1-2. (a) Hadia nifalua ndra samatörö ba wolawa ono mbanua Yehowa, ba hadia nifalua nono mbanua Yehowa? (b) Hana wa tola omuso dödöda hewaʼae göna ita folohi? (Tutunö göi gambara si so ba guli majalah.)

 IRUGI iadaʼa, töra 30 soi tö zi lö manehegö halöwö ba wamati nifaluada. Ira samatörö ba zi hauga soi, labeʼe ba gurunga ndra talifusöda. Hadia zala nifaluara? Lö hadöi sala nifaluara ba wamaigi Yehowa. Nifaluara yaʼia daʼö labaso ba lafahaʼö ira ba Zura Niʼamoniʼö, lafatunö ba niha böʼö hadia nifaduhusira tödö, ba möi ira ba gangowuloa. Lö omasi ira faʼawö dambai ba politik. Hewaʼae göna ira folohi sabölö-bölö, lö tebulö larorogö waʼalöfaröira. *​—Ha Yehowa nifosumangera ba omuso dödöra wamalua daʼö!

² Te no irai öʼila koda ndra Samaduhuʼö Yehowa si lö faʼataʼu andrö ba öʼila wa no laboho-boho mbawa. Ohahau dödöra börö me laʼila wa omuso dödö Yehowa na lö faröi ira. (1 Ng. 29:17a) Imane Yesu: ”Yaʼahowu niha nifakao ba zindruhu . . . Miʼomusoiʼö dödömi ba miʼowua-wuaʼö dödömi, me ebua luomi.”​—Mat. 5:10-12.

3. Simane nitutunö ba Halöwö Zinenge 4:19, 20, hadia nifalua ndra sinenge me göna ira folohi, ba hadia mbörö?

³ Salua khö ndra talifusöda andrö fagölö simane folohi salua  khö ndra sinenge me abad siföföna börö me manuriaigö ira sanandrösa khö Yesu. No hauga kali lategu ndra sinenge ira sangetuʼö huku niha Yahudi ”enaʼö laböhöli wahuhuosa ba döi Yesu”. (Hal. 4:18; 5:27, 28, 40) Hadia nifalua ndra sinenge? (Baso Halöwö Zinenge 4:19, 20.) Aboto ba dödöra wa so zamatörö sabölö alawa sameʼe khöra oroisa ba ’weʼamöi wangombakha ba soi daʼö ba lafaduhuʼö’ sanandrösa khö Yesu. (Hal. 10:42) Andrö wa si fao faʼabarani lamane ira Fetero hegöi Yohane, si fahuhuo salahi ndra sinenge wa abölö laʼoʼö khö Lowalangi moroi khö ndra sangetuʼö huku, ba lö irai laböhöli wanuriaigö sanandrösa khö Yesu. Hulö lamane khö ndra sangetuʼö huku andrö, ’Hadia abölö alawa ami moroi khö Lowalangi irege khömi niʼoʼö?’

4. Simane nitutunö ba Halöwö Zinenge 5:27-29, hadia duma-duma nibeʼe ndra sinenge, ba hewisa woloʼöda duma-dumara?

⁴ No labeʼe duma-duma si sökhi ira sinenge si lö tola löʼö laʼoʼö ira niha Keriso sindruhu. Ira sinenge andrö, ’abölö laʼoʼö khö Lowalangi me yaʼia zamatörö yaʼira moroi ba woloʼö ba niha’. (Baso Halöwö Zinenge 5:27-29.) Me no aefa laböbözi ira börö me larorogö waʼalöfaröira, mofanö ndra sinenge föna zangetuʼö huku, ”omuso dödöra börö me no sinangea laʼoʼaya ira ba döi [Yesu] andrö” ba lö laböhöli wanuriaigö!​—Hal. 5:40-42.

5. Hadia wanofu sinangea taʼila fanema li?

⁵ Moroi ba gangetula nihalö ndra sinenge andrö, so zi tobali fanofu. Duma-dumania, angetulara ba woloʼö li Lowalangi moroi ba niha, hewisa wa tola tefaudu daʼö ba niwaʼö Zura Niʼamoniʼö sanandrösa ba ’woloʼö li ndra samatörö’? (Rom. 13:1) Hewisa ita iadaʼa ba ’woloʼö li ndra samatörö hegöi sondröniaʼö’ simane niwaʼö Waulo, hizaʼi lö tebulö göi tarorogö waʼalöfaröida khö Lowalangi, Samatörö fondrege zalawa?​—Tit. 3:1.

6. (a) Simane nisura ba Roma 13:1, hewisa zinangeania ita khö ndra samatörö? (b) Hadia zinangea aboto ba dödöda sanandrösa khö ndra samatörö?

⁶ Baso Roma 13:1. Ira niha Keriso lö tola  löʼö laʼoʼö li ndra sondröniaʼö mazui ira samatörö. Laforege ira samatörö enaʼö lö hadöi faʼakaliru, laʼadölöʼö huku, ba itaria göi laʼoʼawögö nono mbanua Yehowa. (Fam. 12:16) Daʼö mbörö wa no sinangea na tabuʼa khöra pajak, beʼelö, taʼataʼufi ira, ba tafosumange. (Rom. 13:7) Hizaʼi, wa tola so kuaso khö ndra samatörö andre, ha börö me no itehegö khöra Yehowa ba wangokhögö daʼö. Itutunö goi-goi daʼa Yesu me manofu-nofu khönia Gubernur Romawi sotöi Fondrio Filato. Me iwaʼö khönia Filato wa so kuasonia ba wangai angetula hadia muʼefaʼö mazui muhuku mate Yesu, imane khönia Yesu, ”Maʼifu lö hadöi kuasomö khögu na lö tebeʼe khöu daʼö moroi si yawa.” (Yoh. 19:11) Simane famatörö Wilato, so göi nola wamatörö niha gulidanö iadaʼa.

7. Hadia manö ginötö lö moguna taʼoʼö li ndra samatörö, ba hadia zinangea aboto ba dödöra?

⁷ Hasambalö laʼoʼö ira niha Keriso huku nibeʼe ndra samatörö na lö fasala daʼö moloʼö huku Lowalangi. Hizaʼi, lö taʼoʼö nifakhoi ndra samatörö na laʼandrö khöda wamalua si fasala moloʼö oroisa Lowalangi mazui na lö latehegö khöda wamalua niʼandrö Lowalangi. Duma-dumania, na laʼandrö khö ndra si bohou ebua enaʼö tobali ira saradadu ba fao ira ba wasuwöta. * Mazui lö latehegö khöda wangogunaʼö Sura Niʼamoniʼö Famoʼeluaha Gulidanö si Bohou hegöi publikasi si teʼodane-dane ba Zura Niʼamoniʼö, ba lö latehegö wamalua angowuloa. Na lö tefaudu wangogunaʼö ndra samatörö kuaso nibeʼe khöra, yaʼia daʼö na lafakao zoloʼö khö Keriso, yaʼira zameʼe fanema li föna Lowalangi. Ba anehe Yehowa nifaluara andrö!​—Sango. 5:8.

8. Hadia gamaehuta Yehowa moroi khö ndra samatörö ba gulidanö andre, ba hana wa moguna aboto ba dödöda daʼa?

⁸ Alawa dadaoma niʼokhögö ndra samatörö hizaʼi tenga daʼö dadaoma fondrege zalawa. Ha Yehowa zangokhögö dadaoma fondrege zalawa. Ba Zura Niʼamoniʼö, mato hauga kali mufotöi ia ”Samatörö Fondrege Zalawa”.​—Dan. 7:18, 22, 25, 27.

9. Hadia gangilata nitema Danieli samaʼeleʼö?

⁹ Itema gangilata Danieli sangoromaʼö wa abölö alawa dadaoma Yehowa moroi ba danö böʼö. Iʼila Danieli öfa ngaʼeu gurifö segebua soʼamaedolagö kuaso gulidanö ba götö föna, yaʼia daʼö Babilona, Media-Feresia, Yunani hegöi Roma, ba iadaʼa yaʼia daʼö Anglo-Amerika. (Dan. 7:1-3, 17) Aefa daʼö, iʼila göi Lowalangi Yehowa si no modadao ba gurusi wanguhuku ba zorugo. (Dan. 7:9, 10) Angilata nitema Danieli aefa daʼö, tobali famangelama khö ndra samatörö iadaʼa.

10. Moloʼö Danieli 7:13, 14, 27, haʼökhö ibeʼe Yehowa kuaso ba wamatörö ulidanö, ba hadia zaboto ba dödöda moroi ba nifaluania andrö?

¹⁰ Baso Danieli 7:13, 14, 27. Iheta dania Lowalangi fefu wamatörö niha gulidanö ba ibeʼe daʼö khö zinangea manema yaʼia ba sebua kuaso. Haʼökhö ibeʼe? Khö ’zi hulö nono niha’ yaʼia daʼö Yesu Keriso hegöi ba ”niha niʼamoniʼö andrö khö Wondrege Zalawa” yaʼia daʼö si 144.000 si fao khönia ba wamatörö ”sagötö faʼara”. (Dan. 7:18) Ba daʼa aboto ba dödöda, wa Yehowa andrö ’Fondrege Zalawa’ ba ha yaʼia zi tola mangaʼi ba sameʼe kuaso.

11. Hadia nasa nisura Danieli sangoromaʼö wa Yehowa andrö Samatörö Fondrege Zalawa?

¹¹ Salua ba gangilata Danieli, tefaudu daʼö ba zi no irai ifaʼeleʼö ba zilalö. Iwaʼö Danieli  wa ’Lowalangi sabölö si so ba zorugo yaʼia zanimbagö razo ba samataro razo’. Imane nasa, ”Lowalangi Fondrege Zalawa yaʼia Zamatörö amatöröwa niha gulidanö ba tola ibeʼe gofu haʼökhö zomasi ia.” (Dan. 2:19-21; 4:17) Hadia no irai iheta Yehowa wamatörö niha gulidanö ba ifuli ifataro zamatörö si bohou? Tatu manö!

12. Beʼe duma-duma sangoromaʼö hewisa wangeheta Yehowa wamatörö ndra razo ba götö föna. (Faigi gambara.)

¹² No iforomaʼö Yehowa wa abölö tohude waʼasalawania moroi khö ndra samatörö. Datatutunö tölu duma-dumania. Iʼosawuyu nono mbanua Yehowa Faraʼo moroi ba Miserai ba mato hauga kali itimbagö ba wangefaʼö yaʼira. Hizaʼi, Lowalangi zangefaʼö ono mbanuania ba ilömö Waraʼo ba Nasi Soyo. (2 Mo. 14:26-28; Si. 136:15) Razo Mbelisasa moroi ba Mbabilona ifalua gowasa ba ’ilawa Lowalangi samatörö sorugo’. Baero daö, ’ifosumange nadu nifazökhi moroi ba wirö hegöi anaʼa’ moroi na ifosumange Yehowa. (Dan. 5:22, 23) Hizaʼi, itimbagö niha si fayawa andrö Lowalangi. ”Ba mbongi daʼö”, labunu Mbelisasa ba tebeʼe wamatörönia ba danga niha Media hegöi Feresia. (Dan. 5:28, 30, 31) Razo Herode Agerifa I moroi ba Palestina, ifabunuʼö Yakobo aefa daʼö ibeʼe ba gurunga zinenge sotöi Fetero enaʼö tola göi labunu ia ba gafuriatania. Hizaʼi ibaʼagö Yehowa niʼera-era Herode andrö. ”Ibözi ia malaʼika Yehowa” ba mate ia.​—Hal. 12:1-5, 21-23.

13. Beʼe duma-duma sangoromaʼö hadia nifalua Yehowa ba wokalaisi angowuloa ndra samatörö ba gulidanö.

¹³ Iforomaʼö göi Yehowa wa abölö tohude waʼasalawania moroi ba gangowuloa ndra samatörö si so ba gulidanö andre. Duma-dumania iʼoʼawögö ndraono Gizaraʼeli ba itolo ira ba wolawa si 31 razo Ganaʼana, ba arakhagö larabu fefu Danö Amabuʼula. (Yos. 11:4-6, 20; 12:1, 7, 24) Itolo göi ira Yehowa ba wokalaisi razo Mbeni-hada hegöi ira samatörö Siria si 32 niha sanuwö iraono Gizaraʼeli.​—1 Ra. 20:1, 26-29.

14-15. (a) Hadia niwaʼö razo Nebukanesa hegöi Dario sanandrösa ba waʼasalawa Yehowa? (b) Hadia niwaʼö zanura Sinunö sanandrösa khö Yehowa hegöi ono mbanuania?

¹⁴ No hauga kali iforomaʼö Yehowa wa yaʼia andrö Samatörö Fondrege Zalawa! No irai isuno samösa ia Razo Nebukanesa moroi ba  Mabilona börö waʼabölö, kuaso hegöi lakhömi niʼokhögönia. Lö ifaduhuʼö wa ha Yehowa zinangea mufosumange. Andrö wa ibözi ia Lowalangi irege owöhö. Me no aefa döhö ia, ’ifolakhömi Lowalangi Fondrege Zalawa’ ba ifaduhuʼö wa ”lö tebulö so wamatörö [Yehowa] götö-götö waʼara”. Imane nasa, ”Lö hadöi si tola manaisi yaʼia mazui sanofu nifaluania.” (Dan. 4:30, 33-35) Me no aefa tetandraigö waʼalöfaröi Danieli, ba me no aefa iʼefaʼö ia Yehowa moroi ba dögi zingo, imane Razo Dario, ”Ubeʼe goroisa ba niha fefu . . . enaʼö miʼataʼufi Lowalangi Danieli. Yaʼia andrö Lowalangi sauri götö-götö waʼara. Lö irai adudu wamatörönia ba faʼabölönia irugi zi lö aetu.”​—Dan. 6:7-10, 19-22, 26, 27.

¹⁵ Imane sanura Sinunö, ”Ifawukaisi dandrawa soi böʼö Yehowa; lö mofozu ibeʼe niʼera-erara.” Imane nasa, ”Yaʼahowu soi sangolowalangigö Yehowa; yaʼahowu nono mbanua si no ifili tobali tana khönia.” (Si. 33:10, 12) Daʼa zi tobali dane-dane saro khöda ba wondrorogö faʼalöfaröida khö Yehowa!

16. Hadia zi faduhu dödöda na alua dania ”wamakao sabölö-bölö”, ba hadia mbörö? (Faigi gambara.)

¹⁶ No tatutunö hadia manö zi no ifalua Yehowa ba götö föna. Börö daʼö, hadia dania nifaluania ba zi lö ara tö? Faduhu dödöda wa hasambalö iʼefaʼö nono mbanuania si lö faröi Yehowa na alua ”wamakao sabölö-bölö” ba zi lö ara tö. (Mat. 24:21; Dan. 12:1) Ifalua daʼa na tohare Gogi moroi ba Magogi yaʼia daʼö angowuloa fefu soi ba wolawa ono mbanua Yehowa ba zi sagörö ulidanö. Hewaʼae na so 193 soi zi farahu ba Perserikatan Bangsa-Bangsa solawa yaʼita, hizaʼi tebai nasa lalawa Zamatörö Fondrege Zalawa hegöi saradadunia si so ba zorugo. No ifabuʼu Yehowa, ”Hasambalö ufolakhömi ba uʼamoniʼö ndraʼo, ba uforomaʼö haniha ndraʼo föna duduma hörö soi böʼö. Awena dania aboto  ba dödöra wa yaʼo Yehowa.”​—Hez. 38:14-16, 23; Si. 46:10.

17. Moloʼö Sura Niʼamoniʼö, hadia dania zalua khö ndra razo ba gulidanö andre hegöi ba niha sondrorogö faʼalöfaröira khö Yehowa?

¹⁷ Börö nifalua Gogi, andrö wa alua wasuwöta ba Hamagedo. Ba daʼö dania tohare Yehowa ba wangohori ’ndra razo ba zi sagörö ulidanö’. (Fam. 16:14, 16; 19:19-21) Hizaʼi, ”ha niha satulö tödö zangiagö ulidanö dania, ba ha niha si lö faröi zowanua ba daʼö”.​—Amd. 2:21, nis.

18. Hadia nifalua niha Keriso sindruhu, ba hadia mbörö? (Danieli 3:28)

¹⁸ Iʼotarai me föna, ato niha Keriso sindruhu si lö mamalua somasi-masi dödöra ba latehegö waʼaurira khö Yehowa börö waʼomasira khönia tobali Samatörö yaʼira Fondrege Zalawa. Larorogö waʼalöfaröira, hulö simane iraono matua Heberaiʼo si datölu, sondrorogö faʼalöfaröira khö Wondrege Zalawa sangefaʼö yaʼira moroi ba hola-hola galitö.​—Baso Danieli 3:28.

19. Hadia dane-dane khö Yehowa ba wanguhuku ono mbanuania, ba hadia niʼandrönia khöda iadaʼa?

¹⁹ Sanandrösa ba wondrorogö faʼalöfaröi, imane Dawido sanura buku Zinunö, ”Yehowa dania zanguhuku fefu soi. He Yehowa, etuʼö khögu huku moloʼö amuatagu satulö ba moloʼö faʼalöfaröigu.” (Si. 7:8) Imane nasa, ”Yaʼirorogö ndraʼo faʼalöfaröigu ba faʼadölö dödögu.” (Si. 25:21) Gofu hadia zalua, moguna tarorogö waʼalöfaröida khö Yehowa ba böi awuwu ita! Buania, tola tarasoi simane sanura buku Zinunö me imane, ”Yaʼahowu niha si lö faröi, sanörö lala goroisa Yehowa.”​—Si. 119:1, nis.