Feʼamöi ba hölu eluahania ”fehede ba wamaduhuʼö wa hasambalö lafalua zi no lafabuʼu, ba asese laʼogunaʼö döi Lowalangi . . . ba wamaduhuʼö daʼö”. Tola mufalua daʼö ba wehede mazui musura ba garate.

So ösa zangumaʼö wa fasala na möi ita ba hölu börö me no iwaʼö Yesu, ”Böi miʼae ba hölu. . . . Na mohedeʼö, ’Yaʼia’ na yaʼia, ’Tenga’ na tenga. Si töra moroi ba daʼö tana khö Gafökha.” (Mat. 5:33-37) Tatu manö, aboto ba dödö Yesu wa itaria moguna möi ba hölu ndraono Gizaraʼeli ba woloʼö Oroisa Moze, ba so ösa nono mbanua Lowalangi si lö faröi si no irai möi ba hölu. (1 Mo. 14:22, 23; 2 Mo. 22:10, 11) Aboto göi ba dödönia wa no irai möi ba hölu Yehowa. (Heb. 6:13-17) Börö daʼö, eluaha wehede Yesu tenga tebai möi ita ba hölu. Hizaʼi, ifangelama ita enaʼö böi fahölu ita ba waya mazui ba zi lö eluaha. Baero daʼö, moguna tafalua hadia zi no tafabuʼu börö me daʼö zomasi Yehowa.

Hadia nifaluamö na laʼandrö khöu weʼamöi ba hölu? Si oföna, angeragö hadia tola öfalua mbuʼusa limö andrö. Na ambö faduhu dödöu wa tola öfalua daʼö, abölö sökhi na lö möiʼö ba hölu. Ifangelama ita Taromali Lowalangi, ”Sökhi na lö fawuʼu li ndraʼugö moroi na fawuʼu li hizaʼi lö öfalua.” (Sango. 5:5) Si dua, haogö angeragö goi-goi Zura Niʼamoniʼö soʼamakhaita ba hölu, aefa daʼö halö gangetula moloʼö tödöu side-ide si no tefahaʼö. Hadia manö goi-goi Zura Niʼamoniʼö sinangea öʼangeragö?

So hölu si tefaudu ba gohitö dödö Lowalangi. Duma-dumania, fawuʼu li zi darua Samaduhuʼö Yehowa na mangowalu ira. Buʼusa li andrö fagölö ia weʼamöi ba hölu. Fawuʼu li ira föna Lowalangi ba föna ndra samaduhuʼö wa faoma laʼomasiʼö, lafosumange, ba laʼameʼegö tödö nawöra zamösana ’sagötö fekolira ba gulidanö’. (So göi niha tanö böʼö sangowalu, tenga simane daʼa sibai wehedera, hizaʼi lö tebulö fawuʼu li ira föna Lowalangi.) Lafaduhuʼö föna zato wa yaʼira andrö no sambua fongambatö, ba lö tebulö fao ira sandrohu faʼaurira. (1 Mo. 2:24; 1 Ko. 7:39) Buʼusa li ba wangowalu andre tefaudu ia ba gohitö dödö Lowalangi.

So hölu si lö tefaudu ba gohitö dödö Lowalangi. Niha Keriso sindruhu lö möi ira ba hölu ba wangoʼawögö soira tobali saradadu mazui ba wondröi famatira khö Lowalangi. Na lafalua daʼö, no lasawö goroisa Lowalangi. Niha Keriso sindruhu ”tenga tana khö niha gulidanö”. Börö daʼö, tebai fao ita ba wasuwöta mazui na so gamadöniwa ba gulidanö andre.—Yoh. 15:19; Yes. 2:4; Yak. 1:27.

So hölu si teʼodane-dane ba dödö side-ide. Itaria, fatua lö möi ita ba hölu, moguna tahaogö  taʼangeragö mene-mene nibeʼe Yesu andre: ”Mibeʼe khö Kaisaro dana khö Kaisaro, ba khö Lowalangi dana khö Lowalangi.”—Luk. 20:25.

Duma-dumania, na so samösa niha Keriso somasi faböbö ba zi sambua soi mazui ba wamazökhi paspor, tola manö moguna möi ia ba hölu wa lö faröi ia ba soi daʼö. Na laʼandrö khönia weʼamöi ba hölu ba wamalua si lö tefaudu ba goroisa Lowalangi, lö ifalua daʼö börö dödönia side-ide si no tefahaʼö ba Zura Niʼamoniʼö. Hizaʼi, tola manö latehegö khönia ira samatörö ba wamaböʼöni ngawua wehede feʼamöi ba hölu enaʼö lö fatimba daʼö ba dödönia side-ide.

Na no mufaböʼöni ngawua wehede feʼamöi ba hölu andrö, tola ihalö gangetula niha Keriso andrö weʼamöi ba hölu börö me tefaudu daʼö ba goi-goi nisura ba Roma 13:1, ”Fefu niha enaʼö laʼoʼö li ndra samatörö.” Börö daʼö, tola ihalö gangetula wa lö fatimba khönia na möi ia ba hölu si tefaudu ba goroisa Lowalangi.

Moguna göi öʼogunaʼö dödöu side-ide na laʼandrö khöu wameʼe yawa tangau mazui öʼogunaʼö wakake si no latatugöi ba weʼamöi ba hölu. Na möi ba hölu niha Romawi hegöi niha Sikito me föna, laʼogunaʼö wöda si no amaedola lowalangi wasuwöta ba wangoromaʼö wa tola mufaduhusi tödö wehedera. Labeʼe göi yawa dangara ira niha Yunani na möi ira ba hölu. Faduhu dödöra wa so lowalangi samaigi-maigi hadia niwaʼö mazui nifaluara ba yaʼia dania zanugi khöra.

Tatu manö, lö möi ba hölu zi samösa samosumange Yehowa föna lambang negara soʼamakhaita ba wamosumange faya. Hizaʼi, hadia nifaluamö na laʼandrö khöu ira sanguhuku enaʼö ötufa tangamö Zura Niʼamoniʼö na möiʼö ba hölu wa hasambalö ötörö zindruhu? Tola manö öhalö gangetula wamalua daʼö börö me no itutunö Sura Niʼamoniʼö wa so ösa nono mbanua Yehowa si möi ba hölu samalua simane daʼö. (1 Mo. 24:2, 3, 9; 47:29-31) Hizaʼi, na möiʼö ba hölu simane daʼö, moguna ötörö tödöu wa no fawuʼu li ndraʼugö föna Lowalangi wa hasambalö ötörö zindruhu. Börö daʼö, moguna ötörö zindruhu gofu hadia wanofu nibeʼe khöu.

Börö me ebua sibai mböli wahuwusada khö Yehowa, moguna mangandrö ita ba tahaogö taʼangeragö na laʼandrö khöda weʼamöi ba hölu. Moguna tatatugöi wa lö fatimba daʼö ba dödöda side-ide mazui goi-goi Zura Niʼamoniʼö. Na möi ndraʼugö ba hölu, lö tola löʼö öfalua daʼö.—1 Fe. 2:12.