ARTIKEL WAMAHAʼÖ 39
Hadia No Tesura Döimö ba ”Zura Wangorifi”?
”Musura fönania mbuku famasugi ba dödö, yaʼia daʼö buku sanandrösa ba döi niha sangataʼufi Yehowa.”—MAL. 3:16.
SINUNÖ 61 Böi Awuwu, Yaʼami Samaduhuʼö!
NITUTUNÖ *
Sagötö zi hauga ribu fakhe andre, lö tebulö inönö döi nono mbanuania Yehowa ba ”zura wangorifi” (Faigi ngenoli si 1-2)
1. Moloʼö Maleakhi 3:16, hadia mbuku niʼokhögö Yehowa ba hadia nisurania ba daʼö?
SO KHÖ Yehowa mbuku si tohude ba no isura ba daʼö döi nono mbanuania si lö faröi, iʼotarai moroi khö Habeli. * (Luk. 11:50, 51) Sagötö zi hauga ribu fakhe, lö aetu inönö döi nono mbanuania Yehowa ba iadaʼa no so zuta döira ba mbuku daʼö. Ba Zura Niʼamoniʼö lafotöi ia ’buku famasugi ba dödö’, ’sura wangorifi’ hegöi ”gölu-gölu zura waʼauri”. Ba wamahaʼö daʼa tafotöi ia ’sura wangorifi’.—Baso Maleakhi 3:16; Fam. 3:5; 17:8.
2. Haniha manö zi tesura töi ba zura wangorifi andrö, ba hewisa enaʼö tesura döida ba daʼö?
2 Ba mbuku si tohude andre, no tesura fefu döi nono mbanua Yehowa samosumange ba samolakhömi töinia. Niha si no tesura töi ba mbuku daʼö, tebeʼe khöra ginötö ba wanöndra faʼauri si lö aetu. Iadaʼa, tola tesura döida ba mbuku andrö na lö tebulö taʼokhögö wahuwusa saro khö Yehowa si teʼodane-dane ba höli nibeʼe Nononia, Yesu Keriso. (Yoh. 3: 16, 36) Tatu omasi ita na tesura döida ba mbuku daʼö, he na sanötöna faʼauri ba zorugo ita mazui ba gulidanö.
3-4. (a) Na no tesura döida iadaʼa ba zura wangorifi, hadia hasambalö tasöndra waʼauri si lö aetu? Tutunö. (b) Hadia nitutunöda ba wamahaʼö daʼa hegöi ba wamahaʼö aefa daʼa?
3 Hadia fefu döi niha si no tesura ba mbuku daʼö hasambalö lasöndra waʼauri si lö aetu? Lö si tatu. Datanehegö wehede Yehowa khö Moze nisurania ba 2 Moze 32:33. Imane Yehowa, ”Dozi samalua horö fönagu, uheta döinia ba mbukugu.” Na simanö, töi niha si no tesura ba mbuku daʼö tola nasa muheta. Amaedola no isura daʼö Yehowa faoma fetolo. (Fam. 3:5) Na lö faröi ita irugi gamozua, awena lö tebulö so döida ba mbuku daʼö amaedola zi no tesura ia faoma tawa fena.
4 Iadaʼa, tola manö so wanofu-nofu si tumbu ba gera-erada. Duma-dumania, hadia niwaʼö Zura Niʼamoniʼö sanandrösa ba döi niha si no tesura ba zura wangorifi hegöi si löʼö? Hawaʼara lasöndra waʼauri si lö aetu ira niha si no tesura töi ba zura daʼö? Hewisa göi niha si no mate si lö fakhamö manöndra faʼaboto ba dödö sanandrösa khö Yehowa? Hadia tesura göi döira ba mbuku daʼö? Fanofu-nofu daʼa, tatutunö wanema linia ba wamahaʼö daʼa hegöi ba wamahaʼö aefa daʼa.
HANIHA MANÖ ZI SO TÖI BA ZURA WANGORIFI?
5-6. (a) Moloʼö Filifi 4:3, haniha manö zi no tesura töi ba zura wangorifi? (b) Hawaʼara dania tesura döira faoma tawa fena?
5 Haniha manö zi no tesura töi ba zura wangorifi andrö? Enaʼö taʼila wanema linia, datatutunö lima ngawawa niha. Taʼila dania ngawawa döi niha nisura ba zura wangorifi hegöi si löʼö.
6 Ngawawa siföföna yaʼia daʼö niha nibayoini nifili awö Yesu ba wamatörö ba zorugo. Hadia no tesura döira iadaʼa ba zura wangorifi? Noa. Simane niwaʼö zinenge sotöi Faulo khö ndra talifusönia ba Wilifi, no tesura döi niha nibayoini ba zura wangorifi. (Baso Wilifi 4:3.) Hizaʼi, enaʼö lö tebulö so döira ba mbuku daʼö, moguna laforomaʼö waʼalöfaröi. Fatua lö mate ira mazui fatua lö alua wamakao sabölö-bölö, latema dania wamotandro safuria. Ba ginötö daʼö dania, amaedola zi no tesura döira faoma tawa fena si tebai muheta.—Fam. 7:3.
7. Moloʼö Famaʼeleʼö 7:16, 17, hawaʼara tesura faoma tawa fena döi-töi niha si farahu ba ngawawa sato ba zura wangorifi?
7 Ngawawa si dua yaʼia daʼö ngawawa sato si farahu ba mbiri-biri tanö böʼö. Hadia no tesura döira iadaʼa ba zura wangorifi? Noa. Hadia so nasa döira ba mbuku daʼö na no teʼorifi ira moroi ba Hamagedo? So. (Fam. 7:14) Iwaʼö Yesu wa niha si no amaedola mbiri-biri andrö, ”lasöndra waʼauri irugi zi lö aetu”. (Mat. 25:46) Hizaʼi, lö iʼanemaiʼö lasöndra waʼauri si lö aetu na no aefa Hamagedo. Amaedola zi no tesura nasa döira faoma fetolo ba zura wangorifi. Sagötö Wamatörö si Saribu Fakhe, Yesu ’zokubaloi yaʼira ba iʼohe ira ba gumbu nidanö fangorifi’. Na laʼoʼö Keriso ba lö faröi ira khö Yehowa irugi wanguhuku safuria, awena dania amaedola zi no tesura döira faoma tawa fena ba zura wangorifi.—Baso Wamaʼeleʼö 7:16, 17.
8. Haniha zi lö musura töi ba zura wangorifi, ba hadia zalua khöra?
8 Ngawawa si tölu yaʼia daʼö, niha si no amaedola nambi nihori dania ba Hamagedo. Lö hadöi töira ba zura wangorifi. Iwaʼö Yesu wa ”nihori dania [ira] sagötö faʼara”. (Mat. 25:46) Isura göi sinenge sotöi Faulo wa ”göna ira faʼatekiko sagötö faʼara”. (2 Te. 1:9; 2 Fe. 2:9) Sagötö sejarah, so niha sanandrawaisi eheha, yaʼia daʼö niha si no manöndra faʼaboto ba dödö sanandrösa khö Yehowa, hizaʼi lö omasi ira lafalua. Göna ira faʼatekiko sagötö faʼara tenga faʼauri sagötö faʼara. Tatu manö wa lö tesusugi ira. (Mat. 12:32; Mrk. 3:28, 29; Heb. 6:4-6) Iadaʼa, datatutunö dombua ngawawa niha nisusugi ba gulidanö.
NIHA NISUSUGI
9. Moloʼö Halöwö Zinenge 24:15, haniha zi dombua ngawawa nisusugi ba hadia gamaehutara?
9 Itutunö khöda Sura Niʼamoniʼö wa so dombua ngawawa dania niha nisusugi ba tebeʼe khöra ginötö ba wangokhögö faʼauri si lö aetu ba gulidanö, yaʼia daʼö ’niha satulö’ hegöi ’niha si lö atulö’. (Baso Halöwö Zinenge 24:15.) ’Niha satulö’ eluahania niha si lö faröi ba wamosumange Yehowa me auri ira. Hizaʼi, ’niha si lö atulö’ lö irai lafosumange Yehowa me auri ira. Ato ba gotaluara zamalua si lö sökhi. Tobali, börö me tesusugi dania zi dombua ngawawa andre, hadia daʼö geluahania wa tesura döira ba zura wangorifi? Ba wameʼe fanema li moroi ba wanofu daʼö, datazara-zara wanutunö si dombua ngawawa andre.
10. Hana wa tesusugi ’niha satulö’, ba hadia halöwö nibeʼe ba niha nisusugi andrö ösa? (Faigi göi artikel ”Fanofu Zombaso” ba majalah daʼa sanandrösa ba wanusugi salua ba gulidanö.)
10 Ngawawa si öfa yaʼia daʼö ’niha satulö’. Fatua lö mate ira, no tesura döira ba zura wangorifi. Hadia muheta döira ba zura andrö me mate ira? Löʼö, börö me ”auri” nasa ira ba wamaigi Yehowa. Imane Sura Niʼamoniʼö, ”[Yehowa andrö] Lowalangi niha sauri, tenga Lowalangi niha si mate. Auri sa ira fefu ba wamaiginia.” (Luk. 20:38) Eluahania, ba ginötö tesusugi dania niha satulö andrö ba gulidanö, so döira ba zura wangorifi hewaʼae na ha faoma ”fetolo” wanura yaʼia. (Luk. 14:14) So ba gotaluara zanema halöwö tobali ”sondröniaʼö ba zi sagörö ulidanö”.—Si. 45:16.
11. Hadia zinangea lafalua ira ’niha si lö atulö’ enaʼö tesura döira ba zura wangorifi?
11 Ngawawa si lima yaʼia daʼö ’niha si lö atulö’. Me auri ira nasa lö lafalua zatulö, te börö me lö saboto ba dödöra goroisa Yehowa. Börö daʼö, lö si tesura döira ba zura wangorifi. Hizaʼi me isusugi ira Lowalangi, ibeʼe khöra ginötö enaʼö tola tesura döira ba zura wangorifi. Oya wanolo sinangea mubeʼe ba ’niha si lö atulö’ andre. Me mböröta fatua lö si mate ira, ato ba gotaluara zamalua si lö sökhi. Tobali, moguna mufahaʼö ira hewisa lala waʼauri si tefaudu moloʼö goi-goi Yehowa. Börö daʼö, so dania wamahaʼö si tohude sagötö sejarah nifalua Wamatörö Lowalangi.
12. (a) Haniha dania zamahaʼö niha si lö atulö? (b) Hadia dania zalua ba niha si lö omasi mamalua famahaʼö si no latema?
12 Haniha dania zamahaʼö niha si lö atulö? Ngawawa sato hegöi niha satulö si no tesusugi. Niha si lö atulö, moguna fahuwu ira khö Yehowa ba lalulu waʼaurira khönia enaʼö tola tesura döira ba zura wangorifi. Yesu Keriso hegöi niha nibayoini si fao khönia, lahaogö wamaigi-maigi hewisa wanemaʼö ndra niha daʼa hadia zi no lafahaʼö yaʼira. (Fam. 20:4) Hasambalö muhori niha si lö omasi mamalua hadia zi no lafahaʼö yaʼira hewaʼae no töra 100 fakhe ndröfira. (Yes. 65:20) Yehowa hegöi Yesu tola labaso dödö niha, ba lö latehegö na so zamakiko ulidanö si bohou.—Yes. 11:9; 60:18; 65:25; Yoh. 2:25.
TESUSUGI BA WANÖNDRA FAʼAURI SI LÖ AETU BA ENAʼÖ TEHUKU
13-14. (a) Hadia waʼaboto ba dödö niʼokhögöda mböröta sanandrösa ba wehede Yesu nisura ba Yohane 5:29? (b) Hadia zinangea taʼangeragö moroi ba wehedenia andrö?
13 No irai itutunö Yesu sanandrösa ba niha nisusugi ba gulidanö. Imane: ”Irugi inötö dania larongo linia dozi si so ba lewatö, ba möi ira yawa. Samalua si sökhi tesusugi dania ba wanöndra faʼauri si lö aetu, ba samalua si lö sökhi tesusugi enaʼö tehuku.” (Yoh. 5:28, 29) Hadia geluaha niwaʼö Yesu?
14 Me mböröta, tawaʼö wa so ösa moroi ba gotalua niha nisusugi andrö zamalua si sökhi ba so göi zamalua si lö sökhi na no aefa tesusugi ira. Hizaʼi, datafuli tahaogö tanehegö wehede Yesu andrö. Iwaʼö wa niha ’samalua si sökhi, tesusugi dania ira ba wanöndra faʼauri si lö aetu’ ba niha ’samalua si lö sökhi tesusugi dania enaʼö tehuku’. Tobali eluaha niwaʼö Yesu yaʼia daʼö amuata si sökhi hegöi si lö sökhi nifaluara fatua lö mate ira. Ba tefaudu daʼö börö me ba gulidanö si bohou dania lö hadöi samalua si lö sökhi. Hizaʼi, hadia geluahania ”tesusugi dania ba wanöndra faʼauri si lö aetu” ba ”tesusugi enaʼö tehuku”?
15. Haniha ’nisusugi dania ba wanöndra faʼauri si lö aetu’, ba hadia mbörö?
15 Niha samalua si sökhi, ”tesusugi dania ba wanöndra faʼauri si lö aetu” börö me tesura döira ba zura wangorifi. Börö daʼö, niha ”samalua si sökhi” nitutunö ba Yohane 5:29 fagölö ira ba ’niha satulö’ nitutunö ba Halöwö Zinenge 24:15. Tefaudu waʼaboto ba dödö daʼa simane nitutunö ba Roma 6:7, sangumaʼö: ”Na no mate zi samösa niha, no teʼefaʼö ia moroi ba horönia.” Nehegö wa niheta yaʼia daʼö horö nifaluara. Hizaʼi, lö tebulö itörö tödö Yehowa waʼalöfaröira. Börö daʼö, lö saheta döira ba zura wangorifi. (Heb. 6:10) Hewaʼae simanö, na no aefa tesusugi dania ira, moguna larorogö nasa waʼalöfaröira enaʼö lö tebulö so döira ba zura wangorifi andrö sagötö faʼara.
16. Hadia geluahania ”tesusugi enaʼö tehuku”?
16 Hewisa niha samalua si lö sökhi fatua lö mate ira? Hewaʼae no muʼefaʼö horöra me mate ira, lö irai lafosumange Yehowa. Lö si tesura döira ba zura wangorifi. Börö daʼö, niha ”samalua si lö sökhi” nitutunö ba Yohane 5:29, fagölö ira ba ’niha si lö atulö’ nitutunö ba Halöwö Zinenge 24:15, ’tesusugi ira enaʼö tehuku’. * Eluahania, na no aefa tesusugi ira, inehe-nehegö ba ifaigi-faigi ira Yesu. (Luk. 22:30) Aefa daʼö, Yesu zotatugöi hadia tesura döira ba zura wangorifi andrö. Na laröi lala waʼaurira si lö sökhi ba lalulu waʼaurira khö Yehowa, awena tesura döira ba zura wangorifi andrö.
17-18. Hadia zinangea lafalua ira niha nisusugi ba gulidanö ba hadia ’gamuata’ nitutunö ba zura Wamaʼeleʼö 20:12, 13?
17 Ba Wamatörö si Saribu Fakhe, so dania gölu-gölu zura si bohou nibokai. Ba daʼö so goroisa, ba fefu niha nisusugi moguna laʼoʼö goroisa andrö, he niha satulö hegöi si lö atulö. Daʼö niʼila zinenge sotöi Yohane ba zi sambua angilata. Imane, ”Uʼila niha si no mate si zizio föna dadaoma andrö, he niha si toʼölö manö hegöi niha si tehöngö ba tebokai fefu gölu-gölu zura. Hizaʼi, so gölu-gölu zura tanö böʼö nibokai, yaʼia daʼö gölu-gölu zura wangorifi. Muʼetuʼö hukuma niha si no mate moloʼö nisura ba gölu-gölu zura andrö, balazi gamuatara zamösana.”—Fam. 20:12, 13.
18 Hadia muhuku niha nisusugi moloʼö ’amuatara’ ba zilalö fatua lö mate ira? Löʼö! Simane si no tatutunö, no teʼefaʼö horöra ba ginötö mate ira. Börö daʼö, eluaha ngawua wehede ’amuatara’ ba ayati daʼa yaʼia daʼö amuatara me no mufahaʼö ira ba gulidanö si bohou. Ba ginötö daʼö, ono mbanua Yehowa si lö faröi simane Noakhi, Samueli, Dawido hegöi Danieli, moguna lafahaʼö ira sanandrösa khö Yesu Keriso ba mamati ira ba höli nibeʼenia. Na yaʼira manö oya nasa zinangea lafahaʼö ira, mendrua manö niha si lö atulö!
19. Hadia dania zalua ba niha sanimbagö inötö si sökhi nibeʼe khöra ba gulidanö si bohou?
19 Hadia dania zalua ba niha sanimbagö inötö si tohude andrö? Itutunö Famaʼeleʼö 20:15, ”Tetiboʼö ba mbaho alitö dozi niha si lö tesura töi ba zura wangorifi andrö.” Eluahania, tehori dania ira sagötö faʼara. Börö daʼö, moguna taforege enaʼö tesura döida ba zura wangorifi ba lö taya sagötö faʼara!
Samösa dalifusöda ira matua, ibeʼe wamahaʼö sabölö tohude nifalua sagötö Famatörö si Saribu Fakhe (Faigi ngenoli si 20)
20. Hadia wamahaʼö si tohude sagötö Wamatörö si Saribu Fakhe? (Faigi gambara ba guli majalah.)
20 Tatu tabalo-baloi Wamatörö si Saribu Fakhe andrö! Ba daʼö dania, so wamahaʼö sabölö tohude sagötö sejarah, ba muhaogö munehe-nehesi gamuata niha satulö hegöi si lö atulö. (Yes. 26:9; Hal. 17:31) Hewisa dania wamahaʼö andrö? Ba artikel aefa daʼa, tatutunö dania daʼö enaʼö itugu aboto ba dödöda ba taʼameʼegö tödö wamahaʼö sahöli-höli dödö andrö.
SINUNÖ 147 No Tefabuʼu Waʼauri si Lö Aetu
^ Ba wamahaʼö daʼa, tatutunö dania waʼaboto ba dödö si no mubohouni sanandrösa ba wehede Yesu nisura ba Yohane 5:28, 29. Ba ayati daʼö, itutunö Yesu sanandrösa ba niha ’nisusugi ba wanöndra faʼauri si lö aetu’ hegöi niha ’nisusugi enaʼö tehuku’. Ba wamahaʼö daʼa dania, tatutunö hadia zindruhunia geluaha wehede Yesu andrö.
^ Ibörögö tesura mbuku daʼa iʼotarai me ”tumbu ngaʼötö niha ba gulidanö” yaʼia daʼö iʼotarai me so niha si tola muhöli moroi ba horö. (Mat. 25:34; Fam. 17:8) Na simanö, tola manö Habeli zi oföna tesura töi ba zura wangorifi andrö.
^ Ba zilalö, tawaʼö tödöda wa ngawua wehede ’fanguhuku’ niʼogunaʼö ba daʼa eluahania muʼetuʼö hukuma. Sindruhu sa, tola manö daʼö geluahania. Hizaʼi, te eluaha wehede Yesu ba ayati daʼa moguna mufaigi-faigi mazui munehe-nehegö gamuata zi samösa niha. Amaedola mutandraigö ua sakali niha daʼö. Moloʼö si sambua kamus ba li Yunani, ngawua wehede ’muhuku’ ba ayati daʼö eluahania ”muhaogö mufareso gamuata zi samösa niha”.
