So ösa niha sanofu-nofu simane daʼö börö me ha asala labaso waö-waö andrö. Hizaʼi sindruhunia, faböʼö Mefibose nitötöi ba ayati 7 faoma nitötöi ba ayati 8. Moroi ba waö-waö salua khöra, tola tahalö khöda wamahaʼö sabölö moguna.

So dafitu nono matua khö Razo Saulo ba darua nononia alawe. Ono matua siaʼa khönia yaʼia daʼö Yonata. Ba gafuriata, tumbu nono Zaulo sotöi Mefibose moroi khö woʼomonia ba döi sotöi Risifa. Sadöni dödöda, so göi nono Yonata sotöi Mefibose. Eluahania, so samösa nono ba samösa göi maʼuwu Razo Saulo sotöi Mefibose.

Samuza inötö, ibörögö fatuwu Razo Saulo ba niha Gibeona ba iforege wangohori yaʼira. Tola manö, so ösa moroi ba gotaluara nibununia. Sindruhunia, tebai ifalua zimane daʼö. Hadia mbörö? Börö me no fawuʼu li ndra sondröniaʼö iraono Gizaraʼeli me götö Yosua wa atulö ira ba niha Gibeona.—Yos. 9:3-27.

Irugi götö Razo Saulo, lö tebulö mufalua mbuʼusa li andrö. Börö daʼö, me iforege ba wangohori niha Gibeona, no isawö mbuʼusa li daʼö. Lua-luania, ”moʼömö ia awö nösi nomonia ba ndro niha”. (2 Sa. 21:1) Ba gafuriata, mufataro Dawido tobali razo. Lafatunö khönia ira niha Gibeona zala sebua nifalua Zaulo andrö. Isofu khöra Dawido hewisa lalania ba wamalua fangatulö enaʼö ifuli ifahowuʼö soi daʼö Yehowa. Tenga kefe niʼandrö niha Gibeona, hizaʼi laʼandrö khö Dawido enaʼö ibeʼe ba dangara ”dafitu ndra matua moroi ba ngaʼötö [Zaulo]” enaʼö tola muhuku mate ira. (4 Mo. 35:30, 31) Ifalua Dawido hadia niʼandröra andrö.—2 Sa. 21:2-6.

Me luo daʼö, no mate Zaulo hegöi Yonata ba wasuwöta, hizaʼi auri nasa nono Yonata sotöi Mefibose. Akela-kela ia börö me no alabu ia me iraono, ba lö fao ia khö duania Saulo me iforege wangohori niha Gibeona. No fawuʼu li Dawido khö Yonata wa lö tebulö fahuwu ira irugi zi lö aetu, ba moguna mbuʼusa li daʼö ba ngaʼötö Yonata, farahu ba daʼö nononia sotöi Mefibose. (1 Sa. 18:1; 20:42) Imane Sura Niʼamoniʼö, ”Iʼomasiʼö sibai Mefibose ono Yonata ono Zaulo andrö Razo Dawido börö me no möi ba hölu Dawido föna Yehowa.”—2 Sa. 21:7.

Hewaʼae simanö, ifalua Dawido hadia niʼandrö niha Gibeona. Ibeʼe ba dangara darua nono matua khö Zaulo, samösa zotöi Mefibose, ba dalima maʼuwu Zaulo ono matua. (2 Sa. 21:8, 9) Ifalua daʼö Dawido ba wamuʼa foʼömö do ba soi andrö.

So wamahaʼö sabölö moguna si tola tahalö moroi waö-waö salua andre. No ihaogö wanutunö oroisa Lowalangi, ”Tebai labunu nono börö gamuata namania.” (5 Mo. 24:16) Na lö fasala ndraono Zaulo si darua hegöi maʼuwunia si dalima, tatu lö itehegö Yehowa na lahuku mate ira. Imane göi oroisa andrö, ”Dozi niha laʼetuʼö khönia huku faʼamate börö horönia samösa.” Tola manö no fao ndra matua si dafitu andrö khö Zaulo me iforege ba wangohori niha Gibeona. Lua-luania, lö tola löʼö labuʼa zala si no lafalua.

Hadia wamahaʼö si tola tahalö moroi ba waö-waö daʼa? Na ifalua zala si samösa niha, tebai iʼosatulö ia mazui iwaʼö tödönia wa ha soloʼö fareta niha böʼö ia. Moguna iluʼi samösa zala nifaluania andrö. Börö daʼö, imane Sura Niʼamoniʼö, ”Faloʼo lala nitörömö, ba lö dania manendre ndraʼugö. Böi holeʼö ndraʼugö ba gambölö mazui ba gabera. Aröuʼö gaheu moroi ba zi lö sökhi.”—Amd. 4:24-27; Ef. 5:15.