Na simane daʼö zalua, ba wamaigi mbanua niha Keriso fangowalunia si oföna no aetu, ba fangowalunia safuria andrö tefaudu moloʼö huku. Enaʼö aboto ba dödöda hadia mbörö wa tola tahalö rahu-rahu simane daʼö, datafaigi hadia niwaʼö Yesu sanandrösa ba niha si fabali khö woʼomonia ba ifuli mangowalu.

Ba Mataiʼo 19:9, ifatunö Yesu wa ha sambua dane-dane wabalisa si tefaudu ba Zura Niʼamoniʼö. Imane, ”Na so zamabali foʼomonia, na tenga börö wohorö, aefa daʼö ifuli mangowalu zui, no sohorö daʼö.” Fehede Yesu andrö zangoromaʼö wa (1) ha sambua dane-dane moloʼö Sura Niʼamoniʼö wa tola fabali zi samösa niha khö woʼomonia yaʼia daʼö na fazamösa no lafalua horö, ba (2) na so niha samabali foʼomonia ira alawe hewaʼae na lö tefaudu daʼö ba Zura Niʼamoniʼö ba ifuli mangowalu ia ba niha böʼö, no sohorö ia. a

Hadia fehede Yesu andrö zangoromaʼö wa tola ifuli mangowalu zi samösa ira matua na no ifalua horö ba ifabali woʼomonia? Tola manö löʼö. Na ira matua zamalua horö, foʼomo si lö fasala zangai angetula hadia iʼefaʼö golalöwa woʼomonia andrö mazui löʼö. Na lö omasi ia iʼefaʼö golalöwa woʼomonia ba iʼandrö wabalisa moloʼö huku, tola ifuli mangowalu ira ba niha böʼö börö me no so zura wabalisa.

Duma-duma tanö böʼö, foʼomo si lö fasala omasi ia na lö aetu wongambatöra, ba ifaduhuʼö wa omasi ia iʼefaʼö zala woʼomonia. Hizaʼi, hewisa na lö fao dödö woʼomonia ira matua samalua horö ba iʼandrö wabalisa moloʼö huku? Börö me no iʼefaʼö zalania foʼomo ira alawe enaʼö lö aetu wongambatöra, tebai ifuli mangowalu ndra matua daʼö ba niha böʼö moloʼö Sura Niʼamoniʼö. Na ihalö gangetula ira matua andrö wa hasambalö mangowalu ia ba niha böʼö hewaʼae na lö tefaudu ba Zura Niʼamoniʼö, no ifuli mohorö ia. Börö daʼö. na lö niʼefasi ia moroi ba mbanua niha Keriso, tola lafuli laʼohe ia ira satua sokubaloi föna panitia pengadilan.—1 Ko. 5:1, 2; 6:9, 10.

Na ifuli mangowalu zi samösa ira matua ba niha böʼö hewaʼae na lö tefaudu daʼö ba Zura Niʼamoniʼö, hewisa mbanua niha Keriso wamaigi fangowalunia si oföna hegöi safuria? Hadia tefaböbö ia nasa khö woʼomonia si oföna moloʼö Sura Niʼamoniʼö? Hadia tola ihalö gangetula foʼomonia ira alawe ba wangefaʼö salania mazui löʼö? Hadia no fohorö wangowalunia safuria andrö ba wamaigi mbanua niha Keriso?

Ba zilalö, no samalua horö zi samösa ira matua ba wamaigi mbanua niha Keriso na ifuli mangowalu ia na auri nasa woʼomonia si lö fasala, lö si möi ia nihalö, ba lö nifaluania horö. Hewaʼae simanö, me itutunö Yesu sanandrösa ba niha si fabali khö woʼomonia ba ifuli mangowalu, lö nitutunönia sanandrösa khö woʼomo si lö fasala. Hizaʼi, itutunö wa ira matua samabali foʼomonia hewaʼae na lö tefaudu daʼö ba Zura Niʼamoniʼö ba ifuli mangowalu ia ba niha böʼö, lafotöi ia sohorö. Me fabali ia ba ifuli mangowalu, aetu saʼae wongambatönia siföföna.

 Na alua wabalisa ba zi no mongambatö ba ifuli mangowalu ndra matua daʼö ba niha böʼö, lö saʼae eluaha wangefaʼö sala nifalua ngambatö si lö fasala. Börö daʼö, lö saʼae tobali noro dödö woʼomo ira alawe ba wangai angetula sabua hadia iʼefaʼö zala woʼomonia mazui löʼö. Aefa daʼö, tefaudu moloʼö huku wangowalunia safuria andrö ba wamaigi mbanua niha Keriso, hewaʼae na auri nasa ngambatönia si lö fasala, lö ifuli mangowalu, ba lö sohorö ia. b

Ba duma-duma andrö mege, alua wabalisa ba zi sambua fongambatö börö me no mohorö woʼomo ira matua. Hewisa na lö samalua horö woʼomo ira matua hizaʼi iʼandrö wabalisa ba ifuli mangowalu ia ba niha böʼö? Mazui, hewisa na lö sohorö woʼomo ira matua fatua lö fabali ira hizaʼi awena ifalua daʼö me no fabali ira, aefa daʼö ifuli mangowalu ia hewaʼae no iʼefaʼö zalania foʼomo ira alawe? Moroi ba duma-duma andre fefu, no sohorö ndra matua andrö börö me no fabali ia khö woʼomonia ba ifuli mangowalu ia, ba daʼö zangetuʼö fangowalunia si oföna. Börö daʼö, fangowalunia safuria tefaudu moloʼö huku. Itutunö The Watchtower 15 Mbaŵa si Felezara 1979, ngaʼörö 32, ”Iadaʼa, no tefaböbö ia ba wangowalunia si bohou ba tebai iʼetuʼö manö enaʼö ifuli orudu ia khö woʼomonia si oföna. No aetu wangowalunia si oföna börö wabalisa, ifalua horö, ba ifuli mangowalu.”

Faʼaboto ba dödö si bohou andre tenga daʼö geluahania ba niha Keriso wa fangowalu andrö ambö teʼamoniʼö, mazui lawaʼö wa fohorö andrö tenga horö sebua. Na ifabali woʼomonia si samösa ira matua hewaʼae na lö tefaudu daʼö ba Zura Niʼamoniʼö ba mangowalu ia ba niha böʼö, moguna laʼohe daʼö ira satua sokubaloi föna panitia pengadilan börö me no mohorö ia. (Na ngambatönia si bohou andrö samösa ira alawe niha Keriso, moguna göi laʼohe ia föna panitia pengadilan börö me no fao ia wamalua horö.) Hewaʼae na tenga fohorö wangowalunia si bohou, tebai mangai halöwö ndra matua daʼö ba mbanua niha Keriso ba zi hauga fakhe, börö me lö si taya ba dödö niha gamuatania ba lö niʼokhögönia töi si sökhi. Fatua lö latehegö khönia ira satua sokubaloi wangai halöwö ba mbanua niha Keriso, moguna laʼangeragö hadia zalua khö woʼomonia si lö fasala, börö me tola manö iʼodödögö wamalua horö ira matua andrö enaʼö aetu wongambatöra. Moguna göi laʼangeragö hewisa zalua ba ndraononia side-ide börö me tola manö lö saʼae irorogö ira amara si no mamalua horö andrö.—Mal. 2:14-16.

Na fabali ba ifuli mangowalu zi samösa niha hewaʼae na lö teʼodane-dane ba Zura Niʼamoniʼö, ebua sibai lua-luania. Börö daʼö, no laforomaʼö waʼatua-tua ira niha Keriso na laʼoʼö lala wangera-ngera Yehowa wa fangowalu andrö no niʼamoniʼö.—Sango. 5:4, 5; Heb. 13:4.