Ba 1 Korindro 15:8, imane Faulo, ”Yaʼo zafuria ifalukhaisi, hulö nono sawuyu sambö baŵa.” Ba zilalö, tawaʼö tödöda wa eluaha ayati daʼa yaʼia daʼö angilata nitema Waulo sombulöʼö faʼaurinia irege tobali ia niha Keriso. Ba gangilata daʼö, iʼila wa no so Yesu ba zorugo. Hulö no oföna tumbu mazui tesusugi Waulo tobali boto eheha ba zi hauga abad fatua lö tebörögö wanusugi ba zorugo. Hizaʼi, me no mufuli muʼosisiʼö, moguna mubulöʼö waʼaboto ba dödö niʼokhögöda.

Sindruhu sa wa nitutunö Waulo ba ayati daʼa yaʼia daʼö salua irege tobali ia niha Keriso. Hizaʼi, hana wa ifagölösi ia simane ’ono sawuyu sambö baŵa’? Datatutunö hadia mbörö.

Faʼatebulö Waulo tobali niha Keriso alua ia ba zi lö mudöna-döna ba si tokea niha. Simane faʼatumbu nono sawuyu sambö baŵa, alua ia ba zi lö mudöna-döna. Me möi Zaulo (nifotöi Faulo ba gafuriata) ba Ndramaseko ba wamakao niha Keriso ba daʼö, ba zi lö idöna-idöna iʼila Yesu ba zi sambua angilata. Tokea göi ndra nifahaʼö Yesu si so ba Ndramaseko me laʼila waʼatebulö Waulo tobali niha Keriso. Modögö dödö Waulo ba zalua andrö irege balunö ia tölu hari.—Hal. 9:1-9, 17-19.

”Tenga ba ginötönia” tobali niha Keriso Waulo. Ba li Yunani, ngawua wehede ’ono sawuyu sambö baŵa’, tola göi mufoʼeluaha ia ”ono sawuyu si tumbu si tenga ba ginötönia”. Ifoʼeluaha göi daʼa The Jerusalem Bible: ”Tumbu ndraʼo ba ginötö lö hadöi sodöna-döna daʼö.” Ba ayati fatua lö daʼa, itutunö Faulo wa ato niha sangila Yesu me no aefa tesusugi ia ba fatua lö möi ia ba zorugo. (1 Ko. 15:4-8) Hizaʼi, lö niʼila Waulo me alua daʼö, börö me lö si tobali ia niha Keriso. Ba gafuriata, me no möi Yesu ba zorugo, ibeʼe gangilata khö Waulo ba zi lö idöna-döna. Me luo daʼö, tebeʼe ginötö khö Waulo ba wamaigi Yesu si no tesusugi, hewaʼae na ”tenga ba ginötönia” alua daʼö.

Iʼogunaʼö ngawua wehede daʼa Faulo ba wangoromaʼö fangide-ngideʼö. So ösa ndra sagatua-tua sangumaʼö wa ngawua wehede ’ono sawuyu sambö baŵa’, itaria muʼogunaʼö ia ba wangosiwawöi niha böʼö. Na daʼö geluaha wehede Waulo, eluahania so ba dödönia wa tenga sinangea ia tobali sinenge. Imane göi ba ayati aefa daʼö, ”Yaʼo zinenge fondrege zide-ide, ba tenga sinangea lafotöi ndraʼo sinenge börö me no ufakao mböröta mbanua niha Keriso khö Lowalangi. Wa tola tobali simane daʼa ndraʼo iadaʼa börö waʼasökhi dödö sebua moroi khö Lowalangi.”—1 Ko. 15:9, 10.

Börö daʼö, ifagölösi ia Faulo simane ono sawuyu sambö baŵa börö me: (1) ifalukhaisi ia Yesu ba zi lö mudöna-döna ba si tokea niha, (2) tobali ia niha Keriso ”tenga ba ginötönia”, (3) iwaʼö tödönia wa tenga sinangea itema gangilata sahöli-höli dödö andrö. Gofu hadia mbörö, sindruhu-ndruhu ebua sibai mböli gangilata andrö khö Waulo. Daʼö zameʼe khönia faʼafaduhu dödö wa no tesusugi Yesu. Andrö wa asese sibai idunö-dunö zalua khönia ba ginötö ituriaigö wanusugi Yesu ba niha böʼö.—Hal. 22:6-11; 26:13-18.