1-2. Hana wa itugu moguna khöda goi-goi Zura Niʼamoniʼö na tebulö zalua ba waʼaurida?

 BA GINÖTÖ alua walöwa, marafule hegöi niʼowalu faoma lafondrondrongo huhuo si teʼodane-dane ba Zura Niʼamoniʼö sanandrösa ba wongambatö. Goi-goi nitutunö ba daʼö tenga sawena larongo. Hizaʼi, iʼotarai maʼökhö daʼö, itugu moguna khöra goi-goi andrö. Hadia mbörö? Börö me lafalua dania daʼö ba wongambatöra.

² Simane daʼö göi nirasoi niha Keriso si no mongambatö sawena tobali satua. Sagötö zi hauga fakhe, te asese larongo huhuo sanandrösa ba wangebuaʼö iraono. Hizaʼi iadaʼa, itugu moguna khöra goi-goi Zura Niʼamoniʼö andrö börö me no so ndraonora sinangea laʼebuaʼö. No noro dödö sebua daʼö! Tatu manö, na no tebulö zalua ba waʼaurida, tebulö göi lala wangera-ngerada sanandrösa ba goi-goi Zura Niʼamoniʼö sasese tarongo. Sambua daʼa zi tobali dane-dane wa lö tola löʼö tabaso ba taʼangerönusi Zura Niʼamoniʼö ’sandrohu faʼaurida’, simane niʼandrö Yehowa khö ndra razo ba götö ndraono Gizaraʼeli mböröta.—5 Mo. 17:19.

3. Hadia nitutunöda ba artikel daʼa?

³ Yaʼami ira satua, no tebeʼe khömi noro dödö si tohude ba wamahaʼö iraonomi sanandrösa khö Yehowa. Hizaʼi, lö ibönö na ha asala no mifatunö ba ndraonomi waʼaboto ba dödö sanandrösa khö Lowalangida. Moguna göi mitolo ira enaʼö laʼomasiʼö Lowalangi. Hewisa wamaluami daʼö? Ba artikel daʼa, tatutunö  dania öfa ngawalö goi-goi Zura Niʼamoniʼö si tola möi fanolomi. (2 Ti. 3:16) Tatutunö göi dania hadia mbua nitema ndra satua börö me no lafalua mene-mene Zura Niʼamoniʼö.

4. Hadia goi-goi si oföna si tobali fanolo khö ndra satua ba wotanögö ba dödö ndraonora waʼomasi khö Yehowa? (Yakobo 1:5)

⁴ Goi-goi si 1: Alui wanuturu lala moroi khö Yehowa. Andrö khö Yehowa waʼatua-tua enaʼö tola ötolo ndraonomö ba wangomasiʼö Lowalangi. (Baso Yakobo 1:5.) No fondrege zi sökhi mene-mene nibeʼe Yehowa. Hadia mbörö? Angeragö zi dombua ngawalö andre. Si oföna, no ara tobali satua si sökhi Yehowa. (Si. 36:9) Si dua, hasambalö mofozu fefu mene-mene nibeʼenia.—Yes. 48:17.

5. (a) Hadia manö wanuturu lala si no ihenaigö organisasi Yehowa si tobali fanolo khö ndra satua? (b) Moroi ba video sanandrösa khö dalifusöda Amorim hegöi foʼomonia, hadia wamahaʼö si tola lahalö ira satua sanandrösa ba wangebuaʼö iraono?

⁵ Iʼogunaʼö Daromalinia Yehowa hegöi organisasinia ba wangehenaigö ö ba wamati si teʼodane-dane ba Zura Niʼamoniʼö. Na öfahaʼö ndraʼugö ba daʼö, tola ötolo ndraonomö ba wangomasiʼö Yehowa. (Mat. 24:45) Duma-dumania, tola ösöndra wanuturu lala si sökhi ba seri artikel ”Bantuan untuk Keluarga”, si no muhenaigö ba zi hauga fakhe ba majalah Sadarlah! Iadaʼa, no tehenaigö daʼö ba situs web khöda. Baero daʼö, oya video si no lahenaigö ba situs jw.org sangoromaʼö fanofu-nofu hegöi drama, si tobali fanolo khö ndra satua ba wamalua mene-mene Yehowa ba wangebuaʼö iraonora. *—Amd. 2:4-6.

6. Hewisa dödö zi samösa ama hegöi ina sanandrösa ba wanuturu lala nitemara moroi ba organisasi Yehowa?

⁶ Ato zatua sangoromaʼö fangandrö saohagölö börö wanolo Yehowa moroi ba organisasinia. Imane si samösa ama sotöi Joe, ”Tenga halöwö saoha wangebuaʼö iraonoma si datölu ba zindruhu. Yaʼo hegöi foʼomogu, lö maböhöli wangandrö fanolo moroi khö Yehowa. Na so sambua artikel mazui video nifaigima, asese marasoi wa tefaudu daʼö ba zoguna khöma. Sindruhu-ndruhu wa no angetula si sökhi na taʼalui wanuturu lala moroi khö Yehowa.” Joe hegöi foʼomonia, no larasoi wa tobali fanolo  ndraonora fefu zi no tehenaigö andrö enaʼö ahatö ira khö Yehowa.

7. Hana wa moguna sibai labeʼe duma-duma si sökhi ira satua? (Roma 2:21)

⁷ Goi-goi si 2: Yatobali ndraʼugö duma-duma. Asese sibai lanehe-nehegö iraono hadia nifalua zatuara ba lagoʼö-goʼö daʼö. Tatu manö, lö hadöi satua si no moʼahonoa. (Rom. 3:23) Hewaʼae simanö, satua sangokhögö faʼatua-tua lafalua wondrege zi sökhi enaʼö tobali ira duma-duma ba ndraonora. (Baso Roma 2:21.) Imane si samösa satua sanandrösa ba ndraono, ”Yaʼira andrö hulö roti samadu idanö, latöngöni fefu hadia ia nifaluada hegöi niwaʼöda. Hasambalö latahigö ita na faböʼö nifaluada moroi ba nifahaʼöda khöra.” Börö daʼö, enaʼö tola laʼomasiʼö Yehowa iraonoda, moguna göi taforomaʼö waʼomasi saro khö Yehowa.

8-9. Hadia wamahaʼö si tola öhalö moroi ba wehede Andrew hegöi Emma?

⁸ Oya sibai lala khö zatua enaʼö tola lafahaʼö ndraonora ba wangomasiʼö Yehowa. Nehegö atö hadia niwaʼö zi samösa ono matua si 17 fakhe sotöi Andrew, ”Lö laböhöli ira satuagu wangombakha khögu wa moguna sibai wangandrö. Ero bongi, fao ndraʼo khö bapagu wangandrö, hewaʼae na no mangandrö ndraʼo ba zi ha yaʼo. Lö laböhöli ira satuagu wamasugi ba dödögu hegöi khö nakhigu wa ’tola fahuhuo ndraʼaga khö Yehowa gofu hawaʼara zomasiga’. Daʼö mbörö wa aboto ba dödögu wa moguna sibai ba waʼaurigu wangandrö. Aoha sibai khögu wangandrö iadaʼa. Ba wamaigigu, Yehowa andrö Ama sangomasiʼö yaʼo.” Yaʼami ira satua, böi miʼaohasi ba dödö waʼomasimi khö Yehowa, börö me tola möi fanolo ndraonomi daʼö enaʼö laʼomasiʼö göi ia.

⁹ Nehegö göi duma-duma Emma. Me iröi ira amania, ebua sibai woʼömö niröinia moroi furi sinangea ibuʼa inania. Imane Emma, ”Asese sibai tosasa mamagu ba gefe. Hewaʼae simanö, lö tebulö itutunö khöma wa hasambalö irorogö nono mbanuania Yehowa ba ibönökhi zoguna khöra. Tola uʼila moroi ba lala waʼaurinia wa sindruhu-ndruhu ifaduhusi tödö daʼö. Ifalua mamagu hadia nifahaʼönia khögu.” Hadia wamahaʼönia? Tola lafahaʼö ndraonora ira satua moroi ba duma-duma nibeʼera ba ginötö si basaki.—Gal. 6:9.

10. Me götö ndraono Gizaraʼeli mböröta, hadia manö ginötö niʼogunaʼö zatua ba wahuhuosa ba ndraonora? (5 Moze 6:6, 7)

¹⁰ Goi-goi si 3: Aseseʼö tutunö ba ndraonomö sanandrösa khö Yehowa. Me götö ndraono Gizaraʼeli mböröta, no ibeʼe goroisania Yehowa khö ndra satua enaʼö laʼaseseʼö wamahaʼö iraonora sanandrösa khönia. (Baso 5 Moze 6:6, 7.) Me luo daʼö, oya ginötö si tola laʼogunaʼö ba zi maʼö-maʼökhö ba wahuhuosa ba ndraonora hegöi ba wotanögö ba dödöra waʼomasi khö Yehowa. Duma-dumania, te iʼogunaʼö ginötö mato hauga za si samösa ono matua ba wanolo amania ba wananö sinanö mazui ba wanaʼu basitö. Simanö göi dalifusönia ira alawe, tola manö mohalöwö ia maʼö-maʼökhö ba wanolo inania ba wanagu, ba wanoso nukha, mazui ba wamalua halöwö tanö böʼö yomo ba nomo. Sagötö falulu fohalöwö zatua ba ndraonora, oya duho-tuho sabölö moguna si tola latutunö. Duma-dumania, tola ladunö-dunö mbua-bua si sökhi niʼokhögö Yehowa hegöi ngawalö zi no ifalua ba wanolo yaʼira si sambua omo.

11. Hadia ginötö si tola laʼogunaʼö ira satua ba wahuhuosa ba ndraonora?

¹¹ No tebulö zalua ba götöda andre. Ba zi hawaʼoya soi, lö oya ginötö si tola laʼogunaʼö ira satua wefao ba ndraonora. Tola manö no mofanö zatua wohalöwö, ba no möi sekola ndraonora. Börö daʼö, lö tola löʼö laʼalui ginötö si tefaudu ira satua ba wahuhuosa ba ndraonora.  (Ef. 5:15, 16; Fil. 1:10) Sambua ginötö si tola laʼogunaʼö yaʼia daʼö famahaʼö zi sambua omo. Imane talifusöda ira matua si bohou ebua sotöi Alexander, ”Lö tebulö idöniaʼö wamahaʼö zi sambua omo khöma bapagu, ba lö itehegö na so zi möi fanaisima irege tebai owulo ndraʼaga. Na no aefa mafalua wamahaʼö, oya zi tola madunö-dunö khö nawöma.”

12. Sagötö mufalua wamahaʼö zi sambua omo, hadia zinangea itörö tödö satua si tobali högö yomo ba nomo?

¹² Na yaʼugö andrö samösa satua si tobali högö yomo ba nomo, hadia zi tola öfalua enaʼö omuso dödö ndraonomö wamalua famahaʼö zi sambua omo? Tola öfahaʼö ira ba mbuku si bohou, Lala ba Wanöndra Faʼohahau Dödö Sagötö Faʼara! Na mifahaʼö ami ba mbuku daʼö, tola mirasoi waʼomuso dödö ba wamahaʼö zi sambua omo. Tatu omasi ndraʼugö na lö labini-biniʼö iraonomö wanutunö ösi dödöra hegöi faʼaombö dödö nirasoira. Börö daʼö, böi ogunaʼö wamahaʼö zi sambua omo ba wameʼe khöra fotu mazui ba wofönu-fönu khöra. Baero daʼö, böi ofönu ba ndraonomö na latutunö lala wangera-ngerara si lö tefaudu ba Zura Niʼamoniʼö. Hizaʼi, andrö khöra saohagölö börö me no latutunö nösi dödöra, ba farou ira enaʼö lö tebulö lafalua daʼö. Awena tola ötolo ndraonomö na no sindruhu-ndruhu aboto ba dödöu hadia nirasoira.

13. Hadia nasa ginötö si tola laʼogunaʼö ira satua ba wanolo iraonora enaʼö ahatö khö Yehowa?

¹³ Yaʼami ira satua, miʼalui ginötö ero maʼökhö ba wanolo iraonomi enaʼö ahatö ira khö Yehowa. Tola mitutunö khöra sanandrösa khö Lowalangida sebua faʼomasi gofu hawaʼara manö, tenga balazi mifalua wamahaʼö ba Zura Niʼamoniʼö. Nehegö atö hadia niwaʼö dalifusöda ira alawe sotöi Lisa, ”Matolo ndraonoma ba wangiʼila hadia wamahaʼö si tola lahalö sanandrösa khö Yehowa moroi ba niwöwöinia. Duma-dumania, na maʼiki ndraonoma börö me fawude-wude nono nasu, maʼogunaʼö daʼö ba wanutunö wa Yehowa andrö Lowalangi somuso tödö, ba iʼogunaʼö niwöwöinia ba wangaʼasogö khöda faʼomuso dödö.”

14. Hana wa moguna latolo ndraonora ira satua ba wamili si fahuwu si sökhi? (Amaedola 13:20)

¹⁴ Goi-goi si 4: Tolo ndraonomö ba wangokhögö fahuwusa si sökhi. No ihaogö  wamatunö khöda Taromali Lowalangi wa so lua-luania khöda wariawösa nifilida, tola aekhu ba zi sökhi mazui ba zi lö sökhi. (Baso Gamaedola 13:20.) Yaʼami ira satua, hadia miʼila haniha manö zi fahuwu ba ndraonomi? Hadia no irai falukha ba fariawö ami khöra? Hadia zinangea mifalua ba wanolo iraonomi enaʼö fahuwu ira ba niha sangomasiʼö Yehowa? (1 Ko. 15:33) Tola mitolo ira ba wamili si fahuwu si sökhi na mikaoni ndra talifusöda saro ba wamati enaʼö fariawö ira ba nösi nomomi.—Si. 119:63.

15. Hadia zi tola lafalua ira satua ba wanolo iraonora enaʼö laʼokhögö wahuwusa si sökhi?

¹⁵ Nehegö atö duma-duma zi samösa ama sotöi Tony. Itutunö hadia nifaluara foʼomonia ba wanolo iraonora enaʼö lafili wariawösa si sökhi, ”Sagötö zi hauga fakhe, makaoni ba nomoma ndra talifusöda si faböʼö-böʼö, he sawuyu-wuyu hegöi si no alawa döfi. Fao ira khöma wemanga ba mafaogö ira wamalua famahaʼö zi sambua omo. No sambua lala si sökhi daʼa enaʼö itugu aboto ba dödöma ndra talifusöda sangomasiʼö ba samosumange Yehowa si fao faʼomuso dödö. No irai mörö ba nomoma ndra satua samasui, utusan injil, hegöi ira talifusöda tanö böʼö. Oya wamahaʼö nihalö ndraonoma moroi ba zi no irai alua khöra, faʼowölö-ölö niforomaʼöra, hegöi faʼaohagölöra ba wamosumange Yehowa. Daʼö zanolo iraonoma enaʼö ahatö ira khö Yehowa.” Yaʼami ira satua, mihalö gangetula ba wanolo iraonomi enaʼö lafili wariawösa si sökhi.

16. Na so nonomö sangumaʼö wa lö omasi ia ifosumange Yehowa, hadia zinangea itörö tödöu?

¹⁶ Hewisa na so nonomö sangumaʼö wa lö omasi ia ifosumange Yehowa, hewaʼae na no öforege wanolo yaʼia? Böi waʼö tödöu wa lö mofozu ndraʼugö wamalua noro dödöu tobali satua. No ibeʼe ginötö Yehowa ba niha fefu ba wangai angetula samösa, tefarahu ba daʼö nonomö andrö. Börö daʼö, tola ihalö gangetula onomö andrö hadia omasi ia ifosumange Yehowa mazui löʼö. Na no ihalö gangetula ba wondröi Yehowa, böi taya wanötönau wa ifuli ia dania ba zi so miföna. Törö tödöu gamaedola sanandrösa ba nono selungu. (Luk. 15:11-19, 22-24) Oya sibai gamuata si lö sökhi nifalua  nono matua andrö. Hizaʼi ba gafuriata, mangawuli ia. Te so zangumaʼö, ”Ha amaedola daʼö. Hadia sindruhu-ndruhu alua zimane daʼö?” Tatu manö! Daʼö zi no irai alua khö dalifusöda ira matua sotöi Elie.

17. Hewisa wa tola möi famarou dödöu zi no irai alua khö Elie?

¹⁷ Imane Elie sanandrösa khö ndra satuania, ”Lafalua wondrege zi sökhi ba wotanögö ba dödögu waʼomasi khö Yehowa hegöi Taromalinia, Sura Niʼamoniʼö. Hizaʼi, me mato 15 fakhe ndröfigu, ibörögö molawa ndraʼo khöra.” Ibini-biniʼö ia Elie ba wamalua si lö omasi Yehowa, ba itimbagö fefu wamorege nifalua zatuania ba wanolo yaʼia ba wamati. Me no iröi nomo, ifalua ngawalö gamuata si lö sökhi. Hewaʼae simanö, itaria itutunö nösi Zura Niʼamoniʼö khö zi fahuwu khönia. Imane Elie, ”Itugu oya nitutunögu khö zi fahuwu khögu andrö, itugu itörö-törö tödögu sanandrösa khö Yehowa. Arara manö, ibörögö tumbu ba dödögu danömö zindruhu si no latanögö ba dödögu ira satuagu.” Ba gafuriata, mangawuli Elie ba zindruhu. * Khalaigö hawaʼomuso dödö ndra satuania börö me no laforege wanolo yaʼia ba wangomasiʼö Yehowa iʼotarai ba waʼide-ide!—2 Ti. 3:14, 15.

18. Hewisa dödöda khö ndra satua samorege ba wanolo iraonora enaʼö laʼomasiʼö Yehowa?

¹⁸ Yaʼami ira satua, no tebeʼe khömi noro dödö si tohude ba wangebuaʼö iraonomi tobali samosumange Yehowa. (Si. 78:4-6) Tenga halöwö saoha daʼö. Masuno ami soroi ba dödö börö me lö tebulö miforege wanolo iraonomi! Na lö mamalö mifalua wondrege zi sökhi ba wanolo iraonomi enaʼö laʼomasiʼö Yehowa ba laʼoʼö niwaʼönia, tola faduhu dödömi wa omuso dödö Namada sebua faʼomasi si so ba zorugo.—Ef. 6:4.