1. Hewisa enaʼö tola tabeʼe ginötöda khö Yehowa?

 TATU omasi ita taʼogunaʼö ginötöda ba wefao khö ndra niha niʼomasiʼöda. Omuso dödö zi sambua fongambatö na laʼogunaʼö ginötöra ba wefao ha ba zi darua ira. Omuso göi dödö ndra si bohou ebua ba wefao khö ndra awö-awöra. Ba tatu omuso dödöda fefu ba wefao khö ndra talifusöda ba gangowuloa. Sabölö tohudenia, omasi ita wameʼe inötöda khö Lowalangida Yehowa. Tola tafalua daʼö na mangandrö ita khönia, tabaso Daromalinia, ba taʼangerönusi gohitö dödö hegöi amuatania sahöli-höli dödöda. No sebua böli ginötö nibeʼeda andrö khö Yehowa!—Si. 139:17.

2. Hana wa itaria abua khöda ba wamalua halöwö ba wamati?

² Tatu omasi ita tabeʼe ginötöda khö Yehowa. Hizaʼi, itaria abua wamalua daʼö. Börö halöwöda sero maʼökhö, tola manö abua khöda ba wameʼe inötöda ba wamalua halöwö ba wamati. Börö me so halöwöda, tarorogö nösi nomoda, mazui tafalua noro dödö tanö böʼö, tola manö tarasoi wa lö inötöda ba wamalua fangandrö, famahaʼö ba Zura Niʼamoniʼö, mazui foʼangerönusi.

3. Hadia nasa danö böʼönia si tola mangohorigö inötöda?

³ So nasa danö böʼö si tola mangohorigö inötöda. Na lö mangelama  ita, tola manö arörö ita ba wamalua ngawalö halöwö si lö fasala hizaʼi sangohorigö inötö. Duma-dumania, rekreasi mazui hiburan. Sindruhu sa, lö fasala na tafalua daʼö fasasakali. Hizaʼi, hewaʼae so mbuania na tafalua rekreasi mazui hiburan, tola manö ahori ginötöda irege tebai tafalua halöwö ba wamati. Börö daʼö, moguna tatatugöi hawaʼoya ginötöda ba wamalua rekreasi mazui hiburan.—Amd. 25:27; 1 Ti. 4:8.

4. Hadia nitutunöda ba artikel daʼa?

⁴ Ba artikel daʼa, tatutunö hana wa moguna tahalö gangetula si fao faʼatua-tua. Tatutunö göi hewisa enaʼö tola tahaogö wangogunaʼö inötöda khö Yehowa ba hadia mbua nitemada.

5. Hewisa wa tola tobali fanolo ndra si bohou ebua mene-mene nisura ba Efeso 5:15-17 ba wamili lala waʼauri si sökhi?

⁵ Fili lala waʼauri si sökhi. Yaʼami si bohou ebua, tatu omasi ami ba wamili lala waʼauri si sökhi. Hizaʼi, omasi sibai ndra gurumi mazui ösi nomomi si tenga si sara lala wamati na migohi zekola salawa enaʼö misöndra halöwö sebua gazi. Sekola salawa andrö tola tobali fangohorigö inötömi. Börö daʼö, omasi ndra satuami hegöi ira si fahuwu khömi ba mbanua niha Keriso na miʼosambuaʼö dödömi ba wamosumange Yehowa. Börö me miʼomasiʼö Yehowa, hewisa enaʼö tola mihalö gangetula si tefaudu? Tandraigö baso Efeso 5:15-17 ba angerönusi ayati andrö. (Baso.) Tola miʼangeragö wanofu-nofu andre: ’Hadia ”zomasi Yehowa” ufalua? Hezo lala waʼauri sangomusoiʼö tödönia? Hadia gangetula nihalögu enaʼö tola uhaogö wangogunaʼö inötö?’ Törö tödöu wa no ”so ita ba ngaluo si lö sökhi” ba lö ara tö tehori gulidanö nifatörö Zatana andre. No angetula si sökhi na taʼogunaʼö waʼaurida ba wangomusoiʼö tödö Yehowa.

6. Hadia nifili Maria, ba hana wa tefaudu nifilinia andrö?

⁶ Fili zabölö moguna. Enaʼö tola tahaogö wangogunaʼö inötö, itaria moguna tafili hezo zabölö taʼofönaiʼö moroi ba zi dombua ngawalö halöwö, hewaʼae na faoma moguna. Tatu omuso sibai dödö Marata me möi Yesu ba nomora. Si fao faʼoböwö, iʼoyaʼö wondrino gö khö Yesu. Hizaʼi, faehu ira nakhinia Maria, abölö ifili wedadao ba zinga Yesu ba ifondrondrongo wamahaʼönia. Sindruhu sa, lö fasala nifalua Marata ba atulö gohitö dödönia. Hizaʼi, iwaʼö Yesu wa ”no ifili khönia zi sökhi” Maria. (Luk. 10:38-42) Ba gafuriata, te olifu Maria hadia gö niʼara me luo daʼö. Hizaʼi, lö olifu ia wamahaʼö nibeʼe Yesu. Lö iʼalimagösi Maria ginötö ba wamahaʼö yaʼia khö Yesu. Simanö göi ita, moguna tahaogö wangogunaʼö inötöda ba wangaʼaroʼö fahuwusada khö Yehowa. Hewisa lalania?

7. Hana wa moguna sibai wangandrö, famahaʼö ba Zura Niʼamoniʼö, hegöi foʼangerönusi?

⁷ Böi olifu ita wa fangandrö, famahaʼö ba Zura Niʼamoniʼö, hegöi foʼangerönusi no faosatö ba wamosumangeda Lowalangi. Ba ginötö mangandrö ita, sindruhunia fahuhuo ita khö Namada si so ba zorugo, sangomasiʼö yaʼita. (Si. 5:7) Na tafahaʼö ita ba Zura Niʼamoniʼö, tola tasöndra ”waʼaboto ba dödö sanandrösa khö Lowalangi”, Umbu waʼatua-tua. (Amd. 2:1-5) Ba ginötö tafalua woʼangerönusi, taʼangeragö mbua-bua Yehowa sahöli-höli dödö hegöi ngawalö zi sökhi nifaluania khöda awö niwöwöinia tanö böʼö ba zi so miföna. Sindruhu-ndruhu wa moguna sibai wangandrö, famahaʼö ba Zura Niʼamoniʼö, hegöi foʼangerönusi. Daʼö lala si  sökhi ba wangogunaʼö inötö. Hizaʼi, lö oya ginötöda ba wamalua daʼö. Na simanö, hadia zinangea tafalua enaʼö tola tahaogö wangogunaʼö inötö si so?

8. Hadia wamahaʼö nihalöda moroi ba duma-duma Yesu?

⁸ Na tola, alui nahia si lö niha-niha. Nehegö duma-duma Yesu. Fatua lö mangai halöwö ia me so ia ba gulidanö, möi ia ba danö si mate sagötö zi 40 hari. (Luk. 4:1, 2) Ba nahia si lö niha-niha andrö, mangandrö Yesu khö Namania Yehowa ba iʼangerönusi hewisa wamaluania somasi Namania andrö. Buania, no tefaʼanö Yesu ba wanaögö fanandraigö si lö ara tö alua khönia. Hewisa woloʼöu duma-duma Yesu? Na ato niha si toröi ba nomomö, tatu abua khöu wanöndra nahia si lö niha-niha. Na simanö, tola möiʼö baero ba öʼalui nahia si lö niha-niha. Daʼö nifalua Julie na mangandrö ia khö Yehowa. Toröi ia hegöi foʼomonia ba apartemen side-ide si so ba Prancis, ba abua khönia wangalui nahia si lö niha-niha enaʼö tola mangandrö ia. Imane Julie, ”Börö daʼö, möido ba taman ero maʼökhö. Ba daʼö, tola mangandrö ndraʼo si fao faʼahono dödö ba lö taha-tahagu wahuhuosa khö Yehowa.”

9. Hewisa wangoromaʼö Yesu wa ebua sibai mböli wahuwusania khö Yehowa?

⁹ Oya sibai halöwö Yesu. Sagötö mangai halöwö ia ba gulidanö, asese laʼoʼö ia niha sato ba omasi ira na ibeʼe ginötönia khöra. Samuza inötö, ”owulo fefu niha si so ba mbanua andrö föna mbawandruhö” enaʼö tola falukha ira khönia. Hewaʼae simanö, lö tebulö ibeʼe ginötönia ba wangaʼaroʼö fahuwusania khö Yehowa. Sihulö wongi sibai fatua lö tumbu luo, möi ia ba ”nahia si lö niha-niha” enaʼö tola fahuhuo ia khö Namania.—Mrk. 1:32-35.

10-11. Ba Mataiʼo 26:40, 41, hadia mene-mene nibeʼe Yesu ba Kabu Gezemane, hizaʼi hadia zalua?

¹⁰ Irugi waʼamatenia, lö tebulö ibeʼe ginötönia Yesu fahuhuo khö Namania. Ba mbongi safuria fatua lö mate ia, iʼalui nahia si lö niha-niha enaʼö tola mangandrö ia ba ifalua woʼangerönusi. Börö daʼö, möi Yesu ba Kabu Gezemane. (Mat. 26:36) Ba daʼö, ibeʼe mene-mene khö ndra nifahaʼönia sanandrösa ba wangandrö.

¹¹ Tola manö aefa talu mbongi me ofeta Yesu hegöi ira nifahaʼönia ba Kabu Gezemane. Iʼandrö khöra Yesu enaʼö ’böi mörö’ ira. Aefa daʼö, iröi ira ba ilau mangandrö. (Mat. 26:37-39) Hizaʼi, ba ginötö möi mangandrö Yesu, no lalau mörö. Me iʼila Yesu wa no mörö ira, ifuli iwaʼö khöra, ”Böi miförö ba böi miböhöli wangandrö.” (Baso Mataiʼo 26:40, 41.) Aboto ba dödö Yesu wa erege sibai dödöra. Iʼila göi wa hewaʼae na mohiʼa dödöra,  hizaʼi ’ambö faʼabölöra’. Ifuli zui mangandrö ia dua kali tö. Hizaʼi ero mangawuli ia, no lalau mörö, tenga sangandrö.—Mat. 26:42-45.

12. Na lö öʼila mangandrö börö me no fawuka gera-erau mazui no erege dödöu, hadia zinangea öfalua?

¹² Fili ginötö si tefaudu. Itaria, na fawuka gera-erada mazui no erege dödöda, tola manö lö taʼila mangandrö. Hadia simane daʼö nirasoimö? Ato ndra talifusöda sorasoi simane daʼö. Hadia zinangea öfalua? So ösa zotatugöi enaʼö ahulö mangandrö ira ba zi bongi fatua lö marase ira. So göi ösa zamorege enaʼö lahaogö sibai wetarora na mangandrö irege tola laʼosambuaʼö dödöra. Hizaʼi, hewisa na lö öʼila mangandrö börö me lö khöu faʼahono dödö mazui so khöu waʼide-ide dödö? Faehagö nösi dödöu khö Yehowa. Yafaduhu dödöu wa aboto ba dödö Namada sebua faʼomasi hadia nirasoimö.—Si. 139:4.

13. Hewisa wa tola möi fanaisida perangkat elektronik ba wameʼe inötöda khö Yehowa?

¹³ Forege enaʼö lö mangoloi dödöu ba ginötö öfahaʼö ndraʼugö. Baero wangandrö, so nasa zinangea tafalua enaʼö teʼaroʼö wahuwusada khö Yehowa, yaʼia daʼö tafahaʼö ita ba Zura Niʼamoniʼö ba möi ita ba gangowuloa. Hadia zinangea öfalua enaʼö sindruhu-ndruhu so mbuania khöu na öfahaʼö ndraʼugö hegöi na möiʼö ba gangowuloa? Sofu khöu samösa, ’Hadia zi toʼölönia si möi famangoloi dödögu? Hadia itaria mangoloi dödögu börö telefo, e-mail, hegöi SMS ba HP mazui perangkat elektronik tanö böʼönia?’ Sindruhu sa, moguna sibai perangkat andrö ba so miliaran niha sangokhögö yaʼia. Hizaʼi, so ösa ndra samareso sangumaʼö wa tola manö tobali famangoloi dödöda HP-da na so ba zingada, hewaʼae na lö taʼogunaʼö. Imane samösa profesor psikologi, ”Lö öʼila öʼosambuaʼö dödöu ba halöwö nifaluau . . . Tenga saʼae ba daʼö so gera-eramö.” Ba wamobörö gangowuloa ba zi sambua wilayah hegöi regional khöda, mufasugi ba dödöda enaʼö lö tobali fanaisi niha böʼö perangkat elektronik niʼokhögöda. Hadia tola göi ötatugöi enaʼö lö tobali fanaisi khöu perangkat elektronik ba wameʼe inötöu khö Yehowa?

14. Moloʼö Filifi 4:6, 7, hewisa Yehowa ba wanolo yaʼita enaʼö tola taʼosambuaʼö dödöda?

¹⁴ Andrö wanolo khö Yehowa enaʼö tola öʼosambuaʼö dödöu. Na ibörögö öʼera-era danö  böʼö ba ginötö öfahaʼö ndraʼugö mazui na so ndraʼugö ba gangowuloa, andrö khö Yehowa enaʼö öböhöli woʼangeragö daʼö. Na so zaombö dödöu, tola manö lö öʼila öʼosambuaʼö gera-eramö ba wamalua halöwö ba wamati. Hizaʼi, böi böhöli wamalua daʼö. Andrö waʼohahau dödö moroi khö Lowalangi enaʼö irorogö dödömö awö gera-eramö.—Baso Wilifi 4:6, 7.

15. Hadia mbuania na tabeʼe ginötöda khö Yehowa?

¹⁵ Oya mbua nitemamö na öbeʼe ginötöu fahuhuo khö Yehowa, öfondrondrongo ia, ba öʼangeragö sanandrösa khönia. Hadia manö mbuania? Si oföna, tola öhalö gangetula si sökhi. Ifaduhuʼö khöda Sura Niʼamoniʼö wa ”niha si fao ba zatua-tua, ba atua-tua ia göi dania”. (Amd. 13:20) Yehowa andrö no fondrege zatua-tua. Börö daʼö, na asese öbeʼe ginötöu khönia, itugu atua-tua göi ndraʼugö. Tola göi öʼomusoiʼö dödönia ba lö öfalua zi möi fangafökhö dödönia.

16. Hana wa tobali ita samahaʼö si sökhi na tabeʼe ginötöda khö Yehowa?

¹⁶ Si dua, tola tobali ndraʼugö samahaʼö si sökhi. Ba ginötö tatolo zi samösa niha ba wamahaʼö yaʼia ba Zura Niʼamoniʼö, ohitö dödöda siföföna yaʼia daʼö ba wanolo yaʼia tobali si fahuwu khö Yehowa. Na asese mangandrö ita ba tafahaʼö ita sanandrösa khö Namada sebua faʼomasi si so ba zorugo, itugu taʼomasiʼö ia. Buania, itugu tofakha ba dödö niha lala wamahaʼö nifaluada, ba terou göi dödö niha nifahaʼöda ba Zura Niʼamoniʼö ba wangomasiʼö Yehowa. Daʼö mbörö wa tola tobali samahaʼö si sökhi Yesu. Ba ginötö fahuhuo ia sanandrösa khö Namania, iʼogunaʼö wehede si sökhi ba safönu faʼomasi irege tefarou dödö ndra nifahaʼönia ba wangomasiʼö Yehowa.—Yoh. 17:25, 26.

17. Hadia mbörö wa itugu aro wamatida na talau mangandrö ba tafahaʼö ita?

¹⁷ Si tölu, itugu aro wamatimö. Hadia no irai mangandrö ndraʼugö khö Yehowa enaʼö ibeʼe khöu wanuturu lala, fondrara dödö, mazui fanolo? Ero ifondrondrongo wangandrömö Yehowa, itugu aro wamatimö khönia. (1 Yo. 5:15) Hadia nasa zi tola möi fangaʼaroʼö wamatimö? Famahaʼö samösa. Simane niwaʼö Zura Niʼamoniʼö, ’tola mamati ita börö me no tarongo duria andrö’. (Rom. 10:17) Hizaʼi, baero wamahaʼö samösa, so nasa zinangea tafalua.

18. Hadia wamahaʼö nihalöda moroi ba zi no irai alua khö zanura Sinunö 77?

¹⁸ Moguna tahaogö taʼangerönusi hadia zi no tafahaʼö yaʼita. Nehegö atö hadia zi no irai alua khö zanura Sinunö 77. Imane tödönia  wa lö saʼae omuso dödö Yehowa khönia hegöi ba ndraono Gizaraʼeli tanö böʼö. Lua-luania, abu sibai dödönia irege lö iʼila mörö. (Ayati 2-8) Sindruhu sa, aboto ba dödönia hadia manö zi no irai ifalua Yehowa ba nono mbanuania. Hewaʼae simanö, manofu-nofu ia, ”Hadia olifu Lowalangi wangoromaʼö faʼahakhö dödö khöma, mazui no taya waʼahakhö dödönia börö wönunia andrö?” (Ayati 9) Börö daʼö, hadia nifaluania? Imane khö Yehowa, ”Uʼangerönusi fefu halöwömö ba uʼangeragö ngawalö nifaluamö.” (Ayati 12) Iʼangerönusi göi hewisa me iforomaʼö waʼahakhö dödönia Yehowa ba nono mbanuania ba götö silalö. (Ayati 11) Me no iʼangerönusi daʼö, itugu faduhu dödönia wa lö irai faröi Yehowa ba nono mbanuania. (Ayati 15) Simanö göi, itugu aro wamatimö na öʼangerönusi hadia nifalua Yehowa ba nono mbanuania hegöi khöu samösa.

19. Hadia nasa mbua nitemada na tabeʼe ginötöda khö Yehowa?

¹⁹ Si öfa, sabölö moguna, itugu tedou waʼomasimö khö Yehowa. Faʼomasimö andrö zamarou yaʼugö ba woloʼö niwaʼö Yehowa, ötehegö gofu hadia ia ba wangomusoiʼö tödönia, ba anau gölöu ba wanaögö fanandraigö. (Mat. 22:37-39; 1 Ko. 13:4, 7; 1 Yo. 5:3) Na itugu tedou waʼomasida khö Yehowa, tola tarasoi wahuwusa saro khönia. Lö hadöi sabölö ebua böli moroi ba daʼö!—Si. 63:1-8.

20. Hadia nifaluamö enaʼö tola öbeʼe ginötömö khö Yehowa?

²⁰ Törö tödöu wa fangandrö, famahaʼö ba Zura Niʼamoniʼö, hegöi foʼangerönusi no faosatö moroi ba wamosumangeda Lowalangi. Simane Yesu, beʼe ginötöu khö Yehowa ba alui nahia si lö niha-niha ba wamalua daʼö. Böi tehegö so zamangoloi tödömö. Andrö wanolo khö Yehowa enaʼö lö tebulö öʼosambuaʼö dödömö ba wamalua halöwö ba wamati. Na öhaogö wangogunaʼö inötöu iadaʼa, hasambalö ibeʼe khöu Yehowa hadia zi no ifabuʼu, yaʼia daʼö faʼauri si lö aetu ba gulidanö si bohou.—Mrk. 4:24.