Roti ba Nono Nasu si Dua Rozi
IMANE Nick si toröi ba Oregon, Amerika Serikat, ”Ba mböröta ndröfi 2014, uʼohe manörö-nörö ba kota nono nasugu si dua rozi. Si toʼölönia, so ba daʼö ndra Samaduhuʼö Yehowa ba no mozizio ira ba zinga naha mbuku si so gaolo-gaolo. Sökhi ba moʼadu sibai wonukhara, ba no laboho-boho mbawa ba niha sanörö lala.
”Sökhi göi lagu ndra Samaduhuʼö Yehowa andrö ba nono nasugu. Samuza inötö, no mozizio Elaine ba zinga naha mbuku si so gaolo-gaolo. Ibeʼe gönia roti ö nono nasugu si dua rozi andrö. Iʼotarai daʼö, ero na matörö naha mbuku si so gaolo-gaolo andrö, ladöni-döni ndraʼo ba daʼö börö me omasi ira na so zameʼe öra roti.
”Daʼö zalua ba zi hauga waŵa. Omasi sibai nasugu si dua rozi andrö wemanga roti, ba omuso göi dödögu börö me tola fahuhuo ndraʼo khö ndra Samaduhuʼö. Hizaʼi, lö omasido na talafo ara fahuhuodo khöra. Me luo daʼö, töra 70 fakhe ndröfigu ba lö oya zaboto ba dödögu sanandrösa ba nifaduhusira tödö. No hauga kali afatö dödögu ba gereja Protestan, andrö wa umane tödögu abölö sökhi na ufahaʼödo samösa ba Zura Niʼamoniʼö.
”Asese göi uʼila ndra Samaduhuʼö Yehowa sanarogö naha mbuku si so gaolo-gaolo ba nahia si faböʼö-böʼö ba mbanuagu. Fahuwu sibai ira. Na so wanofugu, labeʼe wanema li moroi ba Zura Niʼamoniʼö. Daʼö mbörö wa itugu faduhu dödögu khöra.
”Samuza inötö, manofu khögu Elaine, ’Hadia faduhu dödöu wa buala si otarai khö Lowalangi gurifö?’ Utema linia, ’Yaʼia, faduhu dödögu!’ Aefa daʼö, ibaso khögu Yesaya 11:6-9. Iʼotarai daʼö, ibörögö adöni dödögu wamahaʼö yaʼo ba Zura Niʼamoniʼö. Hizaʼi, lö omasido utema mbuku nibeʼera.
”Mato hauga hari aefa daʼö, tohare Elaine hegöi foʼomonia sotöi Brent ba latutunö khögu nösi Zura Niʼamoniʼö. Hewaʼae lö arara wahuhuosama, hizaʼi adöni dödögu. Lafarou ndraʼo ba wombaso buku Mataiʼo irugi Halöwö Zinenge enaʼö aboto ba dödögu hadia zinangea ifalua si samösa niha Keriso. Andrö wa ubaso mbuku daʼö. Lö ara me talu ndröfi 2016, utema wamahaʼö ba Zura Niʼamoniʼö moroi khö Brent hegöi Elaine.
”Udöna-döna ginötö wamahaʼö yaʼo ba Zura Niʼamoniʼö sakali samigu, simanö göi weʼamöi ba Nahia Gangowuloa. Omuso sibai dödögu ba mangandrö saohagölö ndraʼo börö me no uʼila hadia zindruhunia nifahaʼö Zura Niʼamoniʼö. Mato döfi aefa daʼö, tebayagö ndraʼo idanö. Iadaʼa, no 79 fakhe ndröfigu, ba faduhu dödögu wa ba lala sindruhu so ndraʼo. No ifahowuʼö ndraʼo Yehowa, yaʼia me idöni ndraʼo tobali ösi nomonia.”
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
