1. Hadia gangetula si tohude sinangea lahalö niha gulidanö maʼafefu?

 SO SAMBUA gangetula si tohude sinangea lahalö niha gulidanö ba götöda andre: Hadia latuhini Lowalangi Yehowa tobali Samatörö banua si yawa awö danö, mazui hadia latuhini nudunia si lö sökhi, yaʼia daʼö Afökha Satana? Tebai lawaʼö wa lö faʼawö dambai ira. Gofu hadia gangetula nihalöra, daʼö zotatugöi hadia lasöndra waʼauri si lö aetu mazui löʼö. (Mat. 25:31-33, 46) Sagötö alua ”wamakao sabölö-bölö” dania, tebeʼe khöra dandra sangoromaʼö hadia teʼorifi ira mazui tehori.—Fam. 7:14; 14:9-11; Hez. 9:4, 6.

2. (a) Simane nitutunö ba Heberaiʼo 10:35-39, hadia zinangea tafalua? (b) Hewisa wa tola möi fanoloda mbuku Wamaʼeleʼö?

² Baso Heberaiʼo 10:35-39. Na no öfili wotuhini famatörö Yehowa, no öhalö gangetula si fao faʼatua-tua. Iadaʼa, tatu manö omasiʼö göi ötolo niha böʼö ba wangai angetula si tefaudu. Ba wanolo yaʼira, tola öʼogunaʼö waʼaboto ba dödö si no tesura ba mbuku Wamaʼeleʼö. Itutunö buku sadöni dödöda andrö hadia dania zalua ba niha solawa famatörö Yehowa. Ifatunö göi hadia dania howu-howu nitema niha si lö faröi ba wotuhini famatörönia. Moguna sibai tafahaʼö ita sanandrösa ba daʼö enaʼö itugu aro gangetulada ba wamosumange Yehowa si fao faʼalöfaröi. Baero daʼö, tola göi taʼogunaʼö hadia zi no tafahaʼö yaʼita andrö ba wanolo niha böʼö enaʼö tola lahalö gangetula si tefaudu ba lö tebulö lafosumange Yehowa.

3. Hadia nitutunöda ba artikel daʼa?

³ Ba artikel daʼa, tatutunö wanofu-nofu andre: Hadia dania zalua ba niha sotuhini famatörö Lowalangi? Ba hadia zalua  ba niha sangai angetula ba wotuhini urifö samuʼi soyo si hulö hola-hola galitö, nitutunö ba mbuku Wamaʼeleʼö?

4. Ba gangilata zinenge sotöi Yohane, haniha zi fao khö Yesu ba zorugo?

⁴ Ba zi sambua angilata, iʼila sinenge sotöi Yohane dombua ngawawa sotuhini famatörö Yehowa ba sanema faʼauri si lö aetu. So 144.000 niha si farahu ba ngawawa siföföna. (Fam. 7:4) Tehalö ira moroi ba gulidanö wefao khö Yesu ba Wamatörönia si so ba zorugo, ba yaʼira dania zamatörö ulidanö andre. (Fam. 5:9, 10; 14:3, 4) Ba gangilata andrö, iʼila Yohane wa fao ira khö Yesu wezizio ba Hili Ziona si so ba zorugo.—Fam. 14:1.

5. Hadia zi lö ara tö alua ba niha nibayoini sauri nasa ba gulidanö?

⁵ Iʼotarai me götö ndra sinenge irugi iadaʼa, no mato hauga ribu niha si no mufili enaʼö farahu ira ba zi 144.000 niha. (Luk. 12:32; Rom. 8:17) Hizaʼi, no mufatunö khö Yohane wa sagötö ngaluo safuria, lö atoto niha nibayoini sauri nasa ba gulidanö. Fatua lö tebörögö wamakao sabölö-bölö, fefu niha ”si tosai” andrö hasambalö latema ”wamotandro” safuria moroi khö Yehowa sangoromaʼö wa omuso dödönia khöra. (Fam. 7:2, 3; 12:17) Sagötö alua wamakao sabölö-bölö, teʼohe dania ira ba zorugo. Teʼowuloi ira ba niha tanö böʼö si farahu ba zi 144.000 niha, si lö faröi irugi waʼamate. Aefa daʼö, mamatörö ira awö Yesu ba Wamatörö Lowalangi.—Mat. 24:31; Fam. 5:9, 10.

6-7. (a) Haniha niʼila Yohane aefa daʼö? (b) Hana wa adöni dödö niha nibayoini si tosai hegöi ”ngawawa sato sibai” ba nösi Wamaʼeleʼö faza 7?

⁶ Me no aefa iʼila Yohane ngawawa si so ba zorugo, iʼila göi ”ngawawa sato sibai”. Tebai muʼerai waʼato niha si farahu ba ngawawa andrö, tenga simane ngawawa si 144.000 niha. (Fam. 7:9, 10) Haniha ira andrö? Imane Yohane, ”Yaʼira andrö si no teʼorifi moroi ba wamakao sabölö-bölö. No lasasai nukhara sebua ba laʼafusiʼö ba ndro Nono Mbiri-biri.” (Fam. 7:14) Na no aefa teʼorifi ”ngawawa sato sibai” moroi ba wamakao sabölö-bölö, latema dania howu-howu sahöli-höli dödö ba gulidanö andre.—Si. 37:9-11, 27-29; Amd. 2:21, 22; Fam. 7:16, 17.

⁷ Gofu hezo so dania auri ita, he ba zorugo hegöi ba gulidanö, hadia takhalaigö wa so ita ba waʼalua zi no mututunö ba Wamaʼeleʼö faza 7? Moguna tafalua daʼö. No inötö sahöli-höli dödö daʼö ba nono mbanua Lowalangi si farahu ba zi dombua ngawawa no mege! Ba ginötö daʼö, hasambalö tarasoi waʼomuso dödö börö me no tahalö gangetula ba wotuhini famatörö Yehowa. Hadia nasa nitutunö mbuku Wamaʼeleʼö sanandrösa ba wamakao sabölö-bölö?—Mat. 24:21.

8. Hadia dania zalua ba wamobörö wamakao sabölö-bölö, ba hadia lua-luania ba niha sato?

⁸ Simane nitutunöda ba artikel si no tataluʼi, hasambalö terou dödö kuaso politik ba gulidanö andre ba wanuwö Babilona Sebua, yaʼia daʼö agama sofaya ba zi sagörö ulidanö. (Fam. 17:16, 17) Daʼö dania zalua ba wamobörö wamakao sabölö-bölö. Hadia terou dödö niha sato wangai angetula ba wamosumange Yehowa börö zalua andrö? Löʼö. Itutunö Famaʼeleʼö faza 6 wa lö lalumöʼö ira khö Yehowa sagötö mbaŵa waʼabasaki andrö. Hizaʼi, laʼalui wolumöʼö ba zi no amaedola hili, yaʼia daʼö kuaso politik hegöi lala wogale ba gulidanö andre. Börö me lö lahalö gangetula  ba wotuhini Famatörö Lowalangi, tobali ira udu Yehowa.—Luk. 11:23; Fam. 6:15-17.

9. Sagötö wamakao sabölö-bölö dania, hewisa lala nono mbanua Yehowa ba wangoromaʼö wa faehu ira moroi ba niha böʼö, ba hadia lua-luania?

⁹ Sagötö wamakao sabölö-bölö dania, hasambalö laforomaʼö ono mbanua Yehowa si lö faröi wa faehu ira moroi ba niha böʼö. Ha yaʼira dania ngawawa samosumange Lowalangi Yehowa ba gulidanö andre, ba lö omasi ira latuhini ”gurifö samuʼi”. (Fam. 13:14-17) Börö me lö faröi ira khö Yehowa, mofönu sibai khöra fefu nudu Lowalangi. Börö daʼö, owulo dania fefu soi ba wanuwö ono mbanua Lowalangi ba zi sagörö ulidanö. Ba Zura Niʼamoniʼö, mufotöi daʼö fanuwö nifalua Gogi moroi ba Magogi.—Hez. 38:14-16.

10. Simane nitutunö ba Wamaʼeleʼö 19:19-21, hadia dania nifalua Yehowa na lasuwö nono mbanuania?

¹⁰ Hadia nifalua Yehowa na lasuwö nono mbanuania? Imane, ”Mohola wönugu sabölö-bölö.” (Hez. 38:18, 21-23) Itutunö Famaʼeleʼö faza 19 hadia zalua aefa daʼö. Ifatenge Nononia Yehowa ba wolumöʼö ono mbanuania hegöi ba wangohori fefu zi faʼudu khöra. Ba wasuwöta andrö, fao khö Yesu ndra ”saradadu zorugo”, yaʼia daʼö ira malaʼika si lö faröi hegöi si 144.000. (Fam. 17:14; 19:11-15) Hadia lua-lua wasuwöta andrö? Tehori fefu niha hegöi organisasi solawa Yehowa!—Baso Wamaʼeleʼö 19:19-21.

11. Hadia zalua sabölö tohude nitutunö ba mbuku Wamaʼeleʼö?

¹¹ Khalaigö hewisa dödö niha si lö faröi na teʼorifi ira dania ba ginötö tehori fefu nudu Lowalangi. Tatu omuso sibai dödöra! So göi waʼomuso dödö ba zorugo na tehori dania Mbabilona Sebua. Hizaʼi, so zalua tanö böʼö sangaʼasogö faʼomuso dödö sabölö ebua. (Fam. 19:1-3) Sindruhunia, daʼö zalua sabölö tohude ba mbuku Wamaʼeleʼö, yaʼia daʼö ’fangowalu Nono Mbiri-biri’.—Fam. 19:6-9.

12. Hawaʼara alua walöwa Nono Mbiri-biri? (Famaʼeleʼö 21:1, 2)

¹² Hawaʼara alua walöwa andrö? Fatua lö alua wasuwöta Hamagedo, no saʼae teʼowuloi ba zorugo fefu zi 144.000 niha. Hewaʼae simanö, tenga nasa daʼö ginötönia wamalua fangowalu Nono Mbiri-biri. (Baso Wamaʼeleʼö 21:1, 2.) Mufalua walöwa andrö na no aefa wasuwöta Hamagedo ba no tehori fefu nudu Lowalangi.—Si. 45:3, 4, 13-17.

13. Hadia zalua ba walöwa Nono Mbiri-biri?

¹³ Hadia zalua ba walöwa Nono Mbiri-biri? Teʼosambuaʼö zi samösa ira matua khö zi samösa ira alawe na no mangowalu ira. Simanö göi na alua walöwa Nono Mbiri-biri, teʼosambuaʼö Yesu Keriso si no tobali Razo khö ndra si 144.000, si no amaedola ”niʼowalu”. Iʼotarai daʼö, fao ira ba wamatörö ulidanö andre ba zi 1.000 fakhe faʼara.—Fam. 20:6.

14-15. Hewisa Wamaʼeleʼö faza 21 woʼamaedolagö si 144.000 niha? (Faigi gambara ba guli majalah.)

¹⁴ Ba Wamaʼeleʼö faza 21, muʼamaedolagö zi 144.000 niha andrö simane banua si sökhi sibai nifotöi ”Yeruzalema si Bohou”. (Fam. 21:2, 9) Tefasindro mbanua andrö ba zi 12 kara wondrasi, ba no tesura ba daʼö ”döi zi 12 sinenge Nono Mbiri-biri”. Hana wa adöni dödö Yohane ba zi no tesura andrö? Börö me no tesura döinia ba gara andrö. Sindruhu-ndruhu wa no töi sebua daʼö!—Fam. 21:10-14; Ef. 2:20.

¹⁵ Faehu sibai mbanua andrö moroi ba mbanua tanö böʼö. Tefazökhi lalania moroi ba ganaʼa si sökhi, so 12 mbawa gölinia nifazökhi moroi ba mutiara, ba tefazökhi göli hegöi  fondrasinia moroi ba gara sebua böli. Baero daʼö, fagölö waʼanau, faʼebolo, ba faʼalawania. (Fam. 21:15-21) Hizaʼi, hulö so sambua zoʼamböta. Imane Yohane, ”Lö niʼilagu wa so gosali ba mbanua andrö, börö me osalinia yaʼia daʼö Lowalangi Yehowa Fondrege Zabölö, hegöi Ono Mbiri-biri. Lö moguna ihagaini mbanua andrö sino mazui baŵa. Lakhömi Lowalangi daʼö zi tobali haga, ba Ono Mbiri-biri zi tobali fandrunia.” (Fam. 21:22, 23) Fefu zi farahu ba Yeruzalema si Bohou tola faʼila bawa ira khö Yehowa. Börö daʼö, lö saʼae moguna khöra gosali. (Fam. 22:3, 4) Baero daʼö, sagötö mangai halöwö ira khö Yehowa, idöniaʼö ira Yesu Keriso si no tobali ere sebua ba zorugo. (Heb. 7:27) Daʼö mbörö wa muʼamaedolagö Yehowa hegöi Yesu simane osali ba mbanua andrö.

16. Hadia zalua ba niha gulidanö sagötö Wamatörö si Saribu Fakhe?

¹⁶ Tatu omuso sibai dödö niha nibayoini na lakhalaigö Yeruzalema si Bohou. Hizaʼi, fefu niha sangokhögö tötönafö faʼauri si lö aetu ba gulidanö andre, adöni göi dödöra ba mbanua andrö. Hadia mbörö? Börö me oya howu-howu niʼasogö Yeruzalema si Bohou sagötö Wamatörö si Saribu Fakhe. Iʼila Yohane wa mangele howu-howu andrö hulö ”nungo nidanö fangorifi”. Ba zinga nungo nidanö andrö, faoma so fatambai ”döla geu fangorifi” ba muʼogunaʼö mbulunia ”ba wamadöhö fefu soi”. (Fam. 22:1, 2) Tebeʼe ginötö ba niha gulidanö maʼafefu ba wanema howu-howu andrö. Arara manö, tobali niha soʼahonoa fefu zoloʼö li Yehowa. Lö hadöi saʼae fökhö, faʼabu dödö, hegöi fege-ege.—Fam. 21:3-5.

17. Simane niforomaʼö ba Wamaʼeleʼö 20:11-13, haniha manö zanema howu-howu sagötö Wamatörö si Saribu Fakhe?

¹⁷ Haniha manö zanema howu-howu sahöli-höli dödöda andrö? Si oföna yaʼia daʼö ngawawa sato sibai si teʼorifi ba Hamagedo, ba simanö göi ndraono sawena tumbu dania ba gulidanö si bohou. Baero daʼö, ifabuʼu göi Famaʼeleʼö faza 20 wa tesusugi dania niha si no mate. (Baso Wamaʼeleʼö 20:11-13.) Fefu niha ”satulö” si no mate me götö föna hegöi niha ”si lö atulö” si lö irai mamahaʼö yaʼira sanandrösa khö Yehowa, hasambalö tesusugi dania ira enaʼö auri ba gulidanö. (Hal. 24:15; Yoh. 5:28, 29) Hizaʼi, hadia daʼö geluahania  wa ahori tesusugi fefu niha sagötö Wamatörö si Saribu Fakhe? Löʼö. So ösa niha si lö omasi mamosumange Yehowa hewaʼae na no tebeʼe khöra ginötö fatua lö mate ira. Lö tesusugi niha simane daʼö, börö me no oroma wa tenga sinangea ira wanöndra faʼauri ba gulidanö Faradaiso.—Mat. 25:46; 2 Te. 1:9; Fam. 17:8; 20:15.

18. Hewisa zalua ba gulidanö ba gangohorita zi 1.000 fakhe?

¹⁸ Ba gangohorita zi 1.000 fakhe, no saʼae moʼahonoa fefu niha sauri ba gulidanö. Lö saʼae göna ira horö ondröita moroi khö Gadamo. (Rom. 5:12) No muheta fefu lua-lua horö Gadamo andrö. Börö daʼö, amaedola ”ifuli auri” ita tobali niha soʼahonoa ba gangohorita zi 1.000 fakhe.—Fam. 20:5.

19. Hana wa moguna alua wanandraigö safuria?

¹⁹ Aboto ba dödöda wa lö faröi Yesu khö Lowalangi hewaʼae na itandraigö ia Satana. Hizaʼi, hadia lafalua göi zimane daʼö niha si no moʼahonoa na tebeʼe ginötö khö Zatana ba wanandraigö famatira? Fefu niha ero zamösana tola labeʼe wanema li moroi ba wanofu daʼö ba ginötö teʼefaʼö Zatana moroi ba mbaho sabakha na no aefa zi 1.000 fakhe andrö. (Fam. 20:7) Niha si lö faröi sagötö wanandraigö safuria andrö, hasambalö latema waʼauri si lö aetu ba lasöndra wangefa sindruhu. (Rom. 8:21) Hizaʼi, tehori dania Gafökha, ira malaʼika si lö sökhi, hegöi niha gulidanö si fao khöra ba wolawa Yehowa.—Fam. 20:8-10.

20. Hewisa dödöu me no tatutunö wamaʼeleʼö si no tesura ba mbuku Wamaʼeleʼö?

²⁰ Hewisa dödöu me no tatutunö rahu-rahu mbuku Wamaʼeleʼö? Hadia lö omuso dödöu me tola fao ndraʼugö ba waʼalua wamaʼeleʼö andrö? Ba hadia lö terou dödöu wogaoni niha böʼö enaʼö fao ira khöda ba wamalua famosumange satulö khö Lowalangida? (Fam. 22:17) Tatu tadöna-döna waʼalua wamaʼeleʼö andrö, ba fao dödöda wangumaʼö fehede niwaʼö zinenge sotöi Yohane: ”Yaduhu! Yatohare Zoʼaya yaʼita Yesu.”—Fam. 22:20.