1. Hadia mbuania na tatutunö ba niha böʼö hewisa wa tola taʼila ’zindruhu’?

 ”HEWISA wa tola öʼila zindruhu?” Daʼö zasese lasofu ira talifusöda na awena falukha ira khöda. Omasi ita tarongo hewisa wa tola laʼila ba laʼomasiʼö Yehowa ira talifusöda, ba omasi göi ita tatutunö hana wa taʼandrö sibai saohagölö me tola tobali ita Samaduhuʼö Yehowa. (Rom. 1:11) Na tatutunö zimane daʼö, tefasugi ba dödöda wa ebua sibai mböli zindruhu si no tasöndra. Itugu aro waʼafaduhu dödöda ba lö ’taböhöli wanörö lala sindruhu’, eluahania lö tebulö taʼomusoiʼö dödö Yehowa ba waʼaurida ba taforege wanöndra howu-howunia.—3 Yo. 4.

2. Hadia nitutunöda ba artikel daʼa?

² Ba artikel daʼa, tatutunö dania hadia manö mbörö wa taʼomasiʼö zindruhu. Tatutunö göi hewisa enaʼö lö tebulö taforomaʼö wa taʼomasiʼö zindruhu. Artikel daʼa zanolo yaʼita enaʼö abölö taʼandrö saohagölö ba zi no ifalua Yehowa me no idöni ita ba zindruhu. (Yoh. 6:44) Daʼa göi zameʼe khöda famarou dödö ba wamahaʼö niha böʼö ba zindruhu andrö.

3. Hadia dane-dane siföföna wa taʼomasiʼö zindruhu?

³ Oya dane-dane wa taʼomasiʼö zindruhu. Sabölö tohude, börö me taʼomasiʼö Lowalangi Yehowa, Umbu zindruhu. Ba Daromalinia, Sura Niʼamoniʼö, aboto ba dödöda wa yaʼia andrö tenga ha Somböi sebua faʼabölö, hizaʼi yaʼia andrö Ama sebua faʼomasi ba soʼameʼegö tödö yaʼita. (1 Fe. 5:7) Aboto göi ba dödöda wa yaʼia andrö Lowalangi ”sahakhö tödö . . . si sökhi böwö, lö alio mofönu ba fahöna waʼomasi si lö faröi ba faʼaduhu”. (2 Mo. 34:6) Iʼomasiʼö sibai göi waʼatulö Yehowa. (Yes. 61:8) Afökhö dödönia na iʼila tefakao ita, ba no itatugöi ginötö ba wangasiwai abula dödöda. (Yer. 29:11) No sahöli-höli dödöda daʼa! Daʼö sambua mbörö wa taʼomasiʼö sibai Yehowa!

4-5. Hana wa ifagölösi wanötöna niʼokhögöda Faulo ba zao?

⁴ Dane-dane tanö böʼö wa taʼomasiʼö zindruhu yaʼia daʼö börö me oya mbua si sökhi nitemada me no taʼila zindruhu. Duma-dumania, sanandrösa ba dötönaföda ba zi so miföna. Ba woʼamaedolagö hawaʼebua mböli dötönafö andrö, imane sinenge sotöi Faulo, ”Fanötöna andre no amaedola zao ba waʼaurida, sabölö ba si tola taʼodaligö.” (Heb. 6:19) Simane sao sanaha enaʼö lö ahani göfa, tötönafö moroi ba Sura Niʼamoniʼö zanolo yaʼita enaʼö lö awuwu ita ba wanaögö abula dödö.

⁵ Ba ayati daʼa, nitutunö Waulo yaʼia daʼö fanötöna niʼokhögö niha Keriso nibayoini sauri ba zorugo. Hizaʼi, moguna göi ia khö ndra niha Keriso sangokhögö fanötöna faʼauri si lö aetu ba gulidanö faradaiso. (Yoh. 3:16) Börö me taʼokhögö wanötöna faʼauri si lö aetu, itugu moʼeluaha waʼaurida.

6-7. Hadia mbua nitema Yvonne me no ifahaʼö ia ba zindruhu sanandrösa ba zi so miföna?

⁶ Angeragö duma-duma salua khö dalifusöda ira alawe sotöi Yvonne. Tenga ba zindruhu teʼebuaʼö ia, ba me ide-ide ia ataʼu sibai ia waʼamate. So sambua wehede si no irai ibaso si lö irai taya ba wangera-ngerania, yaʼia daʼö: ”Samuza inötö, lö hadöi luo mahemolu.” Imane Yvonne, ”Börö ngawua wehede daʼö, andrö wa itaria tokea ndraʼo ba zi bongi ba woʼangeragö si so miföna. Umane tödögu, ’Hasambalö so waʼauri sabölö sökhi.’ Lö uʼila hadia geluaha waʼaurigu, hizaʼi lö omasido mate!”

⁷ Me no ebua-bua Yvonne falukha ia khö ndra Samaduhuʼö Yehowa. Imane, ”Ibörötaigö faduhu dödögu wa so khögu dötönafö faʼauri ba gulidanö faradaiso sagötö faʼara.” Hadia mbua nitemania me no ifahaʼö ia ba zindruhu? Imane, ”Lö saʼae tokea ndraʼo ba zi bongi ba woʼabusi tödö salua ba zi so miföna mazui faʼamate.” Iʼomasiʼö sibai zindruhu andrö talifusöda Yvonne, ba irasoi waʼomuso dödö sebua ba ginötö itutunö wanötöna andrö ba niha böʼö.—1 Ti. 4:16.

8-9. (a) Ba gamaedola nitutunö Yesu, hadia zangoromaʼö wa iʼandrö sibai saohagölö ira matua andrö ba girö-girö nisöndrania? (b) Na yaʼugö samösa, hewisa wamaigimö sindruhu andrö?

⁸ Sindruhu tanö böʼö moroi ba Zura Niʼamoniʼö yaʼia daʼö turia somuso dödö sanandrösa ba Wamatörö Lowalangi. Iʼamaedolagö daʼö Yesu hulö girö-girö si tobini. Simane nisura ba Mataiʼo 13:44, imane Yesu, ”Famatörö Lowalangi ba zorugo andrö hulö girö-girö si tobini ba mbenua. So niha sanöndra ba ifuli ikoʼo zui. Omuso sibai dödönia ba ifamawa fefu gokhötania ba wowöli benua andrö.” Nehegö atö: Tenga daʼö zi so ba dödö ndra matua andrö ba wangalui  girö-girö si tobini. Hizaʼi me no isöndra, oya nitehegönia, ifamawa fefu haratonia enaʼö tola iʼokhögö daʼö. Hadia mbörö? Börö me iʼila wa ebua sibai mböli girö-girö andrö. Abölö ebua mbölinia moroi ba zi no itehegö.

⁹ Hadia simane daʼö göi nirasoimö sanandrösa ba zindruhu? Tatu manö! Aboto ba dödöda wa fefu nihenaigö gulidanö andre, lö si tola tafaedogö ba waʼomuso dödö nitemada me tola tafosumange Yehowa iadaʼa hegöi tötönafö faʼauri si lö aetu barö Wamatörö Lowalangi. No töi si sökhi me tola fahuwu ita khö Yehowa. Abölö ebua mbölinia moroi ba zi no tatehegö. No faʼomuso dödö sebua khöda me tola ’taʼomusoiʼö dödönia’.—Kol. 1:10.

10-11. Hadia mbörö wa ibulöʼö lala waʼaurinia talifusöda Michael?

¹⁰ Ato ba gotaluada zi no manehegö hadia ia ba wangomusoiʼö tödö Yehowa. So zondröi halöwö sebua gazi mazui samöhöli ba wolohi faʼakayo. So göi zombulöʼö faʼaurira me no lafahaʼö ira sanandrösa khö Yehowa. Daʼö nifalua Michael. Tenga ba zindruhu teʼebuaʼö ia. Me awuyu-wuyu ia, ifahaʼö ia fasile. Imane, ”Uforege sibai wondrorogö enaʼö abölö ndraʼo ba lö mofökhö. Itaria uwaʼö tödögu, lö si tola mokalaisi yaʼo.” Hizaʼi, me ibörögö ifahaʼö ia Zura Niʼamoniʼö, aboto ba dödö Michael hewisa wamaigi Yehowa faʼalösökhi. (Si. 11:5) Imane Michael sanandrösa khö zi sambua fongambatö samahaʼö yaʼia ba Zura Niʼamoniʼö, ”Lö irai lafaso ndraʼo enaʼö uböhöli fasile. Nifaluara yaʼia daʼö lö laböhöli wamahaʼö yaʼo ba zindruhu si so ba Zura Niʼamoniʼö.”

¹¹ Me itugu ifahaʼö ia Michael sanandrösa khö Yehowa, itugu tedou göi waʼomasinia khö Yehowa. Sabölö adöni dödönia yaʼia daʼö faʼahakhö dödö niforomaʼö Yehowa ba nono mbanuania. Ba gafuriata, aboto ba dödö Michael wa moguna ihalö gangetula sombulöʼö faʼaurinia. Imane, ”Abua sibai khögu wondröi fasile. Te daʼö gangetula sabölö abua si no irai uhalö. Hizaʼi, uʼila wa omasi Yehowa na ufalua daʼö. Faduhu dödögu wa abölö ebua howu-howu nitemagu na ufalua ia.” Iʼandrö sibai saohagölö Michael ba zindruhu si no itema, ba daʼö zamarou tödönia ba wombulöʼö faʼaurinia.—Yak. 1:25.

12-13. Hewisa zindruhu moroi ba Zura Niʼamoniʼö tobali fanolo khö Mayli?

¹² Ba wangoromaʼö hawaʼebua mböli zindruhu, iʼamaedolagö daʼö Sura Niʼamoniʼö simane fandru sohaga ba dalu zogömi-gömi. (Si. 119:105; Ef. 5:8) Mayli, moroi ba Azerbaijan, iʼandrö sibai saohagölö ba wanolo si no itema moroi ba Daromali Lowalangi. Faböʼö agama namania hegöi agama ninania. Amania dawa, inania agama Yahudi. Imane Mayli, ”Hewaʼae faduhu dödögu wa so Lowalangi, hizaʼi oya wanofu-nofu si tumbu ba wangera-ngeragu. Duma-dumania, ’Hadia mbörö wa iwöwöi niha Lowalangi na tefakao ira sandrohu faʼauri ba tefakao nasa ira dania ba galitö narako?’ Börö me ato niha sangumaʼö wa börö Lowalangi wa alua fefu hadia ia, manofu-nofu ndraʼo, ’Hadia Lowalangi zotatugöi faʼauri niha, ba hadia omuso dödönia na göna ira famakao?’”

¹³ Lö iböhöli Mayli wangalui fanema li moroi ba wanofu-nofunia. Samuza inötö, ifahaʼö ia ba Zura Niʼamoniʼö ba tobali ia Samaduhuʼö Yehowa. Imane, ”Fatema sibai ba dödögu wamahaʼö moroi ba Zura Niʼamoniʼö ba urasoi waʼahono dödö. Daʼö zombulöʼö fangera-ngeragu sanandrösa ba waʼauri andre ba sameʼe khögu faʼomuso dödö.” Simane Mayli, tatu omasi ita tasuno Yehowa  ”Lowalangi si no mangeheta [yaʼita] moroi ba zogömi-gömi numalö ba haga sahöli-höli dödö”.—1 Fe. 2:9.

14. Hewisa enaʼö itugu aro waʼomasida ba zindruhu? (Faigi göi kotak ” Amaedola Tanö Böʼö Sanandrösa ba Zindruhu”.)

¹⁴ No tatutunö duma-duma sangoromaʼö hawaʼebua mböli zindruhu andrö. Hizaʼi, oya nasa duma-duma tanö böʼö si tola manö tumbu ba ngera-eramö. Na öfalua wamahaʼö samösa, alui hadia nasa zangoromaʼö wa moguna öʼomasiʼö zindruhu. Na öfalua daʼö, itugu öʼomasiʼö zindruhu, ba tefarou dödömö ba wangoromaʼö yaʼia.

15. Hadia sambua lala si tola tafalua ba wangoromaʼö wa taʼomasiʼö zindruhu?

¹⁵ Tola taforomaʼö wa taʼomasiʼö zindruhu na lö taböhöli wamahaʼö yaʼita ba Zura Niʼamoniʼö hegöi publikasi si teʼodane-dane ba Zura Niʼamoniʼö. Hewaʼae no ara tafahaʼö ita ba zindruhu, oya nasa zinangea tafahaʼö ita. Ba Watch Tower si oföna mufazökhi, iʼamaedolagö zindruhu andrö hulö simane bunga si tobini ba gotalua goʼo satabö, yaʼia daʼö falimosa. Enaʼö tola isöndra mbunga andrö si samösa niha, moguna iforege wangalui  yaʼia ba ifaöndrö ia wangai. Ba lö iʼanemaiʼö omuso dödönia na ha sambua nisöndrania. Moguna nasa iforege wangalui enaʼö oya isöndra. Simanö göi, böi tawaʼö wa no ibönö khöda na so sambua zindruhu si no tasöndra. Moguna nasa taforege wangalui sindruhu tanö böʼö. Moguna wangodödögö ba wamahaʼö yaʼita, hizaʼi tenga zaya-zaya gölö daʼö.

16. Moroi ba zi no öfalua, hadia lala wamahaʼö sabölö tefaudu? (Amaedola 2:4-6)

¹⁶ Lö fefu niha omasi ira mombaso mazui ba wamahaʼö yaʼira. Hizaʼi, ikaoni ita Yehowa enaʼö tagohi ba ’taʼalui’ waʼaboto ba dödö sabölö abakha sanandrösa ba zindruhu. (Baso Gamaedola 2:4-6.) Na tafalua daʼö, hasambalö oya mbua nitemada. Sanandrösa ba wombaso Sura Niʼamoniʼö, imane Corey, ”Uhaogö ufareso ero sambua ayati ba ginötö ubaso Zura Niʼamoniʼö. Ubaso ero na so catatan kaki, ubokai referensi silang, ba ufalua riset. . . . Börö me uʼogunaʼö lala wamahaʼö andre, oya mbua nitemagu!” Gofu hadia ia lala niʼogunaʼöda, no taforomaʼö wa taʼandrö saohagölö ba zindruhu na tabeʼe ginötöda ba taforege wamahaʼö yaʼita ba Zura Niʼamoniʼö.—Si. 1:1-3.

17. Hadia geluahania taʼaurifagö zindruhu? (Yakobo 1:25)

¹⁷ Tatu manö, lö obönö na ha tafahaʼö manö ita ba zindruhu. Enaʼö tatema mbuania, moguna taʼaurifagö daʼö. Eluahania, tafalua ba waʼaurida hadia zi no tafahaʼö yaʼita. Na tafalua daʼö, tarasoi waʼomuso dödö sindruhu. (Baso Yakobo 1:25.) Hewisa wotatugöida wa no taʼaurifagö zindruhu? So samösa dalifusöda sameʼe bua gera-era, iwaʼö wa moguna taʼangeragö hadia manö zindruhu si no tafalua ba hadia nasa zinangea tadouʼö. Imane Faulo, ”Enaʼö tedou ita simane si no tafalua barö daʼa.”—Fil. 3:16.

18. Hadia mbörö wa taforege enaʼö ’lö taböhöli wanörö lala sindruhu’?

¹⁸ Angeragö hadia mbua nitemada na taforege enaʼö ’lö taböhöli wanörö lala sindruhu’! Itugu sökhi waʼaurida, ba tola göi taʼomusoiʼö dödö Yehowa hegöi ira talifusöda si sara lala wamati. (Amd. 27:11; 3 Yo. 4) Daʼa dane-dane sabölö sökhi wa taʼomasiʼö ba taʼaurifagö zindruhu ba waʼaurida.