1. Hadia dötönafö nibeʼe Yehowa khöda?

 YEHOWA zameʼe khöda tötönafö sahöli-höli dödö yaʼia daʼö faʼauri si lö aetu. So ösa zanötöna faʼauri si lö aetu ba zorugo ba mboto eheha si lö irai mate. (1 Ko. 15:50, 53) Tanö böʼönia, latötöna waʼauri si lö aetu ba gulidanö si fahöna faʼohahau dödö, lö fökhö ba moʼahonoa. (Fam. 21:3, 4) Ebua sibai mböli dötönafö nibeʼe khöda andre, hewaʼae na sanötöna faʼauri ba zorugo ita mazui ba gulidanö.

2. Hadia dane-dane wamatida, ba hana wa tola tawaʼö daʼö?

² Ngawua wehede ”tötönafö” niʼogunaʼö ba Zura Niʼamoniʼö, tola mufoʼeluaha ia ”mudöna-döna wa hasambalö si sökhi zalua”. Faduhu dödöda wa lö tola löʼö alua nitötönada börö me Yehowa zangumaʼö. (Rom. 15:13) Taʼila hadia mbuʼusa linia, ba aboto ba dödöda wa hasambalö ifalua daʼö. (4 Mo. 23:19) Faduhu göi dödöda wa omasi Yehowa ba so khönia waʼabölö ba wamalua si no ifabuʼu. Börö daʼö, tötönaföda andrö tenga ha anga-anga mazui fangifi, hizaʼi teʼodane-dane ia ba zindruhu ba hasambalö alua.

3. Hadia nitutunöda ba artikel daʼa? (Sinunö 27:14)

³ Iʼomasiʼö ita Amada si so ba zorugo ba omasi ia na faduhu dödöda khönia. (Baso Zinunö 27:14.) Na aro wanötönada khö Yehowa, tola anau gölöda ba wanaögö fanandraigö ba tarasoi waʼomuso dödö hegöi faʼabarani ba zi so miföna. Ba artikel daʼa, tatutunö dania hewisa wa tola möi folumöʼöda dötönafö andrö. Si oföna, datatutunö hewisa wa no amaedola zao hegöi takula khöda dötönafö. Aefa daʼö, tatutunö hewisa wangaʼaroʼöda tötönafö andrö.

4. Hewisa wa no amaedola zao dötönafö andrö? (Heberaiʼo 6:19)

⁴ Ba zurania khö ndra niha Heberaiʼo, ifagölösi Faulo dötönaföda andrö simane sao. (Baso Heberaiʼo 6:19.) Asese itörö nasi, daʼö mbörö wa aboto ba dödö Waulo wa muʼogunaʼö zao andrö enaʼö lö ahani göfa. Samuza inötö me itörö göfa sebua Faulo, alua mbade sabölö-bölö. Me alua mbade andrö, lafazaumba ba nasi zao ira sohalöwö faböi ahani göfa ba lö telobi ba gara. (Hal. 27:29, 39-41) Simane sao sanaha enaʼö lö ahani göfa, tötönafö göi zanolo yaʼita faböi ahani ba fandröndröu ita moroi khö Yehowa na alua khöda gabula dödö. Tötönafö zanolo yaʼita enaʼö lö mangiwa dödöda na alua khöda gabula dödö si no amaedola mbade, faduhu dödöda wa hasambalö so dania ginötö si sökhi ba zi so miföna. Böi olifu ita wamangelama niwaʼö Yesu wa hasambalö göna ita folohi. (Yoh. 15:20) Na taʼangerönusi mbuʼusa li Yehowa khöda ba zi so miföna, daʼö zanolo yaʼita enaʼö lö taböhöli wamosumange yaʼia.

5. Hewisa wanötöna andrö tobali fanolo khö Yesu ba wondrorogö faʼalöfaröi hewaʼae na itaögö waʼamate?

⁵ Datatutunö hewisa dötönafö niʼokhögö Yesu tobali fanolonia ba wondrorogö faʼalöfaröi hewaʼae iʼila wa itaögö waʼamate safökhö. Ba ngaluo Wendrakose me 33 M, itötöi sinenge sotöi Fetero wamaʼeleʼö si so ba mbuku Zinunö sanandrösa ba waʼahono dödö nirasoi Yesu börö dötönafönia, imane: ”Afönu fanötöna waʼaurigu. Börö me lö öröi ndraʼo ba Lewatö, mazui ötehegö khö zawuyumö si lö faröi laʼila waʼatekiko. . . . No öʼomusoiʼö dödögu weʼaso tanö fönau.” (Hal. 2:25-28; Si. 16:8-11) Hewaʼae iʼila Yesu wa hasambalö mate ia ba zi lö ara tö, hizaʼi iʼokhögö dötönafö saro wa hasambalö isusugi ia Lowalangi ba irasoi waʼahono dödö börö me ifuli teʼosambuaʼö ia khö Namania si so ba zorugo.​—Heb. 12:2, 3.

6. Hadia niwaʼö zi samösa talifusöda ira matua sanandrösa ba wanötöna?

⁶ Tötönafö andre zanolo ira talifusöda ba wangoromaʼö faʼanau gölö. Datatutunö duma-duma zi samösa talifusöda ira matua sotöi Leonard Chinn, si toröi ba Inggris. Sagötö Wasuwöta Gulidanö I, labeʼe ia ba gurunga börö me lö omasi ia tobali saradadu. Me no dua waŵa lakuru ia ba sel isolasi, lafaso ia wohalöwö. Imane Leonard ba gafuriata, ”Me no alua khögu fefu daʼö, aboto ba dödögu wa sindruhu-ndruhu moguna khöda dötönafö enaʼö tola anau gölöda. Tola tafahaʼö ita moroi ba duma-duma Yesu, ira sinenge, ira samaʼeleʼö hegöi buʼusa li Lowalangi si so ba Zura Niʼamoniʼö. Daʼa fefu zameʼe khöda faʼaro dödö ba dötönafö niʼokhögöda ba zi so miföna, ba tobali folumöʼöda daʼö ba wangoromaʼö faʼanau gölö.” Tötönafö andre zi no amaedola zao khö Leonard, ba tola göi tobali sao ia khöda.

7. Hewisa wa möi fangaro dötönaföda wanandraigö andrö? (Roma 5:3-5; Yakobo 1:12)

⁷ Na anau gölöda wanaögö fanandraigö ba tarasoi wanolo moroi khö Yehowa, faduhu dödöda wa omuso dödönia ba nifaluada, ba itugu aro dötönaföda. (Baso Roma 5:3-5; Yakobo 1:12.) Iadaʼa, abölö aro wanötönada moroi me awena tarongo duria somuso dödö. Omasi Zatana na oya wangabu dödö si göna khöda, hizaʼi börö wanolo moroi khö Yehowa tola anau gölöda.

8. Hewisa wa no amaedola dakula dötönafö andrö? (1 Tesalonika 5:8)

⁸ Ifagölösi dötönafö andrö Sura Niʼamoniʼö simane takula. (Baso 1 Tesalonika 5:8.)  Na möi fasuwö zi samösa saradadu, moguna ifake dakula ba wolumöʼö högönia. Ba wasuwöta wamati moguna göi talumöʼö gera-erada moroi ba nono wana Zatana. Ihawui ita fanandraigö hegöi lala wangera-ngera gulidanö enaʼö tekiko wangera-ngerada. Simane takula solumöʼö högö zi samösa saradadu, tötönafö andrö zolumöʼö fangera-ngerada enaʼö lö faröi ita khö Yehowa.

9. Hadia zalua ba niha si lö fanötöna?

⁹ Tötönafö faʼauri si lö aetu zanolo yaʼita ba wangokhögö faʼatua-tua ba wangai angetula si tefaudu. Na alö waʼaro dötönaföda ba tatehegö ifatörö ita fangera-ngera si lö sökhi, tola olifu ita dötönaföda yaʼia daʼö faʼauri si lö aetu. Angeragö zalua ba niha Keriso si so ba mbanua Gorindro me föna. Taya wamatira ba mbuʼusa li Lowalangi sanandrösa ba wanusugi niha si no mate. (1 Ko. 15:12) Isura Faulo wa niha si lö faduhu tödö ba wanusugi si no mate andrö, ha tana khöra laʼalui. (1 Ko. 15:32) Iadaʼa, ato zi lö manötöna ba mbuʼusa li Lowalangi ba lafalua gofu hadia ia zi möi fangomuso dödöra. Hizaʼi, faböʼö ita moroi khöra börö me faduhu dödöda ba mbuʼusa li Lowalangi sanandrösa ba zi so miföna. Tötönafö niʼokhögöda, amaedola dakula solumöʼö fangera-ngerada. Daʼö zanolo yaʼita enaʼö lö taʼosambuaʼö dödöda ba wolohi somasi-masi dödöda, si möi famakiko fahuwusada khö Yehowa.​—1 Ko. 15:33, 34.

10. Hewisa dötönafö tobali folumöʼöda moroi ba wangera-ngera si fasala?

¹⁰ Takula tötönafö zolumöʼö fangera-ngerada. Duma-dumania, so zangumaʼö wa tebai laʼomusoiʼö dödö Yehowa. Lamane: ’Tenga sinangea usöndra waʼauri si lö aetu. Lö sökhi nifaluagu. Lö irai afönu wamaluagu goi-goi Lowalangi.’ Törö tödöu wa simane daʼö göi niwaʼö Gelifasi me ibeʼe wondrara dödö khö Yobi. Imane: ”Hewisa wa tola atulö niha niʼadonogö ndra alawe?” Aefa daʼö imane nasa sanandrösa khö Lowalangi: ”Lö faduhu dödönia khö ndra malaʼikania, ba lö ohau-hau dalu mbanua ba wamaiginia.” (Yob. 15:14, 15) Sindruhu-ndruhu wa falimosa daʼö! Böi olifu ita wa Satana zangaʼasogö fangera-ngera simane daʼö. Iʼila Satana, na so khöda wangera-ngera simane daʼö tola alö waʼaro dötönaföda. Börö daʼö, datatimbagö walimosa Zatana ba taʼosambuaʼö dödöda ba nifabuʼu Yehowa. Yafaduhu dödöda wa omasi Yehowa na taʼokhögö waʼauri si lö aetu, ba hasambalö itolo ita ba wogamö ohitö dödö andrö.​—1 Ti. 2:3, 4.

11. Hana wa moguna khöda wombaloi irege alua nitötönada?

¹¹ Itaria abua khöda wangaʼaroʼö tötönaföda. Tola manö taya khöda waʼebolo dödö ba wombaloi buʼusa li Lowalangi. Hizaʼi, börö me lö tebulö so Yehowa sagötö faʼara, daʼö mbörö wa faböʼö wamaiginia inötö moroi khöda. (2 Fe. 3:8, 9) Hasambalö ifalua zi no ifabuʼu ba lala sabölö sökhi hewaʼae na tenga ba ginötö somasi ita ifalua daʼö. Hadia zanolo yaʼita ba wangaʼaroʼö tötönaföda ba lö mamalö tabaloi Yehowa si fao faʼebolo dödö?​—Yak. 5:7, 8.

12. Moloʼö Heberaiʼo 11:1, 6, hadia gamakhaita dötönafö ba wamati?

¹² Lö tebulö aro dötönaföda na ahatö ita khö Yehowa, börö me ha yaʼia zi tola mamalua nitötönada andrö. Hizaʼi, enaʼö lö tebulö manötöna ita khö Yehowa, moguna mamati ita wa so ia ba hasambalö ”ibeʼe luo ba niha sangalui yaʼia soroi ba dödö”. (Baso Heberaiʼo 11:1, 6.) Na sindruhu-ndruhu so Yehowa ba wamaigida, itugu faduhu dödöda wa hasambalö ifalua zi no ifabuʼu. Börö daʼö, datatutunö  hadia manö zi tola tafalua ba wangaʼaroʼö fahuwusada khö Yehowa hegöi ba wondrorogö enaʼö lö taya wanötönada.

13. Hewisa enaʼö aro wahuwusada khö Lowalangi?

¹³ Angandrö khö Yehowa ba baso Daromalinia. Hewaʼae na lö taʼila Yehowa, hizaʼi tola ahatö ita khönia. Tola fahuhuo ita khönia ba wangandrö, ba faduhu dödöda wa ifondrondrongo wangandröda. (Yer. 29:11, 12) No tafondrondrongo wehede Lowalangi na tabaso Daromalinia ba taʼangerönusi daʼö. Na tabaso hewisa wanolo Yehowa niha si lö faröi me götö föna, tola itugu aro dötönaföda. Fefu nisura ba Daromali Lowalangi ”tesura ia ba wamahaʼö yaʼita. Nisura andrö zameʼe khöda fondrara dödö enaʼö anau gölöda irege so khöda wanötöna”.​—Rom. 15:4.

14. Hana wa moguna taʼangerönusi nifalua Yehowa ba nono mbanuania me götö föna?

¹⁴ Angerönusi hewisa wamalua Yehowa nifabuʼunia me götö föna. Nehegö hadia nifalua Lowalangi khö Gaberahamo hegöi Sara. Tenga saʼae sinangea moʼono ira menaʼö börö me no numalö ndröfira. Hizaʼi ifabuʼu khöra Lowalangi wa hasambalö so nonora. (1 Mo. 18:10) Hadia nifalua Gaberahamo? Imane Sura Niʼamoniʼö: ”Mamati ia wa tobali ia ama dozi soi.” (Rom. 4:18) Hewaʼae na ba wamaigi niha basaki alua nitötönara andrö, faduhu dödö Gaberahamo wa hasambalö ifalua nifabuʼunia Yehowa. Ba daʼö zalua ba gafuriata. (Rom. 4:19-21) Moroi ba zalua andrö, tafahaʼö ita wa hasambalö ifalua mbuʼusa linia Yehowa hewaʼae na tebai alua daʼö dali waʼaniha.

15. Hana wa moguna taʼangerönusi hadia zi no ifalua khöda Lowalangi?

¹⁵ Angeragö hadia zi no ifalua khöu Yehowa. Törö tödöu hadia manö mbua si no ötema börö me no ifalua mbuʼusa linia Lowalangi simane si no tesura ba Daromalinia.  Duma-dumania, no ifabuʼu Yesu wa hasambalö ibönökhi zoguna khöu Amania si so ba zorugo. (Mat. 6:32, 33) Ifaduhuʼö göi Yesu wa hasambalö ibeʼe khöu geheha niʼamoniʼö Yehowa na öʼandrö khönia. (Luk. 11:13) No ifalua mbuʼusa linia andrö Yehowa. Te itörö tödöu mbuʼusa linia tanö böʼö si no ifalua. Duma-dumania, ifabuʼu khöu wa iʼefaʼö zalamö, ibeʼe khöu wondrara dödö, ba ibönökhi zoguna khöu ba wamati. (Mat. 6:14; 24:45; 2 Ko. 1:3) Na öʼangerönusi hadia manö zi no ifalua khöu Lowalangi, itugu aro dötönaföu wa hasambalö ifalua zi no ifabuʼu ba zi so miföna.

16. Hadia mbörö wa no buala sebua böli wanötöna andrö?

¹⁶ Tötönafö faʼauri si lö aetu no buala sebua böli moroi khö Lowalangi. Faduhu dödöda wa hasambalö alua nidöna-dönada. Simane sao, tötönafö zanolo yaʼita enaʼö lö ahani ita na göna ita abula dödö, famakao hegöi faʼamate. Simane takula, tötönafö andrö zolumöʼö fangera-ngerada enaʼö tola tatimbagö wangera-ngera si fasala ba taʼolembai zindruhu. Börö dötönaföda si teʼodane-dane ba Zura Niʼamoniʼö tola itugu ahatö ita khö Lowalangi ba tarasoi waʼomasinia. Oya mbua nitemada na tarorogö enaʼö itugu aro dötönaföda.

17. Hana wa tola tarasoi waʼomuso dödö na aro dötönaföda?

¹⁷ Ifarou dödö ndra talifusönia Faulo me ifaʼoheʼö zurania ba Roma imane, ”Miʼomusoiʼö dödömi ba wanötöna andrö”. (Rom. 12:12) Omuso dödö Waulo börö me faduhu dödönia wa isöndra waʼauri si lö aetu ba zorugo na lö faröi ia. Tarasoi göi waʼomuso dödö börö me faduhu dödöda wa hasambalö alua dötönaföda andrö simane nifabuʼu Yehowa. Imane sanura buku Zinunö, ”Yaʼahowu niha . . . sanötöna khö Yehowa Lowalanginia, . . . Lowalangi si lö faröi.”​—Si. 146:5, 6.