1. Hadia zotatugöi amuatada?

 TATU omasi ita na omuso dödö Yehowa ba gamuatada, he na awena mazui no ara tebayagö ita idanö. Börö daʼö, moguna taʼangenanöi hadia niʼera-erada. Hadia mbörö? Börö me daʼö zotatugöi hewisa gamuatada. Na asese taʼangeragö gisö-isö dödö si fasala, lua-luania tawaʼö ba tafalua zi lö sökhi. (Ef. 4:17-19) Hizaʼi, na tafoʼösi ngawalö zi sökhi ba wangera-ngerada, tola taʼomusoiʼö dödö Namada Yehowa ba wehede hegöi ba nifaluada.—Gal. 5:16.

2. Hadia manö wanofu-nofu nitutunöda ba artikel daʼa?

² Simane nitutunöda ba artikel si no aefa, itaria nasa tumbu ba wangera-ngerada gisö-isö dödö si fasala. Hewaʼae simanö, tola tahalö gangetula enaʼö lö taʼoʼö gisö-isö dödöda andrö. Fatua lö tebayagö ita idanö, moguna taböhöli wamalua ngawalö zi fatuwu khö Yehowa. Daʼö lala si oföna ba sabölö moguna ba wangeheta amuata si tohöna andrö. Hizaʼi, enaʼö sindruhu-ndruhu taʼomusoiʼö dödö Yehowa, moguna taʼoʼö goroisa andre: ”Mibohouni gamuatami.” (Kol. 3:10) Ba artikel daʼa, tatutunö wanofu-nofu andre: Hadia geluahania ’tabohouni gamuatada’? Hewisa enaʼö tola tabohouni gamuatada ba lö tebulö tafalua daʼö?

3. Hewisa niha si no ’mamohouni amuatania’? (Galatia 5:22, 23)

³ Niha si no ’mamohouni amuatania’, hasambalö iʼoʼö gamuata Yehowa. Eheha niʼamoniʼö zamatörö fangera-ngerania, nirasoinia,  hegöi nifaluania, irege lö tebulö iforomaʼö mbua-bua geheha. (Baso Galatia 5:22, 23.) Duma-dumania, iʼomasiʼö Yehowa hegöi ono mbanuania. (Mat. 22:36-39) Lö taya waʼomuso dödönia hewaʼae na göna ia abula dödö. (Yak. 1:2-4) Lö tebulö iʼasogö waʼatulö. (Mat. 5:9) Ebolo dödönia ba niha böʼö ba sökhi dödönia khöra. (Kol. 3:13) Iʼomasiʼö ba ifalua zi sökhi. (Luk. 6:35) Oroma moroi ba gamuatania wa mamati ia khö Namania si so ba zorugo. (Yak. 2:18) Lö alio mofönu ia hewaʼae na so zangandrö-ngandrö fönunia, ba tola itaha dödönia na so wondrönisi dödö.—1 Ko. 9:25, 27; Tit. 3:2.

4. Enaʼö tola tabohouni gamuatada, hadia mbörö wa moguna tadouʼö fefu mbua-bua nitötöi ba Galatia 5:22, 23 hegöi ba ayati tanö böʼö? Tutunö.

⁴ Enaʼö tola tabohouni gamuatada, moguna tadouʼö mbua-bua nitötöi ba Galatia 5:22, 23 hegöi ba ayati tanö böʼö. * Bua-bua daʼa tenga simane nukha si hauga ngawua nizara-zara famake. Sindruhunia, no moʼamakhaita fefu mbua-bua andre. Duma-dumania, na sindruhu-ndruhu taʼomasiʼö niha böʼö, tatu ebolo dödöda ba sökhi dödöda khönia. Mazui, enaʼö tobali ita niha si sökhi, moguna taʼokhögö gamuata falöʼalio mofönu ba fanaha tödö.

5. Hadia geluahania ”taʼokhögö wangera-ngera Keriso”, ba hadia mbörö wa moguna tafahaʼö ita ba duma-duma Yesu? (1 Korindro 2:16)

⁵ Baso 1 Korindro 2:16. Enaʼö tola tabohouni gamuatada, moguna ”taʼokhögö wangera-ngera Keriso”. Eluahania, moguna tafahaʼö ita ba lala wangera-ngera Yesu ba taʼoʼö duma-duma nibeʼenia. Moʼahonoa wangoromaʼö Yesu bua-bua geheha. Simane sörömi sangoromaʼö fefu hadia ia, moʼahonoa woloʼö Yesu bua-bua Yehowa. (Heb. 1:3) Na itugu fakhili lala wangera-ngerada khö Yesu, itugu fakhili göi mbua-buada khönia ba tola taʼoʼö duma-duma nibeʼenia.—Fil. 2:5.

6. Hadia manö zinangea tatörö tödöda na taforege wamohouni amuatada?

⁶ Hadia sindruhu-ndruhu tola taʼoʼö duma-duma Yesu? Te tamane tödöda, ’Yesu andrö moʼahonoa. Lö duhu wa tola uʼoʼö duma-duma nibeʼenia!’ Na daʼö nirasoimö, törö tödöu zi tölu ngawalö andre. Si oföna, tewöwöi ndraʼugö si fakhili-khili khö Yehowa hegöi Yesu. Börö daʼö, na omasi ndraʼugö, tatu tola öʼoʼö duma-dumara hewaʼae na lö moʼahonoa wamaluamö  daʼö. (1 Mo. 1:26) Si dua, hasambalö itolo ndraʼugö eheha Lowalangi, faʼabölö fondrege zebua ba mbanua si yawa awö danö. Börö wanolo geheha niʼamoniʼö, tola mofozu ndraʼugö ba wamalua ngawalö hadia ia zi lö ikhamö faʼabölöu. Si tölu, lö itötöna Yehowa enaʼö moʼahonoa wangoromaʼöu bua-bua geheha ba götöda iadaʼa. Yaʼita sangokhögö tötönafö faʼauri si lö aetu ba gulidanö, ibeʼe khöda dania ginötö 1.000 fakhe waʼara Amada sebua faʼomasi enaʼö tobali ita niha soʼahonoa. (Fam. 20:1-3) Niʼandrö Yehowa khöda iadaʼa yaʼia daʼö enaʼö taforege wamohouni amuatada ba taʼodaligö wanolo moroi khönia.

7. Hadia nitutunöda aefa daʼa?

⁷ Hewisa enaʼö tola taʼoʼö duma-duma Yesu? Datatutunö öfa mbua-bua geheha Lowalangi. Taʼila dania hewisa woloʼöda duma-duma Yesu ba wangoromaʼö bua-bua andrö. Tatutunö göi wanofu-nofu sinangea taʼangeragö ba wamareso hadia sindruhu-ndruhu no tabohouni gamuatada.

8. Hewisa wangoromaʼö Yesu faʼomasinia?

⁸ Börö me iʼomasiʼö sibai Yehowa, terou dödö Yesu ba woloʼö niwaʼö Namania ba itehegö nosonia salahida. (Yoh. 14:31; 15:13) Oroma waʼomasi Yesu ba niha moroi ba lala waʼaurinia me so ia ba gulidanö. Ero maʼökhö, iforomaʼö waʼomasi hegöi faʼahakhö dödö ba niha böʼö, farahu ba daʼö niha si faʼudu khönia. Sambua lalania ba wangoromaʼö faʼomasi yaʼia daʼö ifahaʼö ira sanandrösa ba Wamatörö Lowalangi. (Luk. 4:43, 44) Börö waʼebua waʼomasinia khö Lowalangi hegöi ba niha gulidanö, itehegö tefakao ia ba mate ba danga niha sebua horö. Daʼö mbörö wa tebeʼe khöda ginötö ba wanöndra faʼauri si lö aetu.

9. Hewisa woloʼöda duma-duma Yesu ba wangoromaʼö faʼomasi?

⁹ Talulu waʼaurida khö Namada si so ba zorugo ba tebayagö ita idanö börö me taʼomasiʼö ia. Börö daʼö, simane Yesu, moguna taforomaʼö waʼomasida khö Yehowa moroi ba nifaluada ba niha böʼö. Imane sinenge sotöi Yohane, ”Si lö mangomasiʼö talifusönia niʼila hörönia, tebai iʼomasiʼö Lowalangi si lö iʼila hörönia.” (1 Yo. 4:20) Tandraigö angeragö daʼa: ’Hadia sindruhu-ndruhu uʼomasiʼö niha böʼö? Hadia ahakhö dödögu niha böʼö hewaʼae na lafalua khögu zi lö sökhi? Hadia omasido uʼogunaʼö ginötögu, faʼabölögu, hegöi okhötagu ba wamahaʼö niha böʼö sanandrösa khö Yehowa? Hadia aoha gölögu wamalua daʼö hewaʼae na ato niha si lö moʼameʼegö tödö famorege nifaluagu mazui lasaisi ndraʼo? Hadia tola uʼalui lala enaʼö itugu oya ginötö niʼogunaʼögu ba wanuriaigö?’—Ef. 5:15, 16.

10. Hezo taʼila wa Yesu andrö solohe faʼatulö?

¹⁰ Yesu andrö niha sangomasiʼö faʼatulö. Lö irai isulöni zi lö sökhi awönia si lö sökhi. Baero daʼö, na so niha si faʼudu, iforege enaʼö atulö ira. Ifarou göi niha böʼö enaʼö laʼasiwai watitisa ba gotaluara. Duma-dumania, ifahaʼö niha wa moguna atulö ira khö dalifusöra na omasi ira itema zumange nibeʼera Yehowa. (Mat. 5:9, 23, 24) Baero daʼö, no hauga kali itolo ndra sinengenia enaʼö laböhöli wamadöni haniha zabölö ebua ba gotaluara.—Luk. 9:46-48; 22:24-27.

11. Hewisa enaʼö tobali ita niha solohe faʼatulö?

¹¹ Enaʼö tobali ita niha solohe faʼatulö, lö ibönö na ha asala taforege enaʼö lö fatiti ita ba niha böʼö. Moguna taforege enaʼö atulö ita ba niha böʼö ba tafarou ndra talifusöda enaʼö laʼasiwai watitisa ba gotaluara. (Fil. 4:2, 3; Yak. 3:17, 18) Tandraigö angeragö daʼa: ’Hadia aoha gölögu wamorege enaʼö ifuli atulö ndraʼo ba niha böʼö? Na so dalifusögu si sara lala wamati sangafökhöiʼö tödögu, hadia lö tebulö abao dödögu khönia? Hadia ubaloi balazi tohare niha böʼö wangondrasi yaʼo enaʼö atulö ndraʼaga,  mazui hadia uʼalui lala enaʼö atulö ndraʼaga hewaʼae na yaʼia zi fasala? Na tefaudu, hadia tola ufarou ndra talifusögu si fatiti enaʼö atulö ira khö nawöra?’

12. Hewisa wangoromaʼö Yesu faʼasökhi dödö ba niha böʼö?

¹² Yesu andrö niha si sökhi tödö. (Mat. 11:28-30) Lö alio mofönu ia ba lö fatandro, hewaʼae na tetandraigö waʼebolo dödönia. Duma-dumania, me so samösa ndra alawe Wenisia sangandrö tolo ba wamadöhö ononia, lö fao dödö Yesu ba wamobörö. Hizaʼi, börö me iforomaʼö wamati sebua, ifadöhö nononia andrö Yesu. (Mat. 15:22-28) Hewaʼae na niha si sökhi tödö Yesu, lö alawö-lawö ia ba wameʼe mene-mene. Itaria ibeʼe mene-mene sabeʼe ba niha niʼomasiʼönia ba wangoromaʼö khöra faʼasökhi dödönia. Duma-dumania, me itenawa ia Fetero ba wamalua ohitö dödö Yehowa, itegu ia Yesu föna ndra nifahaʼönia tanö böʼö. (Mrk. 8:32, 33) Ifalua daʼö tenga ba wangailasi Fetero. Omasi ia ba wamahaʼö Fetero hegöi ba wamangelama ira nifahaʼönia tanö böʼö enaʼö lö lataha ia wamalua ohitö dödö Lowalangi. Tatu manö aila Wetero me luo daʼö. Hizaʼi, itema mbua moroi ba degu-tegu nibeʼe Yesu.

13. Hewisa wangoromaʼöda faʼasökhi dödö?

¹³ Enaʼö tola öforomaʼö waʼasökhi dödö ba niha niʼomasiʼöu, böi alawö ndraʼugö ba wameʼe khöra mene-mene. Ba ginötö öbeʼe mene-mene, oʼö duma-duma Yesu sameʼe mene-mene si teʼodane-dane ba goi-goi Zura Niʼamoniʼö. Faʼema mene-mene daʼö si fao faʼasökhi dödö. Böi manahö-nahö dödöu khöra. Yafaduhu dödöu, na laʼomasiʼö Yehowa hegöi yaʼugö, hasambalö latemaʼö mene-mene nibeʼeu khöra. Tandraigö angeragö daʼa: ’Na ifalua zala niha niʼomasiʼögu, hadia lö ataʼu ndraʼo ba wameʼe khönia mene-mene? Na ubeʼe mene-mene, hadia ufaʼema daʼö si fao faʼasökhi dödö mazui uhagö-hagöni ia? Hadia mbörö wa ubeʼe mene-mene khö zi samösa niha? Hadia ubeʼe khönia mene-mene börö waʼabao dödögu mazui börö me omasido utolo ia?’

14. Hewisa wangoromaʼö Yesu faʼasökhi ba niha?

¹⁴ Tenga ha iʼila Yesu hadia zi sökhi, hizaʼi ifalua göi daʼö. Börö me iʼomasiʼö sibai Namania, lö tebulö iʼokhögö gohitö dödö satulö ba wamalua si sökhi. Niha si sökhi andrö lö tebulö iʼalui lala ba wanolo niha böʼö hegöi ba wamalua khöra si sökhi. Te aboto ba dödöda hadia zi sökhi sinangea tafalua. Hizaʼi, lö ibönö na ha asala taʼila. Moguna taʼokhögö gohitö dödö satulö ba wamalua si sökhi. Te so zanofu, ’Hadia so niha sangokhögö ohitö dödö si fasala ba wamalua si sökhi?’ So. Duma-dumania, no irai itötöi Yesu sanandrösa ba niha sameʼe buala ha enaʼö laʼila ba lasuno ira niha böʼö. Hulö sökhi sibai nifaluara andrö ba wamaigi niha, hizaʼi lö omuso dödö Yehowa khöra.—Mat. 6:1-4.

15. Hewisa enaʼö tobali ita niha si sökhi?

¹⁵ Tola tobali ita niha si sökhi na tafalua zatulö tenga ba wangalui tana khöda. Tandraigö angeragö daʼa: ’Na no uʼila hadia zi sökhi sinangea ufalua, hadia sindruhu-ndruhu omasido wamalua yaʼia? Hadia mbörö wa ufalua daʼö?’

16. Hadia zinangea tafalua ero maʼökhö, ba hadia mbörö?

¹⁶ Hewaʼae na no tebayagö ita idanö, böi tawaʼö tödöda wa lö saʼae moguna tabohouni gamuatada. Amuata si bohou andrö hulö nukha si bohou, moguna tahaogö wondrorogö. Sambua lala si tola tafalua yaʼia daʼö na taforege ba wangoromaʼö bua-bua geheha ero maʼökhö. Hadia mbörö? Börö me eheha niʼamoniʼö andrö faʼabölö si otarai khö Lowalangi, ba iʼogunaʼö waʼabölö andrö ba wanolo yaʼita. (1 Mo. 1:2) Börö daʼö, na lö tebulö taforomaʼö  mbua-bua niʼasogö geheha niʼamoniʼö, hasambalö itolo ita eheha andrö ba wamalua si sökhi. Iwaʼö Yakobo wa ’famati andrö na lö bua-bua, mate’. (Yak. 2:26) Simanö göi fefu mbua-bua tanö böʼö niʼasogö geheha niʼamoniʼö, lö tola löʼö taforomaʼö daʼö ba nifaluada. Ero taforomaʼö mbua-bua andrö, daʼö dandra wa eheha niʼamoniʼö zanuturu lalada.

17. Hadia zinangea tatörö tödöda na itaria abua khöda wangoromaʼö bua-bua geheha?

¹⁷ Hewaʼae na no ara tebayagö idanö zi samösa niha Keriso, tola manö abua khönia wangoromaʼö bua-bua geheha. Hewaʼae simanö, sabölö moguna, böi tebulö taforege ba wangoromaʼö bua-bua andrö. Angeragö atö duma-duma andre. Na asika mbaru somasi-masi ndraʼugö, hadia öʼanemaiʼö ötiboʼö ia? Löʼö. Na tola, öfuli ötagu zasikania andrö. Aefa daʼö, tatu öhaogö-haogö wamake yaʼia. Simanö göi, böi ide-ide dödöu na abua khöu wangoromaʼö faʼasökhi dödö, faʼebolo dödö, mazui faʼomasi khö zi samösa niha. Tola ifuli sökhi wahuwusau ba niha daʼö na öʼandrö khönia wangefaʼö sala soroi ba dödö. Aefa daʼö, halö gangetula enaʼö itugu sökhi gamuatamö ba zi so miföna.

18. Hadia zi tola tafaduhusi tödö?

¹⁸ Tatu taʼandrö sibai saohagölö börö me no ibeʼe khöda duma-duma si sökhi Yesu. Na itugu fakhili lala wangera-ngerada khönia, itugu aoha khöda woloʼö amuatania. Na itugu fakhili gamuatada khö Yesu, itugu aoha khöda wondrorogö amuatada si bohou. Ba artikel daʼa, no tatutunö öfa ngawalö gamuata si farahu ba mbua-bua geheha. Beʼe ginötöu ba wamahaʼö yaʼugö ba gamuata tanö böʼö si farahu ba mbua-bua geheha, ba angeragö hawaʼasökhi wangoromaʼöu bua-bua andrö. Enaʼö tola ösöndra artikel sanutunö sanandrösa ba mbua-bua geheha, faigi Wanuturu Lala ba Wamalua Riset khö Ndra Samaduhuʼö Yehowa ba subjek ”Faʼauri Niha Keriso” aefa daʼö alui faosatö ”Bua-Bua Geheha”. Yafaduhu dödöu wa hasambalö itolo ndraʼugö Yehowa na öforege wamohouni amuatamö ba lö tebulö öfalua daʼö.