ARTIKEL WAMAHAʼÖ 10
Tola Öheta Khöu ”Gamuata si Tohöna Andrö”
”Miheta khömi gamuata si tohöna andrö hegöi si toʼölö mifalua me föna.”—KOL. 3:9.
SINUNÖ 29 Tafaudugö Waʼaurida ba Döida
NITUTUNÖ *
1. Hewisa lala waʼaurimö ba zilalö fatua lö öfahaʼö ndraʼugö ba Zura Niʼamoniʼö?
HEWISA lala waʼaurimö ba zilalö fatua lö öfahaʼö ndraʼugö ba Zura Niʼamoniʼö khö ndra Samaduhuʼö Yehowa? Ato ba gotaluada zataʼu ba woʼangeragö daʼö. Ba zilalö, no tedönisi wangera-ngerada hegöi amuatada ba lala wangera-ngera niha gulidanö andre sanandrösa ba zatulö hegöi si fasala. Ba ginötö daʼö, ’lö hadöi tötönaföda ba lö khöda faʼaboto ba dödö sanandrösa khö Lowalangi’. (Ef. 2:12) Hizaʼi, me no tafahaʼö ita ba Zura Niʼamoniʼö, tebulö lala waʼaurida!
2. Hadia zaboto ba dödöu me no öfahaʼö ndraʼugö ba Zura Niʼamoniʼö?
2 Me no öfahaʼö ndraʼugö ba Zura Niʼamoniʼö, awena aboto ba dödöu wa iʼomasiʼö sibai ndraʼugö Amada si so ba zorugo. Aboto göi ba dödöu, na omasiʼö öʼomusoiʼö dödö Yehowa ba tobali ndraʼugö ösi nomonia, moguna öbulöʼö lala waʼaurimö, amuatamö, hegöi fangera-ngeramö. Moguna göi öfalua ba waʼaurimö goi-goinia fondrege zalawa.—Ef. 5:3-5.
3. Moloʼö Kolose 3:9, 10, hadia zomasi Yehowa tafalua, ba hadia nitutunöda ba artikel daʼa?
3 Börö me yaʼia andrö Amada ba Somböi yaʼita, ha Yehowa zotatugöi hadia zinangea lafalua ira ösi nomonia. Fatua lö tebayagö ita idanö, iʼandrö khöda enaʼö taforege ba ’wangeheta amuata si tohöna andrö hegöi si toʼölö tafalua me föna’. * (Baso Kolose 3:9, 10.) Artikel daʼa zanolo niha sedöna mubayagö idanö ba wameʼe fanema li moroi ba wanofu si tölu ngawua andre: (1) Hadia ”gamuata si tohöna andrö”? (2) Hadia mbörö wa iʼandrö khöda Yehowa ba wangeheta amuata si tohöna andrö? (3) Hewisa wamaluada daʼö? Yaʼita si no tebayagö idanö, itolo ita artikel daʼa enaʼö lö tafuli tafalua gamuata si tohöna andrö.
HADIA ”GAMUATA SI TOHÖNA ANDRÖ”?
4. Hadia nifalua zi samösa niha na so nasa khönia ”gamuata si tohöna andrö”?
4 Na so nasa ”gamuata si tohöna andrö” khö zi samösa niha, oroma daʼö ba lala wangera-ngera hegöi nifaluania. Duma-dumania, ha tana khönia iʼalui, agalio mofönu, lö mangila mangandrö saohagölö, ba asiliyawa. Omuso dödönia wamaigi pornografi hegöi film sangoromaʼö faʼalösökhi. Tatu manö, so gamuatania si sökhi, ba tola manö itegu-tegu ia tödönia börö wehede mazui amuatania si lö sökhi. Hizaʼi, lö terou dödönia ba wombulöʼö lala wangera-ngerania hegöi amuatania.—Gal. 5:19-21; 2 Ti. 3:2-5.
Na no taheta khöda ”gamuata si tohöna andrö”, lö saʼae ifatörö ita isö-isö dödö si fasala (Faigi ngenoli si 5) *
5. Hadia tola taheta fefu lala wangera-ngera hegöi isö-isö dödö si fasala niʼokhögöda? Tutunö. (Halöwö Zinenge 3:19)
5 Börö me niha si lö moʼahonoa ita, samösa lö hadöi moroi ba gotaluada si tola mangeheta fefu lala wangera-ngera hegöi isö-isö dödö si fasala niʼokhögöda. Itaria, maniasa ita börö wehededa mazui nifaluada. (Yer. 17:9; Yak. 3:2) Hizaʼi, na no taheta gamuata si tohöna andrö, lö saʼae ifatörö ita isö-isö dödö si fasala ba tola taböhöli wamalua amuata si lö sökhi. Tola saʼae tafaböʼöni gamuatada moroi ba zilalö.—Yes. 55:7; baso Halöwö Zinenge 3:19.
6. Hana wa iʼandrö khöda Yehowa enaʼö taröi lala wangera-ngera hegöi amuata si fasala si toʼölö tafalua?
6 Börö me iʼomasiʼö sibai ita Yehowa ba omasi ia na omuso dödöda, iʼandrö khöda enaʼö taröi lala wangera-ngera hegöi amuata si fasala si toʼölö tafalua. (Yes. 48:17, 18) Aboto ba dödö Yehowa wa niha si lö manimbagö isö-isö dödö si fasala andrö tola iʼasogö gabula dödö ba waʼaurinia samösa hegöi ba niha si so ba zi fasuinia. Abu dödö Yehowa na alua zimane daʼö.
7. Moloʼö Roma 12:1, 2, hadia gangetula sinangea tahalö?
7 Ba ginötö taforege ba wombulöʼö amuatada, tola manö laʼoʼaya ita ira awöda mazui ösi nomoda. (1 Fe. 4:3, 4) Te lawaʼö khöda wa tola tafalua gofu hadia ia ba lö hadöi niha sinangea mamatörö yaʼita. Hizaʼi, tenga sindruhu-ndruhu teʼefaʼö niha si lö omasi moloʼö goi-goi Yehowa, börö me no latehegö idönisi dödöra ulidanö Zatana. (Baso Roma 12:1, 2.) Börö daʼö, moguna tahalö gangetula. Hadia lö tebulö taʼonukha gamuata si tohöna andrö nidönisi gisö-isö dödö si fasala hegöi ulidanö Zatana? Mazui, hadia omasi ita na ibulöʼö lala waʼaurida Yehowa enaʼö tobali ita niha sabölö sökhi?—Yes. 64:8.
HEWISA LALADA BA ’WANGEHETAʼ AMUATA SI TOHÖNA ANDRÖ?
8. Hewisa lala Yehowa ba wanolo yaʼita ba wangeheta fangera-ngera si fasala hegöi ba wamöhöli amuata si lö sökhi?
8 Iʼila Yehowa wa moguna khöda ginötö hegöi famorege ba wangeheta fangera-ngera si fasala hegöi ba wamöhöli amuata si lö sökhi. (Si. 103:13, 14) Hizaʼi, omasi ia itolo ita ba ibeʼe khöda waʼatua-tua hegöi faʼabölö enaʼö tola tafaböʼöni lala waʼaurida. Ba wamalua daʼö, iʼogunaʼö Daromalinia, ehehania niʼamoniʼö, hegöi organisasinia. Tatu no irai göi itolo ndraʼugö ba zilalö. Iadaʼa, datatutunö hadia manö lala si tola öfalua enaʼö tola öheta khöu gamuata si tohöna andrö irege sinangea ndraʼugö tebayagö idanö.
9. Hadia zi tola öfalua börö wanolo Daromali Lowalangi?
9 Ogunaʼö Zura Niʼamoniʼö ba wamareso lala waʼaurimö. Taromali andrö amaedola zörömi. Tola öʼogunaʼö daʼö ba wamareso lala wangera-ngeramö, fehedemö, hegöi nifaluamö. (Yak. 1:22-25) Samahaʼö yaʼugö ba Zura Niʼamoniʼö hegöi ira talifusöda saro ba wamati ba mbanua niha Keriso, tola latolo ndraʼugö ba wamareso lala waʼaurimö. Duma-dumania, tola laʼogunaʼö ayati Zura Niʼamoniʼö ba wanolo yaʼugö enaʼö öʼila hadia gamuatamö si sökhi ba hadia göi zoʼamböta ndraʼugö. Tola göi lafahaʼö ndraʼugö ba wangalui fanuturu lala si teʼodane-dane ba Zura Niʼamoniʼö, sanolo yaʼugö ba wamöhöli amuata si lö sökhi. Baero daʼö, lö tebulö itolo ndraʼugö Yehowa. Iʼila hadia lala sabölö sökhi ba wanolo yaʼugö börö me tola iʼila nösi dödöu. (Amd. 14:10; 15:11) Börö daʼö, forege wangandrö khönia ba fahaʼö ndraʼugö ba Daromalinia ero maʼökhö.
10. Hadia wamahaʼö si tola öhalö moroi ba zalua khö Elie?
10 Yafaduhu dödöu wa no fondrege zi sökhi goi-goi Yehowa. Hasambalö tatema mbua na taʼoʼö fefu zomasi Yehowa. Itugu moʼeluaha waʼaurida, taʼokhögö lua-lua waʼauri si sökhi, ba tasöndra waʼohahau dödö sindruhu. (Si. 19:7-11) Hizaʼi, niha si lö omasi moloʼö goi-goi Yehowa, hasambalö göna ira abula dödö börö gamuatara si lö sökhi. Nehegö atö hadia zalua khö dalifusöda ira matua sotöi Elie. Laʼebuaʼö ia ira satuania sangomasiʼö Yehowa. Hizaʼi, me no ebua-bua ia, tedönisi dödönia ba wariawösa si lö sökhi. Lua-luania, ibörögö iʼogunaʼö narkoba, ifalua gamuata wohorö, ba ilau managö. Ibörögö göi tobali ia niha si lö sökhi amuata ba sagalio mofönu. Imane, ”Sindruhunia, ufalua fefu daʼö hewaʼae na aboto ba dödögu wa tebai lafalua daʼö ira niha Keriso.” Hizaʼi, lö olifu Elie hadia manö zi no ifahaʼö ia iʼotarai ba waʼide-idenia. Ba gafuriata, ifuli zui ibörögö wamahaʼö yaʼia ba Zura Niʼamoniʼö. Iforege ba wamöhöli amuatania si lö sökhi, ba tebayagö ia idanö me döfi 2000. Hadia mbua nirasoinia me no ifuli iʼoʼö goi-goi Yehowa? Imane Elie, ”Iadaʼa, uʼokhögö waʼahono dödö hegöi tödö side-ide si lö sinegu.” * Simane salua khönia andrö, fefu niha si lö omasi moloʼö goi-goi Yehowa hasambalö lafakao waʼaurira samösa. Hewaʼae simanö, omasi Yehowa ba wameʼe khöra fanolo enaʼö tola labulöʼö lala waʼaurira.
11. Hadia manö zi fatuwu khö Yehowa?
11 Forege enaʼö fatuwu ndraʼugö ba zi fatuwu Yehowa. (Si. 97:10) Iwaʼö Sura Niʼamoniʼö wa fatuwu khö Yehowa ”hörö sasiliyawa, lela si falimo, ba tanga samunu niha si lö horö”. (Amd. 6:16, 17) Baero daʼö, fatuwu göi ia ”ba niha safaito ba si falimo”. (Si. 5:6) Fatuwu sibai khö Yehowa gamuata simane daʼö irege ihori fefu niha si lö sökhi me götö Noakhi, börö me no afönu gulidanö faʼalösökhi nifaluara. (1 Mo. 6:13) Iʼogunaʼö göi zamaʼeleʼönia Yehowa sotöi Maleakhi ba wangombakha wa fatuwu sibai ia ba niha si faröi ba si fabali khö woʼomonia si lö sala. Lö itema zumange nibeʼera Lowalangi, ba iʼetuʼö hukumara ba zi so miföna.—Mal. 2:13-16; Heb. 13:4.
Moguna taʼogorofi ngawalö zi fatuwu khö Yehowa, hulö simane na laʼandrö khöda ba wemanga bua zinanö sobou (Faigi ngenoli si 11-12)
12. Hadia geluahania ’sindruhu-ndruhu fatuwu ita ba zi lö sökhi’?
12 Iʼandrö khöda Yehowa enaʼö ’sindruhu-ndruhu fatuwu ita ba zi lö sökhi’. (Rom. 12:9) Na ’sindruhu-ndruhu fatuwu’ ita ba zi lö sökhi, eluahania lö omasi ita mazui anuzu dödöda ba daʼö. Khalaigö na so zangumaʼö khöu wemanga bua zinanö sobou. Ba woʼangeragö manö te no anuzu dödöu. Simanö göi, moguna taʼogorofi ngawalö zi fatuwu khö Yehowa irege lö tumbu ba gera-erada wamalua daʼö.
13. Hana wa moguna tarorogö wangera-ngerada?
13 Rorogö wangera-ngeramö. Fefu ngawalö niʼera-erada daʼö zotatugöi hadia nifaluada. Börö daʼö, iwaʼö Yesu wa moguna talawa wangera-ngera si tola mondrönisi tödöda ba wamalua horö sebua. (Mat. 5:21, 22, 28, 29) Tatu manö omasi ita taʼomusoiʼö dödö Namada si so ba zorugo. Börö daʼö, na ibörögö so khöda wangera-ngera si fasala, moguna taʼanemaiʼö tatayaigö daʼö!
14. Hadia zoroma moroi ba wehededa, ba hadia manö wanofu-nofu sinangea taʼangeragö?
14 Angenanöi wehedemö. Imane Yesu, ”Hadia zi otarai mbawa, no moroi ba dödö daʼö.” (Mat. 15:18) Oroma nösi dödöda moroi ba wehededa. Börö daʼö, tandraigö angeragö: ’Hadia lö falimo ndraʼo, hewaʼae na tola manö göna ndraʼo abula dödö? Na no mangowalu ndraʼo, hadia mangelama ndraʼo faböi ugadu-gadu ndra matua mazui ira alawe böʼö? Hadia sindruhu-ndruhu fatuwu ndraʼo ba wehede soʼamakhaita ba wohorö ba lö irai alua ba mbewegu wehede simane daʼö? Na so zangandrö-ngandrö fönugu, hadia tola uhaogö-haogö manö khönia na fahuhuo ndraʼo?’ Moguna öhaogö öʼangeragö wanofu-nofu daʼa. Fehede si tenga sinangea andrö tola muʼamaedolagö ia simane bua mbaru. Abölö aoha khöda wamokai baruda na no oföna tabokai mbua mbaruda. Simanö göi, na omasi ita taheta gamuata si tohöna andrö, moguna taböhöli walimosa ba lö saʼae kalua ba mbeweda wehede si lö sökhi mazui fehede soʼamakhaita ba wohorö.
15. Hadia geluahania taʼosö gamuatada si tohöna ”ba döla geu famakao”?
15 Bulöʼö waʼaurimö. Me iwaʼö Faulo wa moguna sibai tafalua daʼö, iʼogunaʼö duma-duma si sökhi sibai. Iwaʼö wa moguna taʼosö gamuatada si tohöna ”ba döla geu famakao”. (Rom. 6:6) Eluahania, simane Keriso si no manehegö teʼosö ia ba döla geu, moguna göi tabunu gamuatada hegöi si toʼölö tafalua si fatuwu khö Yehowa. Na tafalua daʼö, awena taʼokhögö dödö side-ide si lö sinegu hegöi tötönafö faʼauri safönu faʼohahau dödö sagötö faʼara. (Yoh. 17:3; 1 Fe. 3:21) Böi olifu ita wa lö ibulöʼö goi-goinia Yehowa enaʼö tefaudu daʼö ba zomasi ita. Hizaʼi, yaʼita zinangea mombulöʼö faʼaurida ba woloʼö goi-goinia.—Yes. 1:16-18; 55:9.
16. Hadia mbörö wa tebai taböhöli wolawa isö-isö dödöda si fasala?
16 Böi böhöli wolawa isö-isö dödö si fasala. Hewaʼae na no tebayagö ndraʼugö idanö, moguna nasa ölawa gisö-isö dödö si fasala. Nehegö atö hadia zalua khö dalifusöda ira matua sotöi Maurício. Me awuyu-wuyu ia, ibörögö adöni dödönia khö nawönia ira matua. Ba gafuriata, falukha ia khö ndra Samaduhuʼö Yehowa ba ibörögö ifahaʼö ia ba Zura Niʼamoniʼö. Me no ibulöʼö lala waʼaurinia, tebayagö ia idanö me döfi 2002. Hewaʼae no ifosumange Yehowa ba zi hauga fakhe, imane Maurício, ”Itaria nasa moguna ulawa gisö-isö dödögu si fasala.” Hizaʼi, lö ide-ide dödönia. Imane, ”Aboto ba dödögu wa tola uʼomusoiʼö dödö Yehowa na ulawa gisö-isö dödögu si fasala andrö.” *
17. Hadia zadöni dödöu moroi ba zalua khö Nabiha?
17 Andrö wanolo khö Yehowa ba odaligö gehehania, tenga faʼabölöu samösa. (Gal. 5:22; Fil. 4:6) Moguna taforege enaʼö sindruhu-ndruhu aheta khöda gamuata si tohöna andrö. Nehegö atö hadia zalua khö dalifusöda ira alawe sotöi Nabiha. Me önö fakhe ndröfinia, mofanö namania iröi Nabiha hegöi ösi nomonia. Imane Nabiha, ”Afökhö sibai dödögu börö zalua andrö.” Lua-luania, tobali ia niha sagalio mofönu. Ba gafuriata, ifamawa narkoba, aefa daʼö laraʼu ia ba labeʼe ia ba gurunga mato hauga fakhe. Me so ia bakha ba gurunga, ibörögö ifahaʼö ia ba Zura Niʼamoniʼö khö ndra Samaduhuʼö Yehowa si möi ba daʼö. Ibörögö ibulöʼö lala waʼaurinia Nabiha. Imane, ”So ösa gamuatagu si lö sökhi si tola iʼanemaiʼö uböhöli. Hizaʼi, abua sibai khögu wamöhöli foroko.” Ba gafuriata, tola iböhöli woroko me no iforege ba zi töra döfi faʼara. Hadia mbörö? Imane Nabiha, ”Sabölö manolo yaʼodo yaʼia daʼö fangandrö si lö aetu-aetu khö Yehowa.” Iadaʼa no tola imane, ”Faduhu dödögu, na tola ubulöʼö lala waʼaurigu ba wangomusoiʼö tödö Yehowa, tola göi lafalua daʼö gofu haniha manö!” *
TOLA TEBAYAGÖ NDRAʼUGÖ IDANÖ!
18. Moloʼö 1 Korindro 6:9-11, hadia manö wombulöʼö si no lafalua ira samosumange Yehowa?
18 Me abad siföföna, ba gotalua niha nifili Yehowa si fao ba wamatörö khö Keriso, so ösa zi no irai mamalua amuata si lö sökhi. Duma-dumania, so ba gotaluara zi no irai mamalua amuata wohorö, lafalua waʼorudu khö nawöra ira matua, ba managö ira. Hizaʼi, börö wanolo geheha niʼamoniʼö, tola labulöʼö lala waʼaurira. (Baso 1 Korindro 6:9-11.) Iadaʼa göi, so zuta waʼato niha si no mofozu ba wombulöʼö lala waʼaurira me no lafahaʼö ira ba Zura Niʼamoniʼö. * Tola laböhöli gamuatara si lö sökhi si no mowaʼa bakha ba dödöra. Salua khöra andrö zangoromaʼö wa tola göi öbulöʼö lala waʼaurimö ba öböhöli wamalua amuata si lö sökhi enaʼö sinangea ndraʼugö tebayagö idanö.
19. Hadia nitutunöda ba artikel aefa daʼa?
19 Baero wangeheta amuata si tohöna, moguna göi laforege ira niha sedöna tebayagö idanö ba wamohouni amuatara. Ba artikel aefa daʼa, tatutunö hewisa wamaluada daʼö, ba hadia zi tola lafalua niha böʼö ba wanolo yaʼita.
SINUNÖ 41 Fondrondrongo Wangandrögu
^ par. 5 Enaʼö tola tebayagö ita idanö, moguna tabulöʼö gamuatada. Artikel daʼa zanolo yaʼita ba wangiʼila hadia manö gamuata si tohöna andrö, hadia mbörö wa moguna taheta gamuata si tohöna andrö, ba hewisa wamaluada daʼö. Ba artikel aefa daʼa, tatutunö hewisa enaʼö lö tebulö tabohouni gamuatada hewaʼae na no tebayagö ita idanö.
^ par. 3 ELUAHA NGAWUA WEHEDE: ’Mangeheta amuata si tohöna andrö’ eluahania mangeheta amuata hegöi isö-isö dödö si lö mangomusoiʼö tödö Yehowa. Moguna tafalua daʼa fatua lö tebayagö ita idanö.—Ef. 4:22.
^ par. 10 Enaʼö öʼila danö böʼönia nasa, faigi artikel ”Alkitab Mengubah Kehidupan—ʼSaya Harus Kembali kepada Yehuwa’”, ba Menara Pengawal 1 Mbaŵa si Öfa 2012.
^ par. 16 Enaʼö öʼila danö böʼönia nasa, faigi artikel ”Alkitab Mengubah Kehidupan—ʼMereka Baik Sekali’”, ba Menara Pengawal 1 Mbaŵa si Lima 2012.
^ par. 17 Enaʼö öʼila danö böʼönia nasa, faigi artikel ”Alkitab Mengubah Kehidupan—ʼSaya Menjadi Pemarah dan Agresif’”, ba Menara Pengawal 1 Mbaŵa si Fulu 2012.
^ par. 18 Faigi kotak ” Sura Niʼamoniʼö Zombulöʼö Faʼauri”.
^ par. 64 ELUAHA GAMBARA: Simane na taheta mbaruda si no atua, moguna taforege ba wangeheta amuata si lö sökhi si toʼölö tafalua.
