1-2. Hadia mbörö wa adöni dödöda ba nösi mbuku Wamaʼeleʼö?

 HADIA no irai öfaigi-faigi koda si so ba album niʼokhögö nawömö? Tola manö ato niha si lö faʼila khöu ba koda andrö. Hizaʼi, so sagörö koda sadöni dödöu, börö me so ndraʼugö ba daʼö. Öhaogö wamaigi-maigi haniha manö zi so ba koda andrö, ba öʼangeragö hamega ba hezo mikoda ami me luo daʼö. Sindruhu-ndruhu wa adöni dödöu ba koda si sambua andrö.

² Hulö simane koda andrö mbuku Wamaʼeleʼö. Hadia mbörö? Si löʼö-löʼönia, so dombua mbörö. Si oföna, musura mbuku daʼö soguna khöda. Imane ayati siföföna, ”Daʼa nifaʼeleʼö Yesu Keriso, nitemania moroi khö Lowalangi ba wangoromaʼö khö ndra sawuyu Lowalangi ngawalö zi lö ara tö alua.” (Fam. 1:1) Eluahania, mufanandrösa fefu wamaʼeleʼö si no tesura ba mbuku daʼö tenga ba niha sato ba gulidanö andre, hizaʼi khöda yaʼita samosumange Yehowa. Börö daʼö, yaʼita ono mbanua Lowalangi, lö tokea dödöda na fao ita ba waʼalua wamaʼeleʼö si no tesura ba mbuku andrö. Tola tawaʼö, amaedola so ita bakha ba koda daʼö.

3-4. Moloʼö buku Wamaʼeleʼö, hawaʼara alua zi no tefaʼeleʼö ba mbuku daʼö, ba hadia zinangea tafalua me no aboto ba dödöda?

³ Dane-dane si dua moʼamakhaita ia ba ginötö waʼalua zi no  tefaʼeleʼö andrö. Imane sinenge sotöi Yohane me no alawa ndröfinia, ”Börö geheha moroi khö Lowalangi wa so ndraʼo ba luo Zoʼaya.” (Fam. 1:10) Me isura wehede daʼö Yohane te me döfi 96 M, ara nasa tohare ”luo Zoʼaya”. (Mat. 25:14, 19; Luk. 19:12) Hizaʼi, moloʼö si no tefaʼeleʼö ba Zura Niʼamoniʼö, tohare luo Zoʼaya andrö me döfi 1914 me mufataro Yesu tobali Razo ba zorugo. Iʼotarai daʼö, ibörögö alua ngawalö zi no tefaʼeleʼö ba mbuku Wamaʼeleʼö sanandrösa ba nono mbanua Lowalangi. Börö daʼö, no auri ita iadaʼa ba ”luo Zoʼaya”!

⁴ Börö me no auri ita iadaʼa ba ginötö sahöli-höli dödö andre, moguna taʼameʼegö tödö mene-mene nisura ba Wamaʼeleʼö 1:3: ”Yaʼahowu zombaso famaʼeleʼö hegöi samondrongo ba samalua si no tesura andre, börö me no ahatö ginötö si no mutatugöi.” Börö daʼö, moguna ’tabaso’, ’tafondrondrongo’, ba ’tafalua’ zi no tesura ba mbuku Wamaʼeleʼö. Hadia manö duma-dumania?

5. Hewisa wangoromaʼö Yesu ba mbuku Wamaʼeleʼö wa moguna tatatugöi enaʼö itema zumange nibeʼeda Yehowa?

⁵ Moroi ba faza siföföna ba mbuku Wamaʼeleʼö, ba daʼö taʼila wa aboto ba dödö Yesu hadia zalua ba mbanua niha Keriso. (Fam. 1:12-16, 20; 2:1) Iforomaʼö daʼö Yesu me ifaʼema wehedenia ba zi fitu banua niha Keriso ba Asia Kecil me abad siföföna. Ba wehedenia andrö, ibeʼe khöra wanuturu lala enaʼö itema zumange nibeʼera Yehowa. Moguna göi khöda iadaʼa wanuturu lala nibeʼenia andrö. Hadia wamahaʼönia khöda? Aboto sibai ba dödö zondröniaʼö yaʼita, Keriso Yesu, hewisa wamatida. Inehe-nehegö ba ilumöʼö ita, ba iʼila fefu hadia ia zalua. Aboto ba dödönia hadia zinangea tafalua enaʼö lö tebulö taʼomusoiʼö dödö Yehowa. Hadia wanuturu lala nibeʼenia si lö tola löʼö taʼoʼö iadaʼa?

6. (a) Moroi ba wehede Yesu nisura ba Wamaʼeleʼö 2:3, 4, hadia zalua ba mbanua niha Keriso si so ba Nefeso? (b) Hadia wamahaʼönia khöda?

⁶ Baso Wamaʼeleʼö 2:3, 4. Moguna tarorogö enaʼö lö taya waʼomasida khö Yehowa. Fehede Yesu ba mbanua niha Keriso ba Nefeso, daʼö zangoromaʼö wa no anau gölöra ba owölö-ölö ira ba wamosumange Yehowa hewaʼae na oya wanandraigö si göna ira. Hizaʼi, tenga saʼae simane me mböröta waʼomasira khö Yehowa. Börö daʼö, moguna laʼaroʼö waʼomasira khönia. Na lö lafalua daʼö, lö itema zumange nibeʼera Lowalangi. Simane daʼö göi ita iadaʼa. Atulö wa moguna taforomaʼö waʼanau gölö, hizaʼi moguna göi atulö gohitö dödöda ba wamalua daʼö. Tenga ha inehe-nehegö Lowalangi hadia nifaluada, hizaʼi inehegö göi hadia mbörö wa tafalua daʼö. Omasi ia na tafosumange ia börö me sindruhu-ndruhu taʼomasiʼö ba taʼameʼegö tödö ia.—Amd. 16:2; Mrk. 12:29, 30.

7. (a) Moloʼö Famaʼeleʼö 3:1-3, hadia niʼila Yesu salua ba mbanua niha Keriso si so ba Zade? (b) Hadia zinangea tafalua?

⁷ Baso Wamaʼeleʼö 3:1-3. Moguna mangelama ita ba böi mörö ba wamati. Faböʼö göi zalua ba mbanua niha Keriso si so ba Zade. Me mböröta, owölö-ölö sibai ira ba wamosumange Lowalangi. Hizaʼi ba gafuriata, lö saʼae lafalua halöwö ba wamati. Börö daʼö, ifangelama ira Yesu enaʼö ’maoso’ ira. Hadia wamahaʼönia khöda? Sindruhu sa, lö olifu Yehowa hadia zi no tafalua ba döinia. (Heb. 6:10) Hizaʼi, böi tawaʼö tödöda wa ibönö na asala tafosumange manö Yehowa iadaʼa, ha börö me oya zi no tafalua khönia ba zilalö. Hewaʼae na tenga simane faʼoya ba zilalö zi tola tafalua iadaʼa, moguna owölö-ölö  ita ”ba wangai halöwö Lowalangi”. Lö tola löʼö mangelama ita ba böi mörö wamatida irugi gamozua.—1 Ko. 15:58; Mat. 24:13; Mrk. 13:33.

8. Hadia wamahaʼö nihalöda ba wehede Yesu ba mbanua niha Keriso si so ba Laodikia? (Famaʼeleʼö 3:15-17)

⁸ Baso Wamaʼeleʼö 3:15-17. Moguna owölö-ölö ita ba soroi ba dödöda wamosumange Yehowa. Fehede Yesu ba mbanua niha Keriso ba Laodikia, daʼö zangoromaʼö wa faböʼö göi zalua khöra. ”Hulö zanakhö-nakhö” ira ba wamosumange Yehowa. Börö daʼö, ifatunö khöra Yesu wa sindruhunia ’si tosasa ira ba sabu tödö’. Moguna lafosumange Yehowa si fao faʼamohiʼa dödö. (Fam. 3:19) Hadia wamahaʼönia khöda? Na no ibörögö alö waʼaterou dödöda ba wamosumange Lowalangi, moguna itugu taʼameʼegö tödö ngawalö zi sökhi si no ihenaigö Yehowa hegöi organisasinia. (Fam. 3:18) Böi ha börö wolohi faʼohahau dödö ba gulidanö andre, mangoloi dödöda ba lö saʼae taʼofönaiʼö wamalua halöwö ba wamati.

9. Moloʼö fehede Yesu ba mbanua niha Keriso ba Weregamo hegöi ba Diatira, hadia deʼala sinangea tatimbagö?

⁹ Moguna tatimbagö wamahaʼö niha si no mondröi sindruhu. So ösa niha nitegu Yesu ba Weregamo börö me ladunö-dunö wamahaʼö niha, si möi famoto wahasara dödö ba mbanua niha Keriso. (Fam. 2:14-16) Aefa daʼö, isuno niha Diatira si lö omasi mangila ”si tobini khö Zatana”. Iʼamenesi göi ira Yesu enaʼö ’böi laböhöli’ zindruhu. (Fam. 2:24-26) Ba mbanua niha Keriso si dombua andrö, so ösa zi lö tola löʼö mamalalini era-erara börö me no ibörögö laʼoʼö wamahaʼö faya. Hewisa göi ita iadaʼa? Moguna tatimbagö gofu hadia manö wamahaʼö si lö tefaudu ba lala wangera-ngera Yehowa. Niha si no mondröi sindruhu andrö ”hulö soloʼö khö Lowalangi ira wamaigida”, hizaʼi ”no sangosilöʼögö faʼabölönia andrö”. (2 Ti. 3:5) Na owölö-ölö ita ba wamahaʼö yaʼita ba Daromali Lowalangi, tola itugu aoha khöda ba wangiʼila hegöi ba wanimbagö famahaʼö faya.—2 Ti. 3:14-17; Yud. 3, 4.

10. Hadia nasa wamahaʼö nihalöda ba wehede Yesu ba mbanua niha Keriso si so ba Weregamo hegöi ba Diatira?

¹⁰ Tebai tafalua gamuata wohorö, fao dödöda, mazui tawaʼö wa si toʼölö manö daʼö. So nasa danö böʼö salua ba mbanua niha Keriso si so ba Weregamo hegöi ba Diatira. So ösa nitegu Yesu ba daʼö börö me lö latimbagö gamuata wohorö. (Fam. 2:14, 20) Hadia wamahaʼönia khöda? Tebai tafalua gofu hadia ia gamuata  wohorö. Böi tawaʼö tödöda wa lö mofönu Yehowa na tafalua daʼö börö me no ara mangai halöwö ita khönia ba oya noro dödö nibeʼe khöda ba organisasinia. (1 Sa. 15:22; 1 Fe. 2:16) Omasi ia na taʼoʼö goi-goinia salawa sanandrösa ba gamuata, hewaʼae na itugu lö sökhi gamuata niha ba gulidanö andre.—Ef. 6:11-13.

11. Hadia zi no tafahaʼö yaʼita irugi daʼa? (Faigi göi kotak ” Famahaʼönia Khöda Iadaʼa”.)

¹¹ Hadia zi no tafahaʼö yaʼita irugi daʼa? No tatutunö wa moguna sibai tatatugöi enaʼö itema zumange nibeʼeda Yehowa. Na so zi lö tefaudu nifaluada irege lö itema zumange nibeʼeda Lowalangi, moguna iʼanemaiʼö tabulöʼö nifaluada. (Fam. 2:5, 16; 3:3, 16) So nasa danö böʼö niwaʼö Yesu ba mbanua niha Keriso me abad siföföna. Hadia daʼö?

12. Hadia wehede Yesu ba mbanua niha Keriso si so ba Zimina hegöi ba Wiladefia soguna khöda göi irugi maʼökhö? (Famaʼeleʼö 2:10)

¹² Iadaʼa, datatutunö hadia wehede Yesu ba mbanua niha Keriso si so ba Zimina hegöi ba Wiladefia. Ifarou ira enaʼö böi ataʼu ira na göna ira famakao, börö me hasambalö tefahowuʼö waʼalöfaröira andrö. (Baso Wamaʼeleʼö 2:10; 3:10) Hadia wamahaʼönia khöda iadaʼa? Datafaʼanö ita ba wanaögö famakao ba taʼanauʼö gölöda ba wanaögö yaʼia. (Mat. 24:9, 13; 2 Ko. 12:10) Hadia mbörö wa moguna sibai daʼö?

13-14. Ba ginötö alua zi no tefaʼeleʼö ba Wamaʼeleʼö faza 12, hadia lua-luania ba nono mbanua Lowalangi?

¹³ Moloʼö buku Wamaʼeleʼö, hasambalö tefakao nono mbanua Lowalangi ba ”luo Zoʼaya”, yaʼia daʼö ba götöda iadaʼa. Ba Wamaʼeleʼö faza 12, itutunö khöda sanandrösa ba wasuwöta salua ba zorugo me no mufataro Yesu tobali Razo ba Wamatörö Lowalangi. Mikhaʼeli, yaʼia daʼö Yesu Keriso si no mangawuli ba zorugo, iʼohe ndra saradadunia ba wanuwö Satana awö ndra malaʼika si lö sökhi. (Fam. 12:7, 8) Lua-luania, tekalaisi fefu nudu Lowalangi andrö ba tetiboʼö ira ba gulidanö. Börö daʼö, tefakao fefu niha sauri ba gulidanö. (Fam. 12:9, 12) Hadia lua-luania ba nono mbanua Lowalangi?

¹⁴ Ifatunö khöda buku Wamaʼeleʼö hadia nifalua Zatana aefa daʼö. Tebai saʼae möi ia ba zorugo. Börö daʼö, isuwö niha nibayoini si toröi nasa ba gulidanö, si tobali sosalahini Famatörö Lowalangi ba ”sanema halöwö ba wamaduhuʼö Yesu”. (Fam. 12:17; 2 Ko. 5:20; Ef. 6:19, 20) Hewisa waʼaluania zi no tefaʼeleʼö andrö?

15. Haniha niʼamaedolagö ’zi darua samaduhuʼö’ ba Wamaʼeleʼö faza 11, ba hadia zalua khöra?

¹⁵ Satana zamarou tödö nudu Lowalangi irege lasuwö niha nibayoini, sondröniaʼö  halöwö fanuriaigö turia somuso dödö sanandrösa ba Wamatörö Lowalangi. Ba mbuku Wamaʼeleʼö, muʼamaedolagö ndra talifusöda andrö simane ’si darua samaduhuʼö’ nibunu. * (Fam. 11:3, 7-11) Me döfi 1918, laböbögö zi lö duhu khö ndra talifusöda si dawalu si tobali sondröniaʼö, lawaʼö wa fasala ira, ba laʼetuʼö wa ara lakuru ira ba gurunga. Börö daʼö, ato niha sangumaʼö wa no mofozu nudu Lowalangi ba wamöhöli halöwö nifalua ndra talifusöda nibayoini andrö.

16. Hadia zalua me döfi 1919, hizaʼi hadia zi lö tebulö ifalua Satana iʼotarai daʼö?

¹⁶ Moloʼö Famaʼeleʼö faza 11, lö ara me no labunu ’zi darua samaduhuʼö’ andrö, ifuli tesusugi ira. Daʼö zalua khö ndra talifusöda nibayoini andrö ambö döfi me no lakuru ira. Ba zi lö ladöna-döna, ba mböröta ndröfi 1919, teʼefaʼö ira moroi ba gurunga ba lö saʼae lafalua khöra hukuma si no muʼetuʼö ba zilalö. Iʼanemaiʼö ifuli ladöniaʼö wamalua halöwö fanuriaigö. Hizaʼi, lö iböhöli Satana wolohi ono mbanua Lowalangi. Iʼotarai daʼö, lö tebulö ifakao ita, amaedola iʼutaʼö nidanö ”simane faʼabölö-bölö nungo nidanö” enaʼö alömö ita. (Fam. 12:15) Börö daʼö, ”moguna [khöda] waʼanau gölö hegöi famati”.—Fam. 13:10.

17. Hewaʼae lö iböhöli Satana wanuwö ono mbanua Lowalangi, hadia wanolo nitemara?

¹⁷ Itutunö Famaʼeleʼö 12:16 wa hasambalö ”ibokai mbawania tanö ba wanölö idanö” niʼutaʼö Zatana. Daʼö zangoromaʼö wa so wanolo nitema nono mbanua Lowalangi ba zi lö ladöna-döna. Sindruhu-ndruhu wa daʼö zalua. Itaria, laʼoʼawögö nono mbanua Lowalangi ira samatörö ba gulidanö Zatana andre, duma-dumania ira sangetuʼö huku. Asese möna nono mbanua Yehowa föna ndra sangetuʼö huku na so niböbögö khöra si lö duhu, irege lö sanaisi yaʼira ba wamosumange Lowalangi. Hadia nifaluara sagötö me lö hadöi taha-tahara? Lahaogö wangogunaʼö inötö ba wamalua halöwö nibeʼe Yehowa khöra. (1 Ko. 16:9) Hadia manö halöwöra?

18. Hadia halöwöda si oföna ba ngaluo safuria andre?

¹⁸ No ifaʼeleʼö Yesu wa fatua lö tohare gamozua andrö, laturiaigö ira nifahaʼönia ’duria somuso dödö sanandrösa ba Wamatörö Lowalangi’ ba zi sagörö ulidanö misa. (Mat.  24:14) Hasambalö labeʼe khöra wanolo ira malaʼika, solohe ’turia somuso dödö si lö tebulö nifaʼema ba ngawalö soi, ba ngawalö mado, banua, hegöi li’.—Fam. 14:6.

19. Hadia nasa duria sinangea laturiaigö ira niha sangomasiʼö Yehowa?

¹⁹ Tenga ha turia si sökhi sanandrösa ba Wamatörö Lowalangi zinangea laturiaigö ono mbanua Yehowa. Moguna göi latuhini halöwö nifalua ndra malaʼika si no mututunö ba Wamaʼeleʼö faza 8 irugi 10. Laʼombakhaʼö ira malaʼika andrö ngawalö wamakao si göna niha sanimbagö Famatörö Lowalangi. Simanö göi, lö laböhöli ira Samaduhuʼö Yehowa wangombakha wa hasambalö ihuku gulidanö si lö sökhi andre Lowalangi. Muʼamaedolagö duria wanguhuku andrö simane ’teu esi ba teu alitö’. (Fam. 8:7, 13) Moguna aboto ba dödö niha wa no ahatö gamozua andrö enaʼö labulöʼö lala waʼaurira ba teʼefaʼö ira ba ngaluo wönu Yehowa. (Zef. 2:2, 3) Hizaʼi, ato niha si fatuwu ba duria nifaʼemada. Börö daʼö, moguna khöda waʼabarani ba wamaʼema turia andrö. Sagötö alua wamakao sabölö-bölö, hasambalö itugu abeʼe duria wanguhuku safuria nifaʼemada.—Fam. 16:21.

20. Hadia nitutunöda ba zi dombua artikel aefa daʼa?

²⁰ Moguna taʼoʼö wehede nisura ba mbuku Wamaʼeleʼö börö me tefarahu ita ba waʼalua wamaʼeleʼö si no tesura ba daʼö. (Fam. 1:3) Hizaʼi, hewisa enaʼö lö faröi ita na göna ita famakao ba lö taböhöli wanuriaigö si fao faʼabarani? So dombua ngawalö zangaʼaroʼö yaʼita enaʼö lö faröi: si oföna yaʼia daʼö nitutunö mbuku Wamaʼeleʼö sanandrösa ba zalua ba nudu Lowalangi, ba si dua yaʼia daʼö howu-howu nitemada ba zi so miföna na lö faröi ita. Daʼö dania nitutunöda ba zi dombua artikel aefa daʼa.