1. Hadia niwaʼö mbuku Wamaʼeleʼö sanandrösa ba nono mbanua Lowalangi?

 IFATUNÖ khöda buku Wamaʼeleʼö wa no tefasindro Wamatörö Lowalangi ba zorugo, ba no tetiboʼö Zatana ba gulidanö. (Fam. 12:1-9) Börö daʼö, ohahau dödö zorugo, hizaʼi fangabu dödö zalua ba gulidanö. Hadia mbörö? Börö me mofönu sibai Zatana, ba iforege wanuwö ono mbanua Yehowa si lö faröi ba gulidanö.—Fam. 12:12, 15, 17.

2. Hadia zanolo yaʼita enaʼö lö faröi khö Yehowa?

² Hewisa enaʼö lö faröi ita khö Yehowa hewaʼae na göna ita fanandraigö moroi khö Zatana? (Fam. 13:10) Sambua zi tola manolo yaʼita yaʼia daʼö na aboto ba dödöda hadia zalua ba zi so miföna. Ba mbuku Wamaʼeleʼö, itutunö sinenge sotöi Yohane hadia manö howu-howu nitemada ba zi so miföna. Duma-dumania, tasöndra dania waʼohahau dödö na no aefa tehori nudu Lowalangi. Datafaigi hadia nitutunö mbuku Wamaʼeleʼö sanandrösa ba nudu Lowalangi ba hadia dania zalua khöra.

3. Hadia manö dandra-tandra niʼogunaʼö ba mbuku Wamaʼeleʼö ba wanutunö udu Lowalangi?

³ Ifatunö khöda ayati siföföna ba mbuku Wamaʼeleʼö wa muʼogunaʼö ”dandra-tandra” ba wanutunö ösi mbuku andrö. (Fam. 1:1) Itutunö khöda wa udu Lowalangi andrö amaedola  gurifö samuʼi. Duma-dumania, so ”sageu gurifö samuʼi si tohare moroi ba nasi. Fitu högö gurifö daʼö, ba fulu dandrunia”. (Fam. 13:1) Aefa daʼö, so ”gurifö samuʼi tanö böʼö si tohare moroi tou ba danö”. Fehede gurifö daʼö hulö wehede naga ba ”itorugö galitö moroi ba mbanua”. (Fam. 13:11-13) Baero daʼö, so göi ”gurifö samuʼi soyo si hulö hola-hola galitö”, ba no modadao yawa ba hulunia ndra alawe sohorö-horö. Urifö samuʼi si tölu ngaʼeu andrö, daʼö zoʼamaedolagö udu Lowalangi solawa yaʼia hegöi Famatörönia iʼotarai me mböröta. Börö daʼö, moguna sibai aboto ba dödöda haniha ira.—Fam. 17:1, 3.

4-5. Hewisa wa tola möi fanoloda nisura ba Danieli 7:15-17 enaʼö taʼila geluaha dandra-tandra andrö?

⁴ Enaʼö aboto ba dödöda haniha manö nudu andrö, moguna ua aboto ba dödöda hadia geluaha gurifö samuʼi hegöi ira alawe sohorö-horö. Sambua lalania yaʼia daʼö tafareso hadia niwaʼö Zura Niʼamoniʼö sanandrösa ba daʼö. Sindruhunia, no mututunö ba mbuku tanö böʼö geluaha dandra-tandra niʼogunaʼö ba mbuku Wamaʼeleʼö. Duma-dumania me mangifi Danieli, iʼila ”öfa ngaʼeu gurifö sebua sibai moroi ba nasi”. (Dan. 7:1-3) Ifatunö khöda Danieli wa urifö sebua si öfa ngaʼeu andrö eluahania daöfa ”razo”, mazui famatörö. (Baso Danieli 7:15-17.) Moroi ba nitutunönia andrö, aboto ba dödöda wa urifö nitutunö ba mbuku Wamaʼeleʼö eluahania göi famatörö niha gulidanö.

⁵ Iadaʼa, datatutunö hadia manö dandra-tandra nitötöi ba mbuku Wamaʼeleʼö hegöi ayati sanolo yaʼita enaʼö aboto ba dödöda geluahania. Si oföna, datatutunö haʼökhö manandrösa gurifö samuʼi si tölu ngaʼeu andrö. Aefa daʼö, tatutunö hadia zalua ba gurifö andrö. Ba safuria, tatutunö dania hadia zinangea tafalua me no aboto ba dödöda geluahania.

6. Haniha niʼamaedolagö gurifö samuʼi si fitu högö nitutunö ba Wamaʼeleʼö 13:1-4?

⁶ Haniha niʼamaedolagö gurifö samuʼi si fitu högö? (Baso Wamaʼeleʼö 13:1-4.) Taʼila wa urifö samuʼi andrö hulö simane harimo, hizaʼi ahenia hulö gahe mberua ba bawania simane bawa zingo, ba so fulu rozi dandrunia. Tesöndra göi dandra-tandra andrö ba gurifö nitutunö ba Danieli faza 7, hizaʼi no tebagi-bagi ia ba zi öfa ngaʼeu urifö. Na ba mbuku Wamaʼeleʼö andre, no mufarahugö dandra-tandra andrö ba zi sageu urifö samuʼi. Börö daʼö, urifö samuʼi si fitu högö andre lö manandrösa ia ha ba zi sambua famatörö. Mututunö göi wa mamatörö ia ba ”ngawalö mado, banua, li, hegöi soi”. Na simanö, tatu abölö ebua ia moroi ba zi sambua famatörö. (Fam. 13:7) Moroi ba daʼa tola tahalö rahu-rahu wa urifö samuʼi andrö eluahania fefu wamatörö niha gulidanö iʼotarai mböröta irugi iadaʼa. *—Sango. 8:9.

7. Haniha niʼamaedolagö zi fitu högö gurifö samuʼi nitutunö ba Wamaʼeleʼö faza 13?

⁷ Haniha niʼamaedolagö zi fitu högö gurifö samuʼi andrö? Tola tasöndra wanema linia ba Wamaʼeleʼö faza 17, sanutunö sanandrösa ba nadu famaedo gurifö samuʼi si no mutötöi ba faza 13. Imane Famaʼeleʼö 17:10, ”Si fitu andrö eluahania fitu razo: Lima moroi ba gotaluania no adudu, sambua zi so, ba sambua tö zi lö tohare nasa. Na tohare ia dania, ba lö arara.” Moroi ba zi hawaʼoya famatörö niʼogunaʼö Zatana, so fitu zi tola mufotöi ”högö”, börö me ebua sibai kuasora. Yaʼira andrö famatörö sebua kuaso ba gulidanö, ba ato nono mbanua Lowalangi nifakaora mazui si toröi ba soi  nifatöröra. Ba götö zinenge sotöi Yohane, no saʼae dalima moroi ba gotaluara zi no adudu, yaʼia daʼö: Miserai, Asiria, Babilona, Media-Feresia, hegöi Yunani. Famatörö si önö yaʼia daʼö Roma, ba mamatörö ia nasa me itema gangilata daʼa Yohane. Na simanö, haniha högö si fitu mazui famatörö safuria sebua kuaso ba gulidanö?

8. Haniha niʼamaedolagö högö si fitu?

⁸ Simane nitutunöda dania, tola itolo ita famaʼeleʼö si so ba mbuku Danieli enaʼö taʼila haniha niʼamaedolagö högö si fitu. Haniha zamatörö ulidanö sagötö ”luo Zoʼaya” mazui ba ngaluo safuria? (Fam. 1:10) Famatörö andrö yaʼia daʼö angorudua Inggris Raya hegöi Amerika Serikat. Börö daʼö, tola tahalö rahu-rahu wa högö si fitu nitötöi ba Wamaʼeleʼö 13:1-4 yaʼia daʼö Famatörö Gulidanö Inggris-Amerika.

9. Haniha niʼamaedolagö gurifö samuʼi ’si dua rozi tandru si hulö dandru nono mbiri-biri’?

⁹ Ba Wamaʼeleʼö faza 13, Famatörö Gulidanö Inggris-Amerika andrö muʼamaedolagö ia simane urifö samuʼi ’si dua rozi tandru si hulö dandru nono mbiri-biri, hizaʼi fehedenia hulö wehede naga’. Ba faza 16 hegöi 19, lafotöi gurifö daʼa ”samaʼeleʼö sofaya”. (Fam. 16:13; 19:20) ”Ifalua ngawalö dandra sahöli-höli dödö föna niha gulidanö ba itorugö galitö moroi ba mbanua.” (Fam. 13:11-15) So göi wamaʼeleʼö Danieli si fakhili-khili ba daʼö. Itutunö wa Famatörö Gulidanö Inggris-Amerika zangaʼasogö ’famakiko sebua’. (Dan. 8:19, 23, 24) Daʼö zalua ba Wasuwöta Gulidanö si II. So dombua bom atom nifazökhi niha sagatua-tua moroi ba Inggris hegöi Amerika, ba latorugö daʼö ba Jepang irege tebato wasuwöta andrö. Me luo daʼö, Famatörö Gulidanö Inggris-Amerika hulö no ”itorugö galitö moroi ba mbanua”.

10. Haniha niʼamaedolagö ’nadu famaedo gurifö samuʼi’? (Famaʼeleʼö 13:14, 15; 17:3, 8, 11)

¹⁰ Urifö samuʼi aefa daʼö fakhili ia ba gurifö samuʼi si fitu högö. Hizaʼi, urifö daʼa no oyo laʼa-laʼania simane hola-hola galitö. Yaʼia andre ”adu famaedo gurifö samuʼi”, ba lafotöi göi ia ”razo si walu”. * (Baso Wamaʼeleʼö 13:14, 15; 17:3, 8, 11.) Itutunö buku Wamaʼeleʼö wa ”razo” daʼa no irai so ia me mböröta, aefa daʼö lö hadöi yaʼia, ba ifuli so ia ba gafuriata. Tefaudu daʼa ba Perserikatan Bangsa-Bangsa (PBB) sotuhini politik ba gulidanö andre! No irai so organisasi daʼa me mböröta, ba lafotöi ia Liga Bangsa-Bangsa. Aefa daʼö, lö yaʼia saʼae me alua Wasuwöta Gulidanö si II. Ba gafuriata, ifuli zui so organisasi daʼa ba lafotöi ia Perserikatan Bangsa-Bangsa.

11. Hadia dania nifalua wamatörö niha gulidanö, ba hadia mbörö wa lö ataʼu ita?

¹¹ Urifö samuʼi mazui famatörö niha gulidanö, iforege wondrönisi tödö niha enaʼö lalawa Yehowa hegöi ono mbanuania. Amaedola laʼowuloi dania ”razo ba zi sagörö ulidanö” andre ba wasuwöta Hamagedo, yaʼia daʼö ”ngaluo wasuwöta sebua khö Lowalangi Fondrege Zabölö”. (Fam. 16:13, 14, 16) Hizaʼi, lö moguna ataʼu ita. Lowalangida fondrege zabölö, yaʼia daʼö Yehowa, hasambalö ilumöʼö ba iʼefaʼö fefu niha sotuhini famatörönia.—Hez. 38:21-23.

12. Hadia dania zalua ba gurifö samuʼi andrö fefu?

¹² Hadia dania zalua ba gurifö samuʼi andrö fefu? Imane Famaʼeleʼö 19:20, ”Laraʼu gurifö samuʼi andrö awö ndra samaʼeleʼö sofaya khönia si no mamazökhi tandra sahöli-höli dödö föna gurifö daʼö. Samaʼeleʼö andrö zamaelungu  fefu niha sanema tandra gurifö samuʼi andrö hegöi sangalulu ba nadunia. Aefa daʼö, mutiboʼö auri ira maʼadarua ba mbaho alitö si hola-hola safönu balera.” Eluahania, ba ginötö mamatörö ira nasa, hasambalö tehori fefu wamatörö solawa Lowalangi sagötö faʼara.

13. Hadia wanandraigö nitaögö niha Keriso?

¹³ Hadia zinangea tafalua? Yaʼita niha Keriso, tebai faröi ita khö Lowalangi hegöi ba Wamatörönia. (Yoh. 18:36) Eluahania, sindruhu-ndruhu lö faʼawö dambai ita ba politik gulidanö andre. Hizaʼi, te abua khöda wamalua daʼö börö me lafaso ita ira samatörö ba wotuhini yaʼira, he ba wehede hegöi ba nifaluada. Niha si tebai manaögö fanandraigö niʼasogö ndra samatörö, latema dania dandra moroi ba gurifö samuʼi. (Fam. 13:16, 17) Hizaʼi, fefu niha sanema tandra andrö, itimbagö ira Yehowa ba lö lasöndra waʼauri si lö aetu. (Fam. 14:9, 10; 20:4) Börö daʼö, gofu hawaʼabölö-bölö wanandraigö niʼasogö ndra samatörö, moguna tarorogö enaʼö lö faʼawö dambai ita!

14. Hadia niʼila zinenge sotöi Yohane irege ahöli-höli dödönia? (Famaʼeleʼö 17:3-5)

¹⁴ Baso Wamaʼeleʼö 17:3-5. Itutunö sinenge sotöi Yohane wa so niʼilania irege ’ahöli-höli sibai dödönia’. Hadia niʼilania andrö? So samösa ndra alawe sodadao ba hulu gurifö samuʼi. Yaʼia andrö ’sohorö sebua’, ba lafotöi ia ”Babilona Sebua”. ”Mohorö” ia khö ndra ”razo-razo ba gulidanö”.—Fam. 17:1, 2, 6

15-16. Haniha ’Mbabilona Sebua’ andrö, ba hana wa tola tawaʼö zimane daʼö?

¹⁵ Haniha ’Mbabilona Sebua’ andrö? Ira alawe daʼa lö manandrösa ia ba wamatörö niha gulidanö, börö me mututunö wa mohorö-horö ia khö ndra sondröniaʼö ba politik. (Fam. 18:9) Sindruhunia, iforege enaʼö ifatörö ira, hulö zi fakudo ia yawa ba hulura. Baero daʼö, ira alawe daʼa tenga göi manandrösa ia ba lala wogale safönu fakhögusa ba gulidanö Zatana andre, börö me faböʼö woʼamaedolagö daʼö ba ayati tanö böʼö, yaʼia daʼö ’ira sogale ba gulidanö’.—Fam. 18:11, 15, 16.

¹⁶ Ba Zura Niʼamoniʼö, ngawua wehede ”sohorö-horö” tola manandrösa ia ba niha sangotöigö samosumange Lowalangi, hizaʼi sindruhunia sanömba adu mazui si fahuwu ba gulidanö andre. (1 Ng. 5:25; Yak. 4:4) Hizaʼi, niha si lö faröi ba wamosumange Lowalangi, lafotöi ira ”ono alawe” mazui niha ”niʼamoniʼö”. (2 Ko. 11:2; Fam. 14:4) Me föna, banua Mbabilona andrö umbu wamosumange sofaya. Na simanö, tatu tefaudu na muʼogunaʼö Mbabilona Sebua ba woʼamaedolagö fefu lala wamosumange sofaya. Börö daʼö, Babilona Sebua eluahania fefu agama sofaya ba zi sagörö ulidanö andre.—Fam. 17:5, 18; faigi artikel web ”Apa Babilon Besar Itu?” ba jw.org.

17. Hadia dania zalua ba Mbabilona Sebua?

¹⁷ Hadia dania zalua ba Mbabilona Sebua? Imane Famaʼeleʼö 17:16, 17, ”Tandru si fulu rozi ba urifö samuʼi andrö fatiu dödöra dania ba zohorö andrö. Lahalö fefu gokhötania, laheta nukhania, laʼa nagolenia, ba latunu. Börö me Lowalangi zameʼe ba dödöra wamalua ohitö dödönia.” Börö me ifarou dödö ngawalö soi Yehowa, laʼogunaʼö dania gurifö samuʼi soyo si hulö hola-hola galitö, yaʼia daʼö PBB, ba wanuwö hegöi ba wangohori fefu agama sofaya ba zi sagörö ulidanö.—Fam. 18:21-24.

18. Hewisa wotatugöida wa lö tedönisi dödöda ibeʼe Babilona Sebua?

¹⁸ Hadia zinangea tafalua? Moguna tatatugöi wa lö tebulö tafalua ”wamosumange  sohau-hau ba si lö raʼiö moloʼö famaigi Lowalangi”. (Yak. 1:27) Böi tedönisi dödöda ba Mbabilona Sebua. Moguna tatimbagö wamahaʼönia sofaya, owasania si fatuwu ba Zura Niʼamoniʼö, goi-goinia si lö tefaudu sanandrösa ba gamuata, hegöi si toʼölö ifalua soʼamakhaita ba malaʼika si lö sökhi. Baero daʼö, böi taböhöli ba wamangelama niha enaʼö ’laheta ira’ moroi ba Mbabilona Sebua faböi fasala ira ba wamaigi Yehowa.—Fam. 18:4.

19. Haniha ”naga sebua soyo si hulö hola-hola galitö”?

¹⁹ No göi ihaogö wanutunö khöda buku Wamaʼeleʼö sanandrösa khö ”naga sebua soyo si hulö hola-hola galitö”. (Fam. 12:3) Naga daʼa zi fasuwö khö Yesu awö ndra malaʼikania. (Fam. 12:7-9) Isuwö göi nono mbanua Lowalangi ba ibeʼe waʼabölö ba gurifö samuʼi, yaʼia daʼö famatörö niha gulidanö. (Fam. 12:17; 13:4) Haniha naga daʼö? Yaʼia andrö ”ulö satua nifotöi Afökha ba Satana”. (Fam. 12:9; 20:2) Yaʼia zamatörö fefu si faʼudu khö Yehowa.

20. Hadia dania zalua ba naga andrö?

²⁰ Hadia dania zalua ba naga andrö? Itutunö khöda Famaʼeleʼö 20:1-3 wa so dania malaʼika saniboʼö Satana ba mbaho sabakha sibai. Hulö zi no mubeʼe ba gurunga Zatana ba luo daʼö. Sagötö feʼasonia ba daʼö, ”lö ifaelungu niha saʼae irege alua zi 1.000 fakhe andrö”. Aefa daʼö, tetiboʼö Zatana awö ndra malaʼikania si lö sökhi ”ba mbaho alitö safönu balera”. Eluahania, tehori ira sagötö faʼara. (Fam. 20:10) Khalaigö atö hewisa dania zalua na lö hadöi saʼae Satana awö ndra malaʼikania si lö sökhi. Tatu omuso sibai dödöda!

21. Hadia mbörö wa omuso dödöda me no tafahaʼö ita ba dandra-tandra si so ba mbuku Wamaʼeleʼö?

²¹ Tatu omuso sibai dödöda börö me no taʼila geluaha dandra-tandra nitötöi ba mbuku Wamaʼeleʼö! Aboto ba dödöda haniha manö nudu Yehowa andrö ba hadia dania zalua khöra. No tarasoi samösa wa atulö niwaʼö Zura Niʼamoniʼö: ”Yaʼahowu zombaso famaʼeleʼö hegöi samondrongo ba samalua si no tesura andre.” (Fam. 1:3) Iadaʼa, na no tehori dania fefu nudu Lowalangi, hadia manö howu-howu nitema niha si lö faröi? Tatutunö daʼö ba artikel safuria ba seri daʼa.