1-3. Hadia manö mbörö wa tola meʼe ita?

 HAMEGA zafuria ölau meʼe? Itaria, meʼe ita börö waʼomuso dödöda. Hizaʼi sasesenia, mowöi nidanö höröda börö waʼabu dödöda, duma-dumania na mate niha niʼomasiʼöda. Imane talifusöda ira alawe moroi ba Amerika Serikat sotöi Lorilei, ”Iʼotarai me mate nonogu ono alawe, itaria ihawui ndraʼo faʼabu dödö irege urasoi wa lö hadöi sameʼe khögu fondrara dödö. Abu sibai dödögu ba lö uʼila hadia zinangea ufalua.” *

² So mbörö tanö böʼö wa tola meʼe ita. Imane samösa perintis moroi ba Jepang sotöi Hiromi, ”Itaria ide-ide dödögu börö me lö hadöi niha sanemaʼö turia nifaʼemagu. No hauga kali uʼandrö khö Yehowa si fao feʼe enaʼö itolo ndraʼo ba wanöndra niha somasi manemaʼö sindruhu.”

³ Hadia no irai örasoi zimane salua khö ndra talifusöda ira alawe si darua andrö? Ato ba gotaluada zi no irai morasoi simane daʼö. (1 Fe. 5:9) Sindruhu sa, omasi ita ’tafosumange Yehowa si fao faʼomuso dödö’. Hizaʼi, itaria tebai tataha nidanö höröda na mate niha niʼomasiʼöda, na so khöda waʼide-ide dödö, mazui na tataögö gabula dödö sebua si tola manandraigö  faʼalöfaröida khö Lowalangi. (Si. 6:6; 100:2) Na alua khöu zimane daʼö, hadia zinangea öfalua?

4. Hadia nitutunöda ba artikel daʼa?

⁴ Tola tafahaʼö ita moroi ba duma-duma niforomaʼö Yesu. No irai göi irasoi gabula dödö simane daʼö irege ”ilau meʼe”. (Yoh. 11:35; Luk. 19:41; 22:44; Heb. 5:7) Datafatunö hadia manö mbörö wa ilau meʼe Yesu ba hadia wamahaʼönia khöda. Tafatunö göi hadia manö zi tola tafalua na göna ita abula dödö irege mowöi nidanö höröda.

5. Hadia wamahaʼö nihalöda sanandrösa khö Yesu moroi ba waö-waö nisura ba Yohane 11:32-36?

⁵ Me baŵa waʼokafu me 32 M, mofökhö zi fahuwu khö Yesu sotöi Lazaro irege mate ia. (Yoh. 11:3, 14) So darua dalifusö Lazaro ira alawe, yaʼia daʼö Maria hegöi Marata, ba iʼomasiʼö sibai ira Yesu. Afatö sibai dödö Maria hegöi Marata me mate Lazaro. Me no aefa mate Lazaro, möi Yesu ba Mbetani, banua si toröi Maria hegöi Marata. Me irongo Marata wa no tohare Yesu, ilau fagohi ba wamalukhaisi yaʼia. Khalaigö hawaʼabu dödö Marata me iwaʼö, ”He Soʼaya, na so menaʼö ndraʼugö ba daʼa, ba lö mate dalifusögu.” (Yoh. 11:21) Me iʼila meʼe Maria hegöi niha sato, ”ilau meʼe” Yesu.—Baso Yohane 11:32-36.

6. Hadia mbörö wa ilau meʼe Yesu me mate Lazaro?

⁶ Hadia mbörö wa ilau meʼe Yesu me luo daʼö? Imane buku Pemahaman Alkitab, ”Faʼamate zi fahuwu khönia sotöi Lazaro ba faʼabu dödö nirasoi ndra talifusönia, daʼö mbörö wa ’abu dödö Yesu ba ilau meʼe’.” * Tola manö iʼangeragö Yesu hewisa waʼamarase Lazaro me so ia ba wökhö ba hewisa göi dödö zi fahuwu khönia andrö me iʼila wa lö ara tö mate ia. Baero daʼö, irasoi göi Yesu waʼabu dödö salua khö Marata hegöi Maria. Na no mate zi fahuwu khöu mazui ösi nomou niʼomasiʼöu, tatu örasoi göi waʼabu dödö simane nirasoira andrö. Iadaʼa, datafatunö tölu ngawalö zi tola tahalö famahaʼö ba zalua andre.

7. Moroi ba nirasoi Yesu na mate zi samösa niha, hadia zi tola tahalö khöda famahaʼö sanandrösa khö Yehowa?

 ⁷ Aboto ba dödö Yehowa zalua khöu. Yesu andrö ’famaedo Lowalangi’. (Heb. 1:3) Börö daʼö, na abu dödö Yesu na mate zi samösa niha, tatu simane daʼö göi nirasoi Namania. (Yoh. 14:9) Na mate niha niʼomasiʼöu, yafaduhu dödöu wa aboto ba dödö Yehowa zalua khöu. Abu göi dödönia na iʼila wa örasoi waʼabu dödö, ba omasi ia ifadöhö dödöu si no arasa.—Si. 34:18; 147:3.

8. Hana wa faduhu dödöda wa hasambalö isusugi niha niʼomasiʼöda Yesu?

⁸ Omasi Yesu ba wanusugi niha niʼomasiʼöu. Me fahuhuo Yesu khö Marata, ifaduhuʼö khönia, ”Hasambalö ifuli auri dalifusömö.” Faduhu dödö Marata ba niwaʼönia andrö. (Yoh. 11:23-27) Börö me mamati Marata khö Yehowa, faduhu dödönia wa no irai isusugi niha si no mate samaʼeleʼö sotöi Elia hegöi Elisa me mböröta. (1 Ra. 17:17-24; 2 Ra. 4:32-37) Te aboto göi ba dödö Marata wa no hauga kali isusugi niha si no mate Yesu. (Luk. 7:11-15; 8:41, 42, 49-56) Simane Marata, yafaduhu göi dödöu wa hasambalö ifuli falukha ndraʼugö ba niha niʼomasiʼömö si no mate. Tawa hörö hegöi fehede fondrara dödö nibeʼenia khö Maria hegöi Marata, daʼö zangoromaʼö wa omasi sibai ia isusugi niha si no mate!

9. Simane Yesu, hewisa wameʼemö fondrara dödö hegöi fanolo ba niha sabu tödö? Beʼe duma-duma.

⁹ Tola öbeʼe wondrara dödö hegöi fanolo ba niha sabu tödö. Tenga ha ilau meʼe Yesu, hizaʼi ifondrondrongo ba ibeʼe wondrara dödö khö Marata hegöi Maria. Tola göi tafalua zimane daʼö ba niha si no göna abula dödö. Imane samösa satua sokubaloi sotöi Dan, si toröi ba Australia, ”Me no aefa mate woʼomogu, moguna khögu wanolo moroi khö ndra talifusöda. So mato hadauga zi no mongambatö sanolo yaʼodo bongi maʼökhö ba lafondrondrongo hadia nitutunögu khöra. Latehegö khögu ba wanutunö abula dödögu ba lö fatuwu ira me ulau meʼe. Latolo ndraʼo na tebai ufalua halöwögu sero maʼökhö. Duma-dumania, lasasai motogu, laʼöli zoguna khögu, ba larino gögu. Asese göi fao ira khögu wangandrö. Atulö wa yaʼira andrö sindruhu si fahuwu ba ’talifusö ba ginötö waʼatosasa’.”—Amd. 17:17.

10. Tutunö hadia zalua nisura ba Luka 19:36-40.

¹⁰ Me 9 Nisana 33 M, möi Yesu ba Yeruzalema. Me no ofeta ia ba mbanua daʼö, ato sibai niha sanemaʼö yaʼia. Labologö mbarura tanö baero ba lala nitörönia. Lafalua daʼö ba wamaduhuʼö wa yaʼia andrö Razora. Sindruhu-ndruhu wa omuso dödöra me luo daʼö. (Baso Luka 19:36-40.) Börö daʼö, tola manö tokea ndra nifahaʼö Yesu me laʼila hadia zalua aefa daʼö. ”Me no ahatö irugi Yeruzalema, ifaigi mbanua daʼö [Yesu] ba iʼeʼesi.” Si fao feʼe, ifaʼeleʼö hadia dania zalua si hokha mbu niha, si lö ara tö alua ba niha si toröi ba Yeruzalema.—Luk. 19:41-44.

11. Hadia mbörö wa iʼeʼesi Yesu mbanua Yeruzalema?

¹¹ Abu dödö Yesu börö me aboto ba dödönia wa hewaʼae na latemaʼö ia niha, hizaʼi ato niha Yahudi sanimbagö Famatörö Lowalangi. Lua-luania, tedudugö Yeruzalema ba teʼoloiʼö ndra niha Yahudi niʼorifi. (Luk. 21:20-24) Ba gafuriata, simane niwaʼö Yesu, latimbagö ia niha sato. Iadaʼa, hewisa göi zatonia niha ba mbanua si toröi yaʼugö sanandrösa ba duria Wamatörö Lowalangi nifaʼemamö? Na no öforege ba wanolo niha, hizaʼi ambö latemaʼö ba lö ato zomasi mamahaʼö  yaʼira ba zindruhu, tola tobali famahaʼö si sökhi khöu zalua khö Yesu andre. Datafatunö tölu wamahaʼö si tola tahalö.

12. Moroi ba nifalua Yesu me iʼangeragö niha samondrongo turia nifaʼemania, hadia zi tobali famahaʼö khöda sanandrösa khö Yehowa?

¹² Iʼameʼegö tödö fefu niha Yehowa. Moroi ba nifalua Yesu me iʼangeragö mbanua Yeruzalema, sindruhunia daʼö zangoromaʼö wa iʼameʼegö tödö fefu niha Yehowa. ”Lö omasi ia na tekiko fazamösa. Omasi ia enaʼö dozi lafalalini gera-erara.” (2 Fe. 3:9) Tola göi taforomaʼö wa lö aetu taʼomasiʼö nawöda niha na tatolo ira ba wanemaʼö turia somuso dödö.—Mat. 22:39.

13-14. Börö waʼahakhö dödönia ba niha, hadia nifalua Yesu, ba hewisa woloʼöda duma-dumania andrö?

¹³ Owölö-ölö sibai Yesu wamalua fanuriaigö. Börö me iʼomasiʼö fefu niha, iforege wangogunaʼö inötö ba wamahaʼö yaʼira. (Luk. 19:47, 48) Ahakhö dödö Yesu khöra ba terou dödönia ba wanolo yaʼira. Itaria, ato sibai zomasi mamondrongo famahaʼö Yesu irege ”lö fakhamö manga ia hegöi ira nifahaʼönia”. (Mrk. 3:20) Lö göi abua gölönia wamahaʼö yaʼira ba zi bongi, duma-dumania me iʼondrasi ia Nikodemo. (Yoh. 3:1, 2) Sindruhunia, ato ba gotalua niha si no mamondrongo famahaʼö nifaʼema Yesu si lö tobali nifahaʼönia. Hewaʼae simanö, tebeʼe khöra ginötö ba wamahaʼö yaʼira sanandrösa khö Lowalangi. Iadaʼa, omasi göi ita tabeʼe ginötö ba niha fefu enaʼö larongo duria somuso dödö. (Hal. 10:42) Börö daʼö, te moguna tafaudugö ginötö hegöi lala wanuriaigö nifaluada.

¹⁴ Moguna tafaudugö ginötöda weʼamöi manuriaigö. Na lö tafaböʼö-böʼöni ginötöda weʼamöi manuriaigö, tola manö so niha somasi manemaʼö sindruhu, hizaʼi lö falukha ita khöra. Imane samösa perintis sotöi Matilda, ”Yaʼo hegöi foʼomogu, maforege weʼamöi manuriaigö ba ginötö si faböʼö-böʼö. Ba zihulö wongi, manuriaigö ndraʼaga ba nahia wogale. Ba zi laluo, ba ginötö ato niha sofanö, maʼogunaʼö naha mbuku si so gaolo-gaolo. Ba zi tanö owi, manuriaigö ndraʼaga ba nomo-omo misa, börö me si toʼölönia ato niha si so ba nomo.” Simane yaʼira andrö, manuriaigö ita tenga ha ba ginötö si tefaudu khöda. Moguna tafaudugö ginötöda  weʼamöi manuriaigö enaʼö ato niha si tola tafalukhaisi. Na tafalua daʼö, tatu manö omuso dödö Yehowa.

15. Simane nisura ba Luka 22:39-44, hadia zalua ba mbongi fatua lö mate Yesu?

¹⁵ Me 14 Nisana 33 M, yaʼia daʼö ba mbongi fatua lö mate Yesu, möi ia ba Kabu Gezemane. Ba daʼö, ifaehagö fefu nösi dödönia khö Yehowa. (Baso Luka 22:39-44.) ”Mangandrö ia soroi ba dödö, ifaʼema wakaosa si fao taŵa hörö ba feʼao sabölö-bölö.” (Heb. 5:7) Hadia niʼandrö Yesu? Iʼandrö waʼabölö enaʼö lö faröi ia khö Yehowa ba ifalua gohitö dödö Namania. Ifondrondrongo Yehowa wangandrö Nononia sabu tödö andrö ba ifatenge malaʼika ba wamarou tödönia.

16. Hana wa meʼe Yesu me mangandrö ia ba Kabu Gezemane?

¹⁶ Hadia sibai zabu dödö Yesu irege meʼe ia me ilau mangandrö ba Kabu Gezemane? Sambua ba gotaluania yaʼia daʼö börö me lawaʼö khönia niha wa lö ifosumange döi Lowalangi. Baero daʼö, no tebeʼe khönia noro dödö sebua, yaʼia daʼö ba wangamoniʼö töi Namania. Na göna ndraʼugö abula dödö sebua si möi fanandraigö waʼalöfaröimö khö Yehowa, tola öhalö khöu wamahaʼö moroi ba zalua khö Yesu andre. Datatutunö tölu ngawalö ba gotaluania.

17. Hadia zi tola tahalö khöda famahaʼö sanandrösa khö Yehowa me ifondrondrongo wangandrö Yesu?

¹⁷ Ifondrondrongo wangandröu Yehowa. Ifondrondrongo Yehowa wangandrö Yesu nifaʼemania soroi ba dödö. Hadia mbörö? Börö me iʼosambuaʼö dödönia Yesu ba waʼalöfaröinia khö Namania hegöi ba wangamoniʼö töinia. Na daʼö göi niʼofönaiʼöda ba waʼaurida, hasambalö ifondrondrongo wangandröda Yehowa ba ginötö taʼandrö khönia wanolo.—Si. 145:18, 19.

18. Hewisa sibai Yesu andrö ba zi fahuwu khönia?

¹⁸ Aboto ba dödö Yesu hadia nirasoimö. Ba ginötö göna ita fangabu dödö mazui fanandraigö, tatu manö terara dödöda na so zi fahuwu khöda sangila hadia nirasoida, mendrua manö na no irai alua khönia gabula dödö andrö. Simane daʼö sibai Yesu ba zi fahuwu khönia. No irai göi irasoi wa lö faʼabölönia  ba moguna khönia wanolo. Aboto ba dödönia zoʼamböta ita ba no itatugöi wa hasambalö tatema wanolo ”ba ginötö si tefaudu”. (Heb. 4:15, 16) Omasi Yesu ba wanemaʼö fanolo moroi khö zi samösa malaʼika ba Kabu Gezemane. Simane Yesu, moguna göi tatemaʼö wanolo nibeʼe Yehowa. Duma-dumania, iʼogunaʼö publikasi, video, huhuo sebua, mazui famarou dödö moroi khö zi samösa satua sokubaloi hegöi talifusöda si sara lala wamati.

19. Hadia zangabölöʼö yaʼugö ba ginötö göna ndraʼugö abula dödö si möi fanandraigö waʼalöfaröimö khö Lowalangi? Beʼe duma-duma.

¹⁹ Hasambalö ötema ’waʼohahau dödö andrö khö Lowalangi’. Hadia nifalua Yehowa ba wangabölöʼö yaʼita? Ba ginötö mangandrö ita, tatema ’waʼohahau dödö andrö khö Lowalangi, sabölö moroi ba gera-era niha fefu’. (Fil. 4:6, 7) Daʼö zameʼe khöda faʼahono dödö hegöi lala wangera-ngera si sökhi. No irai irasoi daʼö talifusöda ira alawe sotöi Luz. Imane, ”Asese sibai urasoi wa hulö zi lö awö-awögu. Lua-luania, itaria urasoi wa lö iʼomasiʼö ndraʼo Yehowa. Hizaʼi, na tumbu ba dödögu wangera-ngera simane daʼö, iʼanemaiʼö ulau mangandrö khö Yehowa ba ufaehagö khönia nösi dödögu. Na no ufalua daʼö, awena urasoi waʼahono dödö.” Moroi ba zalua khö Luz, taʼila wa tola tatema waʼohahau dödö na mangandrö ita.

20. Me no tatutunö hadia manö mbörö wa meʼe Yesu, hadia zi tobali famahaʼönia khöda?

²⁰ No tatutunö hadia manö mbörö wa meʼe Yesu ba hadia göi wamahaʼönia khöda. Tefaduhuʼö ba dödöda wa hasambalö itolo ita Yehowa hegöi Yesu na göna ita abula dödö, ba tefasugi göi ba dödöda wa moguna tatuhini ndra talifusöda si sara lala wamati sorasoi faʼabu dödö. No göi tafahaʼö ita wa ebua sibai waʼahakhö dödö Yehowa hegöi Yesu ba niha, irege tefarou göi dödöda ba wamalua fanuriaigö hegöi ba wamahaʼö niha. Terara göi dödöda me taʼila wa Yehowa hegöi Ononia, aboto sibai ba dödöra hadia zalua khöda, laʼila hadia zoʼamböta ita, ba omasi ira labeʼe khöda wamarou dödö. Yalötebulö tatörö tödöda ba tafalua hadia zi no tafahaʼö yaʼita ba artikel daʼa irugi alua mbuʼusa li Yehowa ba ’wolosi tawa hörö fefu ba höröda’!—Fam. 21:4.