1. Hewisa wamaigi niha sato faʼatua-tua moroi ba Zura Niʼamoniʼö? (Amaedola 1:20, 21)

 BA SOI böʼö, asese taʼila mozizio ndra talifusöda ba ngai lala ba nahia sasese latörö niha. Laboho mbawa ba labeʼe mbuku ba niha somasi mombaso. Hadia no irai fao ndraʼugö ba halöwö fanuriaigö simane daʼö? Na noa, tatu itörö tödöu ngawua wehede si tesura ba mbuku Gamaedola yaʼia daʼö: Muʼao waʼatua-tua ba watalinga lala nitörö niha sato. (Baso Gamaedola 1:20, 21.) Ba Zura Niʼamoniʼö hegöi publikasida, tesöndra ”waʼatua-tua sindruhu” yaʼia daʼö faʼatua-tua moroi khö Yehowa. Daʼa waʼatua-tua si lö tola löʼö laʼokhögö niha enaʼö lasöndra waʼauri si lö aetu. Tatu omuso dödöda na so niha somasi manema publikasida. Hizaʼi, lö fefu niha omasi ira latema. So ösa zi lö omasi mamahaʼö yaʼira ba Zura Niʼamoniʼö. So göi zangoʼaya yaʼita börö me lawaʼö tödöra wa buku si no atua Zura Niʼamoniʼö andrö. Tanö böʼönia, laʼokhögö lala wangera-ngera si lö tefaudu ba goi-goi Zura Niʼamoniʼö sanandrösa ba gamuata. Moloʼö yaʼira, niha soloʼö goi-goi daʼö ha niha si lö faʼomasi ba sangosamati. Hizaʼi, si fao faʼomasi lö tebulö ihenaigö Yehowa waʼatua-tua daʼa ba niha sato. Hewisa wamaluania daʼö?

2. Hadia lala niʼogunaʼö Yehowa ba wohenaigö faʼatua-tua sindruhu iadaʼa, hizaʼi hadia nifili niha sato?

² Sambua lala niʼogunaʼö Yehowa ba wohenaigö faʼatua-tua sindruhu yaʼia daʼö Taromalinia Sura Niʼamoniʼö. Tehenaigö daʼa ba niha fefu. Baero daʼö, börö howu-howu moroi khö Yehowa, no tehenaigö publikasi si teʼodane-dane ba  Zura Niʼamoniʼö ba zi töra 1.000 ngawalö li. Tola latema mbua dozi samondrongo, yaʼia daʼö sombaso ba samalua famahaʼö si no latema. Hizaʼi, ato niha si lö omasi. Ba ginötö lahalö gangetula, abölö laʼodaligö nifakhoi dödöra samösa mazui bua gera-era nawöra niha. Tola manö göi laʼosiwawöi ita börö me taʼoʼö mene-mene Zura Niʼamoniʼö. Ba artikel daʼa dania, tatutunö hana wa tola simane daʼö ira. Hizaʼi, siföföna sibai datatutunö hewisa enaʼö tola taʼokhögö waʼatua-tua moroi khö Yehowa.

3. Hadia nifaluada enaʼö tobali ita niha sangokhögö faʼatua-tua sindruhu?

³ Faʼatua-tua yaʼia daʼö faʼonekhe ba wangogunaʼö faʼaboto ba dödö ba wangai angetula si sökhi. Hizaʼi töra moroi ba daʼö waʼatua-tua sindruhu. Imane Sura Niʼamoniʼö, ”Böröta waʼatua-tua, fangataʼufi Yehowa, ba faʼaboto ba dödö sanandrösa khö Wondrege Niʼamoniʼö daʼö wangiʼila.” (Amd. 9:10) Börö daʼö, ero tahalö gangetula sebua ba waʼaurida, moguna ua taʼangeragö lala wangera-ngera Yehowa. Tola tafalua daʼö na tafareso Zura Niʼamoniʼö ba tabaso publikasi si teʼodane-dane ba Zura Niʼamoniʼö. Na tafalua daʼö, no taforomaʼö waʼatua-tua sindruhu.​—Amd. 2:5-7.

4. Hana wa ha Yehowa zi tola mameʼe khöda faʼatua-tua sindruhu?

⁴ Ha Yehowa zi tola mameʼe khöda faʼatua-tua sindruhu. (Rom. 16:27) Hana tola tawaʼö wa Yehowa andrö Umbu waʼatua-tua? Si oföna, yaʼia andrö Somböi ba aboto ba dödönia fefu niwöwöinia. (Si. 104:24) Si dua, oroma waʼatua-tua Yehowa ba ngawalö nifaluania. (Rom. 11:33) Si tölu, dozi sanemaʼö faʼatua-tua Yehowa hasambalö latema mbua na laʼoʼö daʼö. (Amd. 2:10-12) Enaʼö tola taʼokhögö waʼatua-tua sindruhu, moguna tafaduhusi tödö dane-dane si tölu ngawalö andrö, ba taʼogunaʼö daʼö tobali fanuturu lala ba wangai angetula hegöi ba ngawalö nifaluada.

5. Hadia zalua ba niha sanimbagö faʼatua-tua sindruhu moroi khö Yehowa?

⁵ Ato niha sahöli-höli tödö ba waʼasökhi mbanua si yawa awö danö, hizaʼi lö faduhu dödöra wa so Zomböi ba lawaʼö wa so manö daʼö fefu börö evolusi. So göi danö böʼö zi faduhu tödö wa so Lowalangi, hizaʼi lö laʼoʼö goi-goi Zura Niʼamoniʼö börö me lawaʼö tödöra ha me föna moguna daʼö, ba abölö laʼoʼö nifakhoi dödöra samösa. Hadia lua-luania? Hadia abölö sökhi zalua ba gulidanö börö me laʼodaligö waʼatua-tuara samösa moroi ba waʼatua-tua Lowalangi? Hadia no lasöndra waʼohahau dödö sindruhu ba laʼokhögö dötönafö saro ba zi so miföna? Löʼö. Na tanehegö zalua ba zi fasuida, daʼa zameʼe khöda faʼaro dödö wa ”lö hadöi mene-mene mazui faʼaboto ba dödö, mazui faʼatua-tua sindruhu si tola muʼogunaʼö ba wolawa Yehowa”. (Amd. 21:30) Daʼa mbörö wa lö tebulö taʼandrö khö Yehowa enaʼö ibeʼe khöda waʼatua-tua sindruhu! Hizaʼi, hadia mbörö wa ato niha si lö omasi?

6. Moloʼö Amaedola 1:22-25, haniha manö zi lö omasi mamondrongo faʼatua-tua sindruhu?

⁶ Ato niha si lö omasi mamondrongo na ”muʼao ba lala waʼatua-tua sindruhu”. Moloʼö Sura Niʼamoniʼö, so tölu ngawawa niha si lö omasi manemaʼö faʼatua-tua sindruhu yaʼia daʼö niha ”si lö faʼaboto ba dödö”, ”sangoʼaya”, ba ”niha si bodo”. (Baso Gamaedola 1:22-25.) Datatutunö hadia mbörö wa latimbagö waʼatua-tua sindruhu ba hewisa enaʼö lö tafalua zimane daʼö.

7. Hana wa so ösa niha si lö omasi mangokhögö faʼaboto ba dödö?

 ⁷ Niha ”si lö faʼaboto ba dödö” faduhu dödönia ba ngawalö nirongonia ba aoha sibai telimo ia. (Amd. 14:15.) Asese falukha ita ba niha simane daʼö ba wanuriaigö. Duma-dumania, zuta niha nilimo ndra sondröniaʼö ba agama hegöi sondröniaʼö ba politik. So ösa ba gotaluara zi tokea börö me laʼila ba gafuriata wa no lalimo ira. Hizaʼi, niha nitötöi ba Gamaedola 1:22, ifili samösa wa lö omasi ia iʼokhögö waʼaboto ba dödö. (Yer. 5:31) Lafalua zomasi-masi dödöra ba lö omasi ira laʼila hadia nifahaʼö Zura Niʼamoniʼö hegöi goi-goi si so ba daʼö. Ato ba gotaluara zorasoi simane nitutunö zi samösa ira alawe samati si so ba Quebec, Kanada. Imane khö zi samösa talifusöda, ”Na ilimo ndraʼaga sondröniaʼö ba agama, horönia samösa daʼö tenga horöma!” Tatu lö omasi ita taʼoʼö niha si lö omasi mangokhögö faʼaboto ba dödö!​—Amd. 1:32; 27:12.

8. Hadia zanolo yaʼita enaʼö tasöndra waʼaboto ba dödö?

⁸ Ifarou ita Sura Niʼamoniʼö enaʼö böi tobali ita niha si lö faʼaboto ba dödö, hizaʼi enaʼö ’tobali ita satua ba wangera-ngera’. (1 Ko. 14:20) Tola taʼokhögö waʼaboto ba dödö na tafalua goi-goi Zura Niʼamoniʼö ba waʼaurida. Na tafalua daʼö, tarasoi samösa wa tobali fanoloda Zura Niʼamoniʼö enaʼö lö göna ita abula dödö ba tola göi tahalö gangetula si sökhi. Moguna tafareso gangetulada ero inötö. Duma-dumania, na no ara tafahaʼö ita ba Zura Niʼamoniʼö ba asese möi ita ba gangowuloa, moguna tasofu khöda samösa: Hana nasa wa lö ululu waʼaurigu khö Yehowa ba tebayagö ndraʼo idanö? Na no tebayagö ita idanö, hadia taforomaʼö waʼatedouda ba wamahaʼö hegöi ba wanuriaigö turia somuso dödö? Hadia oroma ba gangetula nihalöda wa taʼodaligö goi-goi Zura Niʼamoniʼö? Hadia no tafalua zi sökhi simane nifalua Yesu ba niha böʼö? Na taʼila wa so nasa zinangea tadouʼö, moguna taʼameʼegö tödö wamasugi ba dödö nibeʼe Yehowa ’samofaʼatua-tua zambö tödö’.​—Si. 19:7.

9. Hewisa wangoromaʼö niha ”sangoʼaya” wa latimbagö waʼatua-tua?

⁹ Ngawawa si dua sanimbagö faʼatua-tua moroi khö Lowalangi yaʼia daʼö niha ”sangoʼaya”. Itaria falukha ita ba niha simane daʼö ba halöwö fanuriaigö. Omasi sibai ira laʼoʼaya niha böʼö. (Si. 123:4) Ifangelama ita Sura Niʼamoniʼö ba ginötö safuria dania ato zangoʼaya. (2 Fe. 3:3, 4) Hulö simane umönö Loti, so ösa niha ba götöda andre lö laʼameʼegö tödö wamangelama moroi khö Lowalangi. (1 Mo. 19:14) Laʼoʼaya niha samaudugö faʼaurira ba goi-goi Zura Niʼamoniʼö. Terou dödöra wamalua daʼö börö me ”lafalua zi lö sökhi somasi dödöra”. (Yud. 7, 17, 18) Iwaʼö Sura Niʼamoniʼö wa amuata ndra sangoʼaya andrö fagölö ira gamuata niha sangerogö sindruhu mazui sanimbagö Yehowa!

10. Moloʼö Sinunö 1:1, hewisa enaʼö lö tatörö lala niha sangoʼaya?

¹⁰ Hewisa enaʼö lö tatörö lala niha sangoʼaya? Yaʼia daʼö na lö fariawö ita ba niha si fabuʼa-buʼa. (Baso Zinunö 1:1.) Eluahania, lö tafondrondrongo mazui tabaso ngawalö hadia ia nifazökhi niha sondröi sindruhu. Na lö mangelama ita, tola tedönisi dödöda irege tobali ita niha si fabuʼa-buʼa ba ibörötaigö aombö dödöda khö Yehowa hegöi ba wanuturu lala nibeʼe organisasinia. Enaʼö lö alua khöda zimane daʼö, datasofu khöda samösa, ’Hadia mukökö-kökö ndraʼo na so wanuturu lala si bohou mazui famohouni? Hadia uʼosambuaʼö dödögu ba zala nifalua ndra talifusö sondröniaʼö ba gangowuloa?’  Na iʼanemaiʼö tabulöʼö lala wangera-ngera simane daʼö, omuso dödö Yehowa ba nifaluada.​—Amd. 3:34, 35.

11. Hewisa wamaigi ”niha si bodo” goi-goi Yehowa sanandrösa ba gamuata?

¹¹ Ngawawa si tölu sanimbagö faʼatua-tua sindruhu yaʼia daʼö ”niha si bodo”. Bodo ira börö me lö omasi ira laʼoʼö goi-goi Lowalangi sanandrösa ba gamuata, hizaʼi lafalua zomasi-masi dödöra. (Amd. 12:15) Niha simane daʼö, latimbagö Yehowa Umbu waʼatua-tua. (Si. 53:1) Na falukha ita khöra ba wanuriaigö, asese fabuʼa-buʼa ira khöda börö me tafaudugö waʼaurida ba goi-goi Zura Niʼamoniʼö. Hizaʼi, tebai labeʼe khöda goi-goi sabölö sökhi, solohe faʼomuso dödö. Imane Sura Niʼamoniʼö, ”Tebai isöndra waʼatua-tua sindruhu niha si bodo. Lö hadöi si tola iwaʼö ba mbawa göli.” (Amd. 24:7) Niha si bodo, lö iʼila ibeʼe khöda mene-mene si sökhi. Daʼö mbörö wa ifangelama ita Yehowa enaʼö ’taʼaröuʼö ita ba niha si bodo’!​—Amd. 14:7.

12. Hewisa enaʼö lö taʼoʼö nifalua niha si bodo?

¹² Lö omasi ita taʼoʼö nifalua niha sanimbagö mene-mene moroi khö Lowalangi. Hizaʼi tafahaʼö ita ba wangomasiʼö lala wangera-ngera Lowalangi, tefarahu ba daʼö fefu goi-goinia. Tola taʼaroʼö waʼomasida na tafaehusi lua-lua nitema niha si lö moloʼö ba mbua nitema niha soloʼö. Nehegö hawaʼoya gabula dödö salua ba niha sanimbagö mene-mene si sökhi moroi khö Yehowa. Aefa daʼö, angeragö göi hawaʼasökhi waʼauri niha soloʼö goi-goi moroi khö Lowalangi.​—Si. 32:8, 10.

13. Hadia ifaso ita Yehowa ba woloʼö mene-menenia?

¹³ No ihenaigö Yehowa mene-menenia ba niha fefu, hizaʼi lö ifaso ira ba wanemaʼö daʼö. Hewaʼae simanö, no itutunö hadia manö zalua ba niha si lö omasi manemaʼö mene-mene nibeʼenia. (Amd. 1:29-32) Niha si lö omasi manemaʼö mene-mene moroi khö Yehowa, ”lataögö lua-lua gamuatara”. Börö lala waʼauri nifilira, oya gabula dödö hegöi famakao salua khöra. Ba gafuriata dania ihori ira Yehowa. Hizaʼi, niha samondrondrongo mene-mene moroi khö Yehowa ba samalua daʼö, latema dania nifabuʼu andre, ”Lö ametaʼuö si göna niha samondrondrongo fehedegu ba lö ataʼu ia na so wamakao.”​—Amd. 1:33.

14-15. Hadia wamahaʼö nihalöda ba Gamaedola 4:23?

¹⁴ Na taʼoʼö mene-mene Lowalangi, hasambalö tatema mbuania. Simane si no tatutunö, no ihenaigö mene-mene andrö Yehowa ba niha fefu. Duma-dumania, ba mbuku Gamaedola, no ibeʼe mene-mene si sökhi si tola mangaʼazökhi faʼaurida. Datatutunö öfa ngawalö duma-duma moroi ba mene-mene andrö.

¹⁵ Rorogö dödömö. Imane Sura Niʼamoniʼö, ”Moroi ba ngawalö nirorogö maʼafefu,  siaʼania faigi-faigi dödöu, börö me khönia iʼotarai faʼauri.” (Amd. 4:23) Angeragö hadia nifaluada ba wondrorogö tödöda. Moguna taʼa gö si sökhi, talau faʼolahraga ba lö tafalua zi möi famakiko mbotoda. Moguna göi tafalua zimane daʼö ba wondrorogö tödöda ba wamati. Tabaso Daromali Lowalangi ero maʼökhö, tafaʼanö ita weʼamöi ba gangowuloa hegöi ba wameʼe bua gera-era, ba lö taböhöli wamalua halöwö fanuriaigö. Tatimbagö göi fefu gamuata si raʼiö ba tarorogö enaʼö lö taʼunö wangera-ngerada moroi ba hiburan sondrönisi tödöda ba wamalua fohorö hegöi fariawösa si lö sökhi.

16. Hadia mbuania na taʼoʼö mene-mene ba Gamaedola 23:4, 5?

¹⁶ Yaʼahono dödöu ba zi no so. Ibeʼe khöda mene-mene si sökhi andre Sura Niʼamoniʼö, ”Böi eregesi dödöu ba wolohi faʼakayo. . . . Awena sibai öʼila ia ba no taya, faʼakayomö andrö ibologö gafinia hulö moyo ba muhombo ia ba dalu mbanua.” (Amd. 23:4, 5) Alio sibai wangohori kefe mazui okhöta. Hewaʼae simanö, ato niha si kayo hegöi si numana samorege ba wangalui kefe. Daʼö mbörö wa asese sibai lafalua zi möi famakiko mbotora, töi si sökhi hegöi fahuwusara ba niha böʼö. (Amd. 28:20; 1 Ti. 6:9, 10) Hizaʼi, tola itolo ita faʼatua-tua moroi khö Lowalangi enaʼö taʼokhögö wangera-ngera satulö sanandrösa ba gefe. Daʼö göi zanolo yaʼita enaʼö lö khöda fakhögusa, ba tarasoi waʼahono dödö hegöi faʼomuso dödö.​—Sango. 7:12.

17. Hewisa enaʼö taʼokhögö ”lela niha satua-tua” simane nitutunö ba Gamaedola 12:18?

¹⁷ Angeragö fatua lö fahuhuoʼö. Na lö mangelama ita ba wehededa tola manö alua gabula dödö sebua. Imane Sura Niʼamoniʼö, ”Hulö nikhu gari wehede si lö fakhamö muʼangeragö, hizaʼi lela niha satua-tua tobali dalu-dalu.” (Amd. 12:18) Enaʼö tola taʼokhögö wahuwusa si sökhi, böi tadunö-dunö zala nifalua niha böʼö. (Amd. 20:19) Na omasi ita enaʼö möi fondrara dödö niha wehededa tenga fangafökhö dödö, moguna asese tabaso  Zura Niʼamoniʼö ba taʼangerönusi daʼö. (Luk. 6:45) Na taʼangerönusi hadia niwaʼö Zura Niʼamoniʼö, tola tobali simane ’ungo nidanö samangele faʼatua-tua’ wehededa si möi fangokafu dödö niha böʼö.​—Amd. 18:4.

18. Hewisa goi-goi si so ba Gamaedola 24:6 möi fanoloda ba wamalua halöwö fanuriaigö?

¹⁸ Oʼö wanuturu lala nibeʼe organisasi. Enaʼö tola mofozu ita, iʼamenesi ita Sura Niʼamoniʼö, ”Oʼö wanuturu lala si sökhi ba ginötö fasuwö, ba so waʼamöna na ato zanuturu lala.” (Amd. 24:6) Angeragö hewisa wa tobali fanolo khöda ayati daʼa enaʼö tobali ita sanuriaigö hegöi samahaʼö sabölö sökhi. Moroi na taʼodaligö waʼatua-tuada samösa ba wamalua fanuriaigö, abölö sökhi na taʼoʼö wanuturu lala si no labeʼe khöda. Tola tafahaʼö ita moroi khö ndra talifusöda samaʼema huhuo si teʼodane-dane ba Zura Niʼamoniʼö mazui faosatö tanö böʼö ba gangowuloa. Baero daʼö, no göi ihenaigö organisasi fakake si tefaudu simane publikasi hegöi video sanolo niha böʼö enaʼö itugu aboto ba dödöra Zura Niʼamoniʼö. Hadia no öfahaʼö ndraʼugö ba wangogunaʼö fakake andrö fefu?

19. Hewisa dödöu ba waʼatua-tua nibeʼe Yehowa? (Amaedola 3:13-18)

¹⁹ Baso Gamaedola 3:13-18. Taʼandrö sibai saohagölö ba wanuturu lala si sökhi si so ba Daromali Lowalangi! Khalaigö hewisa waʼaurida na lö hadöi mene-mene si sökhi moroi ba Zura Niʼamoniʼö. Tatu lö khöda faʼomuso dödö. Ba artikel daʼa, no tatutunö ösa mene-mene si sökhi si so ba mbuku Gamaedola. Hizaʼi, fahöna nasa mene-mene simane daʼö moroi khö Yehowa ba mbuku tanö böʼö si so ba Zura Niʼamoniʼö. Datahalö gangetula ba wamalua mene-mene daʼa ba waʼaurida sero maʼökhö. Hewaʼae na latimbagö niha waʼatua-tua moroi khö Lowalangi, hizaʼi faduhu dödöda wa hasambalö ”ohahau dödö niha sangaʼaroʼö ba wangolembai [faʼatua-tua]”.