Tumbu ndraʼo ba Darlaston me döfi 1935, banua nifotöi Black Country si farahu ba Inggris. Mufotöi ia Black Country börö me no ifönui ia simbo saitö moroi ba wanunu logam hegöi pabrik soya sibai. Me awena 4 fakhe ndröfigu, ibörögö lafahaʼö ndra satuagu ira Samaduhuʼö Yehowa ba Zura Niʼamoniʼö. Me ibörögö ebua-buado, faduhu dödögu ba zindruhu ba tebayagö ndraʼo idanö me 1952, me 16 fakhe ndröfigu.

Ba ginötö daʼö göi, ubörögö mohalöwö ba perusahaan sebua, samazökhi fakake hegöi gama-gama si so ba bengkel. Ibörögö lafomaha ndraʼo ba wamalua halöwö sebua ba omasido sibai halöwö daʼa.

Abua khögu wangai angetula me iʼandrö khögu satua samasui ba wondröniaʼö Famahaʼö Zura Niʼamoniʼö ba Mbanua Niha Keriso Willenhall si fao yaʼo. Ba ginötö daʼö, farahu ndraʼo ba zi dombua banua niha Keriso. Sagötö mohalöwödo, fao ndraʼo ba mbanua niha Keriso sahatö moroi ba naha wohalöwögu ba Bromsgrove, mato 32 kilometer moroi ba nomogu. Hizaʼi, na hari Satu mazui Migu mangawulido ba nomo zatuagu, faodo ba gangowuloa niha Keriso ba Willenhall.

Börö me omasido utuhini organisasi Yehowa, utemaʼö wogaoni nibeʼe zatua samasui no mege hewaʼae eluahania daʼö uröi halöwö somasido sibai. Lö irai maniasa ndraʼo ba gangetula nihalögu, börö me urasoi waʼomuso dödö sebua me utehegö khö Yehowa ba wamatörö faʼaurigu.

Me farahu nasa ndraʼo ba Mbanua Niha Keriso Bromsgrove, falukha ndraʼo khö zi samösa talifusöda ira alawe si baga-baga ba saro ba wamati, töinia Anne. Mangowalu ndraʼaga me 1957, ba oya halöwö nitemama moroi khö Yehowa. No irai tobali ndraʼaga perintis biasa, perintis istimewa, famalua halöwö famasui, ba mohalöwö ba Mbetieli. Sindruhu-ndruhu tobali umbu waʼomuso dödögu woʼomogu Anne.

Me döfi 1966, omuso sibai dödöma me lakaoni ndraʼaga wefao Sekolah Gilead kelas si 42. Aefa daʼö, lafataro ndraʼaga ba Malawi, sambua soi si so ba Afrika. Niha si so ba daʼö sökhi gamuatara  ba fahuwu ira. Hizaʼi, lö matötöna wa lö ara toröi ndraʼaga ba daʼö.

Marugi Malawi me 1 mbaŵa si Dua 1967. Ba zi sara waŵa siföföna me awena marugi, oya ginötö niʼogunaʼöma ba wamahaʼö yaʼaga ba li niʼogunaʼö ba soi daʼö, awena mabörötaigö halöwö tobali pengawas distrik. Moto niʼogunaʼöma moto jip. Ato zangumaʼö wa tola muʼohe moto daʼö gofu hezo manö. Duma-dumania, na maʼötö nungo nidanö. Sindruhunia sa tenga simane daʼö, awai zi tola maʼötö ha idanö zi lö abakha. Itaria toröi ndraʼaga ba nose nifazökhi moroi ba dambu laʼuri ba sagönia töla wakhe soköli, ba mabeʼe yawa ba detenia tendra enaʼö lö abasö ndraʼaga na moteu. Ba ginötö daʼö, awena marasoi hewisa waʼauri tobali utusan injil. Oya zi tobali taha-taha, hizaʼi möi fangomuso dödö!

Me baŵa si Öfa, aboto ba dödögu wa lö ara tö so gabula dödö niʼasogö ndra samatörö. Urongo ba radio huhuo nifaʼema Presiden Malawi sotöi Dr. Hastings Banda. Iwaʼö wa lö labuʼa pajak ira Samaduhuʼö Yehowa ba laʼasogö gabula dödö khö ndra samatörö. Tatu manö faya niböbögöra andrö. Aboto ba dödöma fefu wa lö omasi ndra samatörö börö me lö faʼawö dambai ndraʼaga ba politik ba lö maʼöli kartu partai.

Me baŵa si Siwa, mabaso ba koran wa no iböbögö zi lö duhu presiden khö ndra talifusöda wa yaʼira zamobörö fangala ba soi daʼö. Iʼowuloi niha sato ba ifatunö khöra wa lö ara tö lahalö gangetula ira samatörö ba wanaisi halöwö ndra Samaduhuʼö Yehowa. Ibörötaigö lö latehegö halöwö ndra Samaduhuʼö Yehowa me 20 mbaŵa si Fulu 1967. Lö ara aefa daʼö, tohare ndra folisi awö ndra samatörö, möi ira laduhö gödo ndraha Malawi ba lafofanö fefu ndra utusan injil si so ba soi daʼö.

 Me no tölu hari labeʼe ndraʼaga ba gurunga, lafofanöga moroi ba Malawi numalö ba mbanua Mauritius nifatörö Inggris me luo daʼö. Hizaʼi, ba mbanua daʼö göi lö latehegö khöma ira samatörö wangai halöwö tobali utusan injil. Börö daʼö, lafataro ndraʼaga ba Rhodesia (iadaʼa Zimbabwe). Me marugi mbanua daʼö, falukha ndraʼaga samösa niha samuʼi sohalöwö ba imigrasi ba lö itehe toröi ndraʼaga ba mbanua daʼö. Imane, ”No lafofanö ami moroi ba Malawi, ba lö latehegö göi khömi na toröi ba Mauritius. Hadia börö me lö nahiami tanö böʼö wa möi ami ba daʼa?” Ibörögö meʼe Anne. Hulö lö hadöi niha sanemaʼö yaʼaga! Me luo daʼö, omasido mangawuli manö ba mbanuagu ba Inggris. Ba gafuriata, latehegö khöma ira sohalöwö ba imigrasi toröiga ba gödo ndraha bongi daʼö. Laʼandrö khöma enaʼö mafatunö daʼö ba gödo sebua khöra moluo mahemolunia. Marase sibai ndraʼaga, hizaʼi lö tebulö maʼodaligö Yehowa. Mahemolunia ba zi laluo, lö madöna-döna wa latehegö khöma toröi ba Zimbabwe hewaʼae na ha tobali niha sanörö ba daʼö. Lö irai olifudo hadia nirasoigu ba zi maʼökhö daʼö. Faduhu dödögu wa Yehowa zameʼe fanuturu lala ba waʼaurima.

Ba gödo ndraha Zimbabwe, mohalöwödo ba Departemen Dinas ba wamaigi-maigi halöwö nifalua ba Malawi hegöi Mozambik. Itugu abölö-bölö wamakao salua khö ndra talifusöda ba Malawi. Sambua halöwögu yaʼia daʼö ufoʼeluaha zura nifaʼoheʼö zatua samasui moroi ba Malawi. Samuza inötö, me uʼasiwai halöwögu ba wamoʼeluaha zi sambua sura ofeta talu mbongi, mege-ege ndraʼo me ubaso nösinia sanutunö wa abölö-bölö sibai wamakao si göna khö ndra talifusöda. * Hewaʼae simanö, sindruhu-ndruhu tefarou dödögu börö waʼalöfaröira, famatira, hegöi faʼanau gölö niforomaʼöra.—2 Ko. 6:4, 5.

Maforege sibai wangaʼasogö gö ba wamati khö ndra talifusöda si so ba Malawi hegöi khö ndra talifusöda soloi ba Mozambik börö wolohi si göna yaʼira. Ira talifusöda samoʼeluaha ba li Chichewa, li sabölö oya muʼogunaʼö ba Malawi, findra ira ba kabu niʼokhögö zi samösa talifusöda ira matua si so ba Zimbabwe. Sökhi sibai gamuata dalifusöda andrö. Ifazökhi mato hauga ngawua nomo hegöi nahia wohalöwö khöra. Ba daʼö latohugö halöwöra ba wamoʼeluaha publikasi si teʼodane-dane ba Zura Niʼamoniʼö.

Matatugöi enaʼö ira satua samasui ba Malawi tola laʼondrasi gangowuloa distrik ba li Chichewa nifalua ero röfi ba Zimbabwe. Me no ofeta ira ba daʼö, latema döla huhuo nifaʼema ba gangowuloa sebua andrö. Ba me mangawuli ira ba Malawi, laʼogunaʼö daʼö ba wamaʼema huhuo ba mbanua niha Keriso misa. Samuza inötö me möi ira ba Zimbabwe, mafalua Sekolah Pelayanan Kerajaan ba wamarou tödö ndra satua samasui si barani andre.

Me baŵa si Dua 1975, möido ba Mozambik ba wamalukhaisi ira talifusöda Samaduhuʼö soloi moroi ba Malawi numalö ba nahia pengungsian si so ba daʼö. Laʼoʼö wanuturu lala si bohou nibeʼe organisasi Yehowa, farahu ba daʼö gamakhoita enaʼö so khöra nifotöi boto satua sokubaloi. Ira satua sokubaloi sawena mufataro, oya lala halöwö ba wamati nifaluara. Duma-dumania, lafaʼema huhuo sebua, ladöniaʼö wamareso Sura Niʼamoniʼö ero maʼökhö hegöi famahaʼö moroi ba mbuku Manuriaigö, ba lafalua göi gangowuloa ba zi sambua wilayah. Ba nahia pengungsian andrö, latatugöi haniha zangehaogö nahia, haniha zombagi gö, ba haniha zozago, simane na mufalua gangowuloa distrik. Oya zi no lakhamö ira talifusöda si lö faröi andrö börö wanolo moroi khö Yehowa, ba sindruhu-ndruhu möi famarou dödögu daʼö.

Ba gafuriata ndröfi 1970-an, gödo ndraha Zambia zamaigi-maigi lala halöwö nifalua ba Malawi. Hewaʼae simanö, asese nasa uʼangeragö zalua khö ndra talifusöda ba Malawi ba uʼohe ira ba wangandrö. Ato göi ndra talifusöda tanö böʼö zamalua simane daʼö. Me no tobali ndraʼo anggota panitia Ndraha Zimbabwe, hauga kali fao ndraʼo ba gangowuloa khö ndra talifusöda si tobali salahi moroi ba gödo sebua, simanö göi ndra talifusöda sangai halöwö ba Malawi, Afrika Selatan hegöi Zambia. Ba gangowuloa simane daʼö, lö aetu mafadunö-dunö, ”Hadia nasa zi tola tafalua khö ndra talifusöda ba Malawi?”

 Me no itugu numalö ginötö, itugu sökhi zalua ba Malawi. Ibörötaigö alö wolohi salua khö ndra talifusöda si toröi ba daʼö. Ato ndra talifusöda lazara-zara wangawuli ba Malawi. Simanö göi soi si so ba zi fasui daʼö, ibörötaigö latehegö khö ndra Samaduhuʼö Yehowa ba wamalua fanuriaigö hegöi feʼamöi ba gangowuloa, ba lö saʼae fanaisi moroi khö ndra samatörö. Daʼö göi zalua khö ndra talifusöda ba Mozambik me 1991. Hizaʼi, manofu-nofu nasa ndraʼaga, ’Hawaʼara göi larasoi zimane daʼö ira talifusöda ba Malawi?’

Alua waʼatebulö politik ba Malawi, ba me döfi 1993, latehegö ira samatörö khö ndra Samaduhuʼö Yehowa ba wamalua halöwöra. Lö ara aefa daʼö, imane khögu talifusöda utusan injil, ”Hadia omasiʼö mangawuli ba Malawi?” Me luo daʼö 59 fakhe ndröfigu, andrö wa umane khönia, ”Löʼö, no saʼae talafo atua ndraʼo!” Hizaʼi ba zi maʼökhö daʼö, matema zura moroi khö ndra Boto Solohe ba lawaʼö khöma enaʼö mangawuli ba Malawi.

Omasiga sibai wamalua halöwöma ba Zimbabwe, andrö wa abua khöma na findra ndraʼaga. Masöndra waʼohahau dödö ba ato zi fahuwu khöma ba daʼa. Si fao faʼasökhi dödö, lawaʼö khöma ira Boto Solohe wa tola toröi ndraʼaga ba Zimbabwe na omasiga. Börö me no lawaʼö zimane daʼö, tola mafili enaʼö toröiga ba daʼa. Hizaʼi, itörö tödögu waö-waö waʼauri Gaberahamo hegöi Sara me laröi nomo niʼomasiʼöra ba waʼatuara ba laʼoʼö wanuturu lala nibeʼe Yehowa.—1 Mo. 12:1-5.

Mahalö gangetula ba woloʼö fanuturu lala nibeʼe organisasi Yehowa, ba mangawuliga ba Malawi me 1 mbaŵa si Dua 1995, so 28 fakhe iʼotarai me lafataro ndraʼaga ba daʼö siföföna sibai. Mufataro ndra Panitia Ndraha ba daʼö, yaʼo hegöi talifusöda tanö böʼö si darua, ba oya halöwö nifaluama ba wondröniaʼö ira Samaduhuʼö Yehowa ba Malawi.

Omuso sibai dödögu me uʼila hewisa wamahowuʼö Yehowa halöwö nifalua ba Malawi! Tedou waʼato zanuriaigö. Me 1993, so mato 30.000 niha, hizaʼi me döfi 1998, töra 42.000. * Fao dödö ndra Boto Solohe ba wamazökhi gödo ndraha si bohou enaʼö tola teʼasogö fefu zoguna ba halöwö sebua andrö. No maʼöli 12 hektar danö ba Lilongwe, ba lafataro ndraʼo tobali panitia konstruksi.

Talifusöda Guy Pierce moroi ba Mboto Solohe zamaʼema huhuo penahbisan ba gödo ndraha si bohou andrö me baŵa si Lima 2001. Töra dua ribu waʼato ndra talifusöda si so ba soi ba daʼö zangondrasi, ba ato ba gotaluara zi no töra 40 fakhe  tebayagö idanö. Lö faröi ndra talifusöda andre ba wanaögö famakao ba zi hauga wulu fakhe sagötö lasaisi halöwöra ira samatörö. Hewaʼae tosasa ira ba gefe, hizaʼi kayo ira ba wamati. Ba omuso sibai dödöra wangondrasi Mbetieli si bohou andre. Sagötö feʼasora ba daʼö, gofu hezo möi ira laʼanunöisi zinunö Wamatörö Lowalangi simane lagu na manunö niha Afrika. Sindruhu-ndruhu wa asöndru dödögu ba lö irai olifudo zalua andrö. Daʼa dandra wa fahöna howu-howu nibeʼe Yehowa ba niha si lö faröi khönia ba wanaögö fanandraigö.

Me no aefa mufazökhi gödo ndraha, omuso dödögu börö me labeʼe halöwögu ba wangamoniʼö Nahia Gangowuloa ba nahia böʼö. Ira talifusöda ba Malawi, tola laʼokhögö Nahia Gangowuloa börö me no ifazökhi sambua program organisasi enaʼö alio wamazökhi Nahia Gangowuloa ba mbanua si tosasa. Ba zilalö, so ösa gangowuloa nifalua ba nose nifazökhi moroi ba geu ekaliptus. Labeʼe sagönia goʼo si no mundrandra ba lafazökhi mbaku-baku sanau moroi ba dambu laʼuri. Iadaʼa, lafazökhi naha wanunu batu bata, ba si fao faʼowölö-ölö laʼogunaʼö daʼö ba wamazökhi nahia gangowuloa si sökhi. Hizaʼi, omasi ndra talifusöda wangogunaʼö baku-baku sanau moroi ba gurusi börö me lawaʼö tödöra, ’Na ambö naha, tola nasa mafadegega.’

Omuso göi dödögu me uʼila hewisa Yehowa ba wanolo niha böʼö enaʼö tedou ira ba wamati. Toröi-röi ba dödögu waʼowölö-ölöra ndra talifusöda si bohou ebua ba Afrika ba wamosumange Yehowa. Alio onekhe ira börö me latema wamomaha moroi ba organisasi Yehowa ba lafalua halöwö nibeʼe khöra. Buania, itugu oya noro dödö nibeʼe khöra ba Mbetieli hegöi ba mbanua niha Keriso. Itugu teʼaroʼö göi mbanua niha Keriso börö me so ndra talifusöda ba mbanua daʼö nifataro tobali satua samasui, ba ato ba gotaluara zi no mangowalu. Lahalö gangetula ira talifusöda andre ba wangai halöwö safönu inötö ba wamosumange Yehowa, ba lataha dödöra lö moʼono hewaʼae lafaso ira ösi nomora hegöi niha böʼö.

Me no 52 fakhe mangai halöwö ndraʼo ba Afrika, ibörögö göna ndraʼo fökhö. Fao dödö ndra talifusöda Boto Solohe ba gangetula nihalö ndra Panitia Ndraha enaʼö findra ndraʼaga ba Inggris. Afatö sibai dödöma börö me maröi halöwö niʼomasiʼöma. Hizaʼi ba waʼatuama, sindruhu-ndruhu lahaogö larorogö ndraʼaga ira talifusöda ba Mbetieli Inggris.

Faduhu dödögu wa angetula sabölö sökhi si no irai uhalö yaʼia daʼö me utehegö khö Yehowa ba wamatörö faʼaurigu. Na uʼodaligö waʼatua-tuagu samösa, tatu manö faböʼö zalua ba waʼaurigu. Iʼotarai ba wamobörö, no aboto ba dödö Yehowa hadia zabölö moguna khögu enaʼö ’adölö lala nitörögu’. (Amd. 3:5, 6) Me awuyu-wuyudo, ahöli-höli dödögu me uʼila hewisa lala halöwö nifalua ba perusahaan sebua. Hizaʼi, no ihenaigö khögu halöwö sabölö sökhi organisasi Yehowa si tobali fangomuso dödögu. Halöwö nifalua ba organisasi daʼa, ikhamö zi sagörö ulidanö. Urasoi samösa wa sindruhu-ndruhu moʼeluaha waʼaurigu börö me ufosumange Yehowa!