʼö andrö? Iadaʼa, taforege enaʼö itugu ato niha sanemaʼö turia sanandrösa ba Wamatörö Lowalangi. Ba situs web khöda, jw.org, oya ngawalö zi no tehenaigö si teʼodane-dane ba Zura Niʼamoniʼö töra ba zi 1.000 ngawalö li. Börö daʼö, ato niha ba zi sagörö ulidanö si tola mombaso yaʼia. Baero daʼö, buku siföföna niʼogunaʼöda ba wombaliʼö nifahaʼö, yaʼia daʼö Lala ba Wanöndra Faʼohahau Dödö Sagötö Faʼara!, no mutehegö mufoʼeluaha daʼö ba zi töra 700 ngawalö li. No göi tehenaigö gö ba wamati ba no mufaʼanö ia ba video soguna khö ndra niha si lö hede. Simanö göi hurufo Braille soguna ba niha si lö hörö. Sindruhu-ndruhu wa no alua fefu zi no ifaʼeleʼö Sura Niʼamoniʼö. Fefu niha ”moroi ba ngawalö soi hegöi li” lafahaʼö ira ba ”li sohau-hau”, yaʼia daʼö sindruhu moroi ba Zura Niʼamoniʼö. (Zak. 8:23; Zef. 3:9) Tola alua fefu daʼa börö me Yesu Keriso zondröniaʼö halöwöda.

8. Hadia manö mbua moroi ba halöwö fanuriaigö nifaluada?

⁸ Iadaʼa, töra 8.000.000 niha moroi ba zi 240 ngawalö soi, fao ira ba organisasi  Yehowa. Baero daʼö, töra 100.000 niha nibayagö idanö ero röfi. Hizaʼi, sabölö moguna, laforege ba ’wamohouni amuatara’ ba laforomaʼö mbua-bua waʼaniha Keriso. (Kol. 3:8-10) Ato moroi ba gotaluara lö saʼae lafalua gamuata wohorö, faʼafaito, mazui fanahö-nahö tödö. Lö göi lahöni-höni sibai soi si farahu yaʼira, mazui lawaʼö tödöra wa ha soira zabölö pade. Simane si no tefaʼeleʼö ba Yesaya 2:4, ”lö saʼae lafomaha ira fasuwö”. Börö me no taforege wamohouni amuatada, itugu ato niha sadöni tödö wefao ba organisasi Lowalangi ba no taforomaʼö wa yaʼita andre soloʼö khö Keriso Yesu. (Yoh. 13:35; 1 Fe. 2:12) Tenga zi lö börö-börö waʼalua daʼa, hizaʼi börö wanolo moroi khö Yesu, Sondröniaʼö yaʼita.

9. Moloʼö famaʼeleʼö si no tesura ba Mataiʼo 24:45-47, hadia nifalua Yesu ba ginötö safuria andre?

⁹ Baso Mataiʼo 24:45-47. No ifaʼeleʼö Yesu wa ba ginötö safuria andre, ifataro dania ”zawuyu si lö faröi ba satua-tua” ba wangehenaigö gö ba wamati. Hewisa waʼalua nifaʼeleʼö andrö ba götöda iadaʼa? Iʼogunaʼö sondröniaʼö yaʼita ngawawa nibayoini si lö atoto ba wameʼe ’gö ba wamati ba ginötö si tefaudu’ ba nono mbanua Lowalangi hegöi ba niha sadöni tödö. Laforege ba wamalua noro dödö si no tebeʼe khöra andrö. Lö lawaʼö tödöra wa yaʼira andrö samatörö famati niha böʼö. (2 Ko. 1:24) Hizaʼi, lafaduhuʼö wa Yesu Keriso zi tobali ”sondröniaʼö hegöi kafalo zaradadu” ba nono mbanua Lowalangi.—Yes. 55:4.

10. Hadia mbuku sameʼe khöu faʼafaduhu dödö irege tobali ndraʼugö ono mbanua Lowalangi Yehowa? (Faigi gambara.)

¹⁰ Iʼotarai me döfi 1919, no lahenaigö ira sawuyu si lö faröi ngawalö publikasi sanolo niha sadöni tödö irege latema gö ba wamati. Ba ndröfi 1921, lafazökhi ira sawuyu si lö faröi mbuku The Harp of God (”Harafa Lowalangi”)  sanutunö dane-dane wamahaʼö moroi ba Zura Niʼamoniʼö. Aefa daʼö, lafazökhi göi mbuku tanö böʼö. Hadia mbuku sanolo yaʼugö irege aboto ba dödöu ba öʼomasiʼö Namada si so ba zorugo? Hadia buku ”Karena Allah Itu Benar Adanya”, Kebenaran yang Membimbing kepada Hidup yang Kekal, Saudara Dapat Hidup Kekal dalam Firdaus di Bumi, Pengetahuan yang Membimbing kepada Kehidupan Abadi, Apa yang Sebenarnya Alkitab Ajarkan?, Hadia Nifahaʼö Zura Niʼamoniʼö Khöda?, mazui Lala ba Wanöndra Faʼohahau Dödö Sagötö Faʼara! si no mufazökhi barö-barö daʼa? Fefu mbuku daʼa lafazökhi ia ba ginötö si faböʼö-böʼö, ba ero sambua buku lafazökhi ia ba wamönökhi soguna ba niha ba ginötö daʼö.

11. Hana wa fefu ita moguna tatema gö ba wamati?

¹¹ Fefu ita, tenga ha sawena mamahaʼö yaʼia ba Zura Niʼamoniʼö, moguna tatema gö sabeʼe yaʼia daʼö faʼaboto ba dödö sanandrösa khö Yehowa hegöi ba Zura Niʼamoniʼö. Imane Faulo, ”Ö sabeʼe moʼamakhaita ba niha si no aro faʼaboto ba dödö.” Iwaʼö nasa Faulo na tafalua zi no tafahaʼö yaʼita tola ’tafaehusi zatulö ba si lö atulö’. (Heb. 5:14) Hizaʼi, tola manö abua khöda woloʼö goi-goi Yehowa börö me itugu lö sökhi gamuata niha ba ginötö safuria andre. Hewaʼae simane daʼö, itatugöi Yesu wa lö tebulö tatema gö ba wamati irege aro wamatida. Ö ba wamati andre teʼodane-dane ia moroi ba Daromali Lowalangi, Sura Niʼamoniʼö. Moloʼö fanuturu lala nibeʼe Yesu, lahenaigö ba labeʼe gö ba wamati andre ira sawuyu si lö faröi soguna khöda fefu.

12. Simane Yesu, hadia nifaluada ba wamolakhömi töi Lowalangi?

¹² Aboto ba dödöda wa no sinangea na tefolakhömi döi Lowalangi. Ba omasi ita göi na tafolakhömi döinia simane nifalua Yesu. (Yoh. 17:6, 26) Duma-dumania, me döfi 1931 ibörögö taʼogunaʼö döi si teʼodane-dane ba Zura Niʼamoniʼö yaʼia daʼö Samaduhuʼö  Yehowa. Börö me taʼogunaʼö döi daʼö, no taforomaʼö wa tafosumange sibai döi Namada ba omasi ita ba wangotöigö töinia. (Yes. 43:10-12) Iʼotarai mbaŵa si Fulu ba ndröfi daʼö, ibörögö labeʼe döi Lowalangi ba guli majalah Manuriaigö. Baero daʼö, ba Mbuku Niʼamoniʼö Famoʼeluaha Gulidanö si Bohou no tefangawuli döi Lowalangi ba nahia sinangeania. Faböʼö sibai daʼa moroi ba nifalua gereja si no mangeheta töi Yehowa ba zi hawaʼoya Zura Niʼamoniʼö nifoʼeluahara!

13. Hadia zameʼe khöu faʼafaduhu dödö wa sindruhu-ndruhu ira ’sawuyu si lö faröi ba satua-tua’ niʼogunaʼö Yesu ba götöda andre? (Yohane 6:68)

¹³ Iʼogunaʼö ndra ’sawuyu si lö faröi ba satua-tua’ Yesu ba wamazökhi sambua organisasi sahöli-höli dödö ba gulidanö enaʼö tedou wamosumange satulö. Hewisa dödöu me no farahu ndraʼugö ba organisasi daʼa? Te fagölö nirasoimö simane nirasoi zinenge sotöi Fetero me iwaʼö khö Yesu, ”Haʼökhö nasa möiga? Ba wehedemö so waʼauri si lö aetu.” (Yoh. 6:68) Hewisa waʼaurida na lö si farahu ita ba organisasi Yehowa? Ba organisasi daʼa, fahöna gö ba wamati nihenaigö Keriso. Ifahaʼö ita göi enaʼö sökhi wamaluada halöwö nibeʼenia khöda. Baero daʼö, itolo ita ba ’wamohouni amuatada’ irege omuso dödö Yehowa.—Ef. 4:24.

14. Sagötö pandemi COVID-19, hadia manö mbua nirasoimö me no farahu ndraʼugö ba organisasi Yehowa?

¹⁴ Ibeʼe khöda wanuturu lala si sökhi Yesu ba ginötö göna ita abula dödö. No tarasoi daʼö sagötö pandemi COVID-19. Ba zi sagörö ulidanö, ato niha si lö mangila hadia zinangea lafalua. Hizaʼi, no itatugöi Yesu wa lö tebulö tatema wanuturu lala si tefaudu irege lö teʼala waʼaurida. Duma-dumania, labeʼe khöda  wamarou dödö enaʼö böi tafahatö-hatö ita ba niha, ba taʼogunaʼö masker na möi ita ba nahia sato niha. Lafasugi göi ba dödö ndra satua sokubaloi enaʼö asese fahuhuo ira khö ndra talifusöda ba mbanua niha Keriso, ba laʼameʼegö tödö zoguna ba mboto hegöi ba wamati. (Yes. 32:1, 2) Lö tebulö tefarou dödöda ba tebeʼe khöda wanuturu lala tanö böʼö moroi ba gangombakhata nifaʼema ndra Boto Solohe.

15. Sagötö pandemi, hadia wanuturu lala nibeʼe khöda sanandrösa ba gangowuloa hegöi fanuriaigö, ba hadia mbuania?

¹⁵ Sagötö pandemi, tatema göi wanuturu lala si tefaudu sanandrösa ba wamalua fanuriaigö hegöi feʼamöi ba gangowuloa. Lö ara me no alua pandemi, ibörögö taʼogunaʼö Internet ba wamalua angowuloa, angowuloa ba zi sambua wilayah, hegöi angowuloa ba zi sambua regional. Arakhagö fefu halöwö fanuriaigö nifaluada taʼogunaʼö zura hegöi telefo. Sindruhu-ndruhu no ifahowuʼö halöwö nifaluada Yehowa. Oya gödo ndraha sangombakha wa monönö waʼato zanuriaigö ba mbanua si toröi yaʼira. So göi ndra talifusöda sanuriaigö sanöndra faʼomuso dödö ba halöwö fanuriaigö nifaluara sagötö pandemi.—Faigi kotak ” Ifahowuʼö Yehowa Halöwö Fanuriaigö Nifaluada”.

16. Hadia zi faduhu dödöda iadaʼa?

¹⁶ So zorasoi wa talafo oya wanuturu lala nibeʼe organisasi sagötö pandemi andre. Hizaʼi, no hauga kali tarasoi mbuania börö me taʼoʼö wanuturu lala nibeʼera andrö. (Mat. 11:19) Na taʼangerönusi hewisa Yesu ba wondröniaʼö ira nifahaʼönia si fao faʼomasi, itugu faduhu dödöda wa gofu hadia zalua ba zi so miföna, lö irai iröi ita Yehowa hegöi Ononia.—Baso Heberaiʼo 13:5, 6.

17. Hewisa dödöu börö me Yesu zondröniaʼö yaʼugö?

¹⁷ Tatu taʼandrö sibai saohagölö börö me Yesu zondröniaʼö halöwö nifaluada. No farahu ita ba organisasi safönu fahasara dödö, ba lö aboto wahasara dödöda hewaʼae no faböʼö-böʼö zi toʼölö tafalua, soi, hegöi li niʼogunaʼöda. Fahöna gö ba wamati nitemada ba tefaʼanö ita ba wamalua halöwöda. Baero daʼö, tetolo ita zamösana ba wamohouni amuatada ba tefahaʼö ita enaʼö faoma taʼomasiʼö nawöda. Sindruhu, omuso sibai dödöda khö Zondröniaʼö yaʼita, Yesu!