ARTIKEL WAMAHAʼÖ 4
Hadia Mbörö Wa Taʼondrasi Wanörö Tödö Faʼamate Yesu?
”Böi miböhöli wamalua daʼa ba wanörö tödö yaʼo.”—LUK. 22:19.
SINUNÖ 20 Öbeʼe Nonomö Sebua Böli
NITUTUNÖ *
1-2. (a) Si toʼölönia, hawaʼara itörö tödöda niha niʼomasiʼöda si no mate? (b) Hadia nifalua Yesu ba mbongi fatua lö mate ia?
NA NO mate niha niʼomasiʼöda, tatu manö lö irai taʼolifugö ia hewaʼae na no ara mate ia. Asese göi itörö-törö tödöda sanandrösa khönia, mendrua manö ba ngaluo wanörö tödö faʼamatenia.
2 Ero röfi, yaʼita hegöi niha si zuta faʼato ba zi sagörö ulidanö, owulo ita ba ngaluo waʼamate zi samösa niha niʼomasiʼöda, yaʼia daʼö Yesu Keriso. (1 Fe. 1:8) Owulo ita ba wanörö tödö yaʼia börö me no ibeʼe nosonia ba wangöhöli yaʼita moroi ba horö hegöi faʼamate. (Mat. 20:28) Omasi Yesu na lafalua daʼö ira nifahaʼönia. Ba mbongi fatua lö mate ia, ifalua sambua gowasa si tohude ba imane, ”Böi miböhöli wamalua daʼa ba wanörö tödö yaʼo.”—Luk. 22:19.
3. Hadia nitutunöda ba artikel daʼa?
3 Moroi ba gotalua niha sangondrasi Fanörö Tödö faʼamate Keriso, so ösa zangokhögö fanötöna faʼauri ba zorugo. Hizaʼi, niha tanö böʼö si zuta faʼato, laʼokhögö wanötöna faʼauri ba gulidanö. Ba artikel daʼa, tatutunö dania hadia mbörö wa ladöna-döna ngaluo Wanörö Tödö faʼamate Yesus ero röfi. Tatutunö göi hadia mbuania na taʼondrasi Wanörö Tödö andrö. Iadaʼa, datafatunö hadia mbörö wa laʼondrasi Wanörö Tödö faʼamate Yesu ira niha sanötöna faʼauri ba zorugo.
HADIA MBÖRÖ WA LAʼONDRASI WANÖRÖ TÖDÖ IRA NIHA NIBAYOINI?
4. Hadia mbörö wa laʼa roti ba labadu nagu ba ngaluo Wanörö Tödö ira niha nibayoini?
4 Ero röfi, niha sanötöna faʼauri ba zorugo, mazui niha nibayoini, laʼa roti ba labadu nagu ba ngaluo Wanörö Tödö. Hadia mbörö? Nehegö atö hadia zalua ba mbongi safuria waʼauri Yesu ba gulidanö. Me no aefa ifalua Gowasa Fasa, ifalua göi gowasa si bohou. Ba gafuriata, lafotöi ia Bongi Watomesa Zoʼaya. Ibeʼe roti hegöi agu khö ndra sinengenia si 11 si lö faröi, ba iʼandrö khöra enaʼö laʼa ba labadu. Ifatunö göi khöra Yesu dombua mbuʼusa li, yaʼia daʼö buʼusa li si bohou hegöi buʼusa li ba Wamatörö. * (Luk. 22:19, 20, 28-30) Börö mbuʼusa li si dombua andre, ira sinenge ba so nasa niha tanö böʼö, tola tobali ira razo hegöi ere ba zorugo. (Fam. 5:10; 14:1) Niha si farahu ba mbuʼusa li daʼö ha niha nibayoini sauri ba gulidanö nasa. Börö daʼö, ha yaʼira zi tola fao ba wemanga roti hegöi ba wamadu agu ba ngaluo Wanörö Tödö.
5. Hadia zaboto ba dödö ndra niha nibayoini sanandrösa ba dötönaföra?
5 So mbörö tanö böʼö wa ladöna-döna ngaluo Wanörö Tödö ira niha nibayoini. Ba ngaluo daʼö, tola laʼangerönusi dötönaföra. No ibeʼe dötönafö sahöli-höli dödö Yehowa khö ndra niha nibayoini si 144.000 andre. Auri ira dania ba zorugo ba mboto si tebai mate ba si tebai tefakiko. Fao göi ira mamatörö khö Yesu Keriso si no tobali Razo awö ndra niha nibayoini tanö böʼö si no tesusugi. Ba sahöli-höli dödöda nasa, sindruhu-ndruhu faʼila bawa ira Lowalangi Yehowa! (1 Ko. 15:51-53; 1 Yo. 3:2) Aboto ba dödö ndra niha nibayoini wa no tefili ira ba wanema tötönafö andrö. Hizaʼi, enaʼö tola auri ira ba zorugo, moguna laforomaʼö wa lö faröi ira irugi gamozua. (2 Ti. 4:7, 8) Omasi sibai ndra niha nibayoini ba woʼangeragö tötönaföra andrö. (Tit. 2:13) Iadaʼa, datatutunö sanandrösa ba niha sanötöna faʼauri ba gulidanö, mazui ’biri-biri tanö böʼö’. (Yoh. 10:16) Hadia manö mbörö wa laʼondrasi Wanörö Tödö?
HADIA MBÖRÖ WA LAʼONDRASI WANÖRÖ TÖDÖ IRA BIRI-BIRI TANÖ BÖʼÖ?
6. Hadia mbörö wa möi mbiri-biri tanö böʼö ba wangondrasi Fanörö Tödö nifalua ero röfi?
6 Lö fao mbiri-biri tanö böʼö ba wemanga roti hegöi ba wamadu agu ba ngaluo Wanörö Tödö. Hizaʼi, möi ira laʼondrasi ba wamaigi hadia nifalua ba gowasa andrö. Ibörögö fao ira ba gowasa sahöli-höli dödö andre iʼotarai me döfi 1938. Imane The Watchtower 1 Mbaŵa si Tölu 1938, ”No sinangea na möi [mbiri-biri tanö böʼö] ba wangondrasi hegöi ba wamaigi nifalua ba gowasa andre. . . . Tola göi fao ira ba waʼomuso dödö ba ginötö daʼö.” Simane tome somuso tödö me möi ira ba walöwa, omuso göi dödö mbiri-biri tanö böʼö me laʼondrasi ba laʼila hadia nifalua ba ngaluo Wanörö Tödö.
7. Hadia mbörö wa omasi mbiri-biri tanö böʼö ba wamondrondrongo huhuo sebua nifaʼema ba ngaluo Wanörö Tödö?
7 Ba ngaluo Wanörö Tödö, laʼangerönusi göi dötönaföra ira biri-biri tanö böʼö. Omasi sibai ira lafondrondrongo huhuo sebua nifaʼema, börö me itutunö huhuo daʼö sanandrösa ba howu-howu nirasoira dania na mamatörö Yesu Keriso tobali Razo sagötö zi 1.000 fakhe. Ba ginötö daʼö, Keriso hegöi awönia si 144.000, lahaogö gulidanö andre tobali faradaiso ba latolo niha soloʼö enaʼö moʼahonoa ira. Ba ngaluo Wanörö Tödö, tofakha sibai ba dödö mbiri-biri tanö böʼö si zuta faʼato me laʼangeragö hewisa dania na alua zi no ifaʼeleʼö Sura Niʼamoniʼö, duma-dumania famaʼeleʼö nisura ba Yesaya 35:5, 6; 65:21-23; hegöi ba Wamaʼeleʼö 21:3, 4. Lakhalaigö hewisa dania ira hegöi niha niʼomasiʼöra na auri ira ba gulidanö si bohou. Daʼa zanolo yaʼira irege hulö zi so föna duduma höröra dötönafö andrö ba lahalö gangetula enaʼö anau gölöra ba wamosumange Yehowa.—Mat. 24:13; Gal. 6:9.
8. Hadia nasa mbörö wa laʼondrasi Wanörö Tödö ira biri-biri tanö böʼö?
8 Laʼondrasi Wanörö Tödö ira biri-biri tanö böʼö börö me omasi ira laforomaʼö wa laʼomasiʼö ba latuhini niha nibayoini. No ifaʼeleʼö Taromali Lowalangi wa falulu fohalöwö dania niha nibayoini khö ndra biri-biri tanö böʼö. Datatutunö hadia manö zi no ifaʼeleʼö andrö.
9. Moloʼö nifaʼeleʼö ba Zakharia 8:23, hewisa dödö mbiri-biri tanö böʼö khö ndra niha nibayoini?
9 Baso Zakharia 8:23. Ba wamaʼeleʼö daʼa, no ihaogö wanutunö hewisa dödö mbiri-biri tanö böʼö khö ndra talifusöra niha nibayoini. Ngawua wehede ”samösa niha Yahudi” hegöi ”khömi”, manandrösa ia ba niha nibayoini sauri ba gulidanö nasa. (Rom. 2:28, 29) ”Dafulu ndra matua moroi ba ngawalö soi hegöi li”, eluahania yaʼia daʼö biri-biri tanö böʼö. ”Lagogohe” mbaru sebua khö ndra niha nibayoini. Daʼa zangoromaʼö wa lö faröi mbiri-biri tanö böʼö khö ndra niha nibayoini, ba omasi ira fao ba wamalua famosumange satulö. Daʼö mbörö wa fao mbiri-biri tanö böʼö khö ndra niha nibayoini ba wangondrasi Fanörö Tödö.
10. Hadia nifalua Yehowa moloʼö nifaʼeleʼö ba Hezekieli 37:15-19, 24, 25?
10 Baso Hezekieli 37:15-19, 24, 25. So dua rozi ziʼo nitötöi ba wamaʼeleʼö daʼa. Siʼo si oföna yaʼia daʼö ”siʼo Yehuda”. Me mböröta, tefili razo ndraono Gizaraʼeli moroi ba mado Yehuda. Na simanö, siʼo Yehuda eluahania niha si tobali razo ba zorugo. Siʼo si dua yaʼia daʼö ”siʼo Geferai”, ba siʼo daʼö eluahania niha sanötöna faʼauri ba gulidanö. * Mututunö ba wamaʼeleʼö daʼa wa hasambalö iʼosambuaʼö zi dombua ngawawa andrö Yehowa enaʼö ’hatö sara siʼo’. Eluahania, falulu fohalöwö ira ba wamosumange Lowalangi barö wamatörö zi samösa Razo, yaʼia daʼö Yesu Keriso. Ero röfi, fao ndra niha nibayoini hegöi biri-biri tanö böʼö ba wangondrasi Fanörö Tödö. Yaʼira tenga saʼae si dombua ngawawa si no mufasambua, hizaʼi no tobali ira si ”sambawa nikubaloi” ba ’ha samösa gubalora’.—Yoh. 10:16.
11. Hadia nifalua ”mbiri-biri” nitötöi ba Mataiʼo 25:31-36, 40 ba wotuhini ira talifusö Keriso?
11 Baso Mataiʼo 25:31-36, 40. Ba ayati daʼa, ’biri-biri’ yaʼia daʼö niha satulö tödö ba ngaluo safuria, sangokhögö fanötöna faʼauri si lö aetu ba gulidanö. Lö faröi ira ba wotuhini ira talifusö Keriso sauri nasa ba gulidanö. Hadia nifaluara? Sabölö oföna nifaluara, latolo ndra niha nibayoini ba wamalua halöwö fondrege zebua, yaʼia daʼö ba wanuriaigö hegöi ba wombaliʼö nifahaʼö fefu niha ba zi sagörö ulidanö.—Mat. 24:14; 28:19, 20.
12-13. Hadia nasa nifalua mbiri-biri tanö böʼö ba wotuhini ira talifusö Keriso?
12 Ero röfi, mato hauga migu fatua lö mufalua Wanörö Tödö, latuhini ndra talifusö Keriso ira biri-biri tanö böʼö ba zi sagörö ulidanö ba wogaoni niha enaʼö laʼondrasi Wanörö Tödö. (Faigi kotak ” Hadia No Öfaʼanö Ndraʼugö ba Wangondrasi Fanörö Tödö ba Ndröfi Daʼa?”) No göi latatugöi enaʼö mufalua Wanörö Tödö ba mbanua niha Keriso ba zi sagörö ulidanö, hewaʼae na lö hadöi niha nibayoini ba zi hawaʼoya mbanua niha Keriso. Omuso sibai dödö mbiri-biri tanö böʼö ba wamalua daʼö börö me latuhini ndra talifusö Keriso. Aboto ba dödöra, na lafalua daʼö, sindruhunia no latolo Yesu simane si no irai iwaʼö.—Mat. 25:37-40.
13 So mbörö tanö böʼö nasa samarou yaʼita ba wangondrasi Fanörö Tödö, gofu hadia ia wanötönada ba zi so miföna. Datatutunö.
HADIA MBÖRÖ WA TAʼONDRASI WANÖRÖ TÖDÖ?
14. Hewisa Yehowa hegöi Yesu ba wangoromaʼöra khöda faʼomasi sahöli-höli dödö?
14 Taʼandrö sibai saohagölö ba waʼomasi Yehowa hegöi Yesu si no laforomaʼö khöda. Oya lala si no ifalua Yehowa ba wangoromaʼö faʼomasinia khöda. Hizaʼi, sabölö tohude yaʼia daʼö me itehegö tefakao Nononia ba mate salahida. (Yoh. 3:16) No göi iforomaʼö waʼomasinia khöda Yesu me itehegö nosonia salahida. (Yoh. 15:13) Tebai tasulöni waʼomasi Yehowa hegöi Yesu. Hizaʼi, tola taforomaʼö wangandröda saohagölö ba lala waʼaurida sero maʼökhö. (Kol. 3:15) Baero daʼö, möi ita taʼondrasi Wanörö Tödö enaʼö lö olifu ita waʼomasira ba taforomaʼö wa taʼomasiʼö göi ira.
15. Hadia mbörö wa laʼandrö sibai saohagölö höli andrö ira niha nibayoini hegöi biri-biri tanö böʼö?
15 Taʼandrö sibai saohagölö ba höli. (Mat. 20:28) Ba wamaigi ndra niha nibayoini, höli andrö no buala sebua böli. Börö me so höli, tola laʼokhögö wanötöna sahöli-höli dödö. Mamati ira ba höli nibeʼe Keriso irege tola atulö ira föna Yehowa ba tobali ira iraononia. (Rom. 5:1; 8:15-17, 23) Mangandrö saohagölö göi mbiri-biri tanö böʼö ba höli andrö. Börö me mamati ira ba höli nibeʼe Keriso, tola laʼokhögö wahuwusa si sökhi khö Lowalangi, lahalö halöwö niʼamoniʼö khönia, ba teʼorifi ira ”moroi ba wamakao sabölö-bölö”. (Fam. 7:13-15) Sambua lala nifalua ndra niha nibayoini hegöi biri-biri tanö böʼö ba wangoromaʼö fangandrö saohagölö, yaʼia daʼö na laʼondrasi Wanörö Tödö nifalua ero röfi.
16. Hadia nasa mbörö wa taʼondrasi Wanörö Tödö?
16 Möi ita taʼondrasi Wanörö Tödö börö me omasi ita taʼoʼö niwaʼö Yesu. Gofu hadia ia wanötönada ba zi so miföna, moguna taʼoʼö hadia niwaʼö Yesu me ifalua Wanörö Tödö siföföna sibai, yaʼia daʼö: ”Böi miböhöli wamalua daʼa ba wanörö tödö yaʼo.”—1 Ko. 11:23, 24.
HADIA MBUANIA KHÖDA NA TAʼONDRASI WANÖRÖ TÖDÖ?
17. Hadia mbörö wa tola itugu ahatö ita khö Yehowa na taʼondrasi Wanörö Tödö?
17 Itugu ahatö ita khö Yehowa. (Yak. 4:8) No tatutunö wa ba mbongi Wanörö Tödö, tola taʼangerönusi dötönafö nibeʼe Yehowa khöda hegöi faʼomasinia fondrege zebua. (Yer. 29:11; 1 Yo. 4:8-10) Na taʼangerönusi daʼö, monönö waʼomasida khö Yehowa ba itugu aro wahuwusada khönia.—Rom. 8:38, 39.
18. Hadia mbuania na taʼangerönusi höli nibeʼe Yesu?
18 Itugu terou dödöda ba woloʼö duma-duma nibeʼe Yesu. (1 Fe. 2:21) Mato hauga hari fatua lö tafalua Wanörö Tödö, tabaso ayati sanandrösa ba migu safuria waʼauri Yesu ba gulidanö, faʼamatenia, ba femaosonia. Aefa daʼö, ba mbongi Wanörö Tödö, tafondrondrongo huhuo sebua samasugi ba dödöda wa iʼomasiʼö sibai ita Yesu. (Ef. 5:2; 1 Yo. 3:16) Ba ginötö tabaso ba taʼangerönusi höli nibeʼe Yesu, itugu terou dödöda ba ’woloʼö amuatania’.—1 Yo. 2:6.
19. Hewisa enaʼö lö tebulö so ita ba lumö waʼomasi Lowalangi?
19 Itugu aro gangetulada enaʼö lö tebulö so ita ba lumö waʼomasi Lowalangi. (Yud. 20, 21) Lö tebulö so ita ba lumö waʼomasi Lowalangi na taforege ba woloʼö yaʼia, ba wangamoniʼö töinia, hegöi ba wangomusoiʼö tödönia. (Amd. 27:11; Mat. 6:9; 1 Yo. 5:3) Ero maʼökhö, moguna taforomaʼö khö Yehowa wa no tahalö gangetula enaʼö lö tebulö so ita ba lumö waʼomasinia sagötö faʼara. Tola itugu teʼaroʼö gangetulada andrö na taʼondrasi Wanörö Tödö.
20. Hadia manö mbörö wa taʼondrasi Wanörö Tödö?
20 Gofu hezo so dania tasöndra waʼauri, he ba zorugo mazui ba gulidanö, so mbörö wa lö tola löʼö möi ita ba Wanörö Tödö. Owulo ita ero röfi ba wanörö tödö faʼamate zi samösa niha niʼomasiʼöda, yaʼia daʼö Yesu Keriso. Sabölö tohude, omasi ita taʼangerönusi waʼomasi sahöli-höli dödö niforomaʼö Yehowa, yaʼia me itehegö Nononia tobali höli. Ba ndröfi daʼa, mufalua Wanörö Tödö ba ngaluo Zumaha, 15 Mbaŵa si Öfa 2022. Taʼomasiʼö sibai Yehowa hegöi Ononia. Börö daʼö, ba ngaluo waʼamate Yesu, lö sabölö moguna baero wangondrasi Fanörö Tödö.
SINUNÖ 16 Suno Yehowa hegöi Ononia Nibayoini
^ Gofu hezo so dania tasöndra waʼauri, he ba zorugo mazui ba gulidanö faradaiso, fefu ita tadöna-döna Wanörö Tödö nifalua ero röfi. Hadia mbörö wa taʼondrasi Wanörö Tödö? Ba artikel daʼa, tatutunö dania wanema linia moroi ba Zura Niʼamoniʼö. Tafatunö göi hadia manö mbuania na möi ita taʼondrasi Wanörö Tödö faʼamate Yesu.
^ Enaʼö öʼila danö böʼönia nasa sanandrösa ba mbuʼusa li si bohou hegöi ba mbuʼusa li ba Wamatörö, faigi artikel ”Kamu Akan Menjadi ’Kerajaan Imamʼ” ba Menara Pengawal 15 Mbaŵa si Fulu 2014, ngaʼörö 15-17.
^ Enaʼö öʼila danö böʼönia nasa sanandrösa ba ziʼo si dua rozi moroi ba wamaʼeleʼö nisura ba Hezekieli faza 37, faigi mbuku Tebohouni Wamosumange Satulö khö Yehowa!, ngaʼörö 129-134, ngenoli si 3-17.
