1. Hadia duria si sökhi nirongo ndra niha Yahudi niʼoloiʼö?

 DAʼÖ ngaluo si tebai laʼolifugö ira niha Yahudi. No ’ifarou dödö Razo Kiro moroi ba Weresia Yehowa’ ba wangefaʼö iraono Gizaraʼeli si no teʼoloiʼö ba Mbabilona ba zi hauga wulu fakhe. Ibeʼe gangombakhata Kiro wa tola mangawuli ndra niha Yahudi ba danöra ”ba wamazökhi mangawuli omo Yehowa, Lowalangi ndraono Gizaraʼeli”. (Esr. 1:1, 3) Sindruhu-ndruhu wa turia somuso dödö daʼö! Iadaʼa, tola lafuli labeʼe zumange khö Lowalangi sindruhu ba danö nibeʼenia khöra.

2. Hadia zi no lafalua ira niha Yahudi lö ara me no mangawuli ira ba Yeruzalema?

² Me döfi 537 SM, so ösa ndra niha Yahudi moroi ba Mbabilona sofeta ba Yeruzalema, ibu kota wamatörö Yehuda tanö raya. Lö ara aefa daʼö, labörögö wamazökhi osali. Me döfi 536 SM, no awai lafazökhi wondrasinia!

3. Hadia wanandraigö salua khö ndra niha Yahudi?

³ Ba ginötö labörögö wamazökhi osali ira niha Yahudi, oya sibai wanandraigö salua khöra. Fefu soi ba zi fasuira ”laforege enaʼö awuwu niha Yehuda ba ide-ide dödöra wamazökhi omo Lowalangi andrö”. (Esr. 4:4) Ba gafuriata, itugu monönö wanandraigö salua khöra. Me döfi 522 SM, ibörögö mamatörö Aretazasa  tobali razo Weresia. * Laʼogunaʼö ginötö daʼö udu niha Yahudi enaʼö teböhöli wamazökhi osali. Laforege ’wangaʼasogö abula dödö ba döi huku’. (Si. 94:20) Lafaʼoheʼö zura khö Razo Aretazasa, ba lawaʼö wa no laʼera-era ira niha Yahudi wamadaö khö razo. (Esr. 4:11-16) Faduhu dödö razo ba niwaʼöra andrö irege ibeʼe fareta enaʼö muböhöli wamazökhi osali. (Esr. 4:17-23) Daʼö mbörö wa laböhöli wamazökhi osali andrö ira niha Yahudi.—Esr. 4:24.

4. Hadia nifalua Yehowa me lö latehegö wamazökhi osali? (Yesaya 55:11)

⁴ Niha si lö mamosumange Yehowa ba danö andrö ba so ösa ndra sohalöwö ba gödo razo Weresia, laforege wanaisi enaʼö teböhöli wamazökhi osali. Hizaʼi, omasi Yehowa na latohugö wamazökhi osali, ba hasambalö alua gohitö dödönia andrö. (Baso Yesaya 55:11.) Ifataro samösa genoninia si lö faʼataʼu sotöi Zakharia tobali samaʼeleʼö khönia. Aefa daʼö, ibeʼe walu ngawua gangilata sahöli-höli dödö Yehowa khö Zakharia, ba ifaʼema gangilata daʼö Zakharia khö ndra niha Yahudi si tobali famarou dödöra. Angilata daʼö zameʼe khöra faʼabarani ba wanaögö folohi, ba tobali famarou dödöra daʼö ba wanohugö halöwö nibeʼe Yehowa khöra. Ba gangilata si lima, iʼila Zakharia sambua naha wandru ba dua ngaʼeu döla geu zaitu.

5. Hadia nitutunöda ba artikel daʼa?

⁵ Tobali famarou dödö ndra niha Yahudi gangilata si lima nibeʼe Yehowa khö Zakharia. Tobali famarou dödöda göi na tatutunö gangilata andrö, börö me asese tarasoi waʼide-ide dödö. Baero daʼö, tola möi fanoloda gangilata andrö enaʼö anau gölöda ba wamosumange Yehowa na göna ita fanandraigö, na tebulö zalua ba waʼaurida, mazui na tebeʼe khöda wanuturu lala sabua khöda famalua.

6. Hana wa tobali famarou dödö ndra niha Yahudi gangilata sanandrösa ba naha wandru hegöi töla geu zaitu si dua ngaʼeu nisura ba Zakharia 4:1-3? (Faigi gambara ba guli majalah.)

⁶ Baso Zakharia 4:1-3. Angilata sanandrösa ba naha wandru hegöi töla geu zaitu si dua ngaʼeu andrö, tobali famarou dödö khö ndra niha Yahudi irege barani ira hewaʼae göna ira fanandraigö. Hadia mbörö? Hadia no önehegö wa fahöna wanikha ba naha wandru andrö ba lö irai ahori? So dua ngaʼeu döla geu zaitu si lö irai tebato ba wamangele fanikha ba naha wandru andrö. Börö daʼö, lö irai mate hola-hola wandru si fitu ngawua andrö börö me lö irai ahori wanikhania. Aefa daʼö, manofu Zakharia, ”Hadia geluaha daʼa fefu?” Imane khönia malaʼika samalukhaisi yaʼia andrö, ”ʼTenga börö zaradadu sato mazui faʼabölö niha, hizaʼi börö waʼabölö gehehagu niʼamoniʼö,’ iwaʼö Yehowa samatörö saradadu zorugo.” (Zak. 4:4, 6) Fanikha moroi ba döla geu andrö eluahania eheha niʼamoniʼö, faʼabölö fondrege zebua si lö irai ahori si otarai Yehowa. Hewaʼae na abölö sibai zaradadu Weresia, tebai lalawa waʼabölö geheha Yehowa. Börö wanolo moroi khö Yehowa, tatu tola laʼasiwai halöwöra ira niha Yahudi ba wamazökhi osali, hewaʼae na oya wanandraigö salua khöra. Tatu manö tefarou sibai dödöra! Moguna laʼodaligö Yehowa ba lafuli lafalua halöwöra. Daʼö nifaluara ba gafuriata hewaʼae na so wanaisi ba halöwöra andrö.

7. Hadia waʼatebulö salua irege itugu ohahau dödö ndra niha Yahudi ba gafuriata?

⁷ Ba gafuriata, so waʼatebulö salua irege abölö ohahau dödö niha Yahudi moroi ba zilalö. Hadia waʼatebulö andrö? Me döfi 520 SM, Razo Dario I zi tobali samatörö ba Weresia. Ba ndröfi si dua wamatörönia, aboto ba dödönia wa sindruhunia tebai lasaisi wamazökhi osali.  Börö daʼö, ibeʼe fareta Dario enaʼö laʼasiwai wamazökhi osali. (Esr. 6:1-3) Tatu manö tokea dödö niha sato ba gangetulania andrö. Hizaʼi, tenga ha daʼö nifalua Dario. Ifaretakö fefu soi ba zi fasui Yeruzalema enaʼö laböhöli wanaisi famazökhi osali. Ifaretakö göi ira fefu enaʼö labeʼe gefe awö ngawalö hadia ia niʼogunaʼö ba wangasiwai famazökhi osali! (Esr. 6:7-12) Buania, mato öfa fakhe aefa daʼö, me döfi 515 SM, awai lafazökhi gosali andrö ira niha Yahudi.—Esr. 6:15.

8. Hadia mbörö wa lö moguna ataʼu ndraʼugö na so wanandraigö?

⁸ Ba ginötö iadaʼa, ato göi zamosumange Yehowa si göna fanandraigö. Duma-dumania, lasaisi halöwö nifaluada ba zi hauga soi. Laraʼu ndra talifusöda ba ’laʼohe ira föna gubernur hegöi föna razo’, ba tobali famaduhuʼö daʼö khö ndra samatörö. (Mat. 10:17, 18) Hizaʼi itaria, börö me so waʼatebulö ba wamatörö mazui börö gangetula zi samösa sanguhuku si sökhi tödö, lö hadöi saʼae taha-tahada ba wamosumange Lowalangi. Ba soi tanö böʼö, lö hadöi lasaisi halöwö nifaluada. Hizaʼi, ato ndra Samaduhuʼö si göna fanandraigö moroi ba nösi nomora. Hewaʼae simanö, börö me tebai lafaso ndra talifusöda andrö enaʼö laböhöli wamosumange Yehowa, lö saʼae lasaisi ira ösi nomora. (Mat. 10:32-36) So mböröta niha si fatuwu ba halöwö nifaluada, ba gafuriata tobali ira Samaduhuʼö Yehowa sowölö-ölö. Börö daʼö, na göna ndraʼugö fanandraigö, böi awuwu ndraʼugö! Böi ataʼufi, börö me hasambalö iʼogunaʼö gehehania niʼamoniʼö Yehowa ba wanolo yaʼugö!

9. Hana wa so ösa ndra niha Yahudi safatö tödö me awena laʼila wondrasi gosali si bohou?

⁹ Me laʼila wondrasi gosali sawena mufazökhi, so ösa ndra niha Yahudi si no alawa döfi sege-ege. (Esr. 3:12) No irai laʼila gosali Zelomo sebua sibai ba solakhömi, ba lawaʼö tödöra wa lö eluahania gosali si bohou andre na mufaedogö ia ba gosali Zelomo mböröta. (Hag. 2:2, 3) Abu sibai dödöra börö me lafaedogö gosali si bohou andre ba gosali siföföna. Hewaʼae simanö, tola tobali fanolo khöra gangilata Zakharia ba wolawa faʼafatö dödö. Hadia mbörö?

10. Hewisa wa tola möi fanolo niha Yahudi wehede nisura ba Zakharia 4:8-10 enaʼö ifuli omuso dödöra?

¹⁰ Baso Zakharia 4:8-10. Imane malaʼika andrö sanandrösa khö ndra niha Yahudi, ”Somuso tödö dania ira na laʼila mbua lot ba danga Zerubabeli.” Hadia geluahania? Bua lot  andrö yaʼia daʼö sinali si no lafotambua ba wamareso faʼadölö. Börö daʼö, fehede malaʼika andrö zamaduhuʼö ba dödö nono mbanua Lowalangi wa hasambalö teʼasiwai gosali andrö ba tefaudu ia ba goi-goi Yehowa, hewaʼae na tenga simane faʼebua gosali siföföna waʼebuania. Omuso sibai dödö Yehowa ba gosali daʼö, ba no sinangea na simane daʼö göi waʼomuso dödöra. Sabölö moguna khö Yehowa yaʼia daʼö mufalua wamosumange satulö ba gosali si bohou andrö ba lala si tefaudu ba zomasi ia. Tola lasöndra waʼomuso dödö ira niha Yahudi na laʼosambuaʼö dödöra ba wamosumange Yehowa ba lala satulö ba laforege wangomusoiʼö tödönia.

11. Hadia gabula dödö nitaögö nono mbanua Yehowa ba ginötöda andre?

¹¹ Ato ba gotaluada zorasoi wa abua khöda wanemaʼö na so waʼatebulö. So ösa ndra talifusöda si no ara mangai halöwö safönu inötö sanema halöwö si bohou. So göi zondröi halöwö somasi ira börö me no agalawa ndröfira. Na daʼö zalua khöda, no si toʼölö na tarasoi waʼafatö dödö. Ba wamobörö, te lö aboto ba dödöda mazui lö fao dödöda ba waʼatebulö andrö. Te itörö-törö manö tödöda halöwö nifaluada ba zilalö fatua lö alua wombulöʼö andrö, ba tola manö ide-ide dödöda börö me lö saʼae oya zi tola tafalua khö Yehowa. (Amd. 24:10) Hizaʼi, tola tobali fanolo khöda gangilata Zakharia enaʼö lö taböhöli wamosumange Yehowa ba tabeʼe khönia wondrege zi sökhi.

12. Ba ginötö alua waʼatebulö, hewisa wa tola tobali fanoloda gangilata Zakharia enaʼö lö tebulö tarasoi waʼomuso dödö?

¹² Abölö aoha khöda wanemaʼö faʼatebulö na taʼangeragö hewisa wamaigi Yehowa faʼatebulö andrö. Iadaʼa, oya nifaluania sahöli-höli dödö, ba tebeʼe khöda döi si sökhi tobali si falulu fohalöwö khönia. (1 Ko. 3:9) Tola manö tebulö-bulö halöwöda. Hizaʼi, lö irai tebulö waʼomasi Yehowa khöda. Itaria, so lua-luania khöda na alua waʼatebulö bakha ba organisasi, ba lö aboto ba dödöda hadia mbörönia. Na daʼö zalua khöu, böi horigö ginötöu ba woʼangeragö hadia mbörö wa alua daʼö. Moroi na öʼera-era manö zalua me ”götö föna”, angandrö enaʼö tola öʼila hadia manö mbua si sökhi moroi ba waʼatebulö andrö. (Sango. 7:10) Moroi na öʼera-era manö zi tebai saʼae öfalua, abölö sökhi na öʼosambuaʼö dödöu ba zi tola öfalua. Ba gangilata Zakharia andre, tafahaʼö ita wa moguna taʼokhögö wangera-ngera si sökhi. Daʼö zanolo yaʼita enaʼö anau gölöda ba lö faröi ita ba wamosumange Yehowa si fao faʼomuso dödö hewaʼae na tebulö zalua khöda.

13. Hadia mbörö wa so ösa niha Yahudi sorasoi wa ambö tefaudu gangetula nihalö Yosua hegöi Serubabeli?

¹³ Simane si no tatutunö, so wanaisi me mufuli mubörögö wamazökhi osali. Hewaʼae simanö, darua ndra matua si no tefili ba wondröniaʼö niha Yahudi, yaʼia daʼö Ere Sebua sotöi Yesua (Yosua) hegöi Gubernur Serubabeli, lahalö gangetula enaʼö ”labörögö zui wamazökhi omo Lowalangi”. (Esr. 5:1, 2) So ösa ndra niha Yahudi sangumaʼö wa ambö tefaudu gangetula daʼa. Tebai mubiniʼö wamazökhi osali, ba hasambalö laʼalui lala ira si faʼudu khöra enaʼö tebato halöwö andrö. Börö daʼö, moguna tefaduhuʼö ba dödö Yosua hegöi Serubabeli wa fao khöra Yehowa. Hewisa wa möi fanolora gangilata Zakharia?

14. Hewisa wangoromaʼö Zakharia 4:12, 14 wa fao Yehowa khö Gere Sebua sotöi Yosua hegöi Gubernur Serubabeli?

¹⁴ Baso Zakharia 4:12, 14. Ifatunö malaʼika samalukhaisi Zakharia wa töla geu zaitu si dua ngaʼeu andrö eluahania ”darua niha nifili”, yaʼia daʼö Yosua hegöi Serubabeli. Yaʼira si darua andrö no amaedola niha ”si zizio ba zinga Lowalangi samatörö ulidanö maʼasagörö”, yaʼia daʼö Yehowa. Sindruhu-ndruhu wa no töi sebua daʼa! Daʼö dandra sangoromaʼö wa ifaduhusi tödö ira Yehowa. Börö daʼö, tola lafaduhusi tödö iraono Gizaraʼeli wanuturu lala nibeʼe ndra matua si darua andre, börö me yaʼira niʼogunaʼö Yehowa ba wondröniaʼö ono mbanuania.

15. Hewisa wangoromaʼöda wa taʼameʼegö tödö wanuturu lala nibeʼe Yehowa ba Daromalinia?

¹⁵ Irugi iadaʼa, lö tebulö ibeʼe Yehowa wanuturu lala ba nono mbanuania, duma-dumania iʼogunaʼö Daromalinia, Sura Niʼamoniʼö. Ba daʼö, ifatunö khöda hewisa lala wamosumange sangomusoiʼö tödönia. Hewisa wangoromaʼöda wa taʼameʼegö tödö wanuturu lala moroi ba Daromali Lowalangi? Moguna tabeʼe ginötöda enaʼö tola tahaogö wombaso ösinia ba taforege enaʼö aboto ba dödöda geluahania. Sofu khöu samösa, ’Ba ginötö ubaso Zura Niʼamoniʼö mazui publikasi, hadia uhaogö uʼangerönusi nösinia? Hadia uforege enaʼö aboto ba dödögu geluaha wamahaʼö Zura Niʼamoniʼö ”si lö muʼila eluaha”? Mazui, hadia ha asala ubaso manö?’ (2 Fe. 3:16) Na tabeʼe ginötöda ba woʼangeragö hadia nifahaʼö Yehowa khöda, tola sindruhu-ndruhu taʼoʼö wanuturu lala nibeʼenia ba tafoʼahonoa wamaluada halöwö khö Lowalangi.—1 Ti. 4:15, 16.

16. Hadia zinangea tafalua na ambö aboto ba dödöda wanuturu lala nibeʼe ”zawuyu si lö faröi ba satua-tua”?

 ¹⁶ Iʼogunaʼö göi Yehowa ”zawuyu si lö faröi ba satua-tua” ba wameʼe khöda fanuturu lala. (Mat. 24:45) Itaria, ambö aboto ba dödöda wanuturu lala nibeʼera. Duma-dumania, me labeʼe khöda wanuturu lala sanandrösa hadia zinangea tafalua na alua bencana alam, tola manö tawaʼö tödöda wa lö alua ba mbanuada zimane daʼö. Mazui, tola manö tarasoi wa talafo abeʼe wanuturu lala nibeʼera sagötö pandemi andre. Hadia zinangea tafalua na tarasoi wa lö ikhamö fangera-ngerada wanuturu lala nibeʼera? Moguna taʼangeragö hadia mbua nitema ndraono Gizaraʼeli me laʼoʼö wanuturu lala nibeʼe Yosua hegöi Serubabeli. Tola göi taʼangeragö waö-waö tanö böʼö si no irai tabaso ba Zura Niʼamoniʼö. Itaria, tebeʼe ba nono mbanua Lowalangi wanuturu lala sambö aboto ba dödöra. Hizaʼi sindruhunia, tola möi fangorifira wanuturu lala andrö.—Sangu. 7:7; 8:10.

17. Hadia mbuania ba niha Yahudi gangilata si lima niʼila Zakharia?

¹⁷ Hewaʼae na no adogo-dogo gangilata si lima niʼila Zakharia, tola möi famarou dödö niha Yahudi gangilata andrö enaʼö lafuli latohugö halöwöra ba lafalua wamosumange satulö khö Yehowa. Baero daʼö, me lafalua wamahaʼö nitemara moroi ba gangilata Zakharia andrö, larasoi samösa wanuturu lala hegöi fanolo moroi khö Yehowa safönu faʼomasi. Börö wanolo geheha niʼamoniʼö moroi khö Yehowa, tola lafuli latohugö halöwöra ba larasoi waʼomuso dödö.—Esr. 6:16.

18. Hadia manö mbua nitemamö moroi ba gangilata Zakharia?

¹⁸ Na öʼangerönusi gangilata Zakharia sanandrösa ba naha wandru hegöi töla geu zaitu si dua ngaʼeu, oya mbua nitemamö. Simane si no tatutunö, tola möi fanolou gangilata andrö enaʼö anau gölöu hewaʼae alua khöu wanandraigö, lö tebulö omuso dödöu hewaʼae tebulö zalua ba waʼaurimö, ba lö mamalö faduhu dödöu khö ndra sawuyu si lö faröi hewaʼae na ambö aboto ba dödöu wanuturu lala nibeʼera. Börö daʼö, na alua khöu wanandraigö, hadia zinangea öfalua? Si oföna, forege enaʼö öʼila hadia niʼila Zakharia, yaʼia daʼö tandra sangoromaʼö wa lö irai iröi nono mbanuania Yehowa. Aefa daʼö, odaligö Yehowa ba böi tebulö fosumange ia soroi ba dödö. (Mat. 22:37) Na öfalua daʼö, hasambalö itolo ndraʼugö Yehowa enaʼö lö tebulö öfosumange ia si fao faʼomuso dödö.—Kol. 1:10, 11.