1. Hana wa lö tokea ita na abua ba niha wamaduhusi tödö niha böʼö?

 BA GULIDANÖ nifatörö Zatana andre, ato niha abua khöra ba wamaduhusi tödö niha böʼö. Alua daʼö börö me asese larasoi waʼafatö dödö ba nifalua ndra pengusaha, ira samatörö hegöi ira sondröniaʼö ba agama. So göi zi lö faduhu tödö khö nawöra, si falazi omo khöra mazui ba nösi nomora. Lö tokea ita na alua daʼa börö me no ifaʼeleʼö Sura Niʼamoniʼö wa ba ngaluo safuria andre ato niha si faröi, samöbögö si lö duhu ba si manga mböli. Amuatara fagölö simane amuata Zatana, samatörö ulidanö andre si tebai mufaduhusi tödö.—2 Ti. 3:1-4; 2 Ko. 4:4.

2. (a) Haniha manö zi tola tafaduhusi tödö? (b) Hadia manö wanofu-nofu si tumbu ba wangera-ngerada?

² Yaʼita niha Keriso, aboto ba dödöda wa tola tafaduhusi tödö Yehowa. (Yer. 17:7, 8) Faduhu dödöda wa iʼomasiʼö ita ba ’lö irai iröi’ zi fahuwu khönia. (Si. 9:10) Tola göi faduhu dödöda khö Yesu Keriso börö me no itehegö nosonia salahida. (1 Fe. 3:18) No göi tarasoi samösa wa tola taʼodaligö mene-mene si so ba Zura Niʼamoniʼö. (2 Ti. 3:16, 17) Faduhu dödöda wa tola tafaduhusi tödö Yehowa, Yesu hegöi Sura Niʼamoniʼö. Hizaʼi, tola manö manofu-nofu dödöda: ’Hadia tola tafaduhusi tödö ndra talifusöda ba mbanua niha Keriso? Na tola, hadia mbörö wa tafaduhusi tödö ira?’

3. Hadia döi sebua niʼokhögöda? (Mareko 10:29, 30)

³ No ibeʼe khöda döi si sökhi Yehowa tobali ösi nomonia ba wamati. Angeragö hawaʼatohude daʼö ba hadia mbua nitemada! (Baso Mareko 10:29, 30.) Ba zi sagörö ulidanö, so  ndra talifusöda sangomasiʼö Yehowa ba samorege ba woloʼö goi-goinia. Hewaʼae faböʼö-böʼö li niʼogunaʼöda, lagu wonukha, hegöi si toʼölö mufalua, hizaʼi tola fahuwu ita khöra hewaʼae na awena falukha. Sabölö tohude, fao ita khöra ba wanuno hegöi ba wamosumange Amada sebua faʼomasi.—Si. 133:1.

4. Hana wa moguna khöda wanolo moroi khö ndra talifusöda?

⁴ Ba ginötö si basaki andre, moguna tarorogö wahasara dödö khö ndra talifusöda töra moroi ba zilalö. Tola latolo ita ba wamahea abula dödöda. (Rom. 15:1; Gal. 6:2) Lafarou göi ita enaʼö lö taböhöli wangai halöwö khö Yehowa ba aro ita ba wamati. (1 Te. 5:11; Heb. 10:23-25) Khalaigö hadia zalua na lö fanolo moroi khö ndra talifusöda. Tatu manö abua khöda ba wolawa fanandraigö moroi ba nududa yaʼia daʼö Afökha Satana hegöi ulidanönia si lö sökhi. Ba zi lö ara tö, Satana hegöi si fao khönia lasuwö nono mbanua Lowalangi. Börö daʼö, taʼandrö sibai saohagölö me so ndra talifusöda sotuhini yaʼita.

5. Hana wa so niha sabua ba wamaduhusi tödö ira talifusöra?

⁵ So ösa niha abua khöra wamaduhusi tödö ira talifusöra si sara lala wamati börö me no irai so zanutunö misa rahasiara mazui so zi lö mamalua si no ifabuʼu. Tola manö göi no irai afökhö dödöra ba wehede hegöi ba nifalua zi samösa talifusöda ba mbanua niha Keriso. Na alua khöda zimane daʼö, abua khöda wamaduhusi tödö ira talifusöda. Na simanö, hadia zanolo yaʼita enaʼö faduhu dödöda khöra?

6. Hewisa waʼomasi tobali fanolo khöda ba wamaduhusi tödö ira talifusöda? (1 Korindro 13:4-8)

⁶ Faʼomasi zi tobali dane-dane ba waʼafaduhu dödö. Ba 1 Korindro faza 13, itutunö khöda mbua-bua niha sangokhögö faʼomasi. Bua-bua daʼö zanolo yaʼita ba wondrouʼö  faʼafaduhu dödö khö ndra talifusöda. (Baso 1 Korindro 13:4-8.) Duma-dumania, ba ayati 4 iwaʼö wa niha sangokhögö ’faʼomasi andrö no sebolo tödö ba si sökhi tödö’. Ebolo sibai dödö Yehowa khöda, hewaʼae no tafalua horö. Tobali, moguna göi ebolo dödöda khö ndra talifusöda ba ginötö so wehedera mazui nifaluara sangafökhöiʼö tödöda. Iwaʼö göi ba ayati 5 wa niha sangokhögö faʼomasi ’lö ilau zi lö moadu ba lö iʼalui dana khönia’. Lö taʼalui dana khöda yaʼia na lö tatöngöni zala si no irai lafalua ira talifusöda. Imane ba Zangombakha 7:9, ”Böi alio abao dödöu.” Abölö sökhi na tafalua mene-mene si so ba Efeso 4:26 sangumaʼö, ”Böi miʼekhugö luo ba wönumi.”

7. Hewisa goi-goi si so ba Mataiʼo 7:1-5 tobali fanoloda ba wamaduhusi tödö ira talifusöda?

⁷ Tola göi tafaduhusi tödö ndra talifusöda yaʼia daʼö na simane famaigi Yehowa wamaigida yaʼira. Iʼomasiʼö ira Yehowa ba lö iʼosambuaʼö dödönia ba zalara. Moguna göi tafalua daʼö. (Si. 130:3) Moroi na taʼosambuaʼö dödöda ba zalara, abölö sökhi na taʼosambuaʼö dödöda ba mbua-bua hegöi ba ngawalö zi sökhi si tola lafalua. (Baso Mataiʼo 7:1-5.) Faduhu göi dödöda wa lö ba dödöra wangafökhöiʼö tödöda, börö me niha sangokhögö faʼomasi andrö ”faduhu dödönia fefu hadia ia”. (1 Ko. 13:7) Tenga daʼö geluahania wa iʼandrö khöda Yehowa enaʼö tafaduhusi tödö ira lö börö-börö. Hizaʼi, omasi ia na faduhu dödöda khöra börö me no laforomaʼö wa tola mufaduhusi tödö ira. *

8. Hewisa enaʼö tafaduhusi tödö ndra talifusöda?

⁸ Moguna ginötö enaʼö tola tafaduhusi tödö ndra talifusöda. Hewisa lalania? Moguna sindruhu-ndruhu aboto ba dödöda ira. Tola fahuhuo ita khöra ba gangowuloa ba falulu fohalöwö ita ba wanuriaigö. Taʼeboloʼö dödöda khöra ba tabeʼe khöra ginötö enaʼö laforomaʼö wa tola mufaduhusi tödö ira. Ba wamobörö, tatu manö lö iʼanemaiʼö ötutunö fefu nösi dödöu ba niha sawena öʼila. Hizaʼi, me no fahuwu ami, tola manö omasiʼö ötutunö khönia nösi dödömö. (Luk. 16:10) Hewaʼae simanö, hewisa na so dalifusöda ba gangowuloa nifaduhusimö tödö sangafökhöiʼö tödömö? Böi anemaiʼö etuʼö wahuwusamö khönia. Halö khöu waʼahono dödö. Böi göi ha börö gamuata zi samösa niha, lua-luania lö öfaduhusi tödö ndra talifusöda fefu. Iadaʼa, datatutunö duma-duma niha si lö faröi samosumange Yehowa. Lö tebulö lafaduhusi tödö niha böʼö hewaʼae na no irai so zangafökhöiʼö tödöra.

9. (a) Hadia zangoromaʼö wa faduhu dödö Khana ba nifakhoi Yehowa hewaʼae itaria lafalua zala ira niha nifataro Yehowa? (b) Hadia wamahaʼö nihalöda ba zalua khö Khana? (Faigi gambara.)

⁹ Hadia no irai afatö dödömö börö gamuata zi samösa talifusöda sondröniaʼö? Na noa, tola öfahaʼö ndraʼugö ba zalua khö Khana. Me luo daʼö, niha sondröniaʼö ba wameʼe sumange khö Yehowa yaʼia daʼö Ere Sebua sotöi Eli. Hizaʼi, tenga duma-duma si sökhi nösi nomonia. Iraononia sangai halöwö tobali ere, asese lafalua gamuata si lö sökhi ba si möi fangaila. Lö iforege Eli ba wameʼe khöra degu-tegu. Me luo daʼö, lö iʼanemaiʼö iheta Eli andrö Yehowa tobali ere sebua. Hewaʼae simanö, lö tebulö faduhu dödö Khana ba zi no ifakhoi Yehowa. Lö iböhöli weʼamöi ba nose Lowalangi hewaʼae na lö saheta Eli tobali ere sebua. Samuza inötö, me abu sibai dödö Khana,  mangandrö ia soroi ba dödö khö Yehowa. Me iʼila daʼö Eli iwaʼö wa no mabu Khana andrö. Hewaʼae lö iʼila hadia zindruhunia zalua, itegu ndra alawe sabu tödö andrö. (1 Sa. 1:12-16) Hewaʼae simanö, ifalua hölunia Khana ba wameʼe ononia matua ba wangai halöwö ba nose Lowalangi. Eluahania, itehegö khö Eli ba wondrorogö ononia. (1 Sa. 1:11) Hadia ilulu manö Yehowa zala nifalua ndraono Eli andrö? Löʼö, ba gafuriata ihuku ira. (1 Sa. 4:17) Iʼamualagö göi Lowalangi nono matua khö Khana sotöi Samueli.—1 Sa. 1:17-20.

10. Hadia zangoromaʼö wa lö tebulö faduhu dödö Dawido khö ndra si fahuwu khönia hewaʼae no irai laʼafökhöiʼö dödönia?

¹⁰ Hadia no irai iʼafökhöiʼö dödöu si fahuwu khöu? Na noa, angeragö duma-duma Razo Dawido. So samösa zi fahuwu khönia sotöi Ahitofeli. Me ifadöni dadaoma waʼarazo Abisalomi ono Dawido, fao Gahitofeli khö Gabisalomi ba wamadaö andrö. Tatu afatö sibai dödö Dawido börö me lö ituhini ia ononia hegöi si fahuwu khönia. Hewaʼae simanö, lö aetu ifaduhusi tödö zi fahuwu khönia tanö böʼö. Lö tebulö faduhu dödönia khö Huzaʼi, niha si lö faröi khö Dawido ba si lö fao ba wamadaö andrö. Ifalua daʼö Dawido börö me iforomaʼö Huzaʼi wa yaʼia andrö si fahuwu si sökhi. Itehegö nosonia ba wanolo Dawido.—2 Sa. 17:1-16.

11. Hadia nifalua zohalöwö khö Nabalo sangoromaʼö wa faduhu dödönia khö Abigaila?

¹¹ Angeragö duma-duma zi samösa sohalöwö khö Nabalo. Nabalo andrö iraono Gizaraʼeli si kayo. Me luo daʼö, Dawido hegöi ira saradadunia si fao faʼasökhi dödö lalumöʼö ndra sohalöwö khö Nabalo. Ba gafuriata, iʼandrö Dawido khö Nabalo ba wameʼe ö khö ndra saradadunia, gofu hadia manö zomasi ibeʼe. Tenga sebua sibai niʼandrö Dawido, hizaʼi lö ibeʼe daʼö Nabalo. Andrö wa mofönu sibai Dawido irege ihalö gangetula ba wamunu fefu ira matua ba nösi nomo Nabalo. So samösa zohalöwö khö Nabalo samatunö salua andrö khö woʼomo Nabalo sotöi Abigaila. Iʼila wa ba danga Abigaila so waʼaurinia. Faduhu göi dödönia wa tola ibulöʼö zalua andrö Abigaila börö me yaʼia andrö ira alawe satua-tua. Börö daʼö, lö moloi ia. Ba sindruhu wa tola mufaduhusi tödö Abigaila. Si  fao faʼabarani iforege Abigaila enaʼö lö ifalua niʼera-erania andrö Dawido. (1 Sa. 25:2-35) Faduhu dödönia wa hasambalö ihalö gangetula si sökhi Dawido.

12. Hadia zangoromaʼö wa faduhu dödö Yesu khö ndra nifahaʼönia hewaʼae itaria lafalua zala?

¹² Faduhu dödö Yesu khö ndra nifahaʼönia hewaʼae na itaria lafalua zala. (Yoh. 15:15, 16) Duma-dumania, me möi Yakobo hegöi Yohane khö Yesu ba wangandrö dadaomara ba Wamatörö Lowalangi, lö isofu khöra Yesu hadia gohitö dödöra ba wamosumange Yehowa mazui itimbagö ira tobali sinengenia. (Mrk. 10:35-40) Ba gafuriata, me laraʼu Yesu, laröi ia ira nifahaʼönia. (Mat. 26:56) Hewaʼae simanö, lö irai taya waʼafaduhu dödö Yesu khöra. Iʼila wa lö moʼahonoa ira, hizaʼi ”lö tebulö iʼomasiʼö ira irugi gamozua”. (Yoh. 13:1) Me no aefa tesusugi Yesu, ibeʼe halöwö sebua khö ndra sinengenia si lö faröi si 11 ba wondröniaʼö halöwö fombaliʼö nifahaʼö hegöi ba wondrorogö biri-birinia sebua böli. (Mat. 28:19, 20; Yoh. 21:15-17) Ba sindruhu wa tola mufaduhusi tödö ndra sinenge si lö moʼahonoa andrö. Lö faröi ira ba wamosumange Yehowa irugi waʼamatera. Tatu manö, tobali duma-duma si sökhi khöda Khana, Dawido, sohalöwö khö Nabalo, Abigaila hegöi Yesu ba wamaduhusi tödö niha si lö moʼahonoa.

13. Hana wa abua khöda wamaduhusi tödö ira talifusöda?

¹³ Hadia no irai ötutunö gabula dödömö khö zi samösa talifusöda, hizaʼi ba gafuriata itutunö daʼö ba niha böʼö? Tola manö afatö dödömö na alua daʼö. No irai alua daʼö khö zi samösa talifusöda ira alawe. Itutunö gabula dödönia khö zi samösa satua sokubaloi. Hizaʼi mahemolunia, itelefo ia foʼomo zatua sokubaloi andrö ba wameʼe khönia famarou dödö. Ba daʼa oroma wa no ifatunö khö woʼomonia gabula dödö dalifusöda andrö. Lua-luania, afatö dödö dalifusöda andrö ba abua khönia wamaduhusi tödö mangawuli zatua sokubaloi daʼö. Hizaʼi, iʼokhögö wangera-ngera si sökhi talifusöda ira alawe andrö. Fahuhuo ia khö zatua sokubaloi tanö böʼö ba wangandrö fanolo irege tola ifuli faduhu dödönia khö ndra satua sokubaloi.

14. Hadia zanolo zi samösa talifusöda irege ifuli faduhu dödönia khö zi darua satua sokubaloi?

¹⁴ So samösa dalifusöda ira matua, no irai afatö dödönia khö zi darua satua sokubaloi. Ara no irasoi daʼö. Iwaʼö tödönia wa tebai mufaduhusi tödö ira. Hizaʼi, ifuli iʼangeragö wehede zi samösa talifusöda nifosumangenia sangumaʼö: ”Ududa andrö Satana, tenga ira talifusöda.” Iʼangerönusi wehede daʼö talifusöda andrö ba ilau mangandrö. Ba gafuriata ifuli atulö ia khö zi darua satua sokubaloi andrö.

15. Hana wa moguna ginötö ba wamaduhusi tödö mangawuli ndra talifusöda? Beʼe duma-duma.

¹⁵ Hadia no irai aheta khöu halöwö ba gangowuloa? Sindruhu wa afökhö sibai daʼö. No irai alua daʼö khö Grete. Yaʼia hegöi inania, lö faröi ira ba wamosumange Yehowa me götö Nazi Jerman ba ndröfi 1930-an. Me luo daʼö, lö latehegö halöwö nifaluada. Omuso sibai dödö Grete me mubeʼe khönia halöwö ba wosali Menara Pengawal khö ndra talifusönia si sara lala wamati. Hizaʼi, me laʼila ira talifusöda wa fatuwu namania ba zindruhu, laheta khönia halöwö daʼö. Ataʼu ira na ifatunö amania khö ndra udu sanandrösa ba mbanua niha Keriso. Tenga ha ndrege daʼö zalua khö Grete. Sagötö Wasuwöta Gulidanö II, lö labeʼe majalah khönia hegöi khö ninania, ba lö lafahede ia na falukha ira ba lala. Sindruhu  wa afökhö sibai daʼö. Iwaʼö Grete wa ara ginötö niʼogunaʼönia ba wangefaʼö sala ndra talifusöda hegöi ba wamaduhusi tödö yaʼira mangawuli. Ba gafuriata, aboto ba dödönia wa no iʼefaʼö zalara Yehowa, ba moguna göi ifalua zimane daʼö. *

16. Hana wa moguna taforege mangawuli ba wamaduhusi tödö ira talifusöda?

¹⁶ Na no irai afatö dödömö khö ndra talifusöda, forege enaʼö ifuli öfaduhusi tödö ira. Tola manö moguna ginötö hegöi famorege ba wamalua daʼö, hizaʼi tenga zaya-zaya gölö. Duma-dumania: Na no irai afökhö dalumö ba wemanga gö, tatu mangelama saʼae ndraʼugö na öfuli öʼa gö simane daʼö. Hizaʼi, tenga daʼö geluahania wa öböhöli saʼae wemanga. Simane daʼö göi, hewaʼae no irai afatö dödöda khö ndra talifusöda, hizaʼi tenga daʼö geluahania wa tebai saʼae tafaduhusi tödö fefu ndra talifusöda. Aboto ba dödöda wa lö moʼahonoa ira. Na taforege enaʼö ifuli faduhu dödöda khö ndra talifusöda, tola itugu tarasoi waʼomuso dödö ba taʼosambuaʼö dödöda ba zi tola tafalua ba wondrorogö faʼafaduhu dödö ba mbanua niha Keriso.

17. Hana wa moguna sibai waʼafaduhu dödö, ba hadia nitutunöda ba artikel aefa daʼa?

¹⁷ Ba gulidanö nifatörö Zatana andre, ato niha lö lafaduhusi tödö nawöra. Hizaʼi, tola tafaduhusi tödö ndra talifusöda börö me taʼomasiʼö ira ba laʼomasiʼö göi ita. Faʼafaduhu dödö simane daʼö zanolo yaʼita ba worasoi faʼomuso dödö hegöi fahasara dödö. Tobali göi folumöʼö daʼö na alua gabula dödö ba zi so miföna. Hewisa na no irai afatö dödöu khö dalifusöda nifaduhusimö tödö? Tandraigö okhögö lala wangera-ngera simane Yehowa, oʼö goi-goi Zura Niʼamoniʼö, douʼö waʼomasiu khö ndra talifusöda, ba fahaʼö ndraʼugö moroi ba duma-duma si so ba Zura Niʼamoniʼö. Na tafalua daʼö, tola talawa waʼafatö dödö ba tola ifuli faduhu dödöda khö ndra talifusöda. Buania, tola ato taʼokhögö ”zi fahuwu sabölö ahatö moroi ba zi fatalifusö”. (Amd. 18:24) Hizaʼi, lö ibönö na ha yaʼita zi faduhu tödö ba niha böʼö, moguna göi lafaduhusi tödö ita. Ba artikel aefa daʼa, tatutunö hadia zinangea tafalua ba wangoromaʼö wa tola lafaduhusi tödö ita ira talifusöda.