1. Hadia zameʼe khöda faʼomuso dödö?

 OMASI Yehowa na tasöndra waʼomuso dödö. Faduhu dödöda ba daʼö börö me faʼomuso dödö andrö no bua moroi ba geheha niʼamoniʼö. (Gal. 5:22) Iwaʼö Sura Niʼamoniʼö wa ohahau dödö ba wameʼe moroi ba wanema. Börö daʼö, ba ginötö tafalua halöwö fanuriaigö soroi ba dödö ba taʼalui lala ba wanolo ira talifusöda, hasambalö tarasoi waʼomuso dödö.—Hal. 20:35.

2-3. (a) Simane nisura ba Galatia 6:4, hadia zi dombua ngawalö zi tebai taʼolifugö enaʼö lö tebulö tarasoi waʼomuso dödö? (b) Hadia nitutunöda ba artikel daʼa?

² Ba Galatia 6:4, so dombua ngawalö nitutunö zinenge sotöi Faulo si tebai taʼolifugö enaʼö lö tebulö tarasoi waʼomuso dödö. (Baso.) Si oföna, moguna tabeʼe wondrege zi sökhi khö Yehowa ndrohu-ndrohu zi sagu khöda. Na tafalua daʼö, hasambalö omuso dödöda. (Mat. 22:36-38) Si dua, tebai tafaedo-faedogö ita ba niha böʼö. Te oya zi tola tafalua börö me lö fökhö ba mbotoda, no tatema wamomaha, ba so nekhe-nekhe dangada. Hewaʼae simanö, moguna tatörö tödöda wa moroi khö Yehowa fefu daʼö, ba moguna taʼandrö saohagölö khönia. Hizaʼi, hewisa na so ndra talifusöda sabölö onekhe moroi khöda ba wanuriaigö? Moguna göi omuso dödöda börö me laʼogunaʼö waʼatua-tuara ba wamosumange Yehowa, tenga ba wangalui harera samösa mazui enaʼö lasuno ira niha. Moroi na fahindri ita khöra, abölö sökhi na tafahaʼö ita moroi ba duma-dumara.

³ Ba artikel daʼa, tatutunö hadia manö zanolo yaʼita na tarasoi waʼide-ide dödö börö me lö oya zi tola tafalua ba halöwö fanuriaigö. Tatutunö göi hewisa enaʼö tola tahaogö wangogunaʼö faʼatua-tuada ba hadia manö göi zi tola tafahaʼö yaʼita moroi ba duma-duma niha böʼö.

4. Hadia zalua si tola mangaʼasogö khöda faʼide-ide dödö? Beʼe duma-duma.

⁴ So ösa nono mbanua Yehowa si tebai mamalua simane faʼoya zomasi ira börö me no numalö ndröfira mazui no göna ira fökhö. Daʼö nirasoi dalifusöda ira alawe sotöi Carol. No irai mangai halöwö ia mböröta ba mbanua si lö ato sanuriaigö. Oya mbua si sökhi nitemania me mangai halöwö ia ba daʼö. So 35 niha nifahaʼönia ba Zura Niʼamoniʼö, ba so göi ba gotaluara zolulu faʼaurira khö Yehowa ba tebayagö ira idanö. Hizaʼi ba gafuriata, me no alö waʼabölönia, ha ba nomo manö so ia. Imane Carol, ”Sindruhu sa, uʼila wa börö me no göna ndraʼo fökhö wa tebai ufalua zimane nifalua niha böʼö. Hizaʼi, na ufaedo-faedogö ndraʼo khöra, urasoi wa yaʼodo andre tenga niha Keriso si sökhi. Ide-ide sibai dödögu börö me oya zomasido ufalua hizaʼi tebai.” Omasi Carol wameʼe fondrege zi sökhi khö Yehowa, ba no sinangea musuno daʼö! Faduhu dödöda wa omuso dödö Lowalangida si sökhi tödö me iʼila waʼaterou dödö niʼokhögö Carol.

5. (a) Hadia zi tebai taʼolifugö na so khöda waʼide-ide dödö börö me lö oya zi tola tafalua? (b) Simane niforomaʼö ba gambara, hewisa dalifusöda ira matua andrö lö iböhöli wameʼe fondrege zi sökhi khö Yehowa?

⁵ Na ide-ide dödöu börö me lö oya zi tola öfalua ba wanuriaigö, sofu khöu samösa, ’Hadia niʼandrö Yehowa khögu?’ Iʼandrö khöda Yehowa enaʼö tabeʼe khönia wondrege zi sökhi ndrohu-ndrohu zi sagu khöda iadaʼa. Khalaigö atö zalua andre: Ide-ide dödö zi samösa talifusöda ira alawe si töra 80 fakhe börö me lö saʼae asese möi ia manuriaigö, tenga simane me 40 fakhe ndröfinia. Iwaʼö tödönia wa hewaʼae no ibeʼe wondrege zi sökhi, ambö nasa daʼö ba wangomusoiʼö tödö Yehowa. Hadia sindruhu daʼö? Angeragö atö daʼa. Na no ibeʼe wondrege zi sökhi talifusöda ira alawe andrö me 40 fakhe ndröfinia ba ibeʼe nasa wondrege zi sökhi me no 80 fakhe ndröfinia, eluahania lö tebulö ibeʼe wondrege zi sökhi. Na ibörögö tarasoi wa ambö nasa möi fangomuso dödö Yehowa fefu zi no tafalua, moguna tatörö tödöda wa Yehowa zotatugöi hadia no ibönö nifaluada andrö ba wangomusoiʼö tödönia mazui löʼö. Na no tafalua wondrege zi sökhi, hasambalö imane khöda Yehowa, ”Sökhi sibai!”—Fareso göi Mataiʼo 25:20-23.

6. Hadia wamahaʼö nihalöda moroi ba duma-duma Maria?

⁶ Abölö omuso dödöda na taʼosambuaʼö dödöda ba zi tola tafalua, tenga ba zi tebai tafalua. Nehegö zi no irai alua khö dalifusöda ira alawe sotöi Maria. No göna ia fökhö irege lö oya zi tola ifalua ba halöwö fanuriaigö. Ba wamobörö, abu sibai dödönia ba irasoi wa lö moguna ia saʼae. Hizaʼi ba gafuriata, itörö tödönia dalifusöda ira alawe ba mbanua niha Keriso si farahu yaʼia, si no tefadölö ba naha wemörö börö me no göna ia fökhö. Ihalö gangetula Maria ba wanolo talifusöda andrö. Imane Maria, ”No uʼera-era enaʼö fao ndraʼaga ba wanuriaigö, maʼogunaʼö telefo mazui sura. Ero fao ndraʼaga ba wanuriaigö, urasoi waʼomuso dödö hegöi faʼahono dödö börö me tola utolo dalifusögu.” Sindruhu-ndruhu wa irasoi waʼomuso dödö Maria börö me iʼosambuaʼö dödönia ba zi tola ifalua, tenga ba zi tebai ifalua. Tola göi tafalua zimane nifalua Maria. Hizaʼi, hewisa na oya nasa zi tola tafalua mazui so khöda waʼatua-tua ba wangai halöwö khö Yehowa?

7. Hadia mene-mene nibeʼe zinenge sotöi Fetero khö ndra niha Keriso?

⁷ Ba zurania siföföna, iʼamenesi ndra talifusönia Fetero enaʼö laʼogunaʼö waʼabölö hegöi faʼatua-tuara ba wamarou tödö ndra talifusöra si sara lala wamati. Imane Fetero, ”Faoma mitolo nawömi balazi mbuala nitema zamösana, tobali sohalöwö si sökhi moroi ba waʼasökhi  dödö sebua khö Lowalangi.” (1 Fe. 4:10) Tebai tataha-taha wangogunaʼö faʼabölöda ba wamalua halöwö fanuriaigö ha börö me ataʼu ita na ide-ide dödö niha böʼö mazui afökhö dödöra. Na tafalua daʼö, eluahania lö tabeʼe wondrege zi sökhi khö Yehowa.

8. Moloʼö 1 Korindro 4:6, 7, hana wa tebai tahöni-höni waʼatua-tuada?

⁸ Lö tola löʼö tahaogö wangogunaʼö faʼatua-tua niʼokhögöda. Hizaʼi, moguna mangelama ita enaʼö böi tahöni-höni daʼö föna niha böʼö. (Baso 1 Korindro 4:6, 7.) Duma-dumania, te onekhe ndraʼugö ba wamörögö famahaʼö ba Zura Niʼamoniʼö. Böi taha-taha wangogunaʼö faʼatua-tuamö andrö! Hizaʼi, moguna ötörö tödöu wa tebai öhöni-höni daʼö föna niha böʼö. Khalaigö zalua andre: Barö-barö daʼa, so mbua si sökhi nitemamö ba wanuriaigö, ba no mofozu ndraʼugö wamörögö famahaʼö ba Zura Niʼamoniʼö. Te omasiʼö öfatunö daʼö khö ndra talifusöda ba gangowuloa wanuriaigö si farahu yaʼugö. Hizaʼi, ba ginötö owulo ami, so samösa dalifusöda ira alawe sanutunö wa no mofozu ia ba wameʼe majalah khö zokhö omo. Hadia nifaluamö? Aboto ba dödömö wa tola möi famarou dödö ndra talifusöda na ötutunö khöra zi no öfalua andrö ba wanuriaigö. Hewaʼae simanö, börö me lö omasi ndraʼugö na taya waʼomuso dödö dalifusöda ira alawe no mege, te öhalö gangetula wa lö ötutunö zi no öfalua andrö ba ginötö daʼö. No öforomaʼö waʼasökhi dödö na öfalua daʼö. Hizaʼi, böi böhöli wamörögö famahaʼö ba Zura Niʼamoniʼö ba niha. Börö me so khöu waʼatua-tua ba wamalua daʼö, böi böhöli wangogunaʼö yaʼia ba lala sabölö sökhi!

9. Hewisa zinangeania ita ba wangogunaʼö faʼatua-tuada?

⁹ Törö tödöu wa moroi khö Lowalangi fefu waʼatua-tua niʼokhögöda. Lö tola löʼö taʼogunaʼö daʼö ba wamarou tödö ndra talifusöda ba mbanua niha Keriso, tenga enaʼö tohude ita moroi khöra. (Fil. 2:3) Tola tarasoi waʼomuso dödö na taʼogunaʼö waʼabölö hegöi faʼatua-tuada ba wamalua somasi Lowalangi. Omuso dödöda tenga börö me abölö oya zi tola tafalua moroi ba niha böʼö mazui abölö tohude ita moroi khöra, hizaʼi börö me taʼogunaʼö waʼatua-tuada ba wanuno Yehowa.

10. Hana wa lö tefaudu na tafaedo-faedogö waʼatohudeda ba zoʼamböta niha böʼö?

¹⁰ Na lö mangelama ita, tola manö ibörögö tafaedo-faedogö waʼatohudeda ba zoʼamböta niha böʼö. Duma-dumania, onekhe zi samösa talifusöda ira matua ba wamaʼema huhuo. Daʼö waʼatohudenia. Börö daʼö, te so ba dödönia wa abölö tohude ia moroi khö zi samösa talifusöda  ira matua sambö onekhe mamaʼema huhuo. Hizaʼi sindruhunia, so göi zi tohude niʼokhögö dalifusöda andrö. Tola manö oböwö ia, sökhi wamahaʼönia iraononia, mazui owölö-ölö ia ba wanuriaigö. Ato ndra talifusöda sangokhögö faʼatua-tua, ba laʼogunaʼö daʼö ba wamosumange Yehowa hegöi ba wanolo niha böʼö. Tatu taʼandrö sibai saohagölö börö me taʼokhögö ndra talifusö simane daʼö!

11. Hana wa taforege ba woloʼö duma-duma nibeʼe Yesu?

¹¹ Sindruhu sa, tebai tafaedo-faedogö ita ba niha böʼö. Hizaʼi, oya wamahaʼö si tola tahalö moroi khö ndra samosumange Yehowa si lö faröi. Sambua duma-dumania yaʼia daʼö Yesu. Hewaʼae na lö moʼahonoa ita tenga simane Yesu, hizaʼi oya zi tola tahalö khöda famahaʼö moroi ba gamuatania si sökhi hegöi ngawalö zahöli-höli dödö si no ifalua. (1 Fe. 2:21) Na taforege ba woloʼö duma-duma nibeʼenia, tola tobali ita enoni Yehowa sabölö sökhi ba sanuriaigö satua-tua.

12-13. Hadia wamahaʼö si tola tahalö moroi ba duma-duma Razo Dawido?

¹² Ba Zura Niʼamoniʼö, ato sibai duma-duma ndra matua hegöi ira alawe si lö faröi ba wamosumange Lowalangi. Hewaʼae na lö moʼahonoa ira, no labeʼe khöda duma-duma si sökhi. (Heb. 6:12) Samösa moroi ba gotaluara yaʼia daʼö Razo Dawido. Ifotöi ia Yehowa ’niha sangomusoiʼö tödögu’. (Hal. 13:22) Hizaʼi, lö moʼahonoa Dawido. So mato hauga kali ifalua horö sebua. Hewaʼae simanö, no ibeʼe khöda duma-duma si sökhi. Lö fabuʼa-buʼa ia me labeʼe khönia degu-tegu. Hizaʼi, itemaʼö degu-tegu nibeʼe khönia ba sindruhu-ndruhu maniasa ia ba zala nifaluania. Buania, iʼefaʼö zalania Yehowa.—Si. 51:3, 4, 10-12.

¹³ Tola tafahaʼö ita moroi khö Dawido na taʼangeragö wanofu-nofu daʼa: ’Hadia nifaluagu na labeʼe khögu mene-mene? Hadia fabuʼa ndraʼo ba utahigö niha böʼö? Mazui, hadia iʼanemaiʼö ufaduhuʼö wa no ufalua zala? Hadia uforege enaʼö lö ufuli ufalua saʼae zala andrö?’ Tola göi öʼangeragö wanofu-nofu daʼö ba ginötö öʼangeragö sanandrösa ba nono mbanua Yehowa tanö böʼö ba Zura Niʼamoniʼö. Hadia fagölö gabula dödöra ba gabula dödö salua khöu? Hadia gamuata si sökhi niforomaʼöra? Ero na öbaso waö-waö zi samösa samosumange Yehowa si lö faröi, sofu khöu samösa, ’Hadia zinangea ufalua ba woloʼö duma-duma nibeʼenia?’

14. Hadia mbuania na tafahaʼö ita ba duma-duma ndra talifusöda si sara lala wamati?

¹⁴ Tola göi tafahaʼö ita ba duma-duma ndra  talifusöda si sara lala wamati, he sawuyu-wuyu hegöi si no alawa döfi. Duma-dumania, ba mbanua niha Keriso si farahu yaʼugö, hadia so zanau ölö ba si lö faröi hewaʼae göna ia abula dödö, simane fanandraigö moroi khö ndra awö-awönia, fanaisi moroi ba nösi nomonia, mazui fökhö si göna ba mbotonia? Hadia no önehegö gamuatania si sökhi somasiʼö öʼoʼö? Na öʼangeragö duma-dumania, tola öfahaʼö ndraʼugö hewisa enaʼö anau gölöu na göna ndraʼugö abula dödö. Tatu taʼandrö sibai saohagölö börö me so ndra talifusöda sameʼe khöda duma-duma si tola taʼoʼö!—Heb. 13:7; Yak. 1:2, 3.

15. Hadia mene-mene nibeʼe Waulo enaʼö lö tebulö omuso dödöda ba wamosumange Yehowa?

¹⁵ Enaʼö terorogö wahasara dödö hegöi faʼatulö ba mbanua niha Keriso, moguna tabeʼe wondrege zi sökhi moloʼö si sagu khöda zamösana. Nehegö atö duma-duma ndra niha Keriso me abad siföföna. No faböʼö-böʼö zi tola lafalua hegöi halöwö nibeʼe khöra. (1 Ko. 12:4, 7-11) Hizaʼi, lö labaliʼö daʼö famoto wahasara dödöra mazui fahindri ira khö nawöra. Ibeʼe khöra mene-mene Faulo enaʼö falulu fohalöwö ira ”ba wangotomosi boto Keriso”. Imane Faulo khö ndra niha Nefeso, ”Na sökhi wohalöwö ndroto-ndroto, daʼö zanolo boto andrö enaʼö tedou irege aro ba waʼomasi.” (Ef. 4:1-3, 11, 12, 16) Fefu niha soloʼö mene-mene nibeʼe Waulo andrö no larorogö wahasara dödö hegöi faʼatulö ba mbanua niha Keriso. Daʼö göi nirasoida iadaʼa ba mbanua niha Keriso si farahu yaʼita.

16. Hadia gangetula sinangea tahalö? (Heberaiʼo 6:10)

¹⁶ Halö gangetula enaʼö lö öfaedo-faedogö ndraʼugö ba niha böʼö. Hizaʼi, fahaʼö ndraʼugö ba duma-duma nibeʼe Yesu ba forege woloʼö amuatania. Angeragö duma-duma nono mbanua Lowalangi si lö faröi me götö föna hegöi iadaʼa. Na lö öböhöli wameʼe fondrege zi sökhi, tola faduhu dödöu wa ’tenga sa si lö atulö Lowalangi irege olifu ia halöwöu’. (Baso Heberaiʼo 6:10.) Böi böhöli wamosumange Yehowa si fao faʼomuso dödö, ba törö tödöu wa iʼameʼegö tödö fefu wamorege nifaluamö soroi ba dödö ba wamosumange yaʼia.