1. Hadia geluahania ”soguna ba wamati”, ba hadia gamakhaitania ba waʼomuso dödö?

 FAʼOMUSO DÖDÖ sindruhu tenga faʼowua-wua dödö nirasoi ba zi sabata ba aefa daʼö taya. Hizaʼi, tola irasoi daʼö niha sandrohu faʼaurinia. Hewisa lalania? Itutunö daʼa Yesu ba Huhuo ba Hili. Imane, ”Yaʼahowu niha soʼameʼegö tödö soguna ba wamati.” (Mat. 5:3) Iʼila Yesu wa no tebeʼe wehulu dödö ba niha me muwöwöi ira enaʼö aboto ba dödöra ba lafosumange Zomböi yaʼira, Lowalangi Yehowa. Daʼö geluaha ”soguna ba wamati”. Börö me ”Lowalangi somuso tödö” Yehowa, andrö göi wa tola laʼokhögö waʼomuso dödö ira niha samosumange yaʼia.​—1 Ti. 1:11.

2-3. (a) Moloʼö Yesu, haniha nasa zomuso tödö? (b) Hadia nitutunöda ba artikel daʼa, ba hana wa moguna daʼö?

² Hadia awena tarasoi waʼomuso dödö na lö abula dödö salua khöda? Löʼö. Ba huhuonia, iwaʼö Yesu wa ”niha sabu tödö” mazui niha sanaögö abula dödö sebua ba safatö tödö börö zala nifaluara, tola larasoi waʼomuso dödö. Iwaʼö göi Yesu wa ”niha nifakao ba zindruhu” mazui niha ’niʼoʼaya’ börö woloʼö Keriso, tola larasoi waʼomuso dödö. (Mat. 5:4, 10, 11) Hizaʼi, hewisa enaʼö sindruhu-ndruhu tarasoi waʼomuso dödö na alua zimane daʼö?

³ Ifahaʼö ita Yesu wa tola tarasoi waʼomuso dödö tenga börö me lö hadöi abula dödöda, hizaʼi börö me no tebönökhi zoguna khöda ba wamati ba taʼokhögö wahuwusa saro khö Lowalangi.  (Yak. 4:8) Ba artikel daʼa, tatutunö dania tölu lala si tola tafalua enaʼö tasöndra waʼomuso dödö sindruhu.

4. Hadia lala si oföna sinangea tafalua enaʼö tarasoi waʼomuso dödö sindruhu? (Sinunö 1:1-3)

⁴ LALA SI 1: Moguna tabaso ba tafahaʼö ita ba Daromali Lowalangi. Ifagölösi Daromali Lowalangi andrö Yesu hulö simane ö. Niha hegöi urifö moguna manga ira enaʼö auri. Hizaʼi, ha yaʼita niha zi tola mombaso Taromali Lowalangi, ba moguna khöda daʼö. Andrö wa imane Yesu, ”Tenga ha ba gönia auri niha, hizaʼi ba ngawalö li si otarai mbawa Yehowa.” (Mat. 4:4) Daʼö mbörö wa lö tatehegö numalö zi maʼökhö na lö tabaso Daromali Lowalangi yaʼia daʼö Sura Niʼamoniʼö. Imane sanura sinunö, ’Yaʼahowu niha sangomasiʼö ba sombaso oroisa Yehowa bongi maʼökhö.’​—Baso Zinunö 1:1-3.

5-6. (a) Hadia zi tola tafahaʼö yaʼita ba Zura Niʼamoniʼö? (b) Hadia mbuania na tabaso Zura Niʼamoniʼö?

⁵ Si fao faʼomasi ifatunö khöda Yehowa ba Zura Niʼamoniʼö hadia zinangea tafalua enaʼö tasöndra waʼomuso dödö ba waʼauri. Ba daʼö tafahaʼö ita hadia lua-lua waʼaurida andre, hewisa enaʼö tobali ita si fahuwu khö Lowalangi ba hadia nifaluada enaʼö iʼefaʼö horöda. Tafahaʼö göi ita sanandrösa ba dötönafö sahöli-höli dödö nifabuʼunia khöda ba zi so miföna. (Yer. 29:11) Sindruhu nisöndrada ba Zura Niʼamoniʼö, daʼö zameʼe khöda faʼomuso dödö!

⁶ Oya göi mene-mene si sökhi ba Zura Niʼamoniʼö soguna ba waʼaurida sero maʼökhö. Na  taʼoʼö mene-mene daʼö tola tarasoi waʼomuso dödö. Ero örasoi waʼafatö dödö börö gabula dödö salua, beʼe ginötömö ba wombaso Taromali Yehowa ba angerönusi daʼö. Imane Yesu, ”Nifahowuʼö yaʼia daʼö, samondrongo ba samalua taromali Lowalangi!”​—Luk. 11:28.

7. Hewisa enaʼö sindruhu-ndruhu ötema mbua ba wombaso Taromali Lowalangi?

⁷ Na öbaso Zura Niʼamoniʼö, fili ginötö si tefaudu, böi mangaösö-ngaösö dödömö. Duma-dumania: Te so niha sondrino ö somasiʼö. Hizaʼi, börö me aösö-aösö ndraʼugö mazui so niʼera-erau tanö böʼö, lua-luania ötölö manö gö daʼö ba lö örasoi hewisa waʼaminia. Me no aefa öʼa, ifuli maniasa ndraʼugö börö me lö ödaʼi-daʼi wemanga ba lö öhaogö worasoi waʼaminia. Na simanö, hadia no irai göi aösö-aösö ndraʼugö wombaso Sura Niʼamoniʼö irege lö aboto ba dödöu nösinia? Tobali, beʼe ginötöu ba wombaso Taromali Lowalangi. Khalaigö hadia zalua hegöi note wahuhuosa niha si so ba daʼö, ba angerönusi hadia nibasomö. Na öfalua daʼö, tola monönö waʼomuso dödömö.

8. Hewisa ”zawuyu si lö faröi ba satua-tua” ba wamalua halöwöra? (Faigi göi nisura ba gahe zura.)

⁸ Yesu zamataro ira ’sawuyu si lö faröi ba satua-tua’ ba wohenaigö ö ba wamati ba ginötö si tefaudu. Buania, lö irai moʼamböta ita ba gö wamati. * (Mat. 24:45) Taromali zi tobali dane-dane ba ngawalö gö wamati nihenaigö ndra sawuyu si lö faröi. (1 Te. 2:13) Tobali, ö ba wamati andrö zanolo yaʼita enaʼö aboto ba dödöda lala wangera-ngera Yehowa nitutunönia ba Zura Niʼamoniʼö. Daʼö mbörö wa moguna tabaso majalah Manuriaigö hegöi Faoso! mazui artikel si so ba jw.org. Tafaʼanö göi ita weʼamöi ba gangowuloa barö migu hegöi ba ngaluo migu. Tafaigi göi acara JW Broadcasting^® ero waŵa na no tehenaigö daʼö ba li niʼilada. Na lö taböhöli wemanga gö ba wamati, tola tafalua lala si dua ba wanöndra faʼomuso dödö.

9. Hadia lala si dua sinangea tafalua enaʼö tasöndra waʼomuso dödö sindruhu?

⁹ LALA SI 2: Moguna tafaudugö waʼaurida ba goi-goi Yehowa. Imane sanura sinunö, ”Yaʼahowu niha sangataʼufi Yehowa, sanörö lalania.” (Si. 128:1) Fangataʼufi Yehowa eluahania tafosumange ia ba lö tafalua hadia ia zangafökhöiʼö tödönia. (Amd. 16:6) Börö daʼö, moguna taforege ba woloʼö goi-goi Lowalangi sanandrösa ba zatulö hegöi si lö atulö, simane si no itutunö ba Zura Niʼamoniʼö. (2 Ko. 7:1) Na tafalua zomasi Yehowa ba taʼaröuʼö ita ba zi fatuwu ia, hasambalö itugu tarasoi waʼomuso dödö.​—Si. 37:27; 97:10; Rom. 12:9.

10. Moloʼö Roma 12:2, hadia zinangea tafalua?

¹⁰ Baso Roma 12:2. Te aboto ba dödö zi samösa niha wa so kuaso khö Yehowa ba wotatugöi satulö hegöi si lö atulö. Hizaʼi, moguna göi ihalö gangetula ba wanemaʼö hegöi ba woloʼö goi-goi Yehowa. Duma-dumania, te no aboto ba dödö zolohe moto mazui hondra wa so kuaso khö ndra samatörö ba wotatugöi hawaʼabölö-bölö na muʼohe moto mazui hondra. Hizaʼi, na lö fatema ba dödönia daʼö, tatu agabölö-bölö na iʼohe hondra mazui moto. Lö omasi ita simane daʼö. Sindruhu-ndruhu faduhu dödöda wa no fondrege zi sökhi na taʼoʼö goi-goi Yehowa, ba taforomaʼö daʼö ba nifaluada. (Amd. 12:28) Simane daʼö göi nirasoi Dawido irege imane  khö Yehowa, ”Yaʼugö zanuturu lala khögu saekhu ba waʼauri. Omuso sibai dödögu weʼaso tanö fönau; owua-wua dödögu sagötö faʼara na so ndraʼo ba gambölöu.”​—Si. 16:11.

11-12. (a) Na so gabula dödöda mazui afatö dödöda, hadia zinangea taʼangelamaisi? (b) Hewisa goi-goi si so ba Wilifi 4:8 tobali fanolo khöda ba wamili hiburan?

¹¹ Ba ginötö göna ita abula dödö mazui faʼafatö dödö, itaria taʼalui hadia zi tola tafalua enaʼö taya gabula dödöda. Sindruhunia lö fasala daʼö, hizaʼi moguna mangelama ita enaʼö lö tafalua zi fatuwu khö Yehowa.​—Ef. 5:10-12, 15-17.

¹² Ba zura nifaʼoheʼönia ba niha Wilifi, ifarou niha Keriso si so ba daʼö sinenge sotöi Faulo enaʼö lö tebulö lafatou-tou tödöra ’hadia zatulö, hadia zohau-hau, hadia zondrouʼö faʼomasi ba hadia mbua-bua si sökhi’. (Baso Wilifi 4:8.) Hewaʼae tenga sibai sanandrösa ba hiburan nitutunö Waulo ba ayati daʼa, hizaʼi tola taʼoʼö goi-goi daʼö ba wamili hiburan, simane sinunö, film, buku mazui game. Na tafalua daʼö, tola tetolo ita enaʼö taʼila hezo zangomusoiʼö tödö Lowalangi ba hezo zi löʼö. Omasi ita taʼoʼö goi-goi Yehowa salawa ba waʼaurida sero maʼökhö. (Si. 119:1-3) Buania, taʼokhögö dödö side-ide si lö sinegu ba tola tafalua lala si tölu si tola mangaʼasogö khöda faʼomuso dödö sindruhu.​—Hal. 23:1.

13. Hadia lala si tölu sinangea tafalua enaʼö tasöndra waʼomuso dödö sindruhu? (Yohane 4:23, 24)

¹³ LALA SI 3: Ofönaiʼö wamosumange Yehowa ba waʼaurimö. No sinangea tafosumange Yehowa börö me yaʼia Zomböi yaʼita. (Fam. 4:11; 14:6, 7) Börö daʼö, sabölö taʼofönaiʼö ba waʼaurida yaʼia daʼö ba wamosumange yaʼia ba lala somasi ia, ”moloʼö fanuturu lala moroi ba geheha niʼamoniʼö ba tefaudu ba zindruhu”. (Baso Yohane 4:23, 24.) Na eheha niʼamoniʼö zameʼe khöda fanuturu lala, tola tafosumange ia moloʼö sindruhu si so ba Daromalinia. Moguna göi taʼofönaiʼö wamosumange Yehowa hewaʼae na lö latehegö halöwö nifaluada ba mbanua si toröi yaʼita. Iadaʼa, töra 100 ndra talifusöda nibeʼe ba gurunga börö me tobali ira Samaduhuʼö Yehowa. * Hewaʼae simanö, lö tebulö omuso dödöra börö me laforege wamalua si tola lafalua ba wangandrö, ba wamahaʼö yaʼira hegöi ba wamahaʼö niha böʼö sanandrösa khö Lowalangi ba Famatörönia. Na lafakao ita mazui laʼoʼaya, tola tarasoi waʼomuso dödö börö me taʼila wa hasambalö fao khöda Yehowa ba ifahowuʼö ita.​—Yak. 1:12; 1 Fe. 4:14.

14. Hadia zalua khö dalifusöda si bohou ebua ba Tajikistan?

¹⁴ Waö-waö salua khö ndra talifusöda sorasoi faʼomuso dödö hewaʼae lataögö wamakao, daʼö zangoromaʼö wa tola göi tarasoi waʼomuso dödö na tafalua zi tölu ngawalö si no tatutunö no mege. Datatutunö zalua khö dalifusöda si 19 fakhe sotöi Jovidon Bobojonov moroi ba Tajikistan, si lö omasi fao ba dinas militer. Me 4 mbaŵa si Fulu 2019, laraʼu ia ba nomonia ba lataha ia mato hauga waŵa, laböbözi göi ia hulö niha si lö sökhi. Tehöngö zalua khönia andre ba soi böʼö misa. Muturiaigö daʼa ba berita. Moloʼö si sambua laporan, laböbözi ia enaʼö ifake nukha zaradadu ba lafaso ia enaʼö möi ia ba hölu wa omasi ia tobali saradadu. Aefa daʼö, laʼohe ia föna zanguhuku, laʼetuʼö hukumania, labeʼe ia ba gurunga ba lafaso ia wohalöwö. Ba gafuriata, ibeʼe fareta presiden enaʼö laʼefasi ia. Sagötö alua khönia wamakao andrö, lö tebulö  irasoi waʼomuso dödö talifusöda Jovidon ba irorogö waʼalöfaröinia. Hadia mbörö? Börö me lö tebulö ibönökhi zoguna khönia ba wamati.

15. Hewisa wa tola tebönökhi zoguna ba wamati khö Jovidon me so ia ba gurunga?

¹⁵ Me so Jovidon ba gurunga, lö iböhöli wemanga gö ba wamati hewaʼae lö hadöi khönia Sura Niʼamoniʼö mazui publikasi. Hewisa wamaluania daʼö? Ira talifusöda samaʼoheʼö gönia, lasura ayati Zura Niʼamoniʼö nibaso maʼökhö daʼö ba tasi naha gönia. Tobali, ero maʼökhö tola ibaso Zura Niʼamoniʼö ba iʼangerönusi daʼö. Me no aefa ia ba gurunga, ibeʼe mene-mene daʼa ba niha si lö nasa sanaögö abula dödö sebua, ”Dataʼogunaʼö ginötö si sökhi andre ba wangabakhaiʼö faʼaboto ba dödöda sanandrösa khö Yehowa, tabaso Daromalinia hegöi publikasida.”

16. Hezo iʼosambuaʼö wangera-ngerania Jovidon?

¹⁶ Lö tebulö iʼaurifagö goi-goi Yehowa ba waʼaurinia Jovidon. Moroi na iʼera-era gisö-isö dödö si fasala mazui amuata si lö sökhi, abölö iʼosambuaʼö dödönia khö Yehowa hegöi ba ngawalö zi möi fangomuso dödö Yehowa. Ahöli-höli dödö Jovidon ba ngawalö niwöwöi Lowalangi. Ero sihulö wongi, maoso ia börö me irongo li wofo sanunö-nunö. Na ba  zi bongi ihaogö wamaigi döfi hegöi baŵa ba dalu mbanua. Imane, ”Daʼö fefu zameʼe khögu faʼomuso dödö hegöi faʼaterou dödö.” Na taʼandrö saohagölö khö Yehowa ba gö wamati hegöi ö ba mboto nitemada, tola tarasoi waʼomuso dödö, ba daʼö zangabölöʼö yaʼita ba wondrorogö faʼanau gölöda.

17. Na göna ita abula dödö sabua simane salua khö Jovidon, hadia mbuania na lö awuwu ita? (1 Fetero 1:6, 7)

¹⁷ Iʼofönaiʼö wamosumange Yehowa ba waʼaurinia Jovidon. Aboto ba dödönia wa moguna irorogö waʼalöfaröinia khö Lowalangi sindruhu. Imane Yesu, ”Ha khö Yehowa Lowalangiu mangalulu ndraʼugö ba öfosumange ia, ba ha khönia öbeʼe halöwö niʼamoniʼö.” (Luk. 4:8) Omasi ndra saradadu hegöi kafalora enaʼö lö saʼae tobali Samaduhuʼö Yehowa Jovidon. Hizaʼi, ero maʼökhö ba ero bongi, iʼandrö wanolo khö Yehowa enaʼö lö awuwu ba lö faröi ia. Hewaʼae na laraʼu ia, laböbözi ba labeʼe ia ba gurunga, lö tebulö anau gölö Jovidon. Buania, iʼokhögö wamati si no tetandraigö ba irasoi göi waʼomuso dödö sebua si lö irai irasoi ba zilalö.​—Baso 1 Fetero 1:6, 7.

18. Hewisa enaʼö lö tebulö tarasoi waʼomuso dödö sindruhu?

¹⁸ Aboto ba dödö Yehowa hadia zameʼe khöda faʼomuso dödö sindruhu. Na öfalua zi tölu ngawalö wanuturu lala nitutunöda no mege, tola örorogö waʼomuso dödömö hewaʼae na so gabula dödö salua. Aefa daʼö, tola göi örasoi hadia nitutunö ba ayati daʼa, ”Yaʼahowu nono mbanua sangolowalangigö Yehowa!”​—Si. 144:15.