1-2. Hewisa enaʼö itema wamosumange nifaluada Yehowa?

 HADIA zi tumbu ba wangera-ngeramö na örongo ngawua wehede ”famosumange”? Tola manö ökhalaigö samösa dalifusöda ira matua sotuhi tanö ba wanutunö ösi dödönia khö Yehowa fatua lö mörö ia. Mazui, tola manö ökhalaigö zi sambua omo sorasoi faʼomuso dödö ba wamahaʼö yaʼira ba Zura Niʼamoniʼö.

² No farahu zi dombua ngawalö andrö ba wamosumange Lowalangi. Hewisa enaʼö itema wamosumange nifaluada Yehowa? Itema daʼö na tefaudu ba gohitö dödönia ba tafalua daʼö si fao faʼomasi ba foʼameʼegö tödö. Taʼomasiʼö sibai Yehowa. Aboto ba dödöda wa no sinangea tafosumange ia ba omasi ita tafalua wondrege zi sökhi ba wamosumange yaʼia.

3. Hadia nitutunöda ba artikel daʼa?

³ Ba artikel daʼa, tatutunö lala wamosumange nitema Yehowa me götö föna. Tatutunö göi walu ngawalö zinangea tafalua ba wamosumange yaʼia ba götöda iadaʼa. Sagötö wanutunöda daʼö, taʼangeragö dania hewisa enaʼö itugu sökhi wamaluada lala wamosumange andrö. Tatutunö göi hadia mbörö wa tola tarasoi waʼomuso dödö na tafalua wamosumange satulö.

4. Fatua lö möi Yesu ba gulidanö, hadia nifalua nono mbanua Yehowa ba wangoromaʼö wa laʼomasiʼö ba laʼameʼegö tödö ia?

⁴ Fatua lö möi Yesu ba gulidanö, niha si lö faröi simane Habeli, Noakhi, Aberahamo, hegöi Yobi, laforomaʼö wa laʼameʼegö tödö ba laʼomasiʼö Yehowa. Hewisa wamaluara daʼö? Laʼoʼö niwaʼö Lowalangi, mamati ira khönia, ba labeʼe khönia zumange. Lö ihaogö wanutunö Sura Niʼamoniʼö hadia manö nifaluara ba wamosumange yaʼia. Hizaʼi si no tatu, lafalua wondrege zi sökhi ba wamosumange Yehowa ba itemaʼö zumange nibeʼera. Ba gafuriata, ibeʼe Yehowa Goroisa Moze ba ndraono Gizaraʼeli. Ba goroisa andrö, no mufaʼanö wanuturu lala sanandrösa ba lala wamosumange somasi ia.

5. Me no aefa mate Yesu ba tesusugi ia, hadia zi tebulö ba lala wamosumange satulö?

⁵ Me no aefa mate Yesu ba tesusugi ia, lö saʼae iʼandrö ba nono mbanuania Yehowa wamalua Oroisa Moze. (Rom. 10:4) Muʼandrö ba niha Keriso ba woloʼö oroisa si bohou, yaʼia daʼö ’oroisa Keriso’. (Gal. 6:2) Ba wamalua ’oroisa’ andrö, lö moguna latanö ba dödöra nösinia ba laʼosisiʼö woloʼö hadia zi tola ba si tebai mufalua. Hizaʼi, moguna laʼoʼö duma-duma nibeʼe Yesu ba lafalua hadia zi no ifahaʼö khöra. Ba götöda andre, taforege göi ba woloʼö Keriso enaʼö tola taʼomusoiʼö dödö Yehowa ba ’tasöndra wolombase’.—Mat. 11:29.

6. Hadia zinangea taʼangeragö sagötö tatutunö artikel daʼa?

⁶ Sagötö tatutunö zi walu ngawalö zinangea tafalua ba wamosumange Lowalangi, sofu khöu samösa, ’Hadia no mofozu ndraʼo wamalua daʼa? Hadia tola nasa udouʼö wamalua yaʼia?’ Tatu manö, lö fasala na omuso dödöu ba zi no öfalua iadaʼa. Hewaʼae simanö, moguna öʼandrö wanolo moroi khö Yehowa ba wangiʼila hadia manö nasa zinangea ödouʼö.

7. Hewisa wamaigi Yehowa fangandrö nifaʼemada soroi ba dödö?

⁷ Tafosumange Yehowa ba ginötö mangandrö ita khönia. Ifagölösi wangandröda andrö Sura Niʼamoniʼö simane sumange somuhua nibeʼe ba nose Lowalangi hegöi ba gosali. (Si. 141:2) Omuso dödö Lowalangi ba zumange somuhua andrö. Simanö göi, tobali ”fangomuso dödönia” wangandrö nifaʼemada soroi ba dödö, hewaʼae na no öna-öna ngawua wehede niʼogunaʼöda. (Amd. 15:8; 5 Mo. 33:10) Tola faduhu dödöda wa omuso dödö Yehowa wamondrondrongo na tatutunö waʼomasida hegöi fangandröda saohagölö khönia. Omasi ia na tafatunö khönia waʼaombö-aombö dödöda, nidöna-dönada, hegöi ngawalö zomasi ita. Fatua lö mangandrö ndraʼugö khö Yehowa, haogö angeragö hadia zinangea öwaʼö. Na öfalua daʼö, tola öbeʼe ”zumange somuhua” fondrege zi sökhi khö Namada si so ba zorugo.

8. Hawaʼara tola tasuno Yehowa?

⁸ Tafosumange Yehowa ba ginötö tasuno ia. (Si. 34:1) No tasuno Yehowa na tadunö-dunö ba niha böʼö mbua-bua hegöi halöwönia sahöli-höli dödö. Terou dödöda wamalua daʼö börö me mangandrö saohagölö ita khönia. Börö daʼö, moguna tabeʼe ginötöda ba woʼangerönusi faʼasökhi dödö si no iforomaʼö khöda Yehowa. Na tafalua daʼö, oya dane-dane niʼokhögöda ba wanuno yaʼia. Na möi ita manuriaigö, tebeʼe khöda ginötö ba ’wamaʼema sumange fanuno khö Lowalangi yaʼia daʼö bua-bua mbewe’. (Heb. 13:15) Simane si no tatutunö mege, moguna tahaogö taʼangeragö hadia zinangea tawaʼö fatua lö mangandrö ita khö Yehowa. Simanö göi, moguna tahaogö taʼangeragö hadia dania niwaʼöda ba niha si  falukha khöda ba wanuriaigö. Omasi ita tabeʼe ”zumange fanuno” fondrege zi sökhi. Daʼö mbörö wa tafatunö zindruhu ba niha böʼö soroi ba dödö.

9. Simane iraono Gizaraʼeli me götö föna, hadia mbuania na taʼondrasi gangowuloa? Tutunö duma-duma si no irai alua khöu.

⁹ Tafosumange Yehowa ba ginötö taʼondrasi gangowuloa. Tebeʼe goroisa ba ndraono Gizaraʼeli: ”Tölu kali ba zi döfi, fefu ndra matua enaʼö laʼondrasi Yehowa Lowalangimi ba nahia si no itatugöi.” (5 Mo. 16:16) Eluahania, moguna laröi nomora awö nowira ba lö hadöi sanarogö moroi furi. Hewaʼae simanö, ifabuʼu khöra Yehowa, ”Na möi ami ba wangondrasi Lowalangi Yehowa . . . , lö si tola morabu soimi.” (2 Mo. 34:24) Börö me mamati ndraono Gizaraʼeli khö Yehowa, möi ira laʼondrasi gangowuloa sebua nifalua ero röfi. Buania, oya howu-howu nitemara. Duma-dumania, itugu aboto ba dödöra goroisa Lowalangi, tola laʼangerönusi waʼasökhi dödönia, ba omuso dödöra ba ginötö fariawö ira khö ndra talifusöra sangomasiʼö Yehowa. (5 Mo. 16:15) Tola göi tatema mbua si sökhi simane daʼö na taforege wangondrasi angowuloa. Khalaigö göi hawaʼomuso dödö Yehowa na tafaʼanö mbua gera-era sadogo-dogo si möi famarou dödö niha böʼö.

10. Hana wa moguna sibai manunö ita na tafosumange Lowalangi?

¹⁰ Tafosumange Yehowa ba ginötö manunö ita. (Si. 28:7) Aboto ba dödö ndraono Gizaraʼeli wa moguna sibai manunö ira ba wamosumange Lowalangi. Me föna, so 288 niha Lewi nifataro Razo Dawido tobali sanunö ba gosali. (1 Ng. 25:1, 6-8) Ba götöda andre, tola göi taforomaʼö waʼomasida khö Lowalangi na manunö ita ba wanuno yaʼia. Tenga faʼonekheda manunö zabölö moguna. Angeragö atö: Hewaʼae na ”asese fasala ita fefu” ba ginötö fahuhuo, lö tobali taha-tahada daʼö ba wanuriaigö hegöi ba wamaʼema bua gera-era ba gangowuloa. (Yak. 3:2) Simanö göi, hewaʼae na tawaʼö tödöda wa lö onekhe ita manunö, böi tabaliʼö taha-tahada daʼö ba woʼanunöisi sinunö ba wanuno Yehowa.

11. Simane nitutunö ba Zinunö 48:13, hana wa moguna tatatugöi ginötöda ba wamalua famahaʼö ba zi sambua omo?

¹¹ Tafosumange Yehowa ba ginötö tafahaʼö ita ba Daromalinia ba tafahaʼö ndraonoda sanandrösa khönia. Ba ngaluo Sabato, tebeʼe ginötö ba ndraono Gizaraʼeli ba wondröi halöwöra sero maʼökhö enaʼö tola laʼosambuaʼö dödöra ba wangaʼaroʼö fahuwusara khö Yehowa. (2 Mo. 31:16, 17) Iraono Gizaraʼeli si lö faröi, lafahaʼö ndraonora sanandrösa khö Yehowa hegöi ba ngawalö zi sökhi nifaluania. Ba götöda andre, moguna göi tatatugöi ginötöda ba wombaso hegöi ba wamahaʼö yaʼita ba Daromali Lowalangi. No farahu daʼö ba wamosumangeda Yehowa, ba tola möi fanoloda daʼö enaʼö itugu ahatö ita khönia. (Si. 73:28) Baero daʼö, na tafalua wamahaʼö ba zi sambua omo, tola tatolo ndraonoda ba wangokhögö fahuwusa saro khö Namada sebua faʼomasi si so ba zorugo.—Baso Zinunö 48:13.

12. Hewisa wamaigi Yehowa halöwö nifalua ba wamazökhi ose Lowalangi, ba hadia wamahaʼönia khöda?

¹² Tafosumange Yehowa ba ginötö fao ita ba wamazökhi hegöi ba wondrorogö nahia wamosumange yaʼia. Iwaʼö Sura Niʼamoniʼö wa no ”halöwö niʼamoniʼö” fefu halöwö nifalua ba wamazökhi ose Lowalangi hegöi gama-gama niʼogunaʼö ba daʼö. (2 Mo. 36:1, 4) Simanö göi wamaigi Yehowa halöwö nifaluada iadaʼa ba wamasindro Nahia Gangowuloa hegöi tomosa tanö böʼö niʼokhögö organisasi. Ba wamaiginia, no farahu daʼö ba wamosumangeda yaʼia. Oya ginötö nitehegö ndra talifusöda ba wamalua halöwö daʼö. Tatu taʼandrö sibai  khöra saohagölö börö me no latuhini halöwö nifalua Wamatörö Lowalangi. Baero daʼö, fao göi ira ba wamalua halöwö fanuriaigö. So göi ösa ba gotaluara zomasi mangai halöwö tobali perintis. Na no saʼae sinangea ira, lö moguna aombö dödö ndra satua sokubaloi ba wamataro yaʼira tobali perintis. Na lafalua daʼö, no latuhini halöwö famazökhi tomosa niʼogunaʼö ba wamosumange Lowalangi. Hewaʼae na onekhe ita fatuka mazui löʼö, tola fao ita fefu ba wangehaogö hegöi ba wondrorogö tomosa andrö.

13. Hana wa omasi ita wameʼe tolo-tolo si no aoha gölö fameʼe ba wotuhini halöwö nifalua Wamatörö Lowalangi?

¹³ Tafosumange Yehowa ba ginötö tabeʼe dolo-tolo si no aoha gölö fameʼe ba wotuhini halöwö nifalua Wamatörö Lowalangi. Tebai laʼondrasi Yehowa iraono Gizaraʼeli na lö hadöi noro dangara. (5 Mo. 16:16) Moguna labeʼe khönia mbuala ndrohu-ndrohu zi sagu khöra. Na lafalua daʼö, no laforomaʼö wa mangandrö sibai saohagölö ira ba ngawalö zi no ifalua khöra Yehowa. Iadaʼa, hewisa göi lalada ba wangoromaʼö wa taʼomasiʼö Yehowa ba taʼandrö saohagölö ba ngawalö zi no ifalua khöda? Sambua lala si tola tafalua yaʼia daʼö na tabeʼe dolo-tolo ndrohu-ndrohu zi sagu khöda ba wotuhini banua niha Keriso hegöi halöwö nifaluada ba zi sagörö ulidanö. Imane sinenge sotöi Faulo, ”Na so zameʼe soroi ba dödö, omuso dödö Lowalangi börö me omasi ia na so niha sameʼe ndrohu-ndrohu zi sagu khönia, tenga si tebai sagu khönia.” (2 Ko. 8:4, 12) Hewaʼae no ide-ide nibeʼeda, hasambalö omuso dödö Yehowa ba dolo-tolo nibeʼeda khönia soroi ba dödö.—Mrk. 12:42-44; 2 Ko. 9:7.

14. Moloʼö Amaedola 19:17, hewisa wamaigi Yehowa fanolo nibeʼeda khö ndra talifusöda?

¹⁴ Tafosumange Yehowa ba ginötö tatolo ndra talifusöda na moguna khöra wanolo. Ifabuʼu Yehowa wa hasambalö ifahowuʼö ndraono Gizaraʼeli na oböwö ira ba niha si numana. (5 Mo. 15:7, 10) Ba wamaigi Yehowa, na tatolo ndra talifusöda ba ginötö moguna khöra wanolo, eluahania no mamuala ita khönia. (Baso Gamaedola 19:17.) Duma-dumania, me lafaʼoheʼö khö Waulo mbuala ira niha Keriso moroi ba Wilifi, ifotöi daʼö Faulo ’sumange somuhua somasi Lowalangi’. (Fil. 4:18) Börö daʼö, sofu khöu samösa, ’Hadia so dalifusögu si tola utolo ba mbanua niha Keriso?’ Omuso dödö Yehowa na tabeʼe ginötöda, faʼabölöda, nekhe-nekhe dangada, hegöi okhötada ba wanolo ira talifusöda na inötö moguna khöra wanolo. Ba wamaiginia, no farahu daʼö ba wamosumangeda yaʼia.—Yak. 1:27.

15. Hana wa lö tobali noro sabua khöda wamosumange Yehowa?

¹⁵ Moguna ginötö hegöi famorege ba wamalua famosumange satulö. Hewaʼae simanö, lö tobali noro sabua daʼö ba worasoida. (1 Yo. 5:3) Hadia mbörö? Börö me taʼomasiʼö Yehowa. Khalaigö samösa nono side-ide somasi mameʼe buala khö bapania. Tola manö iʼogunaʼö ginötö mato hauga za ba wamazökhi gambara si tobali buala khö bapania. Hizaʼi, lö maniasa ia me no iʼogunaʼö ginötönia wamalua daʼö. Börö me iʼomasiʼö bapania, omuso dödönia wameʼe buala andrö. Simanö göi, börö me taʼomasiʼö Yehowa, omuso dödöda wameʼe inötöda hegöi faʼabölöda ba wamosumange yaʼia.

16. Moloʼö Heberaiʼo 6:10, hewisa dödö Yehowa na taforege wangomusoiʼö tödönia?

¹⁶ Aboto ba dödö ndra satua safönu faʼomasi wa no faböʼö-böʼö zi tola lafalua iraonora. Börö daʼö, lö latötöna enaʼö fagölö fefu mbuala nibeʼe ndraonora khöra. Simanö göi Namada si so ba zorugo, aboto ba dödönia wa no  faböʼö-böʼö zi tola tafalua. Te abölö oya zi tola öfalua moroi ba niha böʼö si faʼila khöu. Mazui, te tebai öfalua zimane faʼoya nifalua niha böʼö, tola manö börö waʼalawa ndröfimö, no göna ndraʼugö fökhö, mazui oya noro dödöu yomo ba nomo. Hewaʼae simanö, böi ide-ide dödöu. (Gal. 6:4) Lö olifu Yehowa halöwö si no öfalua. Na öbeʼe khönia wondrege zi sökhi ba öʼokhögö gohitö dödö si tefaudu, hasambalö omuso dödönia. (Baso Heberaiʼo 6:10.) Iʼila nösi dödöu Yehowa. Omasi ia na örasoi waʼomuso dödö hegöi faʼahono dödö ba zumange si tola öbeʼe khönia.

17. (a) Na so ösa zabua khöda famalua ba wamosumange Lowalangi, hadia zinangea tafalua? (b) Hadia mbua nitemamö moroi ba zi no mufaʼanö ba kotak ” Douʼö Waʼomuso Dödöu”?

¹⁷ Hewisa na so ösa zabua khöda famalua ba wamosumange Lowalangi, simane famahaʼö samösa mazui fanuriaigö? Sindruhunia, na asese tafalua daʼö, itugu omuso dödöda wamalua yaʼia ba oya mbua nitemada. Tola taʼamaedolagö daʼö simane na tafomaha ita faʼolahraga mazui ba wamoli alat musik. Na ha fataria tafalua daʼö, lö manö monönö waʼonekheda ba wamalua yaʼia. Hizaʼi, hadia zalua na tahalö gangetula ba wamomaha yaʼita ero maʼökhö? Ba wamobörö, tola manö ha mato hauga menit tafalua daʼö. Hizaʼi ba gafuriata, itugu oya ginötö niʼogunaʼöda. Na no taʼila samösa mbua si sökhi moroi ba wamorege nifaluada, itugu omuso dödöda wamalua yaʼia ba tadöna-döna enaʼö ifuli zui tafalua daʼö. Hadia tola tafalua göi zimane daʼö ba wamosumangeda Lowalangi?

18. Hadia zabölö moguna sinangea tafalua ba waʼaurida andre, ba hadia mbuania na tafalua daʼö?

¹⁸ Sabölö moguna ba waʼaurida andre yaʼia daʼö ba wamalua fondrege zi sökhi ba wamosumange Yehowa. Na tafalua daʼö, hasambalö tarasoi waʼomuso dödö, so lua-lua waʼaurida, ba taʼokhögö dötönafö ba wamosumange Yehowa sagötö faʼara. (Amd. 10:22) Tola göi tarasoi waʼahono dödö iadaʼa hewaʼae göna ita abula dödö, börö me aboto ba dödöda wa hasambalö itolo nono mbanuania Yehowa. (Yes. 41:9, 10) Tatu omuso sibai dödöda ba wamosumange Amada sebua faʼomasi, ’sinangea manema sumange ba lakhömi’ moroi ba gomböila dangania maʼafefu!—Fam. 4:11.