1. Hadia mbörö wa moguna khöda waʼatua-tua moroi khö Yehowa? (Amaedola 4:7)

 BA GINÖTÖ öhalö gangetula sebua, tatu manö öʼohe daʼö ba wangandrö börö me öʼila wa moguna khöu waʼatua-tua. (Yak. 1:5) Imane Razo Selomo, ”Faʼatua-tua zabölö moguna.” (Baso Gamaedola 4:7.) Tatu manö, tenga faʼatua-tua moroi ba niha gulidanö nitutunö Zelomo andre, hizaʼi faʼatua-tua si otarai khö Lowalangi Yehowa. (Amd. 2:6) Hadia tola möi fanoloda waʼatua-tua si otarai khö Lowalangi ba wanaögö ngawalö gabula dödö salua khöda iadaʼa? Tatu manö tola, simane niʼilada dania ba artikel daʼa.

2. Hewisa lala enaʼö tola taʼokhögö waʼatua-tua?

² Hewisa lala enaʼö tola taʼokhögö waʼatua-tua? Sambua lala si tola tafalua yaʼia daʼö tafahaʼö ita ba tafalua mene-mene moroi khö ndra matua si darua sangokhögö faʼatua-tua sahöli-höli dödö. Si oföna yaʼia daʼö Selomo. Imane Sura Niʼamoniʼö, ”Ibeʼe Lowalangi waʼatua-tua khö Zelomo, fangiʼila hegöi faʼaboto ba dödö sebua simane faʼoya gawu ba zinga nasi.” (1 Ra. 4:29) Si dua yaʼia daʼö Yesu, ira matua fondrege zatua-tua si no irai auri ba gulidanö. (Mat. 12:42) No ifaʼeleʼö Sura Niʼamoniʼö sanandrösa khö Yesu, ”Afönu khönia geheha Yehowa. Andrö wa so khönia waʼatua-tua [ba] faʼaboto ba dödö fondrege zebua.”—Yes. 11:2.

3. Hadia nitutunöda ba artikel daʼa?

³ Börö me no itema Selomo hegöi Yesu waʼatua-tua si otarai khö Lowalangi, daʼö mbörö wa tola labeʼe mene-mene si sökhi  soguna khöda. Ba artikel daʼa, tatutunö tölu mene-mene nibeʼera sangoromaʼö wa moguna taʼokhögö lala wangera-ngera si tefaudu sanandrösa ba gokhöta, halöwö, hegöi faʼaurida samösa.

4. Hadia gamaehuta Zelomo hegöi Yesu sanandrösa ba gokhöta?

⁴ Selomo andrö niha sebua okhöta, ba toröi ia ba nomo sebua si sökhi sibai. (1 Ra. 10:7, 14, 15) Hizaʼi, Yesu andrö niha si lö okhöta ba lö hadöi omonia. (Mat. 8:20) Hewaʼae simanö, ira matua si darua andre faoma laʼokhögö lala wangera-ngera si tefaudu sanandrösa ba gokhöta, börö me fagölö Gumbu waʼatua-tua niʼokhögöra, yaʼia daʼö Lowalangi Yehowa.

5. Hadia zangoromaʼö wa so khö Zelomo lala wangera-ngera si tefaudu sanandrösa ba gefe?

⁵ Iwaʼö Selomo wa kefe andrö tola ”tobali folumöʼö”. (Sango. 7:12) Na so gefeda, tola tebönökhi zoguna khöda ba tola göi taʼöli zomasi-masi dödöda. Selomo andrö niha si kayo, hizaʼi aboto ba dödönia wa so zabölö moguna moroi ba gefe. Duma-dumania imane, ”Abölö sökhi döi si sökhi moroi ba harato sebua.” (Amd. 22:1) Iwaʼö göi Selomo wa niha sangomasiʼö kefe lö irai ahono dödönia ba zi no iʼokhögö. (Sango. 5:10, 12) Iʼamenesi göi ita enaʼö böi tawaʼö tödöda wa kefe andrö zabölö moguna ba waʼaurida, börö me tola taya daʼö ba zi lö arara.—Amd. 23:4, 5.

6. Hadia zangoromaʼö wa so khö Yesu lala wangera-ngera si tefaudu sanandrösa ba gokhöta? (Mataiʼo 6:31-33)

⁶ So khö Yesu lala wangera-ngera si tefaudu sanandrösa ba gokhöta. Sindruhu sa, omuso dödönia wemanga ö sami hegöi ba wamadu agu si sökhi. (Luk. 19:2, 6, 7) Me ifalua dandra sahöli-höli dödö si oföna sibai, no irai ibaliʼö nidanö tobali agu fondrege zi sökhi. (Yoh. 2:10, 11) Ba ngaluo waʼamatenia, ifake nukha sebua böli. (Yoh. 19:23, 24) Hewaʼae simanö, tenga okhöta zabölö iʼofönaiʼö ba waʼaurinia. Imane khö ndra soloʼö khönia, ”Tebai möi sawuyu zi darua zi samösa niha. . . . Tebai tobali ami sawuyu Lowalangi ba sawuyu Ganaʼa göi.” (Mat. 6:24) Ifahaʼö göi ita Yesu wa hasambalö ibönökhi zoguna khöda Yehowa na  taʼofönaiʼö Wamatörö Lowalangi.—Baso Mataiʼo 6:31-33.

7. Hadia mbua nitema zi samösa talifusöda ira matua börö me iʼokhögö lala wangera-ngera si tefaudu sanandrösa ba gokhöta?

⁷ Ato ndra talifusöda si no manema bua si sökhi börö me no laʼoʼö mene-mene Zura Niʼamoniʼö sanandrösa ba gokhöta. Nehegö atö duma-duma zi samösa talifusöda ira matua sotöi Daniel. Imane, ”Me awuyu-wuyu nasa ndraʼo, uhalö gangetula ba wangofönaiʼö halöwö ba wamati ba waʼaurigu.” Börö me lö tebulö iʼöna-önaiʼö waʼaurinia Daniel, tola iʼogunaʼö ginötö hegöi nekhe-nekhe danga niʼokhögönia ba wanolo niha si göna bencana hegöi ba wangai halöwö ba Mbetieli. Imane nasa, ”Lö irai maniasa ndraʼo ba gangetula nihalögu. Sindruhu sa, na uʼosambuaʼö dödögu ba wangalui okhöta, tola usöndra gefe sebua. Hizaʼi na ufalua daʼö, lö usöndra zi fahuwu si sökhi simane niʼokhögögu iadaʼa. Baero daʼö, tebai urasoi waʼohahau dödö simane nirasoigu iadaʼa me uʼofönaiʼö wangalui Famatörö Lowalangi. Lö eluaha gefe sebua na mufaedogö ia ba howu-howu nibeʼe Yehowa khögu.” Börö daʼö, na taʼosambuaʼö dödöda ba wamalua halöwö ba wamati, tenga ba wangalui okhöta, oya howu-howu nitemada.

8. Hadia zangoromaʼö wa so khö Zelomo lala wangera-ngera si tefaudu sanandrösa ba halöwönia? (Sangombakha 5:18, 19)

⁸ Iwaʼö Selomo wa tola taʼomusoiʼö dödöda ba halöwö nifaluada, ba ifotöi daʼö ”buala Lowalangi”. (Baso Zangombakha 5:18, 19.) Imane nasa, ”Oi so gunania waʼerege dödö ba wohalöwö.” (Amd. 14:23) No irasoi samösa Selomo wa atulö wehede daʼö. Oya ifazökhi nomo, kabu nagu, kabu mbunga, hegöi baʼa nidanö. So göi ösa mbanua nifasindronia. (1 Ra. 9:19; Sango. 2:4-6) Tatu omuso dödö Zelomo ba halöwö si no ifalua andrö. Hizaʼi, aboto ba dödönia wa lö ibönö daʼö ba wangokhögö faʼomuso dödö. Börö daʼö, oya göi halöwö ba wamati nifaluania. Duma-dumania, idöniaʼö halöwö famazökhi osali niʼogunaʼö ba wamosumange Yehowa. Mufalua wamazökhi osali andrö fitu fakhe waʼara! (1 Ra. 6:38; 9:1) Me no ifalua fefu daʼö, aboto ba dödönia wa sabölö moguna yaʼia daʼö halöwö ba wamati. Imane, ”Rahu-rahu moroi ba zi no muwaʼö andre fefu yaʼia daʼö: Ataʼufi Lowalangi sindruhu ba falua goroisania.”—Sango. 12:13.

9. Hewisa wangoromaʼö Yesu wa tenga halöwönia zabölö iʼofönaiʼö ba waʼaurinia?

⁹ Yesu andrö niha sowölö-ölö ba wohalöwö. Me awuyu-wuyu ia, mohalöwö ia tobali tuka geu. (Mrk. 6:3) Itolo zatuania ba wamönökhi soguna khöra börö me ato ira ba nomo. Tatu mangandrö saohagölö zatuania ba wanolo nibeʼenia andrö. Börö me moʼahonoa Yesu, tatu manö sökhi sibai halöwö dangania. Börö daʼö, ato zomasi mowöli gama-gama nifazökhinia. Omuso göi dödö Yesu wamalua halöwönia andrö. Hizaʼi, hewaʼae na owölö-ölö Yesu ba wohalöwö, lö tebulö ibeʼe ginötönia ba wamalua halöwö ba wamati. (Yoh. 7:15) Ba gafuriata, me no tobali ia sanuriaigö safönu inötö, iʼamenesi niha samondrondrongo yaʼia, ”Böi miʼohalöwö ba wangalui ö si tola owoyu. Miʼohalöwö ba wangalui ö si lö irai owoyu ba solohe ba waʼauri si lö aetu.” (Yoh. 6:27) Baero daʼö, imane Yesu me ifaʼema Huhuo ba Hili, ”Mihöna khömi harato ba zorugo.”—Mat. 6:20.

10. Hadia zi tola manö alua na owölö-ölö ita wohalöwö?

¹⁰ Na taʼoʼö mene-mene si sökhi moroi khö Yehowa, tola taʼokhögö lala wangera-ngera si tefaudu sanandrösa ba wohalöwö. Yaʼita niha Keriso, no tefahaʼö ita enaʼö ’taforege wohalöwö ba wamalua si sökhi’. (Ef. 4:28) Si toʼölönia,  tola laʼila ira kafaloda wa owölö-ölö ita ba lö falimo, ba tola manö mangandrö saohagölö ira ba waʼerege dödöda. Börö daʼö, te itugu taforege nasa wohalöwö enaʼö lö tebulö laʼokhögö lala wangera-ngera si sökhi sanandrösa khö ndra Samaduhuʼö Yehowa. Hizaʼi ba gafuriata, awena aboto ba dödöda wa no ibörögö taʼosiwawöi noro dödöda yomo ba nomo hegöi halöwöda ba wamati. Na daʼö zalua, moguna tabulöʼö nifaluada enaʼö oya ginötöda ba wamalua sabölö moguna.

11. Hadia wamahaʼö nitema zi samösa talifusöda ira matua sanandrösa ba lala wangera-ngera si tefaudu ba halöwönia?

¹¹ Moroi ba duma-duma zi samösa satua sokubaloi, ifahaʼö ia talifusöda ira matua sotöi William wa moguna sibai wangokhögö lala wangera-ngera si tefaudu sanandrösa ba halöwö. Ba zilalö, no irai mohalöwö ia khö zatua sokubaloi andrö. Imane William, ”Sindruhu-ndruhu wa no tobali duma-duma si sökhi [dalifusöda andrö] ba wangokhögö lala wangera-ngera si tefaudu sanandrösa ba halöwö. Owölö-ölö ia wohalöwö, ba omuso dödö niha börö me sökhi wamaluania halöwönia. Hizaʼi, na no mangawuli ia moroi ba halöwönia, lö saʼae iʼera-era halöwönia andrö. Niʼera-erania yaʼia daʼö ösi nomonia hegöi famosumange Lowalangi. Buania, omuso sibai dödönia!” *

12. Hadia zangoromaʼö wa no irai so khö Zelomo lala wangera-ngera si tefaudu sanandrösa ba waʼaurinia samösa, hizaʼi hana wa tebulö ia ba gafuriata?

¹² Me lö nasa si faröi Zelomo khö Yehowa, iʼokhögö lala wangera-ngera si tefaudu sanandrösa ba waʼaurinia samösa. Me awuyu-wuyu ia, ifaduhuʼö si fao fangide-ngideʼö wa yaʼia andrö niha sambö tödö, ba iʼandrö wanuturu lala moroi khö Yehowa. (1 Ra. 3:7-9) Me awena mamatörö ia, aboto göi ba dödö Zelomo wa tola möi famaʼala wayawasa andrö. Imane, ”Lua-lua waʼasiliyawa ba faʼatekiko, ba lua-lua wayawasa ba faʼateʼala.” (Amd. 16:18) Hizaʼi ba gafuriata, lö ifalua Selomo mene-mene  nibeʼenia andrö. Ibörögö fayawa ia ba iʼosiwawöi goroisa Lowalangi. Duma-dumania, so goroisa sangumaʼö wa razo Heberaiʼo ’tebai ato woʼomonia faböi fandröndröu ia khö Lowalangi’. (5 Mo. 17:17) Iʼosiwawöi goroisa andrö Selomo irege so 700 woʼomonia ba 300 woʼomo ba döi, ba ato moroi ba gotaluara zi tenga samosumange Yehowa! (1 Ra. 11:1-3) Me luo daʼö, te iwaʼö tödönia Selomo wa lö tobali famaʼalania nifaluania andrö. Hizaʼi ba gafuriata, itema lua-lua si lö sökhi börö me lö iʼoʼö goroisa Yehowa.—1 Ra. 11:9-13.

13. Hadia wamahaʼö si tola tahalö moroi ba wangide-ngideʼö niʼokhögö Yesu?

¹³ So khö Yesu wangide-ngideʼö ba iʼokhögö lala wangera-ngera si tefaudu sanandrösa ba waʼaurinia samösa. Fatua lö möi ia ba gulidanö, oya ngawalö zahöli-höli dödö nifalua Yesu ba wangai halöwö khö Yehowa. Börö Yesu wa ”tewöwöi fefu zi so ba zorugo hegöi ba gulidanö”. (Kol. 1:16) Me tebayagö ia idanö, tola manö ifuli itörö tödönia hadia manö zi no irai ifalua ba zilalö sagötö wefaonia khö Namania. (Mat. 3:16; Yoh. 17:5) Hewaʼae simanö, lö tobali börö wayawasania fefu zi no itörö tödö andrö. Lö göi irai iwaʼö tödönia wa abölö tohude ia moroi ba niha böʼö. Ifatunö khö ndra nifahaʼönia wa möi ia ba gulidanö ”tenga si möi mangoni, no si möi enoni, sameʼe nosonia höli zato”. (Mat. 20:28) Ifaduhuʼö göi wa tebai ifalua gofu hadia ia ba zomasi dödönia samösa. (Yoh. 5:19) Sindruhu-ndruhu wa so khö Yesu wangide-ngideʼö! No tobali ia duma-duma si sökhi khöda.

14. Hewisa lala Yesu ba wamahaʼö ira soloʼö khönia enaʼö laʼokhögö lala wangera-ngera si tefaudu sanandrösa ba waʼaurira samösa?

¹⁴ Ifahaʼö ndra soloʼö khönia Yesu ba wangokhögö lala wangera-ngera si tefaudu sanandrösa ba waʼaurira samösa. No irai imane khöra Yesu, ”Bu högömi manö iʼila [Yehowa] hauga rozi.” (Mat. 10:30) Terara sibai dödöda ba wehede Yesu andrö, mendrua manö na asese taʼokhögö lala wangera-ngera si lö tefaudu sangaʼasogö faʼide-ide dödö. Iforomaʼö Yesu wa iʼameʼegö tödö ita Amada si so ba zorugo ba no sebua böli ita ba wamaiginia. Lö irai fasala lala wangera-ngera Yehowa. Börö daʼö,  böi tawaʼö tödöda wa tenga sinangea ita ba wamosumange yaʼia hegöi ba wangokhögö faʼauri si lö aetu ba gulidanö si bohou nifabuʼunia.

15. (a) Moloʼö sambua artikel si so ba majalah Menara Pengawal, hewisa enaʼö taʼokhögö lala wangera-ngera si tefaudu sanandrösa ba waʼaurida samösa? (b) Simane niforomaʼö ba gambara ba ngaʼörö 24, hadia lua-luania na abölö taʼosambuaʼö dödöda ba waʼaurida samösa?

¹⁵ Mato 15 fakhe silalö, itutunö majalah Menara Pengawal hewisa enaʼö taʼokhögö lala wangera-ngera si tefaudu sanandrösa ba waʼaurida samösa. Imane majalah andrö, ”Tatu lö tawaʼö tödöda wa abölö tohude ita moroi ba niha böʼö irege tumbu ba dödöda waʼasiliyawa. Hizaʼi, tebai göi tawaʼö tödöda wa si lö eluaha waʼaurida andre. Abölö sökhi na tahaogö taʼangeragö hadia zi tohude ita hegöi soʼamböta ita, irege tola taʼokhögö lala wangera-ngera si tefaudu sanandrösa ba waʼaurida samösa. Imane si samösa talifusöda ira alawe, ’Yaʼodo tenga niha si lö sökhi, ba tenga göi niha si tohude. So gamuatagu si sökhi ba so göi gamuatagu si lö sökhi, ba simane daʼö göi niha böʼö.’” * Börö daʼö, na taʼokhögö lala wangera-ngera si tefaudu sanandrösa ba waʼaurida samösa, hasambalö tatema mbua si sökhi.

16. Hadia mbörö wa ibeʼe khöda Yehowa mene-mene si sökhi?

¹⁶ Iʼogunaʼö Daromalinia Yehowa ba wameʼe khöda mene-mene si sökhi. Ifalua daʼö börö me iʼomasiʼö ita ba omasi ia na omuso dödöda. (Yes. 48:17, 18) Börö daʼö, na omasi ita tarasoi waʼomuso dödö, böi tebulö taʼofönaiʼö Yehowa ba waʼaurida. Na tafalua daʼö, teʼefaʼö ita moroi ba ngawalö gabula dödö salua ba niha sangosambuaʼö tödöra ba gokhöta, ba halöwö, mazui ba waʼaurira samösa. Börö daʼö, datahalö gangetula ba wangokhögö faʼatua-tua hegöi ba wangomusoiʼö tödö Yehowa!—Amd. 23:15.