ARTIKEL WAMAHAʼÖ 40
Manolo Niha Sato ba Woloʼö Sindruhu
”Niha sanolo niha sato ba woloʼö sindruhu, mohaga ira simane döfi irugi zi lö aetu.”—DAN. 12:3.
SINUNÖ 151 Muʼao Ia
NITUTUNÖ *
1. Hadia zalua si möi fangomuso dödöda ba Wamatörö si Saribu Fakhe?
KHALAIGÖ hawaʼomuso dödöda na ibörögö tesusugi niha ba gulidanö ba Wamatörö Keriso si Saribu Fakhe! Fefu niha, omasi ira ifuli falukha ba nösi nomora si no mate mazui khö zi fahuwu khöra. Irasoi göi zimane daʼö Yehowa. (Yob. 14:15) Tobali, ba ginötö tesusugi dania ira, fefu niha omuso dödöra. Ba wamahaʼö silalö, no tatutunö wa ’niha satulö’ si tesura töi ba zura wangorifi, ”tesusugi dania [ira] ba wanöndra faʼauri si lö aetu”. (Hal. 24:15; Yoh. 5:29) Tola manö na no aefa Hamagedo dania, ato niha niʼomasiʼöda nisusugi. * Aefa daʼö, ’niha si lö atulö’ mususugi dania ira enaʼö tehuku. Yaʼira andrö niha si lö irai manöndra faʼaboto ba dödö sanandrösa khö Yehowa mazui si lö irai mamosumange yaʼia.
2-3. (a) Moloʼö Yesaya 11:9, 10, hadia dania nifahaʼö ba wamahaʼö si tohude sagötö sejarah? (b) Hadia nitutunöda ba wamahaʼö daʼa?
2 Fefu niha nisusugi, oya nasa zinangea lafahaʼö yaʼira, he niha satulö hegöi niha si lö atulö. (Yes. 26:9; 61:11) Daʼö mbörö wa mufalua wamahaʼö sabölö tohude sagötö sejarah. (Baso Yesaya 11:9, 10.) Hadia manö zinangea lafahaʼö ira? Niha si lö atulö, moguna lafahaʼö ira sanandrösa khö Yesu Keriso, Famatörö Lowalangi hegöi höli. Moguna göi lafahaʼö ira hadia mbörö wa tohude sibai döi Yehowa ba hana wa yaʼia zinangea mamatörö. Niha satulö, moguna nasa lafahaʼö ira sanandrösa ba gohitö dödö Yehowa ba gulidanö nizara-zarania famatunö ba zilalö. So göi ba gotaluara zi no mate fatua lö ahori so Zura Niʼamoniʼö. Ba daʼa taʼila wa oya nasa zinangea lafahaʼö ira, he niha satulö hegöi si lö atulö.
3 Ba wamahaʼö andre, datatutunö wanofu-nofu daʼa: Hewisa dania wamalua famahaʼö sabölö tohude andrö? Hadia dania zalua ba niha soloʼö famahaʼö si no latema? Hadia göi zalua ba niha si lö moloʼö famahaʼö si no latema? Moguna taʼila wanema li moroi ba zinofu-nofu daʼö. Börö daʼö, datafahaʼö ita moroi ba wamaʼeleʼö sadöni dödöda ba mbuku Danieli hegöi buku Wamaʼeleʼö, sanolo yaʼita ba wamaudugö faʼaboto ba dödöda hadia dania zalua ba ginötö tesusugi niha si no mate. Si oföna, datatutunö ngawalö zalua nifaʼeleʼö ba mbuku Danieli 12:1, 2.
”NIHA SI NO MÖRÖ BARÖ DANÖ MAOSO DANIA IRA”
4-5. Moloʼö Danieli 12:1, hadia zalua ba götö safuria?
4 Baso Danieli 12:1. No ihaogö wanutunö khöda buku Danieli hadia manö dania zalua ba götö safuria. Duma-dumania, iwaʼö ba Danieli 12:1 wa Mikhaʼeli yaʼia daʼö Yesu Keriso, ’mozizio ia ba wangoʼawögö ono mbanua Lowalangi’. No alua wamaʼeleʼö andrö iʼotarai me döfi 1914 me tefataro Yesu tobali Razo ba Wamatörö Lowalangi ba zorugo.
5 Ifaʼeleʼö göi Danieli wa ”maoso” dania Yesu ba ”ginötö waʼatosasa si lö irai alua iʼotarai me tefasindro zi sambua soi irugi ba götö daʼö”. Fehede ’inötö waʼatosasa’ yaʼia daʼö ’famakao sabölö-bölö’ nitötöi ba Mataiʼo 24:21. Ba gafuriata ginötö waʼatosasa andrö yaʼia daʼö ba Hamagedo, maoso dania Yesu ba wangoʼawögö ono mbanua Lowalangi. Ba mbuku Wamaʼeleʼö, ifotöi niha niʼoʼawögö Yesu andrö ”ngawawa sato . . . si no teʼorifi moroi ba wamakao sabölö-bölö”.—Fam. 7:9, 14.
6. Hadia dania zalua ba ngawawa sato na no teʼefaʼö ira ba wamakao sabölö-bölö? Tutunö. (Faigi göi artikel ”Fanofu Zombaso” ba majalah daʼa sanandrösa ba wanusugi ba gulidanö.)
6 Baso Danieli 12:2. Hadia dania zalua ba ngawawa sato na no teʼefaʼö ira moroi ba wamakao sabölö-bölö? Ba zilalö, te tawaʼö tödöda wa famaʼeleʼö ba Danieli 12:2 eluahania fanusugi ba wamati salua ba götö safuria. Hizaʼi, iadaʼa aboto ba dödöda ayati daʼö eluahania femaoso salua dania ba gulidanö si bohou. Hezo taʼila? Ba li sindruhunia, ngawua wehede ’tanö’ si so ba Danieli 12:2 fagölö ira ngawua wehede ”gawu-gawu” si so ba Yobi 17:16. Ba ayati daʼö, ngawua wehede ”gawu-gawu” manandrösa ia ba ”Lewatö”. Tobali, famaʼeleʼö si so ba Danieli 12:2 eluahania fanusugi niha si no mate salua na no awai ngaluo safuria mazui na no aefa Hamagedo. *
7. (a) Haniha dania niha sanöndra ”faʼauri si lö aetu”? (b) Hana wa fanusugira andrö mufotöi ia ’fanusugi sabölö sökhi’?
7 Iwaʼö ba Danieli 12:2 wa so ösa niha nisusugi ba wanöndra ”faʼauri si lö aetu”. Yaʼira andrö niha samorege ba wanöndra faʼaboto ba dödö sanandrösa khö Yehowa hegöi Yesu ba lö faröi ira sagötö Wamatörö si Saribu Fakhe. (Yoh. 17:3) Fanusugira andrö ’fanusugi sabölö sökhi’ moroi ba wanusugi si no irai alua. (Heb. 11:35) Hadia mbörö? Börö me niha nisusugi ba zilalö ifuli zui mate ira.
8. Hadia geluahania so niha ”niʼailasi ba so göi niʼoʼaya sagötö faʼara”?
8 Lö fefu niha nisusugi omasi ira tobali nifahaʼö Yehowa. Moloʼö famaʼeleʼö Danieli, so ösa niha nisusugi ”niʼailasi ba so göi niʼoʼaya sagötö faʼara”. Börö me molawa ira, andrö wa lö tesura döira ba zura wangorifi. Lö hadöi lasöndra waʼauri si lö aetu. ”Teʼailasi ira sagötö faʼara” mazui tehori sagötö faʼara. Börö daʼö, itutunö Danieli 12:2 mbua safuria nitema niha nisusugi, ba muʼetuʼö daʼö moloʼö amuatara me no aefa tesusugi ira. * (Fam. 20:12) So zanöndra faʼauri si lö aetu ba so göi zi löʼö.
MANOLO NIHA SATO BA WOLOʼÖ SINDRUHU
9-10. Hadia nasa zalua dania na no aefa wamakao sabölö-bölö, ba haniha manö zi ”hulö dalu mbanua sohaga”?
9 Baso Danieli 12:3. Hadia nasa zalua na no aefa wamakao sabölö-bölö? Simane nisura ba Danieli 12:2, ba ayati 3 göi ifaʼeleʼö hadia dania zalua na no aefa wamakao sabölö-bölö.
10 Haniha zi ”hulö dalu mbanua sohaga”? Enaʼö taʼila wanema linia, datafaigi wehede Yesu nisura ba Mataiʼo 13:43: ”Ba luo daʼö, niha satulö humaga ira simane haga luo ba Wamatörö Namara.” Nitutunö Yesu ba daʼa sanandrösa ba ”niha si möi ba Wamatörö Lowalangi”, yaʼia daʼö ira talifusönia nibayoini si fao khönia ba Wamatörö ba zorugo. (Mat. 13:38) Tobali, nitutunö ba Danieli 12:3 manandrösa ba niha nibayoini ba hadia dania nifaluara sagötö Wamatörö si Saribu Fakhe.
Falulu fohalöwö zi 144.000 khö Yesu Keriso ba wamaʼanö famahaʼö sabölö tohude nifalua sagötö Wamatörö si Saribu Fakhe (Faigi ngenoli si 11)
11-12. Hadia halöwö niha nibayoini si 144.000 sagötö Wamatörö si Saribu Fakhe?
11 Hewisa niha nibayoini ba wanolo ”niha sato ba woloʼö sindruhu”? Falulu fohalöwö ira khö Yesu Keriso ba wamalua famahaʼö sabölö tohude sagötö Wamatörö si Saribu Fakhe ba gulidanö. Tenga ha mamatörö ira tobali razo, hizaʼi niha si 144.000 mangai halöwö ira göi tobali ere. (Fam. 1:6; 5:10; 20:6) Tobali, fao ira ”ba wamadöhö fefu soi”, mazui latolo niha gulidanö irege moʼahonoa. (Fam. 22:1, 2; Hez. 47:12) Tatu omuso sibai dödöra wamalua halöwö daʼö!
12 Haniha zi farahu ba ”niha sato” nitolo ba woloʼö sindruhu? Yaʼira andrö niha nisusugi, niha niʼefaʼö moroi ba Hamagedo mazui te iraono sawena tumbu dania ba gulidanö si bohou. Ba gangohorita Wamatörö si Saribu Fakhe, moʼahonoa fefu niha sauri ba gulidanö. Hawaʼara tesura döira faoma tawa fena ba zura wangorifi tenga saʼae faoma fetolo?
FANANDRAIGÖ SAFURIA
13-14. Hadia zinangea lafalua ira niha soʼahonoa enaʼö lasöndra waʼauri si lö aetu?
13 Moguna tatörö tödöda, hewaʼae no moʼahonoa zi samösa niha tenga daʼö geluahania wa hasambalö isöndra waʼauri si lö aetu. Moʼahonoa Gadamo faoma Khawa mböröta. Hizaʼi, enaʼö lasöndra waʼauri si lö aetu moguna laforomaʼö wa laʼoʼö nifakhoi Yehowa. Alimagö sibai, lö moloʼö ira.—Rom. 5:12.
14 Ba gangohorita zi 1.000 fakhe, moʼahonoa fefu niha. Hizaʼi, hadia lö faröi ira fefu ba wotuhini famatörö Yehowa sagötö faʼara? Mazui so niha si faröi simane Adamo faoma Khawa? Ba daʼa taʼila wa moguna iforomaʼö waʼalöfaröi si samösa niha. Hizaʼi hewisa lalania?
15-16. (a) Hawaʼara ginötö ba niha fefu ba wangoromaʼö faʼalöfaröira khö Yehowa? (b) Hadia nitema niha si faröi hegöi si lö faröi?
15 Sagötö Wamatörö si Saribu Fakhe, mukuru Zatana irege tebai saʼae ifaelungu niha. Hizaʼi, na no aefa zi 1.000 fakhe, muʼefasi ia ba iforege wondrönisi tödö niha soʼahonoa enaʼö mamadaö ira. Fanandraigö daʼa zameʼe inötö khö zi samösa niha ba wangoromaʼö hadia sindruhu-ndruhu ifosumange Lowalangi ba ituhini wamatörönia. (Fam. 20:7-10) Nifaluara andrö dania zotatugöi hadia musura döira faoma fena mazui löʼö.
16 Itutunö khöda Sura Niʼamoniʼö wa so ösa dania niha si faröi simane Adamo ba Khawa, latimbagö wamatörö Yehowa. Hadia zalua khöra? Imane ba Wamaʼeleʼö 20:15, ”Tetiboʼö ba mbaho alitö dozi niha si lö tesura töi ba zura wangorifi andrö.” Tobali, muhori dania niha samadaö andrö sagötö faʼara. Hizaʼi, ato göi niha si lö faröi ba teʼefaʼö ira ba wanandraigö safuria. Tesura döira ba zura wangorifi sagötö faʼara.
SALUA BA ”GÖTÖ SAFURIA”
17. Hadia niwaʼö zi samösa malaʼika khö Danieli sanandrösa ba götöda iadaʼa? (Danieli 12:4, 8-10)
17 Tatu tabalo-baloi hawaʼara alua daʼö fefu! Hizaʼi so duria si tohude nitema Danieli moroi khö zi samösa malaʼika sanandrösa ba götöda iadaʼa, yaʼia daʼö ”götö safuria”. (Baso Danieli 12:4, 8-10; 2 Ti. 3:1-5) Imane malaʼika andrö, ”Fahöna dania waʼaboto ba dödö.” Eluahania, ba götö safuria dania sindruhu-ndruhu aboto ba dödö nono mbanua Lowalangi gangilata Danieli andrö. Iwaʼö göi malaʼika daʼö wa ba götöda dania ”niha si lö sökhi, lafalua zi lö sökhi, ba lö hadöi niha si lö sökhi sangokhögö faʼatua-tua”.
18. Hadia zi lö ara tö alua ba niha si lö sökhi?
18 Ba götöda iadaʼa, ato niha samalua si lö sökhi, ba na tafaigi sökhi-sökhi manö waʼaurira. (Mal. 3:14, 15) Hizaʼi ba zi lö ara tö, ihuku niha si lö sökhi Yesu si no amaedola nambi ba ifabali ira moroi ba niha si hulö mbiri-biri. (Mat. 25:31-33) Lö teʼefaʼö niha si lö sökhi ba wamakao sabölö-bölö, ba lö tesusugi ira ba gulidanö si bohou. Lö tesura döira ba ”mbuku famasugi ba dödö” simane nisura ba Maleakhi 3:16.
19. Hadia zinangea tafalua iadaʼa, ba hadia mbörö? (Maleakhi 3:16-18)
19 Iadaʼa moguna taforomaʼö wa faböʼö ita moroi ba niha si lö sökhi. (Baso Maleakhi 3:16-18.) Iʼowuloi niha Yehowa enaʼö tobali ono mbanuania, simane ’okhöta si tohude’. Tatu omasi ita tobali ono mbanuania si tohude.
Khalaigö hawaʼomuso dödöda na taʼila Danieli, niha niʼomasiʼöda ba ato nasa niha tanö böʼö nisusugi ba gulidanö si bohou! (Faigi ngenoli si 20)
20. Hadia nifabuʼu Yehowa khö Danieli, ba hana wa tadöna-döna waʼalua mbuʼusa li daʼö?
20 Oya zahöli-höli dödö salua ba götöda iadaʼa. Hizaʼi ba zi lö ara tö, taʼila zahöli-höli dödö sabölö ebua. Tehori fefu waʼalösökhi ba aefa daʼö alua nifabuʼu Yehowa khö Danieli me imane, ”Hasambalö mususugi ndraʼugö ba wanema tana khöu ba ginötönia.” (Dan. 12:13) Hadia öbalo-baloi na tesusugi Danieli hegöi niha niʼomasiʼömö? Tatu manö. Börö daʼö, forege enaʼö lö faröi ndraʼugö irege lö tebulö isura döimö Yehowa ba zura wangorifi.
SINUNÖ 80 ”Mitandra ba Mifaigi Wa si Sökhi Tödö Yehowa”
^ Ba wamahaʼö daʼa, tatutunö dania sanandrösa ba waʼaboto ba dödö si no mubohouni sanandrösa ba Danieli 12:2, 3. Ba ayati daʼö, mututunö sanandrösa ba wamahaʼö sabölö tohude sagötö sejarah. Taʼila dania hawaʼara alua daʼö ba haniha zi farahu ba wamahaʼö daʼö. Tatutunö göi dania hewisa wamahaʼö daʼa möi famaʼanö niha sauri ba gulidanö ba wanaögö fanandraigö safuria na no aefa Wamatörö Keriso si Saribu Fakhe.
^ Fanusugi, tola manö mubörögö ia moroi ba niha si lö faröi si mate sagötö ngaluo safuria. Awena muwuwu tete ba ngaʼötö me föna. Na simanö daʼö, ero sambua ngaʼötö lafaondragö niha si faʼila khöra. Iwaʼö Sura Niʼamoniʼö wa niha nisusugi sauri ba zorugo ”oi niföfögö”. Börö daʼö, tola tahalö rahu-rahu wa niha nisusugi ba gulidanö oi toföfö.—1 Ko. 14:33; 15:23.
^ Daʼa waʼaboto ba dödö si no mubohouni moroi ba waʼaboto ba dödö si so ba mbuku Perhatikanlah Nubuat Daniel! faza 17 hegöi Menara Pengawal seri 38 döfi 1987, ngaʼörö 17-21.
^ Ngawua wehede ’niha satulö’ ba ’niha si lö atulö’ nisura ba Halöwö Zinenge 24:15 hegöi ’niha samalua si sökhi’ ba ’niha samalua si lö sökhi’ ba Yohane 5:29 eluahania amuata niha fatua lö mate ira mazui fatua lö tesusugi.
