1. Hadia manö zangaʼasogö khöda faʼataʼu?

 NEHEGÖ atö hadia manö zalua khö ndra talifusöda. Nestor hegöi foʼomonia sotöi María, omasi ira mangai halöwö ba mbanua si lö ato sanuriaigö. * Börö daʼö, moguna laʼöna-önaiʼö waʼaurira. Hizaʼi, so khöra waʼataʼu alai dania na lö lasöndra waʼohahau dödö na no lafalua daʼö. Toröi Biniam ba soi si lö manehegö halöwö fanuriaigö. Me ihalö gangetula tobali Samaduhuʼö Yehowa, aboto ba dödönia wa tola manö göna ia famakao. Daʼö mbörö wa ataʼu ia. Hizaʼi, abölö ataʼu ia nasa woʼangeragö hadia nifalua nösi nomonia na larongo dania wa no tobali ia Samaduhuʼö Yehowa. Lafatunö khö Valérie wa no göna ia fökhö kanker sabölö-bölö. Abua khönia wangalui doto somasi mamalua operasi si lö mangogunaʼö do. Aboto ba dödönia wa tola manö mate ia ba wökhönia andrö, daʼö mbörö wa ataʼu sibai ia.

2. Hadia mbörö wa moguna talawa waʼataʼuda?

² Hadia no irai ataʼu ndraʼugö simane salua khö ndra talifusöda andrö? Ato ba gotaluada zi no morasoi simane daʼö. Na lö taforege ba wolawa faʼataʼuda, tola manö tahalö gangetula si fasala irege tekiko wahuwusada khö Yehowa. Daʼö zomasi Zatana. Iforege ba wangodela faʼataʼuda enaʼö lö taʼoʼö goroisa Yehowa, duma-dumania ba weʼamöi manuriaigö turia somuso dödö. (Fam. 12:17) Afaito sibai Zatana andrö, abölö, ba lö khönia faʼahakhö dödö. Hizaʼi, tola talumöʼö ita faböi  aekhu ba dandrawa niʼogunaʼönia. Hewisa wamaluada daʼö?

3. Hewisa lalada ba wolawa faʼataʼu?

³ Na faduhu dödöda wa iʼomasiʼö ita Yehowa ba faʼawö ia khöda, tebai ifetaʼu ita Satana. (Si. 118:6) Datafaigi duma-duma zanura Sinunö 118, sanaögö ngawalö gabula dödö sabua ba waʼaurinia. Ato sibai zi faʼudu khönia, ba so ösa moroi ba gotaluara ndra sondröniaʼö (ayati 9, 10). Itaria, abua sibai khönia wanaögö abula dödönia andrö (ayati 13). Ba no irai ibeʼe khönia wotu sabeʼe Yehowa (ayati 18). Hewaʼae simanö, tola imane ba zinunönia, ”Lö ataʼu ndraʼo.” Hadia mbörö wa irasoi waʼahono dödö ba lö khönia faʼataʼu? Hewaʼae no ibeʼe khönia wotu Yehowa, aboto ba dödönia wa iʼomasiʼö sibai ia Amania andrö si so ba zorugo. Gofu hadia zalua khönia, faduhu dödönia wa iʼomasiʼö ia Lowalanginia ba ibeʼe wanolo.—Si. 118:29.

4. Hadia manö waʼataʼu si tola talawa na faduhu dödöda wa iʼomasiʼö ita Lowalangi?

⁴ Moguna faduhu dödöda wa iʼomasiʼö ita Yehowa ero zamösana. Na tafaduhusi tödö daʼö, tola talawa zi tölu ngawalö waʼataʼu nirasoi niha sato, yaʼia daʼö: (1) faʼataʼu na lö tebönökhi zoguna ba nösi nomo, (2) faʼataʼu ba niha, ba (3) faʼataʼu ba waʼamate. Ira talifusöda nitötöi ba ngenoli siföföna mege, tola lalawa waʼataʼura börö me faduhu dödöra wa iʼomasiʼö ira Lowalangi.

5. Hadia manö niʼaombösi tödö zi samösa högö yomo ba nomo? (Faigi gambara ba guli majalah.)

⁵ Tatu manö, iʼonorogö tödö nösi nomonia si samösa högö yomo ba nomo ba wamönökhi soguna khöra. (1 Ti. 5:8) Na samösa högö ndraʼugö yomo ba nomo, te so khöu waʼataʼu na laheta ndraʼugö ba halöwöu sagötö pandemi andre. Te so göi khöu waʼaombö dödö na öʼangeragö hewisa lala ba wamönökhi soguna yomo ba nomo mazui ba wamuʼa okosi nomomi. Te göi ataʼu ndraʼugö na lö ösöndra halöwöu na laheta ndraʼugö moroi ba halöwöu iadaʼa. Mazui, simane Nestor hegöi María nitötöi ba wamobörö mege, te aombö dödöu ba woʼöna-önaiʼö faʼaurimö. No mofozu Zatana ba wangodela faʼataʼu simane daʼö irege ato niha samöhöli ba wamosumange Yehowa.

6. Hadia lala wangera-ngera niʼasogö Zatana khöda?

⁶ Omasi Zatana na tawaʼö tödöda wa lö iʼameʼegö tödö ita Yehowa ba lö itolo ita ba wamönökhi soguna ba nösi nomoda. Lua-luania, tafalua gofu hadia manö enaʼö lö aheta ita moroi ba halöwöda, hewaʼae na lö tefaudu daʼö ba goi-goi Zura Niʼamoniʼö.

7. Hadia nifaduhuʼö Yesu khöda?

⁷ Yesu, sangokhögö faʼaboto ba dödö fondrege zebua sanandrösa khö Namania, ifaduhuʼö ba dödöda wa no ’aboto ba dödö Lowalangi hadia zoguna khöda, fatua lö niʼandröda’. (Mat. 6:8) Aboto göi ba dödö Yesu wa lö tebulö iʼasogö zoguna khöda Yehowa. Börö me niha Keriso ita, farahu ita ba nösi nomo Yehowa. Moguna faduhu dödöda khö Yehowa, si tobali högö yomo ba nomo, wa hasambalö ifalua goi-goi si no ibeʼe ba 1 Timoteo 5:8.

8. (a) Na so khöda waʼataʼu wa tebai taʼasogö zoguna ba nösi nomoda, hadia zi tola möi fanoloda? (Mataiʼo 6:31-33) (b) Hewisa woloʼöda duma-duma zi sambua fongambatö me labeʼe gö zi samösa talifusöda ira alawe? (Faigi gambara.)

⁸ Na faduhu dödöda wa Yehowa andrö iʼomasiʼö ita hegöi ösi nomoda, tola göi faduhu dödöda wa hasambalö tebönökhi zoguna khöda. (Baso Mataiʼo 6:31-33.) Omasi Yehowa wamönökhi soguna khöda andrö. Sindruhu-ndruhu wa yaʼia andrö Lowalangi soböwö! Me iwöwöi gulidanö, tenga ha asala  iʼasogö zoguna khöda faböi mate ita. Hizaʼi, oya göi ngawalö niwöwöinia si tola mangaʼasogö khöda faʼowua-wua dödö ba waʼauri. (1 Mo. 2:9) Hewaʼae na itaria ha soguna khöda sero maʼökhö zi tola tabönökhi, hizaʼi moguna tatörö tödöda wa no buala moroi khö Yehowa daʼö. (Mat. 6:11) Gofu hawaʼoya zi no tatehegö, abölö oya nasa nibeʼe Yehowa khöda iadaʼa hegöi ba zi so miföna. Daʼö zaboto ba dödö Nestor hegöi María ba gafuriata.—Yes. 65:21, 22.

9. Hadia wamahaʼö si tola tahalö moroi ba duma-duma Nestor hegöi María?

⁹ Ohahau dödö Nestor hegöi María ba Kolombia. Lamane wanutunö, ”No irai tumbu ba wangera-ngerama wa moguna maʼöna-önaiʼö waʼaurima ba madouʼö wamalua halöwö ba wamati. Hizaʼi, so khöma waʼataʼu alai na lö masöndra waʼohahau dödö na maʼöna-önaiʼö waʼaurima.” Hewisa wolawara faʼataʼura andrö? Laʼangerönusi hadia manö zi no irai ifalua khöra Yehowa, sangoromaʼö wa iʼomasiʼö ira. Daʼö zamaduhuʼö ba dödöra wa hasambalö ibönökhi zoguna khöra Yehowa. Börö daʼö, laröi halöwöra sebua gazi, lafamawa nomora, ba findra ira ba mbanua si lö ato sanuriaigö. Hewisa dödöra sanandrösa ba gangetula nihalöra andrö? Imane Nestor, ”No marasoi samösa wa atulö wehede nisura ba Mataiʼo 6:33. Lö irai moʼamböta ndraʼaga ba zoguna khöma, ba itugu omuso dödöma iadaʼa.”

10. Hadia mbörö wa ato niha sataʼu ba nawöra niha?

¹⁰ Iʼotarai mböröta, niha gulidanö andre asese lafakao nawöra. (Sango. 8:9) Duma-dumania, ato niha sangogunaʼö kuasora ba lala si fasala, ato zamalua si lö sökhi, so ndraono sekola samakao ba sangoʼaya awöra ba kelas, ba so ösa niha samakao ösi nomora samösa. Börö daʼö, lö tokea ita na ato niha sataʼu ba nawöra niha. Hewisa lala Zatana ba wangodela faʼataʼu andrö?

11-12. Hewisa lala Zatana ba wangodela faʼataʼuda ba nawöda niha?

¹¹ Iʼodela Satana waʼataʼuda ba nawöda niha enaʼö taböhöli weʼamöi manuriaigö ba lö saʼae taʼoʼö li Yehowa. Ifarou dödö ndra samatörö ba wanaisi halöwöda hegöi ba wamakao yaʼita. (Luk. 21:12; Fam. 2:10) No afönu gulidanö Zatana andre turia si lö atulö hegöi fangobousi sanandrösa khö ndra Samaduhuʼö Yehowa. Niha si faduhu tödö ba daʼö, te  laʼoʼaya ita mazui laforege ba wamaʼala yaʼita. (Mat. 10:36) Hadia ahöli-höli dödöda na alua daʼö? Löʼö. No iʼotarai me abad siföföna iʼogunaʼö lala simane daʼö Satana ba wanuwö ono mbanua Lowalangi.—Hal. 5:27, 28, 40.

¹² Tenga ha fanandraigö moroi khö ndra samatörö niʼogunaʼö Zatana ba wametaʼu yaʼita. So ösa zataʼu na laʼangeragö hadia dania nifalua nösi nomora na no tobali ira Samaduhuʼö Yehowa. Ba wangumaʼöra, abölö ataʼu ira daʼö moroi na laböbözi. Laʼomasiʼö sibai nösi nomora. Latötöna ba nösi nomora andrö enaʼö aboto göi ba dödöra Yehowa ba laʼomasiʼö ia. Abu sibai dödöra na so nösi nomora samaʼema fehede si lö sökhi sanandrösa khö Yehowa hegöi ono mbanuania. Sindruhu sa, hewaʼae na lasaisi ita ba wamobörö, so ösa moroi ba gotalua nösi nomoda andrö zi tobali Samaduhuʼö Yehowa ba gafuriata. Hizaʼi, hewisa na so ba gotalua nösi nomoda zangetuʼö fahuwusara khöda börö nifaduhusida tödö? Hadia nifaluada?

13. Hadia mbörö wa moguna taʼangerönusi waʼomasi Lowalangi na göna ita folohi moroi ba nösi nomoda? (Sinunö 27:10)

¹³ Tola terara dödöda na tabaso wehede si sökhi nisura ba Zinunö 27:10. (Baso.) Na lö tebulö itörö tödöda wa iʼomasiʼö sibai ita Yehowa, lö khöda faʼataʼu hewaʼae göna ita folohi moroi ba nösi nomoda. Faduhu göi dödöda wa omasi ia ifahowuʼö waʼanau gölöda. Hasambalö ibönökhi zoguna khöda Yehowa, he soguna ba mboto hegöi ba wamati. Ibeʼe göi khöda wanolo enaʼö tasöndra waʼahono dödö ba faʼomuso dödö. Sindruhu-ndruhu wa tola muʼodaligö Yehowa andrö! Daʼö nirasoi dalifusöda Biniam, si no mutötöi ba wamobörö.

14. Hadia zi tola tahalö khöda famahaʼö moroi ba duma-duma Biniam?

¹⁴ Ihalö gangetula Biniam tobali Samaduhuʼö Yehowa hewaʼae na iʼila wa tola manö göna ia fanandraigö sabua. Börö me faduhu dödönia wa iʼomasiʼö ia Yehowa, andrö wa tola ilawa waʼataʼu ba niha. Imane Biniam, ”Göna ndraʼo folohi moroi khö ndra samatörö, töra moroi ba zi no ukhalaigö ba zilalö. Hizaʼi, sabölö ataʼudo yaʼia daʼö fanaisi moroi ba nösi nomogu. Ataʼu ndraʼo na afatö dödö bapagu ba laʼaohasi ba dödö ndraʼo yomo ba nomo, börö me no uhalö gangetula tobali Samaduhuʼö Yehowa.” Hewaʼae simanö, faduhu  dödönia wa lö tebulö irorogö niha niʼomasiʼönia Yehowa. Imane Biniam, ”Uʼangerönusi hewisa me itolo Yehowa ndra talifusöda tanö böʼö me tosasa ira wangalui soguna, lafalua khöra zi lö atulö, ba laböbözi ira. Aboto ba dödögu wa hasambalö ifahowuʼö ndraʼo Yehowa na lö faröido khönia. Me no hauga kali labeʼe ndraʼo ba gurunga ba lafakao ndraʼo, urasoi samösa wa hasambalö itolo ita Yehowa ba ginötö moguna, asala lö faröi ita khönia.” Sindruhu-ndruhu irasoi Biniam wa no tobali Amania Yehowa andrö, ba hulö nösi nomonia samösa nono mbanua Lowalangi.

15. Hana wa sinangea na ataʼu ita waʼamate?

¹⁵ Ifatunö khöda Sura Niʼamoniʼö wa faʼamate andrö udu. (1 Ko. 15:25, 26) Te so khöda waʼataʼu na mate ita, mendrua manö ba ginötö göna ita mazui ösi nomoda fökhö sabölö-bölö. No sinangea na tarasoi zimane daʼö. Hadia mbörö? Börö me no itanögö ba dödöda Yehowa waʼauri si lö aetu. (Sango. 3:11) Sindruhunia, tobali göi folumöʼöda na ataʼu ita waʼamate. Duma-dumania, daʼö zamarou yaʼita enaʼö tazago hadia niʼada, asese talau faʼolahraga, möi ita khö doto mazui tabadu dalu-dalu na mofökhö ita, ba lö tafalua hadia ia zi tola mamaʼala faʼaurida.

16. Hewisa Zatana wangodelania faʼataʼuda waʼamate?

¹⁶ Iʼila Satana wa ebua sibai mböli waʼauri ba wamaigida. Hizaʼi, iböbögö khöda zi lö duhu wa tola tatehegö gofu hadia manö niʼokhögöda hegöi fahuwusada khö Yehowa, asala auri ita. (Yob. 2:4, 5) Tatu manö fasala niböbögönia andrö! Hizaʼi, börö me so waʼabölö khö Zatana ba ’wangaʼasogö faʼamate’, iforege ba wangodela faʼataʼuda waʼamate enaʼö taröi Yehowa. (Heb. 2:14, 15) Itaria, so niha niʼogunaʼö Zatana ba wametaʼu yaʼita wa hasambalö labunu ita na lö taböhöli wamosumange Yehowa. Tola göi iʼodela Satana wökhö sabölö-bölö si göna yaʼita. Te lafaso ita ira doto mazui ösi nomoda si tenga si sara lala wamati enaʼö tatemaʼö transfusi darah, hewaʼae sindruhunia fasala daʼö moloʼö oroisa Lowalangi. Mazui, te so niha samarou yaʼita enaʼö tatemaʼö lala wamadöhö fökhö si lö tefaudu ba goi-goi Zura Niʼamoniʼö.

17. Moloʼö Roma 8:37-39, hadia mbörö wa lö moguna ataʼu ita waʼamate?

¹⁷ Tatu manö, lö omasi ita mate. Hizaʼi, aboto ba dödöda wa lö tebulö iʼomasiʼö ita Yehowa hewaʼae na no mate ita. (Baso Roma 8:37-39.) Hewaʼae no mate zi fahuwu khö Yehowa, auri ira nasa ba wamaiginia ba lö iʼolifugö ira. (Luk. 20:37, 38) Akhari-khari dödönia, ba omasi ia wanusugi yaʼira. (Yob. 14:15) Ebua sibai mbölida me ihöli ita Yehowa enaʼö ’tasöndra waʼauri si lö aetu’. (Yoh. 3:16) Aboto ba dödöda wa iʼomasiʼö ba iʼameʼegö tödö ita Yehowa. Börö daʼö, ba ginötö mofökhö ita mazui teʼala waʼaurida, lö omasi ita taröi Yehowa. Itugu tafahatö ita khönia ba wangalui fondrara dödö, faʼatua-tua, hegöi faʼabölö. Daʼö nifalua Valérie hegöi foʼomonia.—Si. 41:3.

18. Hadia wamahaʼö si tola tahalö moroi ba duma-duma Valérie?

¹⁸ Me 35 fakhe ndröfi Valérie, lafatunö khönia wa no göna ia fökhö kanker sabölö-bölö, ba ha fawaraö göna daʼö ba niha. Hizaʼi, börö me faduhu dödönia wa iʼomasiʼö ia Yehowa, tola ilawa waʼataʼunia waʼamate. Imane wanutunö, ”Tebulö sibai zalua ba waʼaurima me no lafatunö khöma sanandrösa ba wökhögu. Moguna utörö operasi sebua enaʼö auri ndraʼo. No ato ndra doto nifalukhaisigu, hizaʼi lö omasi ira laʼoperasi ndraʼo na lö muʼogunaʼö  ndro. Ataʼudo sibai. Hewaʼae simanö, lö omasido utema transfusi darah, börö me fasala daʼö moloʼö oroisa Lowalangi. Sandrohu faʼaurigu, no iforomaʼö waʼomasinia khögu Yehowa. Iadaʼa, tebeʼe göi khögu ginötö ba wangoromaʼö faʼomasigu khö Yehowa. Ero lafatunö khögu ira doto duria si lö baga, itugu uhalö gangetula ba wangomusoiʼö tödö Yehowa, ba lö utehegö möna Zatana. Ba gafuriata, aʼozu laʼoperasi ndraʼo ba lö muʼogunaʼö ndro. Sindruhu sa, lö si taya fefu wökhögu. Hizaʼi, lö tebulö ihenaigö fefu zoguna khöma Yehowa. Duma-dumania, ba gangowuloa nifalua fatua lö maʼila sanandrösa ba wökhögu andre, no matutunö artikel tuhonia ’Menghadapi Kesukaran dengan Tabah’. * Sindruhu-ndruhu wa möi famarou dödöma artikel daʼö ba mato hauga kali mafuli mabaso ia. Yaʼo hegöi foʼomogu, tola maʼokhögö waʼahono dödö börö me mabaso-baso artikel simane daʼö ba lö maböhöli wamalua halöwö ba wamati. Daʼö zanolo yaʼaga irege tola maʼokhögö lala wangera-ngera si sökhi ba mahalö gangetula si tefaudu.”

19. Hadia zalua ba zi lö ara tö?

¹⁹ Börö wanolo moroi khö Yehowa, ato niha Keriso ba zi sagörö ulidanö si no mofozu ba wanaögö abula dödö hegöi ba wolawa Afökha. (1 Fe. 5:8, 9) Tola göi öfalua zimane daʼö. Ba zi lö ara tö, hasambalö iʼoroisi Yehowa khö Yesu hegöi ira samatörö si fao khönia ”ba wamakiko halöwö Gafökha”. (1 Yo. 3:8) Aefa daʼö, fefu nono mbanua Lowalangi ba gulidanö, ’lö ataʼu ira gofu hadia ia ba lö hadöi samanizi yaʼira’. (Yes. 54:14; Mi. 4:4) Hizaʼi, fatua lö alua daʼö, moguna taforege ba wolawa faʼataʼu.

20. Hewisa lalada ba wolawa faʼataʼu?

²⁰ Moguna taʼaroʼö waʼafaduhu dödöda wa lö tebulö iʼomasiʼö ba irorogö nono mbanuania Yehowa. Tola tafalua daʼö na taʼangerönusi ba tadunö-dunö hewisa me irorogö nono mbanuania Yehowa me götö föna. Aefa daʼö, moguna göi itörö tödöda hewisa me itolo ita ba wanaögö ngawalö gabula dödö. Sindruhu, börö wanolo moroi khö Yehowa, hasambalö tola talawa waʼataʼu!—Si. 34:4.