Hana Wa Lö Fasuwö Ita Iadaʼa Simane Iraono Gizaraʼeli Me Föna?
”NA SO manö samösa ba gotaluami zi lö omasi fasuwö ba wolawa Prancis mazui Inggris hasambalö wa si mate ami fefu!” Daʼö wehede zi samösa saradadu Nazi khö ndra si sambua ngawawa ndra Samaduhuʼö Yehowa me alua Wasuwöta Gulidanö II. Hewaʼae so ndra saradadu si zizio ba zingara ba no lagogohe wana, samösa lö hadöi ira talifusöda somasi möi fasuwö. Sindruhu-ndruhu wa lö khöra faʼataʼu! Salua andre zangoromaʼö hewisa dödö ndra Samaduhuʼö Yehowa sanandrösa ba wasuwöta yaʼia daʼö: Lö fao ita fasuwö ba lö faʼawö dambai ita ba ngawalö zalua ba gulidanö andre hewaʼae na tola manö teʼala waʼaurida.
Hewaʼae simanö, lö fefu niha sangotöigö niha Keriso, fao dödöra ba lala wangera-ngerada. Moloʼö yaʼira, tola fasuwö niha Keriso ba lö tola löʼö laʼoʼawögö soira. Te so zangumaʼö, ’Ono mbanua Lowalangi ae ndraono Gizaraʼeli me mböröta, ba hana wa tola fasuwö ira? Na simanö, hana wa tebai fasuwö ita iadaʼa?’ Hadia tabeʼe fanema li? Tola tatutunö khöra wa faböʼö zalua ba ndraono Gizaraʼeli mböröta faoma ba götöda iadaʼa. Datafaigi lima ngawalö gamaehutania.
1. ME MBÖRÖTA HA SAMBUA SOI NONO MBANUA LOWALANGI
Me mböröta, so sambua soi nifili Lowalangi tobali ono mbanuania yaʼia daʼö iraono Gizaraʼeli. Ifotöi ira ”okhötagu si tohude, nifili moroi ba ngawalö soi fefu”. (2 Mo. 19:5) So göi mbanua nibeʼe Lowalangi khöra si tobali nahia waʼatoröira. Börö daʼö, me iʼandrö Lowalangi ba ndraono Gizaraʼeli enaʼö fasuwö ira ba wolawa soi böʼö, lö hadöi ono mbanua Lowalangi si tobali udura. *
Iadaʼa, ato nono mbanua Lowalangi ”moroi ba ngawalö soi, mado, banua, hegöi li”. (Fam. 7:9) Börö daʼö, na fao ira fasuwö tola manö lalawa ba labunu dalifusöra si sara lala wamati khöra.
2. FASUWÖ NDRAONO GIZARAʼELI BÖRÖ ME YEHOWA ZANGUMAʼÖ KHÖRA
Me mböröta, Yehowa zotatugöi hadia möi fasuwö ndraono Gizaraʼeli mazui löʼö ba hawaʼara lafalua daʼö. Duma-dumania, no irai iwaʼö Lowalangi ba ndraono Gizaraʼeli enaʼö lasuwö niha Ganaʼana börö me omasi ia na tehuku niha Ganaʼana andrö. Lafosumange malaʼika si lö sökhi ira niha Ganaʼana. Lafalua gamuata wohorö ba labaliʼö sumange ndraonora khö lowalangi faya. Börö daʼö, edöna Yehowa ba wangohori fondrönisi dödö si lö sökhi andrö ba soi si no ifabuʼu ba ndraono Gizaraʼeli. (3 Mo. 18:24, 25) Ba gafuriata me no ofeta ndraono Gizaraʼeli ba Danö Amabuʼula, so mato hauga kali itehegö khöra Yehowa weʼamöi fasuwö enaʼö lö larabu danöra andrö si faʼudu khöra ba sedöna mamakao yaʼira. (2 Sa. 5:17-25) Hewaʼae simanö, lö irai itehegö Yehowa fasuwö ndraono Gizaraʼeli na lö niwaʼönia. Na möi ira fasuwö hizaʼi lö niwaʼö Yehowa, lua-luania asese kala ira.—4 Mo. 14:41-45; 2 Ng. 35:20-24.
Iadaʼa, lö irai iʼandrö Yehowa ba niha enaʼö fasuwö ira. Na simanö, wa fasuwö soi iadaʼa börö me ha tana khöra laʼalui. Duma-dumania enaʼö itugu ebolo mbanua nifatöröra, enaʼö tedou waʼakayora mazui börö me moʼamakhaita ba politik. Hewisa niha si möi fasuwö sangogunaʼö töi Lowalangi ba wangoʼawögö agamara mazui ba wamunu udu Lowalangi? Lö irai iʼandrö khöra Yehowa wamalua daʼö. Hasambalö ilumöʼö nono mbanuania ba ihori fefu zi faʼudu khönia ba Hamagedo. Alua dania daʼö ba zi so miföna. (Fam. 16:14, 16) Ba luo daʼö, ha saradadu Lowalangi moroi ba zorugo zi fasuwö. Lö fao nono mbanua Lowalangi ba gulidanö ba wasuwöta daʼö.—Fam. 19:11-15.
3. IRAONO GIZARAʼELI LÖ LABUNU NIHA SAMATI
Me mböröta, me lasuwö mbanua Yerikho iraono Gizaraʼeli, lö labunu Rakhaba hegöi ösi nomonia. Iadaʼa ato niha samati si mate börö wasuwöta.
Me mböröta, awai nibunu ndra saradadu ndraono Gizaraʼeli ha niha sinangea tehori ba wamaigi Yehowa. Hizaʼi laforomaʼö waʼahakhö dödö ba niha samati khö Lowalangi. Nehegö zi dombua duma-duma andre. Me iʼandrö Yehowa ba ndraono Gizaraʼeli enaʼö ladudugö mbanua Yerikho, lö labunu Rakhaba hegöi ösi nomonia börö me mamati Rakhaba andrö. (Yos. 2:9-16; 6:16, 17) Ba gafuriata, fefu niha Gibeona lö tehori ira börö me lafosumange Lowalangi.—Yos. 9:3-9, 17-19.
Iadaʼa, ira saradadu si möi fasuwö labunu gofu haniha manö. Lua-luania farahu ba daʼö niha samati hegöi niha si toʼölö manö si tenga saradadu.
4. NA MÖI FASUWÖ NDRAONO GIZARAʼELI LÖ TOLA LÖʼÖ LAʼOʼÖ GAMAKHOITA LOWALANGI
Me mböröta, na möi fasuwö ndraono Gizaraʼeli hasambalö laʼoʼö nifakhoi Yehowa. Duma-dumania, so mato hauga kali iʼandrö khöra Lowalangi enaʼö ’lafatunö ba mbanua nisuwöra hadia lala nitörö enaʼö atulö ira’. (5 Mo. 20:10) Baero daʼö, moguna göi larorogö mbotora faböi raʼiö ba enaʼö lö taʼunö nosera. (5 Mo. 23:9-14) Moguna göi laʼoʼö goi-goi Yehowa sanandrösa ba gamuata. Sasesenia, ira saradadu ba zi fasuira lahoröni ndra alawe niʼoloiʼö moroi ba mbanua si no lakalaisi, hizaʼi lö itehegö Yehowa na lafalua daʼö iraono Gizaraʼeli. Na omasi ira lahalö tobali foʼomora ndra alawe niʼoloiʼö moroi ba zi sambua banua, moguna ua labaloi sara waŵa iʼotarai me no lakalaisi mbanua daʼö.—5 Mo. 21:10-13.
Iadaʼa, oya soi si no maneka sura buʼusa li internasional yaʼia daʼö amakhoita ba wolumöʼö ono mbanua na alua wasuwöta ba zi sambua banua. Hizaʼi, asese sibai lasawö gamakhoita daʼö.
5. NA MÖI FASUWÖ NDRAONO GIZARAʼELI, LOWALANGI ZANOLO YAʼIRA
Me mböröta, Lowalangi zanolo iraono Gizaraʼeli me lasuwö mbanua Yerikho. Iadaʼa lö hadöi soi nitolo Yehowa na möi ira fasuwö.
Me mböröta, Yehowa zanolo iraono Gizaraʼeli na möi ira fasuwö ba asese ifalua dandra sahöli-höli dödö enaʼö möna ira. Duma-dumania, itolo ira Yehowa ba wokalaisi banua Yerikho. Tefaudu simane niwaʼö Yehowa, ”muʼao [ndraono Gizaraʼeli] tandra wa labörögö fasuwö” ba ”iʼanemaiʼö adudu mbanua daʼö fadaya tou ba danö”. Daʼa zanolo yaʼira irege aoha khöra ba worabu banua andrö. (Yos. 6:20) Itolo göi nono mbanuania Yehowa ba wokalaisi niha Gamori. ”Ihawui ira kara segebua Yehowa” ba ”abölö oya zi mate ba deu kara andrö moroi ba wöda ndraono Gizaraʼeli”.—Yos. 10:6-11.
Iadaʼa, lö hadöi soi nitolo Yehowa na möi ira fasuwö. Famatörö Lowalangi andrö nifatörö Yesu si tobali razo ”tenga moroi ba gulidanö andre”. (Yoh. 18:36) Hizaʼi, fefu wamatörö niha gulidanö no so ira barö wamatörö Zatana. Fasuwöta salua iadaʼa, daʼö zangoromaʼö wa lö sökhi zamatörö yaʼia.—Luk. 4:5, 6; 1 Yo. 5:19.
LAFOREGE IRA NIHA KERISO ENAʼÖ SO WAʼATULÖ
Simane si no tatutunö, lö saʼae fao ita fasuwö börö me faböʼö zalua ba götöda andre moroi ba ndraono Gizaraʼeli mböröta. Hizaʼi so mbörö tanö böʼö nasa. Duma-dumania, no iwaʼö Lowalangi wa niha nifahaʼönia ba ginötö safuria andre ”lö saʼae lafomaha ira fasuwö”, eluahania lö fao ira ba wasuwöta. (Yes. 2:2-4) Baero daʼö, iwaʼö Keriso wa ira nifahaʼönia ”tenga tana khö niha gulidanö”. Börö daʼö, lö faʼawö dambai ira ba ngawalö zalua ba gulidanö andre.—Yoh. 15:19.
Lö omasi Keriso na fao ba wasuwöta niha soloʼö khönia. Iʼandrö göi khöra enaʼö laʼaröuʼö ira moroi ba gamuata si tola mangandrö fönura, faʼafatuwu ba niha böʼö hegöi fasuwöta. (Mat. 5:21, 22) Iʼandrö göi khöra enaʼö ’laʼasogö waʼatulö’ ba laʼomasiʼö zi faʼudu khöra.—Mat. 5:9, 44.
Hewisa ita zamösana? Te lö omasi ita fasuwö, hizaʼi hadia so nasa ba dödöda waʼafatuwu irege taʼuduni zi samösa talifusöda bakha ba mbanua niha Keriso? Dataforege wangeheta amuata daʼö bakha ba dödöda.—Yak. 4:1, 11.
Ba daʼa aboto ba dödöda wa tebai fao ita ba wasuwöta salua ba gulidanö andre, hizaʼi taforege wolohi faʼatulö ba faoma taʼomasiʼö nawöda zamösana. (Yoh. 13:34, 35) Datahalö gangetula wa lö faʼawö dambai ita ba tabaloi ginötö nitatugöi Yehowa ba wombatogö fasuwöta salua ba zi sagörö ulidanö.—Si. 46:9.
^ Itaria faoma lasuwö nawöra iraono Gizaraʼeli, hewaʼae na sindruhunia lö omasi Yehowa wasuwöta simane daʼö. (1 Ra. 12:24) Hizaʼi, mato hauga kali itehegö wasuwöta simane daʼö Yehowa börö me so mado ndraono Gizaraʼeli solawa yaʼia ba lafalua horö sebua.—Sangu. 20:3-35; 2 Ng. 13:3-18; 25:14-22; 28:1-8.
Te Göi Adöni Dödöu
SASESE LASOFU NIHA
Hana Lö Fao ba Wasuwöta Ndra Samaduhuʼö Yehowa?
Ira Samaduhuʼö Yehowa ba zi sagörö ulidanö lö fao ira ba wasuwöta. Datafaigi hadia mbörö wa lö fao ira ba wasuwöta.
