1. Hewisa niha si tola mufaduhusi tödö andrö?

 NIHA si tola mufaduhusi tödö, iforege wamalua hadia ia zi no ifabuʼu ba itörö zindruhu. (Si. 15:4) Tola göi laʼodaligö ia. Omasi ita na simane daʼö wamaigi ndra talifusöda yaʼita. Hewisa enaʼö tola lafaduhusi tödö ita?

2. Hewisa wangoromaʼöda wa tola mufaduhusi tödö ita?

² Tebai tafaso niha böʼö enaʼö lafaduhusi tödö ita. Moguna taforomaʼö ba wehede hegöi ba nifaluada wa tola mufaduhusi tödö ita. Faʼafaduhu dödö andrö hulö simane kefe. Abua wanöndra yaʼia, hizaʼi alio taya. Börö daʼö, moguna taforege enaʼö tobali ita niha si tola mufaduhusi tödö. No iforomaʼö Yehowa wa tola mufaduhusi tödö ia. Lö irai aombö dödöda khönia börö me ”fefu nifaluania tola mufaduhusi tödö”. (Si. 33:4) Iʼandrö göi khöda enaʼö taʼoʼö ia. (Ef. 5:1) Datatutunö duma-duma niha samosumange Yehowa soloʼö Amada si so ba zorugo ba sangoromaʼö wa tola mufaduhusi tödö ira. Tatutunö göi lima ngawalö mbua-bua sanolo yaʼita enaʼö tola mufaduhusi tödö.

3-4. Hezo taʼila wa tola mufaduhusi tödö Danieli ba hadia zinangea tasofu khöda samösa?

³ Enaʼö tola mufaduhusi tödö ita, nehegö duma-duma zamaʼeleʼö sotöi Danieli. Lö ara me no laʼoloiʼö ia ba Mbabilona, iforomaʼö wa tola muʼodaligö ba mufaduhusi tödö ia. Itugu faduhu dödö niha khönia me itolo ia Yehowa ba wamoʼeluaha  fangifi Razo Mbabilona sotöi Nebukanesa. Baero daʼö, ifaʼema göi Danieli duria si lö omasi razo famondrongo yaʼia daʼö wa lö saʼae omasi Yehowa khö razo andrö. Moguna khönia waʼabarani ba wamalua daʼa börö me Nebukanesa andrö razo samuʼi ba si lö sökhi! (Dan. 2:12; 4:20-22, 25) Hauga fakhe aefa daʼö, ifuli iforomaʼö Danieli wa tola mufaduhusi tödö ia me itutunö geluaha wehede nisura ba dowa gödo Mbabilona. Tefaudu sibai wamoʼeluahania wehede andrö. (Dan. 5:5, 25-29) Ba gafuriata, Dario niha Media hegöi ira sohalöwö ba gödo razo khönia, laʼila wa no ”sahöli-höli dödö waʼatua-tua” Danieli. Lafaduhuʼö wa ”lö falimo [Danieli] ba lö irai iʼosiwawöi mazui ifalua zala ba halöwönia”. (Dan. 6:3, 4) Ira sondröniaʼö manö lafaduhuʼö wa tola mufaduhusi tödö Danieli!

⁴ Na taʼangerönusi duma-duma Danieli, datasofu khöda samösa: ’Hewisa gamuatagu moloʼö niha si tenga samaduhuʼö Yehowa si so ba zi fasuigu? Hadia ba wamaigira yaʼodo andre niha si tola muʼodaligö ba mufaduhusi tödö?’ Hana wa moguna tasofu khöda samösa daʼa? Börö me tobali famolakhömi Yehowa na tola mufaduhusi tödö ita.

5. Hadia zanolo Hanania irege tobali ia niha si tola mufaduhusi tödö?

⁵ Me döfi 455 SM, me no aefa ifazökhi mangawuli göli Yeruzalema Gubernur Nehemia, iʼalui niha si tola mufaduhusi tödö ba wondrorogö banua andrö. Samösa ba gotaluania yaʼia daʼö Hanania, nifotöi  ”sondröniaʼö ba Göli”. Imane Sura Niʼamoniʼö sanandrösa khö Hanania, ”Tola mufaduhusi tödö ia ba iʼataʼufi Lowalangi sindruhu töra moroi ba danö böʼö.” (Neh. 7:2) Faʼomasi hegöi faʼataʼunia na lö ifalua zomasi Yehowa, zanolo Hanania ba wangodödögö halöwö si no mubeʼe khönia. Bua-bua simane daʼö göi zanolo yaʼita enaʼö tola muʼodaligö ba wangai halöwö khö Lowalangi.

6. Hewisa wangoromaʼö Tikhiko wa tola tobali ia si fahuwu niʼodaligö Waulo?

⁶ Angeragö duma-duma Tikhiko, niha nifaduhusi tödö zinenge sotöi Faulo. Me tobali Waulo niha nitaha ba nomo, iʼodaligö wanolo moroi khö Tikhiko. Iwaʼö Faulo wa Tikhiko andrö ”lö faröi ba wangai halöwö Zoʼaya”. (Ef. 6:21, 22) Iʼodaligö ia Faulo tenga ha ba wolohe sura khö ndra talifusö si so ba Efeso hegöi ba Kolose, hizaʼi ba wamarou tödö hegöi ba wondrara tödö ndra talifusö si so ba daʼö. Nifalua Tikhiko andre zamasugi ba dödöda sanandrösa ba niha si lö faröi ba si tola muʼodaligö soʼameʼegö tödö soguna khöda ba wamati.—Kol. 4:7-9.

7. Hezo oroma wa tola mufaduhusi tödö ndra satua sokubaloi hegöi enoni ba mbanua niha Keriso si farahu yaʼugö?

⁷ Tatu taʼandrö sibai saohagölö khö ndra satua sokubaloi hegöi enoni si tola mufaduhusi tödö. Simane Danieli, Hanania, ba Tikhiko, laʼonorogö tödö sibai halöwö nibeʼe khöra. Duma-dumania na tafalua gangowuloa ero migu, faduhu dödöda wa so ndra talifusö si no mutuyu ba wangolohesi halöwö ero sambua faosatö. Laʼandrö sibai saohagölö göi ira satua sokubaloi khö ndra talifusö si no mutuyu börö me no lahaogö wamaʼanö hegöi ba wamaʼema halöwö andrö ba gangowuloa! Baero daʼö, na takaoni niha nifahaʼöda weʼamöi ba gangowuloa hari Migu, faduhu dödöda wa hasambalö so zamaʼema huhuo sebua. Faduhu göi dödöda wa no tehenaigö mbuku niʼogunaʼöda ba wanuriaigö. Taʼandrö sibai saohagölö khö Yehowa me no ibeʼe khöda ndra talifusö si lö faröi ba wamönökhi soguna khöda ba wamati! Hizaʼi, hewisa wangoromaʼöda wa tola mufaduhusi tödö ita?

8. Hewaʼae na taʼameʼegö tödö ndra talifusöda, hadia zinangea tatörö tödöda? (Amaedola 11:13)

⁸ Taʼomasiʼö ndra talifusöda ba taʼameʼegö tödö nifaluara. Hewaʼae simanö, moguna taʼokhögö wangera-ngera satulö ba lö taʼurusai rahasiara. So ösa niha ba mbanua niha Keriso me abad siföföna ”omasi ira lafatou-tou nawöra ba laʼurusai zi tenga urusara, ladunö-dunö zi tenga huhuora”. (1 Ti. 5:13) Tatu lö omasi ita tafalua zimane daʼö. Tola manö so niha sanutunö ösi dödönia ba iʼandrö khöda enaʼö böi tatutunö daʼö ba niha böʼö. Duma-dumania, so samösa dalifusöda ira alawe samatunö khöda wa mofökhö ia mazui so gabula dödönia tanö böʼö ba iʼandrö enaʼö lö tatutunö daʼö ba niha böʼö. Tatu taʼameʼegö tödö niʼandrönia khöda andrö. * (Baso Gamaedola 11:13.) Iadaʼa datatutunö hezo manö nasa moguna tazago rahasia.

9. Hewisa wangoromaʼö zi sambua ösi nomo wa tola mufaduhusi tödö ira?

⁹ Yatobali ndraʼugö niha si tola mufaduhusi tödö yomo ba nomo. Ero samösa ösi nomo, moʼömö ira ba wondrorogö enaʼö lö larongo niha böʼö na so gabula dödö salua yomo ba  nomora. Duma-dumania, so sambua zi toʼölö ifalua talifusöda ira alawe si möi famaʼiki woʼomonia ira matua. Hadia itutunö daʼö ba niha böʼö irege aila woʼomonia ira alawe? Tatu manö löʼö. Iʼomasiʼö woʼomonia ba lö ifalua zi möi fangafökhö dödönia. (Ef. 5:33) Omasi göi ndra si bohou ebua na lafosumange ira. Moguna aboto ba dödö ndra satua daʼa. Lö laʼailasi ndraonora ba lö latutunö föna niha böʼö na so zala nifalua ndraonora. (Kol. 3:21) Moguna göi mangelama ndraono enaʼö lö latutunö ba niha böʼö zalua yomo ba nomo si möi fangaila nösi nomora tanö böʼö. (5 Mo. 5:16) Na laforege ira ösi nomo ba wondrorogö enaʼö lö latutunö ba niha böʼö zalua yomo ba nomora, no larorogö wahasara dödö.

10. Hewisa zindruhu si fahuwu andrö? (Amaedola 17:17)

¹⁰ Yatobali ndraʼugö si fahuwu si tola mufaduhusi tödö. Ba waʼaurida andre, omasi sibai ita tatutunö nösi dödöda ba zi fahuwu khöda. Hewaʼae simanö, itaria abua wamalua daʼö. Te lö toʼölö tatutunö ba niha böʼö hadia zindruhunia nirasoida, ba afökhö göi dödöda na itutunö daʼö si fahuwu khöda ba niha böʼö. Hizaʼi, taʼandrö sibai saohagölö khö zi fahuwu khöda na lö itutunö rahasiada ba niha böʼö! Yaʼia andrö ”sindruhu si fahuwu”.—Baso Gamaedola 17:17.

11. (a) Hewisa wangoromaʼö ndra satua sokubaloi hegöi foʼomora wa tola mufaduhusi tödö ira? (b) Hadia wamahaʼö nihalöda moroi khö zi samösa satua sokubaloi si lö manutunö ba nösi nomonia abula dödö salua ba gangowuloa? (Faigi gambara.)

¹¹ Yatobali ndraʼugö niha si tola mufaduhusi tödö ba mbanua niha Keriso. Ira satua sokubaloi si tola mozago rahasia, no amaedola ”zawatö moroi ba nangi, simane naha wolumöʼö” khö ndra talifusöra. (Yes. 32:2) Lö alawö ita wanutunö ösi dödöda khöra börö me taʼila wa tola lazago rahasiada. Tatu, lö göi tafaso ira enaʼö latutunö khöda hadia zi tebai lafatunö. Baero daʼö, taʼandrö göi saohagölö khö ndra foʼomora börö me lö lafaso ndra satua sokubaloi ba wamatunö rahasia. No sambua howu-howu ba mbanua niha  Keriso na lafalua daʼö ira foʼomo zatua sokubaloi. Imane si samösa foʼomo zatua sokubaloi, ”Uʼandrö sibai saohagölö khö woʼomogu, börö me lö ifatunö khögu haniha manö ndra talifusö ba mbanua niha Keriso si no mukubaloi ba sinangea mutolo ba wamati. Börö me lö ifatunö khögu daʼö foʼomogu, lö tobali noro dödögu gabula dödö salua ba mbanua niha Keriso si tebai uʼasiwai, ba si toʼölö manö göi ndraʼo khö ndra talifusö maʼafefu. Faduhu göi dödögu khö woʼomogu wa lö itutunö ba niha böʼö na ututunö khönia nösi dödögu hegöi abula dödögu.” Tatu omasi ita wangokhögö töi si sökhi tobali niha si tola mufaduhusi tödö. Hadia mbua-bua sanolo yaʼita wamalua daʼö? Datatutunö lima ngawalö moroi ba gotaluania.

12. Hana wa faʼomasi andrö zi tobali dane-dane moroi ba waʼafaduhu dödö? Beʼe duma-duma.

¹² Faʼomasi zi tobali dane-dane moroi ba waʼafaduhu dödö. So dombua goroisa sebua nitutunö Yesu yaʼia daʼö mangomasiʼö Yehowa hegöi awöda niha. (Mat. 22:37-39) Tola mufaduhusi tödö Yehowa, ba yaʼia andrö duma-duma soʼahonoa ba wamalua daʼö. Faʼomasida khö Yehowa zamarou yaʼita ba woloʼö duma-dumania enaʼö tobali ita niha si tola mufaduhusi tödö. Faʼomasida khö ndra talifusöda göi zamarou yaʼita ba wozago rahasiara. Tatu lö omasi ita tatutunö hadia ia zi möi fangailara, fangafökhö dödöra mazui si tobali abula dödöra.—Yoh. 15:12.

13. Hewisa wa tola tobali fanolo khöda wangide-ngideʼö enaʼö tobali ita niha si tola mufaduhusi tödö?

¹³ Fangide-ngideʼö zanolo yaʼita enaʼö tobali ita niha si tola mufaduhusi tödö. Niha Keriso si so fangide-ngideʼö, lö iforege enaʼö lasuno ia niha börö me yaʼia zi oföna mamatunö hadia ia. (Fil. 2:3) Lö göi iforege enaʼö lawaʼö tödöra niha wa tohude ia börö me iʼila fefu rahasia. Na so gabula dödö salua, fangide-ngideʼö zanolo yaʼita enaʼö lö tatutunö ba niha böʼö mbua gera-erada samösa sanandrösa ba ngawalö hadia ia si lö itutunö Sura Niʼamoniʼö mazui publikasida.

14. Hewisa wa möi fanoloda waʼatua-tua enaʼö tobali ita niha si tola mufaduhusi tödö?

¹⁴ Faʼatua-tua zanolo niha Keriso enaʼö iʼila hezo ’ginötö wa lö hede-hede ba inötö wahuhuosa’. (Sango. 3:7) So ngawua wehede si tohude ba zi hauga banua yaʼia daʼö ”Amaedola wirö na humede ba amaedola ganaʼa na tahonogö ita”. Eluahania, itaria abölö sökhi na talau zi lö hede-hede moroi na fahuhuo ita. Daʼö mbörö wa iwaʼö ba Gamaedola 11:12 ”Niha sebua faʼatua-tua lö hede-hedenia.” Angeragö duma-duma daʼa. So samösa zatua sokubaloi si no ara mangai halöwö, asese laʼandrö khönia ba wangasiwai abula dödö salua ba mbanua niha Keriso tanö böʼö. Imane satua sokubaloi si so ba gangowuloa si fao yaʼia, ”Lö irai itutunö gabula dödö salua ba mbanua niha Keriso tanö böʼö.” Andrö wa lafosumange ia ira satua sokubaloi tanö böʼö si so ba mbanua niha Keriso si fao yaʼia. Itugu lafaduhusi tödö ia wa lö irai ifatunö rahasiara ba niha böʼö.

15. Hana wa moguna tatörö zindruhu enaʼö lafaduhusi tödö ita niha böʼö? Beʼe duma-duma.

¹⁵ Moguna tatörö zindruhu. Tola tafaduhusi tödö niha sanörö sindruhu börö me taʼila wa hasambalö iwaʼö zindruhu. (Ef. 4:25; Heb. 13:18) Duma-dumania, omasiʼö ödouʼö waʼonekhemö wamahaʼö niha ba Zura Niʼamoniʼö. Öʼandrö khö zi samösa niha enaʼö ifondrondrongo huhuo nifaʼemamö ba ifatunö khömö hadia manö zinangea ödouʼö.  Na simanö, haniha zi faduhu dödöu wamalua daʼö? Hadia niha sanuno-nuno yaʼugö enaʼö lö afökhö dödöu mazui niha sanörö sindruhu? Imane Sura Niʼamoniʼö, ”Sökhi wanegu si lö mubiniʼö moroi ba waʼomasi si lö muforomaʼö. Tandra waʼalöfaröi na iʼamenesi ita si fahuwu khöda hewaʼae afökhö.” (Amd. 27:5, 6) Sindruhu wa abua ba afökhö wanemaʼö degu-tegu andrö ba wamobörö, hizaʼi moguna ia khöda sagötö faʼara.

16. Moloʼö Amaedola 10:19, hana wa moguna so khöda wanaha tödö?

¹⁶ Moguna so khöda wanaha tödö. Bua-bua daʼa zanolo yaʼita enaʼö tola tataha mbeweda ba ginötö tedönisi dödöda ba wamatunö rahasia. (Baso Gamaedola 10:19.) Tola manö abua khöda wangoromaʼö fanaha tödö ba ginötö taʼogunaʼö media sosial. Na lö mangelama ita, tola manö tafatunö rahasia ba niha sato. Böi olifu ita, na so nibeʼeda ba media sosial, lö taʼila tatatugöi hewisa wangogunaʼö niha böʼö daʼö ba hadia manö gabula dödö niʼasogönia. Fanaha tödö göi zanolo yaʼita na laʼohe ita föna nududa. Duma-dumania, na lasofu-sofu khöda ira folisi ba mbanua si lö manehegö halöwö nifaluada, tatu lö tatutunö ngawalö hadia ia zi tola mamaʼala faʼauri ndra talifusöda. Ba ginötö daʼö hegöi ba ginötö tanö böʼö, moguna taʼoʼö goi-goi enaʼö ’taduhö mbawada’. (Si. 39:1) Moguna tobali ita niha si tola mufaduhusi tödö, he ba nösi nomoda, si fahuwu khöda, ira talifusöda hegöi niha tanö böʼö. Ba wamalua daʼö, moguna so khöda wanaha tödö.

17. Hadia nifaluada fefu ba wondrorogö faʼafaduhu dödö ba mbanua niha Keriso?

¹⁷ Taʼandrö sibai saohagölö khö Yehowa me no ikaoni ita tobali ösi nomonia sangokhögö faʼomasi ba si tola mufaduhusi tödö! Fefu ita, moguna taforege enaʼö lafaduhusi tödö ita ira talifusöda. Na taforomaʼö waʼomasi, fangide-ngideʼö, faʼatua-tua, fanörö sindruhu ba fanaha tödö tola tarorogö waʼafaduhu dödö ba mbanua niha Keriso. Dataforege enaʼö tola lafaduhusi tödö ita niha böʼö. Dataʼoʼö Lowalangida Yehowa ba taforomaʼö wa tola mufaduhusi tödö ita.