ME TORÖI ndra niha Heberaiʼo ba Danö Amabuʼula, labörögö wamaku tanö hegöi ba wananö sinanö ba mböröta ndröfi. Na ba ginötöda andre, lafalua daʼö ba mbaŵa si Siwa mazui ba mbaŵa si Fulu.

Me luo daʼö, laʼogunaʼö kalender nitatugöi moloʼö fofanö mbaŵa (faʼarania 29 mazui 30 hari ero waŵa). Hizaʼi, abölö adogo-dogo ia moroi ba kalender nitatugöi moloʼö fofanö luo. Börö daʼö, oya lala niʼogunaʼö ba wamaudugö si dombua kalender andrö. Sambua lala nifaluara yaʼia daʼö lanönö waʼoya ngaluo ero röfi. Mazui, ero hauga fakhe itaria lanönö sara waŵa, te ba mbaŵa safuria fatua lö tebörögö ndröfi si bohou. Börö me lafalua daʼö, tola aekhu ginötö wananö hegöi famasi ba mbaŵa si fagölö ero röfi.

Hizaʼi me götö Moze, ifatunö ba nono mbanuania Lowalangi wa tebörögö zi döfi ba mbaŵa Abibi mazui Nisana, yaʼia daʼö ba mbaŵa si Tölu mazui baŵa si Öfa. (2 Mo. 12:2; 13:4) Ba mbaŵa Nisana, so sambua gowasa nifalua ndraono Gizaraʼeli, ba labeʼe mbua barli si no labasi tobali sumange sagötö mufalua gowasa andrö.—2 Mo. 23:15, 16.

Imane si samösa pakar sotöi Emil Schürer ba mbuku The History of the Jewish People in the Age of Jesus Christ (175 SM–135 M), ”So sambua gamakhoita salio aboto ba dödöda sinangea muʼoʼö ba wotatugöi hadia munönö sara waŵa ba kalender mazui löʼö. Owasa Fasa nifalua ba mbaŵa Nisana (14 Nisana), lö tola löʼö aekhu ia na no aefa ekuinoks * ba mbaŵa woliwiö . . . Börö daʼö, na duma-dumania lanehegö ba gangohorita ndröfi wa aekhu dania ngaluo Gowasa Fasa fatua lö ekuinoks, lahalö gangetula wa munönö mbaŵa [si 13] fatua lö mbaŵa Nisana.”

Laʼoʼö gamakhoita andrö ira Samaduhuʼö Yehowa na latatugöi hawaʼara mufalua Mbongi Watomesa Zoʼaya, nifalua ba tanggal 14 Nisana moloʼö kalender Heberaiʼo, yaʼia daʼö ba mbaŵa woliwiö (aekhu ia ba mbaŵa si Tölu mazui baŵa si Öfa). Na no latatugöi, lahenaigö lafatunö tanggal daʼö ba mbanua niha Keriso ba zi sagörö ulidanö. *

Hizaʼi, hewisa enaʼö laʼila ira niha Heberaiʼo hawaʼara ahori zi sara waŵa ba tebörögö mbaŵa si bohou? Ba götöda andre, aoha khöda wangiʼila yaʼia börö me tola tafaigi daʼö ba kalender si no mucetak mazui ba aplikasi kalender si so ba perangkat elektronik niʼokhögöda. Hizaʼi, abua sibai wangiʼila daʼö me götö Zura Niʼamoniʼö.

Me götö Noakhi, 30 hari waʼara zi sara waŵa. (1 Mo. 7:11, 24; 8:3, 4) Hizaʼi ba gafuriata, itaria tenga 30 hari waʼara zi sara waŵa ba niha Heberaiʼo. Moloʼö kalender Heberaiʼo, tebörögö zi sara waŵa na no ibörögö oroma zui mbaŵa desaʼa. Alua daʼö mato 29 mazui 30 hari me no aefa ngaluo siföföna ba mbaŵa si no numalö.

Samuza inötö, imane Dawido hegöi Yonata me edöna tebörögö zi sara waŵa, ”Baŵa si bohou mahemolu.” (1 Sa. 20:5, 18) Börö daʼö, me götöra andrö, tola manö no tohöna muʼerai sakali waʼara zi sara waŵa. Hizaʼi ba gafuriata, hewisa wotatugöi ndra niha Yahudi hawaʼara tebörögö mbaŵa si bohou? Tola tasöndra wanuturu lala ba Misnah, yaʼia daʼö angorudua huku si lö tesura hegöi si toʼölö lafalua ira niha Yahudi. Itutunö ba daʼö wa me no aefa tetiboʼö ndraono Gizaraʼeli ba Mbabilona, ira Sangetuʼö Huku zotatugöi hawaʼara tebörögö mbaŵa si bohou. Sagötö mufalua gowasa ba zi fitu waŵa faʼara, owulo ira ba ngaluo si 30 ba mbaŵa andrö. Hadia dane-dane niʼogunaʼöra ba wotatugöi hawaʼara tebörögö mbaŵa si bohou?

So ösa ndra matua nifataro ba hili-hili si so ba zi sagörö Yeruzalema ba wamaigi-maigi talu mbanua ba zi bongi. Na no ibörögö oroma zui khöra mbaŵa desaʼa, laʼanemaiʼö lafatunö daʼö khö ndra Sangetuʼö Huku. Na no saʼae faduhu dödö ndra Sangetuʼö Huku börö me no ato zamatunö khöra, laʼombakhaʼö ba niha sato wa tebörögö mbaŵa si bohou mahemolunia. Hizaʼi, hewisa na lö oroma mbaŵa desaʼa börö me no  ibalugö ia sau mazui lawuo? Latatugöi wa faʼara mbaŵa si so yaʼira andrö yaʼia daʼö 30 hari, ba aefa daʼö tebörögö mbaŵa si bohou mahemolunia.

Itutunö Misnah Yahudi hewisa lala ndra Sangetuʼö Huku ba wangombakha angetulara andrö. Lafohola galitö ba zuzu Hili Zaitu sahatö ba Yeruzalema. Aefa daʼö, mufohola galitö ba nahia sagalawa si so ba Gizaraʼeli. Ba gafuriata, me löʼö saʼae lafalua zimane daʼö, lafatenge niha ba wamaʼema angombakhata andrö. Börö daʼö, tola aboto ba dödö niha Yahudi si so ba Yeruzalema hegöi ba nahia tanö böʼö hawaʼara tebörögö mbaŵa si bohou. Daʼö zanolo yaʼira ba wamalua owasa ba ginötö si fagölö.

Tola möi fanolomö tabel si no mufaʼanö ba daʼa enaʼö itugu aboto ba dödömö mbaŵa, owasa, hegöi inötö ba kalender Heberaiʼo.