1. Hewisa sibai niha sahakhö tödö andrö, ba hadia gamaedola sanolo yaʼita enaʼö itugu aboto ba dödöda hewisa wangoromaʼö faʼahakhö dödö?

HEWISA sibai niha sahakhö tödö andrö? Te takhalaigö niha sangoromaʼö faʼasökhi dödö, faʼafahuwu, ba faʼoböwö. Te göi itörö tödöda gamaedola Yesu sanandrösa ba niha Zamaria si sökhi tödö. ’Iforomaʼö waʼahakhö dödö’ niha Zamaria andrö khö zi samösa niha Yahudi niböbözi ba nirabu. Börö me ”tumbu khönia waʼahakhö dödö”, itatugöi si fao faʼasökhi dödö enaʼö so zondrorogö niha Yahudi andrö irugi döhö. (Luk. 10:29-37) Moroi ba gamaedola daʼa, tola tafahaʼö ita ba gamuata Lowalangi si sökhi sibai, yaʼia daʼö faʼahakhö dödö. Iforomaʼö khöda waʼahakhö dödö börö me iʼomasiʼö ita. Ero maʼökhö, oya lala niʼogunaʼönia ba wangoromaʼö khöda faʼahakhö dödö.

2. Hadia lala tanö böʼö ba wangoromaʼö faʼahakhö dödö?

² So lala tanö böʼö ba wangoromaʼö faʼahakhö dödö. Te ihalö gangetula niha si so faʼahakhö dödö enaʼö lö ihuku niha sinangea muhuku. Daʼö sambua lala niʼogunaʼö Yehowa ba wangoromaʼö khöda faʼahakhö dödö. Imane samösa sanura sinunö, ”Lö ihuku ita moloʼö horö si no tafalua.” (Si. 103:10) Hizaʼi itaria, na ifalua horö si samösa niha, te ihalö gangetula Yehowa ba wameʼe khönia tegu-tegu sabeʼe.

3. Hadia manö wanofu-nofu nitutunöda dania?

³ Ba artikel daʼa, so tölu wanofu nitutunöda: Hana wa iforomaʼö khöda waʼahakhö dödö Yehowa? Hadia so gamakhaita degu-tegu sabeʼe ba waʼahakhö dödö? Ba hadia zanolo yaʼita ba wangoromaʼö faʼahakhö dödö? Datafaigi hadia wanema li moroi ba Daromali Lowalangi.

4. Hana wa iforomaʼö khöda waʼahakhö dödö Yehowa?

⁴ Iforomaʼö khöda waʼahakhö dödö Yehowa börö me iʼomasiʼö ita. Iwaʼö sinenge sotöi Faulo wa ”fahöna waʼahakhö dödö” Lowalangi.  Isura wehede daʼö Faulo me itutunö waʼahakhö dödö niforomaʼö Lowalangi ba nono mbanuania si no tebayoini. Ibeʼe khöra dötönafö faʼauri si lö aetu ba zorugo hewaʼae na lö moʼahonoa ira. (Ef. 2:4-7) Hizaʼi, tenga ha ba nono mbanuania si no tebayoini iforomaʼö waʼahakhö dödö. Imane Dawido, ”Sökhi dödö Yehowa ba niha fefu, ahakhö dödönia fefu niwöwöinia.” (Si. 145:9) Börö me iʼomasiʼö niha gulidanö Yehowa, lö tebulö iforomaʼö waʼahakhö dödö na so dane-danenia wamalua daʼö.

5. Hana wa aboto sibai ba dödö Yesu waʼebua waʼahakhö dödö Yehowa?

⁵ Aboto sibai ba dödö Yesu hawaʼomasi Yehowa wangoromaʼö faʼahakhö dödö. Fatua lö möi Yesu ba gulidanö, no fao ia khö Namania ba zorugo ba zi hauga ribu fakhe faʼara. (Amd. 8:30, 31) No hauga kali iʼila hewisa wangoromaʼö Namania faʼahakhö dödö ba niha samalua horö. (Si. 78:37-42) Me mamahaʼö Yesu, asese idunö-dunö gamuata Namania andre.

6. Hadia gamaedola niʼogunaʼö Yesu ba wanutunö faʼahakhö dödö Namania?

⁶ Simane niʼilada ba artikel si no tataluʼi, itutunö Yesu gamaedola sanandrösa khö nono selungu enaʼö aboto ba dödöda hawaʼomasi Yehowa wangoromaʼö faʼahakhö dödö. Iröi nomonia ono selungu andrö ba ”ihorigö gokhötania ba wamalua si lö sökhi”. (Luk. 15:13) Ba gafuriata, ifalalini gera-erania, iʼide-ideʼö ia, ba mangawuli ia ba nomo. Hadia nifalua namania? Imane Yesu, ”Me iʼila [nono matua andrö] amania moroi ba zaröu, tumbu khönia waʼahakhö dödö. Fagohi namania, italagui ba ihaogö woʼuma.” Hewaʼae na no ifalua horö sebua ono matua andrö, lö iʼailasi ia amania. Hizaʼi, iʼanemaiʼö iforomaʼö waʼahakhö dödö, iʼefaʼö zala nononia andrö ba itemaʼö mangawuli börö me no ifalalini gera-erania. Ama sebua faʼahakhö dödö nitutunö ba gamaedola andrö yaʼia daʼö Yehowa. Iʼogunaʼö gamaedola andrö Yesu ba wamaduhuʼö ba dödöda wa hasambalö iʼefaʼö horöda Amania na tafalalini gera-erada soroi ba dödö.​—Luk. 15:17-24.

7. Hana wa oroma waʼatua-tua Yehowa moroi ba waʼahakhö dödönia?

⁷ Iforomaʼö khöda waʼahakhö dödö Yehowa börö waʼatua-tuania sahöli-höli dödö. Iwaʼö Sura Niʼamoniʼö wa ”faʼatua-tua si otarai moroi yawa” andrö ”afönu faʼahakhö dödö hegöi amuata si sökhi”. (Yak. 3:17) Börö me atua-tua Yehowa, lö tebulö ihalö gangetula soguna ba gomböila dangania. Simane satua sebua faʼomasi, aboto ba dödö Yehowa wa latema mbua si sökhi iraononia na iforomaʼö waʼahakhö dödö. (Si. 103:13;  Yes. 49:15) Tola laʼokhögö dötönafö sahöli-höli dödö ba zi so miföna hewaʼae na lö moʼahonoa ira. Tobali, faʼatua-tua Yehowa sahöli-höli dödö andrö zamarou yaʼia ba wangoromaʼö faʼahakhö dödö na so dane-dane ba wamalua daʼö. Baero daʼö, börö waʼatua-tuania, iʼila Yehowa hawaʼara moguna iforomaʼö waʼahakhö dödö. Hewaʼae na so khönia waʼahakhö dödö, lö ilulu manö niha samalua horö sebua.

8. Hadia zinangea mufalua ba niha si lö mamalalini era-era, ba hadia mbörö?

⁸ Hewisa na so nono mbanua Yehowa sangodödögö famalua horö sebua ba lö iböhöli wamalua daʼö? Iʼoroisi Yehowa khö Waulo ba wameʼe fanuturu lala ba mbanua niha Keriso enaʼö ”lö fariawö” ira ba niha simane daʼö. (1 Ko. 5:11) Börö daʼö, lö tola löʼö muʼefasi moroi ba mbanua niha Keriso niha si lö mamalalini era-erania. Moguna mufalua daʼö ba wolumöʼö ira talifusöda si lö faröi hegöi ba wangoromaʼö wa tatuhini goi-goi Yehowa. Hizaʼi, so ösa zangumaʼö wa muʼefasi niha moroi ba mbanua niha Keriso börö me lö ihakhösi tödö ia Lowalangi. Hadia sindruhu daʼö? Datatutunö.

9-10. Simane nitutunö ba Heberaiʼo 12:5, 6, hana wa no sambua tandra waʼahakhö dödö na muʼefasi zi samösa niha? Beʼe duma-duma.

⁹ Tatu abu sibai dödöda na tarongo gangombakhata ba mbanua niha Keriso wa ”tenga saʼae Samaduhuʼö Yehowa” zi samösa niha niʼomasiʼöda. Tola manö manofu-nofu dödöda hadia sinangea muʼefasi ia andrö. Hadia no sambua tandra waʼahakhö dödö na muʼefasi zi samösa niha? Tatu manö. Na tataha wameʼe tegu-tegu ba niha samalua sala, eluahania lö taforomaʼö waʼatua-tua, faʼahakhö dödö, ba faʼomasi. (Amd. 13:24) Na muʼefasi zi samösa niha, hadia tola tobali fanolo khönia daʼö ba wamalalini era-era? Tola. Ato ndra talifusöda si no irai mamalua horö sebua ba zilalö sangumaʼö wa awena aboto ba dödöra hawaʼebua horö si no lafalua me no muʼefasi ira. Daʼö göi zamarou tödöra ba wamalalini era-erara irege mangawuli ira khö Yehowa.​—Baso Heberaiʼo 12:5, 6.

¹⁰ Nehegö atö duma-duma daʼa. Iʼila si samösa kubalo wa so sageu mbiri-birinia sofökhö. Aboto ba dödönia wa moguna ifasambua mbiri-biri sofökhö andrö moroi ba ngawawania. Hizaʼi si toʼölönia, lö omasi fabali mbiri-biri moroi ba ngawawara, ba abu dödöra na mufasambua ira. Na simanö, me ifasambua mbiri-biri sofökhö kubalo andrö, hadia daʼö geluahania wa lö khönia faʼahakhö dödö? Tenga. Aboto ba dödönia wa hasambalö fatöfa wökhö mbiri-biri andrö ba ngawawania na muʼorudugö ira. Hizaʼi, na mufasambua zi sageu andrö, tola telumöʼö mbiri-biri tanö böʼö.​—Fareso göi 3 Moze 13:3, 4.

11. (a) Hana wa tola mufagölösi niha Keriso si no muʼefasi ba mbiri-biri sofökhö? (b) Hadia zi tola lafalua ira niha si no muʼefasi, ba hadia wanolo si tola latema?

¹¹ Tola mufagölösi niha Keriso si no muʼefasi ba mbiri-biri sofökhö andrö. Hadia mbörö? Börö me mofökhö ia ba wamati. (Yak. 5:14) Simane fökhö si göna ba mboto niha, tola göi fatöfa ba niha böʼö wökhö ba wamati. Börö daʼö, itaria moguna mufasambua niha sofökhö ba wamati moroi ba mbanua niha Keriso. Fangefasi andrö zangoromaʼö wa iʼomasiʼö nono mbanuania si lö faröi Yehowa. Tola göi tobali fanolo daʼö ba niha samalua horö sebua enaʼö aboto ba dödönia wa fasala zi no ifalua, ba ifalalini gera-erania. Sagötö muʼefasi ia, tola iʼondrasi gangowuloa ba wanema fanuturu lala moroi ba Zura Niʼamoniʼö hegöi ba wangaʼaroʼö famatinia. Tola iʼokhögö publikasi ba wamahaʼö yaʼia samösa, ba tola göi ifaigi JW Broadcasting^®. Na laʼila ira satua sokubaloi wa no ibörögö ibulöʼö gamuatania, lazara-zara wameʼe khönia mene-mene hegöi fanuturu lala. Lafalua daʼö ba wanolo yaʼia enaʼö ifuli aro wahuwusania khö Yehowa  irege tola latemaʼö ia ba mbanua niha Keriso ba gafuriata. *

12. Na lö ifalalini gera-erania si samösa niha, hewisa lala ndra satua sokubaloi ba wangoromaʼö khönia faʼomasi hegöi faʼahakhö dödö?

¹² Böi olifu ita, ha niha si lö mamalalini era-era zinangea muʼefasi moroi ba mbanua niha Keriso. Aboto ba dödö ndra satua sokubaloi wa tebai muʼaohasi ba dödö gangetula ba wangefasi si samösa niha. Börö daʼö, moguna lahaogö laʼangeragö sibai fatua lö lahalö gangetula. Aboto göi ba dödöra wa ’indrohugö’ Yehowa ba wameʼe tegu-tegu. (Yer. 30:11) Laʼomasiʼö ndra talifusöra, ba laʼangenanöi enaʼö lö lafalua hadia ia zi tola mamakiko fahuwusa zi samösa niha khö Yehowa. Hizaʼi, na lö ifalalini gera-erania niha samalua horö sebua, lö tola löʼö lahalö gangetula ira satua sokubaloi ba wangefasi yaʼia moroi ba mbanua niha Keriso. Na lafalua daʼö, sindruhunia no laforomaʼö waʼomasi ba faʼahakhö dödö.

13. Hana wa lö tola löʼö muʼefasi zi samösa niha moroi ba mbanua niha Keriso si so ba Gorindro?

¹³ Nehegö atö hadia nifalua Waulo ba niha si lö mamalalini era-erania me abad siföföna. Ba mbanua niha Keriso si so ba Gorindro, so samösa ndra matua sohoröni foʼomo namania. Sindruhu-ndruhu no amuata sogoro Yehowa daʼö! Aboto ba dödö Waulo wa no irai ibeʼe goroisa daʼa Yehowa ba ndraono Gizaraʼeli: ”Niha sohoröni foʼomo namania, no iʼailasi namania. Hasambalö mubunu zi darua niha andrö.” (3 Mo. 20:11) Tatu manö, tebai iʼoroisi Faulo ba mbanua niha Keriso si so ba Gorindro ba wamunu ira matua andrö. Hizaʼi, iʼandrö khöra wangefasi yaʼia moroi ba mbanua niha Keriso. Börö gamuata ndra matua daʼö, so ösa ndra talifusöda si tedönisi tödö, irege lawaʼö wa tenga horö sebua nifaluania andrö!​—1 Ko. 5:1, 2, 13.

14. Hewisa wangoromaʼö Waulo faʼahakhö dödö khö ndra matua si no muʼefasi moroi ba mbanua niha Keriso ba Gorindro, ba hadia mbörö? (2 Korindro 2:5-8, 11)

¹⁴ Ba gafuriata, irongo Faulo wa no ibulöʼö gamuatania ira matua andrö. Sindruhu-ndruhu no ifalalini gera-erania! Hewaʼae na no irai teʼailasi mbanua niha Keriso börö gamuata ndra matua andrö, lö omasi Waulo na talafo abeʼe degu-tegu nibeʼenia. Imane Faulo khö ndra satua sokubaloi ba mbanua niha Keriso andrö, ”Mibologö dödömi khönia ba mirara dödönia.” Aefa daʼö, ifatunö khöra hana wa moguna lafalua daʼö: ”Enaʼö lö awuwu ia ba waʼabu dödö.” Ahakhö dödö Waulo khö ndra matua si no mamalalini era-era andrö. Lö omasi ia na talafo abu dödönia börö zala si no ifalua irege awuwu ia ba lö saʼae iforege enaʼö teʼefaʼö horönia.​—Baso 2 Korindro 2:5-8, 11.

15. Hewisa wameʼe ndra satua sokubaloi tegu-tegu sabeʼe si fao faʼahakhö dödö?

 ¹⁵ Simane Yehowa, omasi ndra satua sokubaloi wangoromaʼö faʼahakhö dödö. Hasambalö labeʼe degu-tegu sabeʼe na inötö moguna. Na lö labeʼe degu-tegu ira satua sokubaloi, eluahania lö laforomaʼö waʼahakhö dödö ba no lalulu manö niha samalua horö sebua. Hizaʼi na tola, laforomaʼö waʼahakhö dödö na so dane-dane ba wamalua yaʼia. Tobali, hadia ha ira satua sokubaloi zinangea mangoromaʼö faʼahakhö dödö?

16. Moloʼö Amaedola 21:13, hadia nifalua Yehowa ba niha si lö mangoromaʼö faʼahakhö dödö?

¹⁶ Fefu niha Keriso moguna laʼoʼö waʼahakhö dödö Yehowa. Hadia mbörö? Börö me lö omasi Yehowa wamondrondrongo fangandrö niha si lö mangoromaʼö faʼahakhö dödö. (Baso Gamaedola 21:13.) Tatu tatötöna enaʼö lö tebulö ifondrondrongo wangandröda Yehowa. Börö daʼö, moguna taʼangenanöi faböi tobali ita niha si lö mangoromaʼö faʼahakhö dödö. Databeʼe wanolo na tarongo ”wangarö-ngarö niha si numana”. Böi taʼolifugö wamangelama andre: ”Niha si lö mangoromaʼö faʼahakhö dödö, lahuku göi ia si lö faʼahakhö dödö.” (Yak. 2:13) Na tafaduhuʼö si fao fangide-ngideʼö wa moguna sibai khöda waʼahakhö dödö, tola itugu terou dödöda ba wangoromaʼö faʼahakhö dödö, mendrua manö na mangawuli ba mbanua niha Keriso niha si no mamalalini era-erania.

17. Hewisa wangoromaʼö Razo Dawido faʼahakhö dödö?

¹⁷ Tola möi fanoloda duma-duma si so ba Zura Niʼamoniʼö ba wangoromaʼö faʼahakhö dödö hegöi ba woʼangenanöi faböi talafo abeʼe ita na so zamalua sala. Angeragö atö duma-duma Razo Dawido. Asese iforomaʼö waʼahakhö dödö. Duma-dumania, hewaʼae na edöna ibunu ia Saulo, iforomaʼö Dawido waʼahakhö dödö khö razo si no ifataro Lowalangi andrö. Lö iʼalui lala ba wamaʼala Saulo hegöi ba wanulöni yaʼia.​—1 Sa. 24:9-12, 18, 19.

18-19. Tutunö hamega lö iforomaʼö waʼahakhö dödö Dawido.

¹⁸ No irai lö iforomaʼö waʼahakhö dödö Dawido. Duma-dumania, me so samösa ndra matua safaito sotöi Nabalo sangoʼaya yaʼia ba si lö omasi mameʼe gönia awö nono buania, mofönu sibai ia ba ihalö gangetula ba wamunu Nabalo hegöi ira matua soroi yomonia. Hizaʼi, iʼanemaiʼö ibeʼe göra foʼomo Nabalo sotöi Abigaila, ira alawe si sökhi tödö ba sebolo tödö. Börö me ifalua daʼö Abigaila, lö moʼömö do Dawido.​—1 Sa. 25:9-22, 32-35.

¹⁹ Ba ginötö tanö böʼö, itutunö khönia Natano samaʼeleʼö sanandrösa khö zi samösa ira matua si kayo sanagö biri-biri niha si numana. Me irongo daʼö Dawido, mofönu sibai ia ba imane, ”Faya wa no sauri Yehowa na tenga sinangea mate niha daʼö!” (2 Sa. 12:1-6) Aboto ba dödö Dawido wa moloʼö Oroisa Moze, lö labunu niha sanagö si sageu biri-biri. Hizaʼi, moguna  ibeʼe öfa ngaʼeu wogati. (2 Mo. 22:1) Moroi ba wehede Dawido andrö taʼila wa talafo abeʼe wohukunia ira matua andrö. Sindruhunia, itutunö gamaedola andrö Natano ba wangoromaʼö wa abölö ebua nasa horö si no ifalua Dawido. Hewaʼae na no ifalua horö andrö, iforomaʼö khönia Yehowa waʼahakhö dödö sabölö ebua moroi ba niforomaʼö Dawido khö ndra matua nitutunö ba gamaedola Natano andrö!​—2 Sa. 12:7-13.

20. Hadia wamahaʼö si tola tahalö moroi ba zalua khö Dawido?

²⁰ Me mofönu sibai Dawido, iʼanemaiʼö ihalö gangetula ba wamunu Nabalo awö ndra matua soroi yomonia. Baero daʼö, iwaʼö Dawido wa lö tola löʼö mubunu ndra matua si kayo nitutunö Natano andrö börö zala si no ifalua. Sindruhunia, niha si sökhi tödö Dawido. Te manofu-nofu ita hana wa abeʼe sibai wanguhukunia ira matua andrö. Angeragö atö hadia zalua khö Dawido me luo daʼö. Itegu-tegu ia tödönia side-ide börö zala si no ifalua. Tobali, na talafo abeʼe nifalua zi samösa niha ba wanguhuku awönia, daʼö dandra wa no ibörögö mofökhö ia ba wamati. Ihaogö ifangelama ndra nifahaʼönia Yesu, ”Böi mihuku nawömi faböi tehuku ami, börö me tehuku ami dania simane fanguhuku nifatörömi.” (Mat. 7:1, 2) Daʼö mbörö wa moguna taʼangenanöi enaʼö lö talafo abeʼe ita khö ndra talifusöda ba taforege enaʼö ”fahöna waʼahakhö dödö” niʼokhögöda simane Lowalangida.

21-22. Hadia manö zinangea tafalua ba wangoromaʼö faʼahakhö dödö?

²¹ Moguna taforomaʼö waʼahakhö dödö moroi ba nifaluada, tenga ha asala tarasoi manö. Börö daʼö, fefu ita moguna taʼangeragö zoguna ba nösi nomoda, ira talifusöda, hegöi niha si so ba zi fasuida. Tatu manö oya ginötö si tola taʼogunaʼö ba wangoromaʼö faʼahakhö dödö khöra. Hadia tola örara dödö niha sorasoi faʼide-ide dödö? Hadia tola ötolo niha böʼö mazui öbeʼe göra? Na so niha sawena mufuli mutemaʼö ba mbanua niha Keriso, hadia tola öʼaroʼö wamatinia ba öforege enaʼö fahuwu ndraʼugö khönia? Hadia tola ötutunö ba niha böʼö duria somuso dödö si möi fondrara dödöra? Daʼö no sambua lala si sökhi ba wangoromaʼö faʼahakhö dödö ba niha si falukha khöda.​—Yob. 29:12, 13; Rom. 10:14, 15; Yak. 1:27.

²² Na taʼila hadia zoguna ba niha si so ba zi fasuida, aboto ba dödöda wa sindruhunia oya sibai ginötö si tola taʼogunaʼö ba wangoromaʼö faʼahakhö dödö. Na taforomaʼö waʼahakhö dödö, no taʼomusoiʼö dödö Namada si so ba zorugo, Lowalangi si ”fahöna waʼahakhö dödö”!