Börö me itugu ato zanuriaigö, itugu oya moguna mbuku. Me luo daʼö, ira talifusöda ba Mbetieli Brooklyn zamazökhi majalah niʼogunaʼöda, hizaʼi falulu fohalöwö nasa ira ba perusahaan tanö böʼö ba wamazökhi buku sagabeʼe uli. Mato hauga waŵa aefa daʼö, ambö gölö perusahaan andrö ba wamazökhi buku niʼogunaʼöda irege tetaha halöwö fanuriaigö. Börö daʼö, isofu talifusöda Rutherford khö Robert Martin, si tobali pengawas percetakan me luo daʼö, hadia tola tafazökhi samösa mbuku niʼogunaʼöda.

Imane talifusöda Martin, ”Bua gera-era si sökhi daʼö. Eluahania tabokai samösa pabrik ba wamazökhi bukuda.” Börö daʼö, lasewa sambua nahia ira talifusöda ba 18 Concord Street ba Brooklyn, ba laʼöli gama-gama soguna ba daʼö.

Lö fefu niha omuso dödöra ba zalua andre. Samösa ba gotaluania yaʼia daʼö sokhö perusahaan si no irai falulu fohalöwö khöda. Möi iʼondrasi pabrik sawena tabokai ba imane, ”Baga sibai gama-gama niʼokhögömi, hizaʼi lö hadöi ba gotaluami sangila mangogunaʼö yaʼia. Ba zi önö waŵa fönada hasambalö tekiko.”

Imane talifusöda Martin, ”Tola manö itörö niwaʼömö. Hizaʼi, maʼila wa hasambalö itolo ndraʼaga Yehowa.” Ba atulö niwaʼö dalifusöda Martin andrö. Lö ara aefa daʼö, so 2.000 mbuku nifazökhi ero maʼökhö me laʼogunaʼö mesin cetak andrö.

Baero wamazökhi buku, so lala si bohou niʼogunaʼö Ndraono Sekola Zura Niʼamoniʼö ba wanuriaigö turia somuso dödö, yaʼia daʼö laʼogunaʼö radio. Ba zi laluo Migu, 26 mbawa si Dua 1922, ifaʼema talifusöda Rutherford huhuo si oföna sibai ba radio. Tuho huhuonia ”Lö Irai Mate Niha si Hauga Zuta Faʼato si No Auri Iadaʼa”. Ifaʼema daʼö ba stasiun radio KOG ba Los Angeles, Kalifornia, AS.

 So mato 25.000 niha samondrongo huhuo andrö. So ösa ba gotaluara zamaʼoheʼö sura fangandrö saohagölö. Sagörö ba gotaluania yaʼia daʼö moroi khö Willard Ashford, si toröi ba Santa Ana, Kalifornia. Iʼandrö saohagölö khö dalifusöda Rutherford ba huhuo si möi ”fondrara dödö ba sadöni dödö” andrö. Imane, ”So datölu niha sofökhö ba nomoma. Hewaʼae öfaʼema huhuo andrö ahatö ba nomoma, tebai maʼondrasi ia. Hizaʼi börö me ba radio öfaʼema ia tola mafondrondrongo daʼö.”

Ba zi hauga migu aefa daʼö itugu ato niha samondrondrongo huhuo nifaʼema ba radio. Ba gangohorita ndröfi 1922, ifatunö The Watch Tower wa ”si löʼö-löʼönia so 300.000 niha si no mamondrondrongo turia somuso dödö ba radio”.

Börö waʼoya zura nitemara, andrö wa lahalö gangetula Iraono Sekola Zura Niʼamoniʼö ba wamazökhi stasiun radio ba zi sambua nahia ba Staten Island sahatö ba Mbetieli Brooklyn. Mufotöi ia WBBR. Ba ndröfi aefa daʼö, laʼogunaʼö stasiun andrö Iraono Sekola Zura Niʼamoniʼö ba wanuriaigö turia somuso dödö.

The Watch Tower 15 mbawa si Önö 1922, iʼombakhaʼö wa so gangowuloa sebua nifalua ba Cedar Point, Ohio, iʼotarai 5 irugi 13 mbawa si Siwa 1922. Omuso sibai dödö Ndraono Sekola Zura Niʼamoniʼö me larugi Cedar Point.

Ba huhuonia siföföna, imane talifusöda Rutherford, ”Sindruhu-ndruhu faduhu dödögu wa . . . ifahowuʼö Lowalangi gangowuloa sebua andre, ba itatugöi wa hasambalö muturiaigö duria sahöli-höli dödö ba niha fefu ba gulidanö andre töra moroi ba zilalö.” Ero samösa dalifusöda samaʼema huhuo lafarou sibai dödö ndra talifusöda ba wamalua halöwö fanuriaigö.

Ba ngaluo Zumaha 8 mbaŵa si Siwa, so mato 8.000 zangondrasi nahia daʼö. Adöni sibai dödöra wamondrongo huhuo nifaʼema dalifusöda Rutherford. Latötöna enaʼö itutunö geluaha ngawua wehede ”ADV” si no musura ba zura undranga. Me modadao ira, ato ba gotaluara sangila spanduk sebua si no mugölugö föna ba panggung. So samösa  zangondrasi sotöi Arthur Claus moroi ba Tulsa, Oklahoma, AS, iʼalui naha wedadao si sökhi enaʼö ahori irongo fefu huhuo nifaʼema. Me luo daʼö, lö terongo-rongo sibai li zamaʼema huhuo börö me lö hadöi mikrofon mazui speaker ba wangebuaʼö li.

Enaʼö lö mangoloi dödö zangondrasi, ibeʼe gangombakhata talifusöda sondröniaʼö angowuloa andrö enaʼö böi so niha si möi bakha ba nahia daʼö sagötö ifaʼema huhuonia talifusöda Rutherford. Me no irugi bözi 9.30 sihulö wongi, ibörögö huhuonia talifusöda Rutherford sanandrösa ba wehede Yesu nisura ba Mataiʼo 4:17, ”No ahatö Wamatörö Lowalangi ba zorugo.” Me itutunö hewisa dania lala enaʼö larongo niha sanandrösa ba Wamatörö andrö, imane talifusöda Rutherford, ”Yesu samösa zangumaʼö na tohare dania ia, iʼowuloi niha satulö hegöi niha si lö faröi enaʼö tobali soloʼö khönia.”

Imane talifusöda Claus, si dadao ba auditorium, ”Mahaogö sibai mafondrondrongo ero sambua ngawua wehede.” Hizaʼi, mofökhö ia irege iröi auditorium hewaʼae na sindruhunia lö omasi ia mofanö börö me iʼila wa lö saʼae latehegö khönia weʼamöi bakha sagötö fahuhuo dalifusöda Rutherford.

Hauga menit aefa daʼö, ibörögö alö wökhönia. Me ifuli ia bakha irongo li dawo-tawo sebua sibai. Daʼö mbörö wa itugu terou dödönia! Ihalö gangetula ba woʼanöisi towa ba weʼamöi yawa ba zagö enaʼö tola ifondrondrongo huhuo andrö. Me luo daʼö 23 fakhe ndröfi dalifusöda Claus. Isöndra lalania ba wanöi yawa ba zagö. Yawa ba daʼö so zandrela si no teboka, ba me ihatöʼö ia ba daʼö iwaʼö wa ”awena ahori irongo fefu huhuo nifaʼema”.

Hizaʼi, tenga ha yaʼia zi so ba daʼö. So göi ndra awö-awönia. Samösa ba gotaluara yaʼia daʼö Frank Johnson. Fagohi ia ba imane khö Claus, ”So khöu rosö ba daʼö?”

 Imane Arthur, ”So.”

Imane talifusöda Frank, ”Yaʼugö andre fanema li moroi ba wangandröma. Hadia no öʼila gölu-gölu sebua andre? Daʼa spanduk si no muböbö ba gosö-osö. Haogö fondrondrongo niwaʼö Zanguhuku. * Na iwaʼö, ’Miʼombakhaʼö, miʼombakhaʼö’ tafendrongagö wanaba tali si öfa rozi andre.”

No igogohe rosö andrö Arthur, ba labalo-baloi wehede dalifusöda Rutherford si tobali tandra hawaʼara lataba zinali andrö. Lö ara aefa daʼö irugi inötö khö dalifusöda Rutherford ba wamaʼema tuho moroi ba huhuonia. Si fao faʼaterou dödö iʼebuaʼö linia talifusöda Rutherford ba wangumaʼö, ”Yatobali ami samaduhuʼö sindruhu ba si lö faröi khö Zoʼaya yaʼita. Böi miböhöli wamalua halöwö daʼa irege tedudugö Mbabilona Sebua. Mituriaigö daʼa ba zi sagörö ulidanö. Fefu niha moguna laʼila wa Yehowa andrö Lowalangi ba Yesu Keriso andrö Razo yawa razo ba Soʼaya yawa zoʼaya. Daʼa ginötö sabölö tohude. Hiza, no mamatörö Razoda! Tebeʼe khömi halöwö ba wanuriaigö daʼö. Andrö, miʼombakhaʼö, miʼombakhaʼö, miʼombakhaʼö Razo hegöi Famatörönia!”

Itutunö Arthur wa me lataba mböbö spanduk andrö, iʼanemaiʼö teboka ba lö taha-taha. Ba spanduk daʼö, no musura ”Ombakhaʼö Razo hegöi Famatörönia”. Daʼö geluaha ”ADV” si no tesura ba zura undranga.

Angowuloa sebua nifalua ba Cedar Point zanolo ira talifusö enaʼö laʼosambuaʼö dödöra ba halöwö si tohude yaʼia daʼö ba wanuriaigö turia sanandrösa ba Wamatörö Lowalangi. Ira talifusöda sanehegö faʼaurira ba wamalua yaʼia, larasoi waʼomuso dödö. Imane si samösa kolportir (mufotöi ia iadaʼa perintis) moroi ba Oklahoma, AS, ”Ba mbanua nifataro yaʼaga, ato niha sohalöwö ba wangalui batu bara, ba tosasa sibai waʼaurira.” Itutunö wa ato niha seʼe börö waʼomuso dödö me larongo duria si so ba majalah Golden Age. Imane nasa talifusöda andrö, ”Omuso sibai dödöma me tola mabeʼe khöra wondrara dödö.”

Aboto ba dödö Ndraono Sekola Zura Niʼamoniʼö wa moguna sibai wehede Yesu nisura ba Luka 10:2, ”Ebolo mbasitö, ba lö ato zohalöwö.” Ba gafuriata ndröfi daʼö, itugu laforege ba wanuriaigö turia sanandrösa ba Wamatörö Lowalangi ba zi sagörö ulidanö.