1. Hadia nifatunö Razo Selomo ba Zangombakha 7:20?

 IMANE Razo Selomo, ”Lö hadöi niha satulö ba gulidanö si lö mamalua si lö sökhi ba si lö irai mamalua horö.” (Sango. 7:20) Atulö sibai niwaʼönia andrö! No niha samalua horö ita fefu. (1 Yo. 1:8) Börö daʼö, moguna khöda wangefa moroi khö Lowalangi hegöi ba nawöda niha.

2. Hewisa dödömö me iʼefaʼö zalamö si fahuwu khömö?

² Tola manö no irai öfalua zala sangafökhöiʼö tödö zi fahuwu khöu. Börö me omasiʼö öʼasiwai watitisa salua ba gotaluami ba ifuli aro wahuwusami, öʼandrö khönia wangefa soroi ba dödö. Hewisa dödömö me iʼefaʼö zalamö si fahuwu khömö andrö? Tatu manö omuso dödöu ba örasoi waʼahono dödö!

3. Hadia nitutunöda ba artikel daʼa?

³ Omasi ita tobali si fahuwu khö Yehowa. Hizaʼi, itaria taʼafökhöiʼö dödönia ba wehededa mazui ba nifaluada. Hewaʼae simanö, hadia mbörö wa tola faduhu dödöda wa omasi Yehowa wangefaʼö salada? Hadia mbörö wa abölö tohude wangefa nibeʼe Yehowa moroi ba wangefaʼöda sala nawöda niha? Ba haniha zinangea manema fangefa moroi khö Lowalangi?

4. Hadia mbörö wa tola faduhu dödöda wa omasi Yehowa wangefaʼö salada?

⁴ Ifaduhuʼö ba dödöda Taromali Lowalangi wa omasi Yehowa wangefaʼö salada. Me fahuhuo Yehowa khö Moze ba Hili  Zinaʼi, ifatenge malaʼikania ba wanutunö bua-buania: ”Yehowa, Lowalangi sahakhö tödö Yehowa andrö ba si sökhi böwö, lö alio mofönu ba fahöna waʼomasi si lö faröi ba faʼaduhu, sangoromaʼö faʼomasi si lö faröi ba niha si hauga ribu faʼato. Iʼefaʼö zala, olalöwa, horö.” (2 Mo. 34:6, 7) Yehowa andrö Lowalangi si sökhi tödö ba sahakhö tödö somasi mangefaʼö horö niha samalalini era-era.—Neh. 9:17; Si. 86:15.

5. Hadia nifalua Yehowa börö me sindruhu-ndruhu aboto ba dödönia niha gulidanö? (Sinunö 103:13, 14)

⁵ Börö me yaʼia Zomböi yaʼita, aboto ba dödö Yehowa fefu hadia ia sanandrösa khöda. Angeragö atö, ahori aboto ba dödönia fefu niha gulidanö ero zamösana. (Si. 139:15-17) Anehe ia walömoʼahonoa nitemada moroi khö wurugöda. Baero daʼö, aboto göi ba dödönia hadia manö zi no irai alua khöda ba zilalö sotatugöi hewisa gamuatada. Hadia nifalua Yehowa börö me sindruhu-ndruhu aboto ba dödönia niha gulidanö? Terou dödönia ba wangoromaʼö khöda faʼahakhö dödö.—Si. 78:39; baso Zinunö 103:13, 14.

6. Hewisa wangoromaʼö Yehowa wa omasi ia wangefaʼö salada?

⁶ No iforomaʼö Yehowa wa omasi ia wangefaʼö salada. Aboto ba dödönia wa no göna ita horö ba faʼamate börö zala nifalua niha siföföna, yaʼia daʼö Adamo. (Rom. 5:12) Lö hadöi si tola tafalua ba wangefaʼö yaʼita samösa mazui niha böʼö moroi ba horö hegöi faʼamate. (Si. 49:7-9) Hewaʼae simanö, iforomaʼö waʼahakhö dödö Lowalangida sebua faʼomasi ba iʼalui lala enaʼö teʼefaʼö ita. Hadia nifaluania? Simane nitutunö ba Yohane 3:16, ifatenge Nononia si ha sambua enaʼö mate salahida. (Mat. 20:28; Rom. 5:19) Itehegö mate ia Yesu salahida enaʼö teʼefaʼö dozi samati khönia moroi ba horö hegöi faʼamate. (Heb. 2:9) Khalaigö hawaʼafökhö dödö Yehowa me iʼila wa alua khö Nononia waʼamate si möi fangaila ba safönu famakao! Na lö omasi Yehowa wangefaʼö salada, tatu lö itehegö mate Nononia salahida.

7. Haniha manö duma-duma ba Zura Niʼamoniʼö si no manema fangefaʼö sala moroi khö Yehowa?

⁷ Ba Zura Niʼamoniʼö, ato duma-duma sanandrösa ba niha si no manema fangefaʼö sala moroi khö Yehowa. (Ef. 4:32) Haniha  zi tumbu ba gera-eramö? Tola manö itörö tödöu Razo Manase. Yaʼia andrö niha si lö sökhi, samalua horö fondrege zebua föna Yehowa. Ifosumange nadu ba idöniaʼö wamalua famosumange faya. So ösa ndraononia nibununia tobali sumange Lowalangi niha baero. Baero daʼö, iʼohe ba gosali Yehowa nadu nifazökhinia. Imane Sura Niʼamoniʼö sanandrösa khönia, ”Oya zi lö sökhi nifalua Manase si möi fangafökhö dödö Yehowa.” (2 Ng. 33:2-7) Hizaʼi, me ifalalini gera-erania Manase soroi ba dödö, iʼefaʼö zalania Yehowa. Baero daʼö, ifangawuli göi khönia Lowalangi dadaomania tobali razo. (2 Ng. 33:12, 13) Tola manö öʼangeragö göi sanandrösa khö Razo Dawido si no hauga kali mamalua horö sebua föna Yehowa, simane amuata wohorö hegöi fabunusa. Hewaʼae simanö, me ifalalini gera-erania Dawido soroi ba dödö ba ifaduhuʼö wa no ifalua zala, iʼefaʼö göi zalania Yehowa. (2 Sa. 12:9, 10, 13, 14) Börö daʼö, tola faduhu dödöda wa omasi Yehowa wangefaʼö salada. Iadaʼa, datatutunö hadia mbörö wa abölö tohude wangefaʼö sala nibeʼe Yehowa moroi ba wangefa nibeʼe niha gulidanö.

8. Hadia mbörö wa Sanguhuku fondrege zi sökhi Yehowa andrö?

⁸ Yehowa andrö ”Sanguhuku ösi gulidanö”. (1 Mo. 18:25) Samösa zanguhuku si sökhi moguna sindruhu-ndruhu aboto ba dödönia sanandrösa ba huku. Tola faduhu dödöda wa simane daʼö göi Yehowa Sanguhuku yaʼita, sindruhu-ndruhu aboto ba dödönia sanandrösa ba huku börö me yaʼia göi Zameʼe Huku khöda. (Yes. 33:22) Samösa lö sangokhögö faʼaboto ba dödö simane niʼokhögö Yehowa sanandrösa ba zatulö hegöi si lö atulö. Hadia nasa zinangea iʼokhögö sanguhuku si sökhi? Moguna ihaogö iʼangeragö fefu zalua fatua lö ihalö gangetula. Lö tebulö ifalua daʼö Yehowa, daʼö mbörö wa yaʼia andrö Sanguhuku fondrege zi sökhi.

9. Hadia zi no aboto ba dödö Yehowa fatua lö ihalö gangetula ba wangefaʼö sala?

⁹ Tenga simane niha gulidanö si tobali sanguhuku, iʼokhögö Yehowa waʼaboto ba dödö soʼahonoa sanandrösa ba ngawalö hadia ia. Daʼö mbörö wa hasambalö atulö gangetula nihalönia. (1 Mo. 18:20, 21; Si. 90:8) Ihalö gangetula tenga moloʼö hadia niʼila mazui nirongo niha. Sindruhu-ndruhu aboto ba dödönia hana wa tafalua hadia ia, duma-dumania börö gamuata niʼoʼöda moroi khö ndra satuada, lala wangebuaʼö yaʼita, salua ba zi fasuida, nirasoida, hegöi lala wangera-ngerada. Baero daʼö, tola ibaso nösi dödöda Yehowa. Aboto ba dödönia gohitö dödöda, niʼera-erada, hegöi somasi-masi dödöda. Lö hadöi si tobini föna Yehowa. (Heb. 4:13) Börö daʼö, na iʼefaʼö zala zi samösa niha Yehowa, hasambalö atulö gangetula nihalönia andrö, börö me teʼodane-dane daʼö ba waʼaboto ba dödö soʼahonoa niʼokhögönia.

10. Hadia mbörö wa tola tawaʼö wa hasambalö atulö wanguhuku nifalua Yehowa? (5 Moze 32:4)

¹⁰ Hasambalö atulö wanguhuku nifalua Yehowa. Lö khönia faʼebua dödö zambuana. Ibeʼe wangefa ba niha tenga moloʼö sikhala, faʼebua gokhöta, faʼalawa faka, mazui faʼatua-tuara. (1 Sa. 16:7; Yak. 2:1-4) Samösa lö niha si tola mamaso Yehowa mazui sameʼe khönia sölö-sölö. (2 Ng. 19:7) Lö irai ihalö gangetula börö wönu mazui faʼabao dödö. (2 Mo. 34:7) No sanguhuku fondrege zi sökhi Yehowa börö me sindruhu-ndruhu aboto ba dödönia ita hegöi salua khöda.—Baso 5 Moze 32:4.

11. Hadia zi tohude ba wangefaʼö sala nibeʼe Yehowa?

 ¹¹ Aboto ba dödö ndra sanura Buku Niʼamoniʼö Heberaiʼo wa tohude wangefaʼö sala nibeʼe Yehowa moroi ba wangefaʼö sala nibeʼe niha gulidanö. Itutunö sambua karya referensi wa itaria laʼogunaʼö ngawua wehede Heberaiʼo ”sanutunö fangefa nibeʼe Lowalangi ba niha samalua horö. Lö irai muʼogunaʼö ngawua wehede daʼö ba wanutunö fangefa nibeʼe niha ba nawönia niha”. Ha Yehowa zangokhögö kuaso ba wangefaʼö fefu horö nifalua zi samösa niha samalalini era-era. Hadia mbuania na no iʼefaʼö zalada Yehowa?

12-13. (a) Hadia nirasoida na no iʼefaʼö zalada Yehowa? (b) Na no iʼefaʼö zalada Yehowa, hadia zi lö ifalua?

¹² Na no aboto ba dödöda wa no iʼefaʼö zalada Yehowa, hasambalö tarasoi ’waʼohahau dödö’ ba taʼokhögö dödö side-ide si lö sinegu. Tola tarasoi zimane daʼö börö me Yehowa zameʼe khöda fangefa. (Hal. 3:19) Na no iʼefaʼö zalada Yehowa, omasi ia na ifuli tobali ita si fahuwu khönia, irege hulö zi lö irai tafalua horö fönania.

¹³ Na no iʼefaʼö zalada Yehowa, lö saʼae itörö-törö tödönia mazui ifuli ihuku ita börö horö nifaluada andrö. (Yes. 43:25; Yer. 31:34) Iʼefaʼö horöda Yehowa ”simane otalua gatumbukha faoma aekhula”. * (Si. 103:12) Na taʼangeragö wangefa nibeʼe Yehowa, tatu mangandrö saohagölö ita khönia ba ahöli-höli dödöda. (Si. 130:4) Hizaʼi, haniha zi tola manema fangefa moroi khö Yehowa?

14. Hadia zi no tafahaʼö yaʼita irugi daʼa sanandrösa ba gangetula Yehowa ba wangefaʼö sala?

¹⁴ Simane si no tatutunö, iʼefaʼö zalada Yehowa tenga moloʼö faʼebua horö si no tafalua. Baero daʼö, börö me yaʼia andrö Somböi yaʼita, Sameʼe Huku, ba Sanguhuku yaʼita, oya waʼaboto ba dödö niʼokhögö Yehowa. Iʼogunaʼö waʼaboto ba dödönia andrö ba wangai angetula si tefaudu. Hizaʼi, hadia manö niʼangeragö Yehowa fatua lö ihalö gangetula ba wangefaʼö salada?

15. Moloʼö Luka 12:47, 48, hadia niʼangeragö Yehowa fatua lö ihalö gangetula ba wangefaʼö salada?

¹⁵ Fatua lö ihalö gangetula Yehowa ba wangefaʼö sala, iʼangeragö hadia aboto ba dödö  niha samalua horö wa fasala nifaluania andrö mazui löʼö. No ihaogö wanutunö daʼö Yesu ba Luka 12:47, 48. (Baso.) Na iʼodödögö si samösa niha wamalua amuata si lö sökhi hewaʼae na aboto ba dödönia wa fatuwu khö Lowalangi gamuata simane daʼö, eluahania no ifalua horö sebua. Tola manö lö iʼefaʼö zalania Yehowa. (Mrk. 3:29; Yoh. 9:41) Hizaʼi, tatu fao dödöda wa itaria tafalua zala hewaʼae na aboto ba dödöda wa fasala nifaluada andrö. Na simanö, hadia tola nasa tatema wangefa? Tola! Nehegö atö hadia nasa niʼangeragö Yehowa fatua lö ihalö gangetula.

16. Hadia geluahania mamalalini era-era, ba hadia mbörö wa moguna tafalua daʼö?

¹⁶ Niʼangeragö Yehowa nasa yaʼia daʼö hadia sindruhu-ndruhu ifalalini gera-erania niha samalua horö andrö mazui löʼö. Na ifalalini gera-erania si samösa niha, eluahania ibulöʼö lala wangera-ngera, amuata, hegöi ohitö dödönia. Abu dödönia börö me no ifalua zi lö sökhi mazui börö me lö nifaluania satulö. Abu dödö niha samalalini era-era tenga ha börö me no ifalua zala, hizaʼi börö me lö saʼae aro wahuwusania khö Yehowa irege ifalua gamuata si lö sökhi andrö. Törö tödöu wa no ifalua horö sebua Razo Manase hegöi Razo Dawido. Hewaʼae simanö, iʼefaʼö zalara Yehowa börö me no lafalalini gera-erara soroi ba dödö. (1 Ra. 14:8) Tatu manö, enaʼö iʼefaʼö zalada Yehowa, moguna taforomaʼö wa sindruhu-ndruhu tafalalini gera-erada. Hizaʼi, lö ibönö na ha asala maniasa ita ba horö nifaluada. So zi lö tola löʼö tafalua. * Daʼö danö böʼönia niʼangeragö Yehowa fatua lö ihalö gangetula.

17. Hadia geluahania wombulöʼö lala waʼauri, ba hadia mbörö wa moguna tafalua daʼö? (Yesaya 55:7)

¹⁷ Tanö böʼönia niʼangeragö Yehowa yaʼia daʼö hadia no ibulöʼö lala waʼaurinia si samösa niha mazui löʼö. Eluahania, moguna iröi lala waʼaurinia si lö sökhi ba itörö lala waʼauri si tefaudu ba zomasi Yehowa. (Baso Yesaya 55:7.) Moguna göi ibulöʼö wangera-ngerania ba iʼoʼö lala wangera-ngera Yehowa. (Rom. 12:2; Ef. 4:23) Lö tola löʼö ihalö gangetula enaʼö lö saʼae iʼangeragö mazui ifalua gamuata  si lö sökhi nifaluania ba zilalö. (Kol. 3:7-10) Börö me mamati ita ba höli si no ibeʼe Keriso, daʼö zi tobali dane-dane khö Yehowa ba wangefaʼö salada hegöi ba wangamoniʼö yaʼita moroi ba horö. Na iʼila Yehowa wa no taforege wombulöʼö lala waʼaurida, hasambalö ibeʼe khöda wangefa si teʼodane-dane ba höli.—1 Yo. 1:7.

18. Hadia manö zi no tatutunö sanandrösa ba wangefaʼö sala nibeʼe Yehowa?

¹⁸ Dataʼadogoiʼö wanutunö hadia manö zi no tafahaʼö yaʼita. Si oföna, lö tebulö omasi Yehowa wangefaʼö salada. Si dua, sindruhu-ndruhu aboto ba dödönia ita. Ahori iʼila fefu hadia ia sanandrösa khöda ba yaʼia zabölö mangila hadia sindruhu-ndruhu no tafalalini gera-erada mazui löʼö. Ba si tölu, na ibeʼe khöda wangefa, sindruhu-ndruhu iʼefaʼö fefu horö nifaluada irege hulö zi lö irai tafalua horö fönania. Daʼö mbörö wa tola taʼokhögö dödö side-ide si lö sinegu ba tatema howu-howu moroi khönia. Sindruhu-ndruhu wa no sahöli-höli dödö wangefaʼö sala nibeʼe Yehowa!

19. Hewaʼae na lö moʼahonoa ita ba asese tafalua zala, hadia mbörö wa lö tebulö tarasoi waʼomuso dödö?

¹⁹ Tatu manö, börö me niha si lö moʼahonoa ita, asese tafalua zala. Hewaʼae simanö, tola tasöndra wondrara dödö moroi ba wehede nisura ba mbuku Pemahaman Alkitab, Jilid 2, ngaʼörö 1055, sangumaʼö, ”Yehowa andrö safönu faʼahakhö dödö ba aboto ba dödönia wa ambö faʼabölö nono mbanuania. Börö daʼö, lö moguna talafo laʼabusi tödö zala nifaluara börö walömoʼahonoara. (Si 103:8-14; 130:3) Na lafalua wondrege zi sökhi ba woloʼö goi-goi Lowalangi, tola lasöndra waʼomuso dödö. (Fil 4:4-6; 1Yo 3:19-22).” Sindruhu-ndruhu wa möi fondrara dödöda wehede daʼö!

20. Hadia nitutunöda ba artikel aefa daʼa?

²⁰ Taʼandrö sibai saohagölö khö Yehowa börö me omasi ia wangefaʼö salada na sindruhu-ndruhu maniasa ita ba horö si no tafalua. Hizaʼi, hewisa woloʼöda duma-duma Yehowa ba wangefaʼö sala? Hadia waʼafagölö wangefaʼö sala nibeʼeda ba wangefa nibeʼe Yehowa, hizaʼi hadia göi gamaehutania? Hadia mbörö wa moguna aboto ba dödöda gamaehutania? Ba artikel aefa daʼa, tatutunö wanema li moroi ba wanofu-nofu daʼö.