1. Hadia gabula dödö salua khö Dawido?

 NO MOLOI Dawido. Me luo daʼö, iʼalui lala razo ndraono Gizaraʼeli sotöi Saulo ba wamunu Dawido. Samuza maʼökhö, börö me olofo Dawido, möi ia ba mbanua Nobi ba wangandrö lima ngawua roti. (1 Sa. 21:1, 3) Aefa daʼö, Dawido hegöi si fao khönia, labiniʼö ira ba dögi narö hili. (1 Sa. 22:1) Hana wa tola alua daʼa ba waʼauri Dawido?

2. Hadia gamuata si lö sökhi nifalua Zaulo? (1 Samueli 23:16, 17)

² Afökhö sibai dödö Zaulo khö Dawido börö me ato niha sangomasiʼö yaʼia ba asese möna ia ba wasuwöta. Aboto ba dödö Zaulo wa no itimbagö ia Yehowa börö me lö hadöi khönia foloʼö ba no ifili Dawido si tobali razo. (Baso 1 Samueli 23:16, 17.) Hewaʼae simanö, lö aetu mamatörö Zaulo tobali razo ndraono Gizaraʼeli. Ato sibai zaradadunia hegöi si faʼawö khönia irege lö tola löʼö moloi Dawido. Hadia imane tödönia Saulo wa tola itaha gohitö dödö Yehowa enaʼö tobali razo Dawido? (Yes. 55:11) Lö niwaʼö Zura Niʼamoniʼö. Hizaʼi si no tatu, hulö no ifaʼala samösa waʼaurinia Saulo börö me hasambalö kala gofu haniha manö zolawa Lowalangi!

3. Hewisa Dawido ba wanaögö salua khönia?

 ³ Dawido andrö tenga niha somasi molohi dadaoma. Lö iforege enaʼö tobali ia razo ba ndraono Gizaraʼeli. Yehowa samösa zofili yaʼia tobali razo. (1 Sa. 16:1, 12, 13) Me luo daʼö, iʼuduni ia Saulo. Hewaʼae na tola manö teʼala waʼaurinia, lö itahigö Yehowa. Lö göi mukökö ia me ambö zoguna khönia mazui me ba dögi narö hili toröi ia. Te ba dögi narö hili so Dawido me isura zinunö fanuno si sökhi sibai, si so ba duho nifatunöda andre: ”Lö ambö hadia ia zi sökhi ba niha sangalui Yehowa.”—Si. 34:10.

4. Hadia wanofu-nofu sinangea tafatunö, ba hadia mbörö?

⁴ Ato nono mbanua Yehowa iadaʼa sambö-ambö balazo hegöi soguna tanö böʼönia, * mendrua manö sagötö alua pandemi andre. Baero daʼö, börö me no ahatö ”wamakao sabölö-bölö”, itugu tosasa waʼaurida. (Mat. 24:21) Iadaʼa, datafatunö wanofu si öfa ngawalö andre: Hadia geluahania ”lö ambö hadia ia zi sökhi” nitema Dawido? Hadia mbörö wa ahono dödöda ba zi no so khöda? Hana wa faduhu dödöda wa hasambalö ilumöʼö ita Yehowa? Ba hewisa wamaʼanöda yaʼita iʼotarai iadaʼa ba wanaögö abula dödö salua ba zi so miföna?

5-6. Hewisa Zinunö 23:1-6 ba wanolonia yaʼita enaʼö aboto ba dödöda geluaha wehede Dawido wa ”lö ambö hadia ia zi sökhi” ba nono mbanua Yehowa?

⁵ Hadia geluahania me iwaʼö Dawido wa ”lö ambö hadia ia zi sökhi” ba nono mbanua Yehowa? Enaʼö aboto ba dödöda, datatutunö ngawua wehede si fakhili nisura Dawido ba Zinunö 23. (Baso Zinunö 23:1-6.) Ba ayati si oföna imane, ”Yehowa gubalogu. Lö ambö ndraʼo hadia ia.” Aefa daʼö, itutunö hadia manö ngawalö zabölö moguna, simane howu-howu nirasoinia me iʼodaligö Yehowa, Kubalonia. Iʼohe ia Yehowa ”ba lala satulö”, ba lö iröi ia sagötö faʼomuso dödö hegöi ba waʼabu dödö. Aboto ba dödö Dawido wa  hewaʼae so ia ”ba mbenua soduʼu” khö Yehowa, hizaʼi tenga daʼö geluahania wa lö alua khönia gabula dödö. Itaria irasoi waʼide-ide dödö ba hulö zanörö ’bawa danö sogömi-gömi’ ia. Itaria göi so zoʼuduni yaʼia. Hizaʼi, lö ataʼu Dawido börö me Yehowa Gubalonia.

⁶ Na simanö, hadia geluahania ”lö ambö hadia ia zi sökhi” nitema Dawido? Ahori so fefu zoguna khönia ba wamati irege lö tebulö ahatö ia khö Yehowa. Faʼomuso dödönia tenga teʼodaligö ba gefe. Ahono dödö Dawido ba zi no ihenaigö khönia Yehowa. Sabölö moguna khönia yaʼia daʼö howu-howu ba folumöʼö moroi khö Lowalangi.

7. Moloʼö Luka 21:20-24, hadia wanandraigö nitaögö niha Keriso si so ba Yudea me abad siföföna?

⁷ Moroi ba wehede Dawido, tafahaʼö ita wa tebai taʼofönaiʼö gefe ba waʼaurida. Tatu manö, lö fasala na taʼomusoiʼö dödöda ba harato niʼokhögöda. Hizaʼi, böi taʼofönaiʼö daʼö ba waʼaurida. Daʼö zi tebai laʼolifugö ira niha Keriso si toröi ba Yudea me abad siföföna. (Baso Luka 21:20-24.) No ifangelama ira Yesu wa ba ginötö laʼila ”so zaradadu samasui Yeruzalema”, lö tola löʼö ’moloi ira ba hili’ enaʼö teʼorifi ira. Eluahania, oya zinangea latehegö. Imane sambua artikel Menara Pengawal me döfi 1999, ”Laröi nomora awö nowira, ba lö laʼowuloi harato si so ba nomora. Börö waʼafaduhu dödöra ba wolumöʼö moroi khö Yehowa, laʼofönaiʼö wamosumange yaʼia moroi ba ngawalö hadia ia zabölö moguna ba wamaigi niha.”

8. Hadia zi tola tahalö famahaʼö moroi khö ndra niha Keriso si toröi ba Yudea me abad siföföna?

⁸ Hadia wamahaʼönia khöda? Ba artikel Menara Pengawal daʼö göi, ifatunö khöda wa tola manö alua khöda wanandraigö simane daʼö. Lalada ba wanaögö fanandraigö andrö zangoromaʼö hadia abölö taʼofönaiʼö gefe moroi ba wangorifi si otarai khö Lowalangi. Imane rahu-rahu ba artikel daʼö, ”Ba ginötö moloi ita, tola manö tosasa ita ba ambö zoguna khöda. Moguna no tefaʼanö ita ba wamalua hadia ia, simane ira talifusöda me abad siföföna soloi moroi ba Yudea.” *

9. Moroi ba mene-mene nifaʼema Waulo ba niha Heberaiʼo, hadia waʼafaduhu dödö niʼokhögöda?

⁹ Hadia tola ökhalaigö hewisa dödö ndra niha Keriso me luo daʼö? Tatu abua khöra ba wondröi fefu haratora ba lasawa nahia si bohou. Moguna mamati ira wa hasambalö ibönökhi fefu zoguna khöra Yehowa. Sindruhunia, no tefaʼanö ira ba wanaögö fanandraigö wamati andrö. Lima fakhe fatua lö lafaʼuʼu Yeruzalema ira saradadu Romawi, no ifangelama ndra niha Keriso Heberaiʼo Faulo. Imane, ”Böi miʼomasiʼö gefe ba mihonogö dödömi ba zi no so, börö me no iwaʼö Lowalangi, ’Lö manö uröi ndraʼugö ba lö uʼositengagö ndraʼugö.’ Börö daʼö lö ataʼu ita wangumaʼö, ’Yehowa zanolo yaʼo; lö ataʼu ndraʼo. Hadia zi tola lafalua niha khögu?’” (Heb. 13:5, 6) Niha Keriso si no moloʼö mene-mene Waulo andrö, tatu aoha khöra ba wamaudugö faʼaurira ba nahia si bohou. Faduhu dödöra wa ibönökhi fefu zoguna khöra Yehowa. Iadaʼa göi, mene-mene Waulo andrö zameʼe khöda faʼafaduhu dödö simane daʼö.

10. Hadia mene-mene nibeʼe Waulo khöda?

¹⁰ Ibeʼe göi mene-mene simane daʼö Faulo khö Dimoteo, ba moguna göi khöda mene-mene daʼö. Imane, ”Tobali, na so khöda mbalazo hegöi nukha, yaʼahono dödöda ba daʼö.” (1 Ti. 6:8) Hadia daʼö geluahania wa  tebai taʼa gö sami, toröi ita ba nahia si sökhi, mazui taʼöli mbaruda si bohou? Tenga. Eluaha niwaʼö Waulo yaʼia daʼö enaʼö ahono dödöda ba zi no so. (Fil. 4:12) Daʼö zanolo Faulo ba wanaögö fefu ngawalö gabula dödö salua khönia. Törö tödöu, fondrege zebua böli niʼokhögöda tenga kefe mazui harato, hizaʼi fahuwusada khö Lowalangida.—Hab. 3:17, 18.

11. Moroi ba wehede Moze ba ndraono Gizaraʼeli, hadia wamahaʼö nihalöda enaʼö ahono dödöda ba zi no so?

¹¹ Ha Yehowa zabölö mangila hadia zindruhunia zoguna khöda, ba tola manö faböʼö daʼö ba niʼera-erada. Nehegö atö hadia niwaʼö Moze ba ndraono Gizaraʼeli me no laʼanöröi danö si mate ba zi 40 fakhe faʼara: ”No ifahowuʼö fefu nifaluami Yehowa Lowalangimi. Anehe ia hewisa wofanömi ba danö si mate sebolo andre. Sagötö zi 40 fakhe, lö si faröi khömi Lowalangimi Yehowa, ba lö soʼamböta ami gofu hadia ia.” (5 Mo. 2:7) Sagötö zi 40 fakhe andrö, ibeʼe khöra mana Yehowa si tobali balazora. Baero daʼö, lö irai tekiko nukhara si no lafake iʼotarai me aheta ira ba danö Miserai. (5 Mo. 8:3, 4) Te so ndraono Gizaraʼeli sangumaʼö wa ambö nasa nibeʼe Yehowa andrö khöra. Hizaʼi, ifasugi ba dödöra Moze wa dali zindruhunia, no ibönökhi fefu zoguna khöra Yehowa. Iadaʼa, no göi ibönökhi zoguna khöda Yehowa. Hewaʼae na no öna-öna nibeʼenia andrö ba wamaigida, moguna ahono dödöda ba daʼö. Omuso dödönia na lö aetu taʼandrö khönia saohagölö, ba aboto ba dödöda wa howu-howu si otarai khönia daʼö.

12. Hadia zangoromaʼö wa iʼodaligö Yehowa Dawido, tenga yaʼia samösa?

¹² Aboto ba dödö Dawido wa lö faröi Yehowa ba iʼameʼegö tödö niha sangomasiʼö yaʼia. Arakhagö ba mbawandruhö waʼamate so Dawido me isura Zinunö 34. Hizaʼi, börö me mamati ia, hulö no iʼila ’malaʼika Yehowa ba zi fasuinia’. (Si. 34:7) Te ikhalaigö Dawido ndra malaʼika Yehowa simane saradadu si no mamaʼanö yaʼira ba wolawa udu. Sindruhunia, Dawido andrö saradadu si lö faʼataʼu, ba no ifabuʼu khönia Yehowa wa hasambalö tobali ia razo. Onekhe göi Dawido wangogunaʼö ribo-ribo hegöi föda. Hewaʼae simanö, iʼodaligö Lowalangi, tenga yaʼia samösa. (1 Sa. 16:13; 24:12) Faduhu dödö Dawido wa ”iʼefaʼö” malaʼika Yehowa ”niha sangataʼufi yaʼia”. Sindruhu sa wa lö tatötöna dandra sahöli-höli dödö iadaʼa ba wolumöʼö yaʼita. Niha sangodaligö Yehowa tola manö göna ira faʼamate. Hizaʼi, aboto ba dödöda wa hasambalö tesusugi ira ba auri ira sagötö faʼara.

13. Hana wa iwaʼö tödönia Gogi moroi ba Magogi wa aoha sibai ba wokalaisi yaʼita, hizaʼi hadia mbörö wa lö ataʼu ita? (Faigi gambara ba guli majalah.)

¹³ Ba zi lö ara tö, göna ita fanandraigö wamati. Gogi moroi ba Magogi, yaʼia daʼö angorudua ngawalö soi, hasambalö lasuwö nono mbanua Yehowa. Te dania tarasoi ba daʼö wa tola manö teʼala waʼaurida. Ba ginötö alua daʼö, moguna faduhu dödöda wa hasambalö iʼefaʼö ita Yehowa. Ba wamaigi ngawalö soi, yaʼita andre hulö mbiri-biri si lö hadöi faʼabölö ba lö solumöʼö. (Hez. 38:10-12) Lö hadöi fangönada, ba lö göi toʼölö ita fasuwö. Börö daʼö, lawaʼö tödöra wa aoha sibai ba wokalaisi yaʼita. Sindruhunia, so ngawawa ndra malaʼika ba zi fasuida sangoʼawögö yaʼita. Hana wa lö oroma daʼö ba hörö ngawalö soi? Börö me lö mamati ira khö Yehowa. Hasambalö tokea sibai ira na tohare ndra malaʼika si fasuwö salahida!—Fam. 19:11, 14, 15.

14. Hadia manö zi tola tafalua iadaʼa enaʼö tefaʼanö ita ba wanaögö fanandraigö salua ba zi so miföna?

¹⁴ Hadia zinangea tafalua iadaʼa enaʼö tefaʼanö ita ba wanaögö fanandraigö salua ba zi so miföna? Si oföna, moguna tatatugöi wa tenga kefe zabölö taʼofönaiʼö ba waʼaurida, börö me samuza maʼökhö dania taröi daʼö fefu. Moguna göi tahonogö dödöda ba zi no so, ba böi olifu ita wa sameʼe khöda faʼomuso dödö yaʼia daʼö fahuwusada khö Yehowa. Na itugu aro wahuwusada khö Lowalangida, faduhu dödöda wa ilumöʼö ita dania na isuwö ita Gogi moroi ba Magogi.

15. Hadia manö zi no irai alua khö Dawido sameʼe khönia faʼafaduhu dödö wa lö tebulö itolo ia Yehowa?

¹⁵ Datafaigi wamahaʼö tanö böʼö si tola tahalö moroi khö Dawido enaʼö tefaʼanö ita ba wanaögö fanandraigö. Imane Dawido, ”Mitandra ba mifaigi wa si sökhi tödö Yehowa andrö; omuso dödö niha solumöʼö yaʼira khönia.” (Si. 34:8) Moroi ba wehedenia andrö, aboto ba dödöda hadia zameʼe faʼafaduhu dödö khö Dawido wa tola iʼodaligö Yehowa. No asese iʼodaligö Yehowa ba lö irai afatö dödönia. Me awuyu-wuyu nasa Dawido, no irai ilawa Goliato, saradadu Wilisiti salawa niha ba sabölö sibai. Imane khönia Dawido, ”Maʼökhö andre hasambalö wa ibeʼe ba dangagu ndraʼugö Yehowa.” (1 Sa. 17:46) Ba sindruhu-ndruhu daʼö zalua. Ba gafuriata, me mangai halöwö Dawido khö Razo Saulo, no hauga kali iforege razo ba wamunu yaʼia. Hizaʼi, teʼefaʼö Dawido börö  me ”fao khönia Yehowa”. (1 Sa. 18:12) Börö me no hauga kali irasoi wanolo moroi khö Yehowa, faduhu dödö Dawido wa hasambalö itolo ia Yehowa ba wanaögö abula dödö salua khönia.

16. Ba ginötö hadia manö tola ’tatandra’ waʼasökhi dödö Yehowa?

¹⁶ Na lö tebulö taʼodaligö Yehowa iʼotarai iadaʼa, monönö waʼafaduhu dödöda wa hasambalö iʼefaʼö ita ba zi so miföna. Te moguna taʼandrö khö gafaloda wohalöwö enaʼö tola taʼondrasi gangowuloa ba zi sambua wilayah mazui regional. Mazui, te taʼandrö enaʼö laʼalösi ginötöda wohalöwö irege tola taʼondrasi fefu gangowuloa ba asese möi ita manuriaigö. Ba wamalua daʼö, moguna mamati ita ba taʼodaligö Yehowa. Hewisa na lö latehegö niʼandröda andrö ba laʼefasi ita ba wohalöwö? Hadia mamati ita khö Yehowa wa hasambalö ibönökhi zoguna khöda ba lö irai iröi mazui iʼositengagö ita? (Heb. 13:5) Törö tödöu wa lö faröi Yehowa andrö. Ato ndra talifusöda sangai halöwö safönu inötö, si no morasoi hewisa wanolo Yehowa yaʼira ba ginötö si basaki.

17. Hadia ayati ba ndröfi 2022, ba hadia mbörö wa tefaudu daʼö?

¹⁷ Börö me Yehowa zi fao khöda, lö ataʼu ita gofu hadia ia dania zalua ba zi so miföna. Lö irai iröi ita Lowalangida, asala taʼofönaiʼö Wamatörönia. Iʼotarai iadaʼa, datafaʼanö ita ba wanaögö faʼabasaki salua ba zi so miföna ba faduhu dödöda wa lö tebulö itolo ita Yehowa. Enaʼö tefasugi ba dödöda wa moguna sibai tafalua daʼö, no lafili Zinunö 34:10 ira Boto Solohe tobali ayati ba ndröfi 2022: ”Lö ambö hadia ia zi sökhi ba niha sangalui Yehowa.”