1. Moloʼö 1 Tesalonika 5:11, hadia halöwö si lö tola löʼö tafalua?

 HADIA no irai fao ndraʼugö wamasindro tomosa mazui ba wangehaogö mangawuli Nahia Gangowuloa? Na noa, tatu lö olifu ndraʼugö hadia nirasoimö me awena sibai muʼogunaʼö nahia andrö ba wamalua angowuloa. Öʼandrö sibai saohagölö khö Yehowa. Börö waʼomuso dödömö, tola manö moʼala hörömö ba abua khöu woʼanunöisi sinunö famobörö. Tobali famolakhömi Yehowa Nahia Gangowuloa sawena mufazökhi andrö. Hizaʼi, no tabeʼe khönia zumange sabölö ebua na fao ita ba wamasindro tomosa tanö böʼö. Tomosa daʼa, abölö ebua mbölinia moroi ba domosa Nahia Gangowuloa. Hadia daʼö? Tatolo ba tafarou dödö niha si möi mamosumange Lowalangi ba nahia andrö. Daʼö geluaha domosa nitutunö zinenge sotöi Faulo ba 1 Tesalonika 5:11, si tobali tuho ayati ba wamahaʼö daʼa.—Baso.

2. Hadia nitutunöda ba artikel daʼa?

² Tobali duma-duma si sökhi khöda Waulo ba wameʼe fanolo hegöi famarou dödö khö ndra talifusönia si sara lala wamati. Aboto ba dödönia nirasoira. Ba artikel daʼa, tatutunö dania hewisa wanolonia ndra talifusö si sara lala wamati enaʼö (1) anau gölöra wanaögö abula dödö, (2) larorogö waʼatulö, ba (3) aro wamatira khö Yehowa. Datatutunö hewisa woloʼöda duma-dumania ba wameʼe fanolo hegöi famarou dödö khö ndra talifusöda iadaʼa.—1 Ko. 11:1.

3. Hadia wangera-ngera satulö niʼokhögö Waulo?

³ Iʼomasiʼö sibai ndra talifusönia Faulo. Aboto ba dödönia hadia nirasoi ndra talifusönia si göna abula dödö börö me no  irai itaögö ngawalö gabula dödö. No irai ahori gefe Waulo irege mohalöwö ia ba wamönökhi soguna khönia hegöi si fao khönia. (Hal. 20:34) So nekhe-nekhe dangania, yaʼia daʼö wamazökhi tendra. Ba wamobörö me möi ia ba Gorindro, falulu fohalöwö ia ba niha böʼö samazökhi tendra yaʼia daʼö Akila ba Firisikila. Hizaʼi ”ero ngaluo sabato”, manuriaigö ia khö ndra niha Yahudi hegöi niha Yunani. Ba gafuriata, me no tohare Zila faoma Timoteo, ”ibörögö oya ibeʼe ginötönia Faulo ba wanuriaigö taromali”. (Hal. 18:2-5) Hewaʼae iforege Faulo wamönökhi soguna khönia, hizaʼi lö mangoloi wangera-ngerania ba gohitö dödönia siföföna, yaʼia daʼö ba wamosumange Yehowa. Andrö wa tola ibeʼe mene-mene si sökhi khö ndra talifusönia. Hewaʼae oya gabula dödö salua ba laforege wombönökhi soguna ba nösi nomora, ifasugi ba dödöra Faulo enaʼö lö laröi ”zabölö moguna”, yaʼia daʼö fefu nifaluara ba wamosumange Yehowa.—Fil. 1:10.

4. Hadia nifalua Waulo hegöi Timoteo ba wanolo ira talifusö si sara lala wamati ba wanaögö folohi?

⁴ Lö ara me no tefasindro mbanua niha Keriso ba Desalonika, göna folohi sabölö-bölö ndra talifusö ba daʼö. Tohare niha sagamuʼi ba laʼalu-alui Waulo hegöi Sila. Me lö lasöndra ira, ’lasöbi ösa baero ndra talifusö föna ndra samatörö’. Muʼao ira, ”No lasawö huku Kaisaro.” (Hal. 17:6, 7) Tatu ataʼu sibai ba tokea ndra talifusö sawena tobali niha Keriso me tohare niha mbanua andrö ba wamakao yaʼira. Tola manö awuwu ira wamosumange Yehowa, hizaʼi lö omasi Waulo na alua daʼö. Hewaʼae na mofanö ia hegöi Sila, hizaʼi laʼalui lala enaʼö so zameʼe fanolo ba mbanua niha Keriso sawena mufasindro andrö. Imane Faulo ba niha Desalonika, ”Mafatenge dalifusöda Timoteo . . .  ba wangaʼaroʼö yaʼami hegöi ba wondrara tödömi börö me mamati ami, enaʼö samösa lö ba gotaluami zawuwu famati börö ngawalö wamakao andre.” (1 Te. 3:2, 3) Te anehe Dimoteo hewisa wolohi salua ba mbanua Lisitera. Iʼila samösa hewisa Waulo wameʼe famarou dödö khö ndra talifusö si so ba daʼö. No göi irasoi wanolo nibeʼe Yehowa khönia hegöi khö ndra talifusönia ba Lisitera. Daʼö mbörö wa tola ibeʼe waʼafaduhu dödö khö ndra talifusö si so ba Desalonika wa hasambalö itolo ira Yehowa.—Hal. 14:8, 19-22; Heb. 12:2.

5. Hadia wanolo nitema Bryant moroi khö zi samösa satua sokubaloi, ba hadia mbuania?

⁵ Hadia nasa nifalua Waulo ba wameʼe famarou dödö khö ndra talifusönia si sara lala wamati? Me ifuli möi Waulo hegöi Baranaba ba mbanua Lisitera, Ikoniu hegöi Andriokhia, ”lafataro ndra satua sokubaloi ero sambu-sambua banua niha Keriso”. (Hal. 14:21-23) Tatu manö, ira satua sokubaloi andrö tobali umbu wondrara dödö ba mbanua niha Keriso. Simane daʼö göi ndra satua sokubaloi iadaʼa. Datafaigi hadia niwaʼö zi samösa talifusöda ira matua sotöi Bryant. Imane, ”Me 15 fakhe ndröfigu, iröi nomoma amagu ba laʼefasi moroi ba mbanua niha Keriso ninagu. Hulö latiboʼö ndraʼo ba urasoi waʼafatö dödö.” Hadia zanolo Bryant irege anau gölönia? Imane, ”So samösa zatua sokubaloi sotöi Tony, fahuhuo ia khögu ba gangowuloa hegöi ba ginötö tanö böʼö. Itutunö khögu waö-waö waʼauri niha sorasoi faʼomuso dödö hewaʼae göna ira abula dödö. Ibaso khögu Zinunö 27:10 ba itutunö khögu sanandrösa khö Hizikia, niha si lö faröi hewaʼae na tenga duma-duma si sökhi namania.” Hadia mbuania khö Bryant? Imane, ”Börö wanolo moroi khö Tony, tola uhalö halöwö safönu inötö ba urasoi waʼomuso dödö.” Yaʼami ira  satua sokubaloi, böi mitaha-taha wameʼe ”fehede si sökhi” si möi famarou dödö khö ndra talifusöda sanaögö abula dödö simane salua khö Bryant.—Amd. 12:25.

6. Hewisa wangogunaʼö Waulo waö-waö waʼauri nono mbanua Yehowa ba wamarou tödö ndra talifusönia?

⁶ Ifasugi ba dödö ndra talifusönia Faulo wa ato ’zamaduhuʼö simane lawuo’ si no mofozu ba wanaögö abula dödö börö wanolo moroi khö Yehowa. (Heb. 12:1) Itutunö Faulo waö-waö waʼauri niha ba götö föna si no mofozu wanaögö abula dödö börö me iʼila wa tobali fanolo daʼö khö ndra talifusönia ba wangokhögö faʼabarani ba tola laʼosambuaʼö dödöra ba ’mbanua Lowalangi sauri’. (Heb. 12:22) Simane daʼö göi iadaʼa. Tatu teʼaroʼö wamatida na tabaso nifalua Yehowa ba wanolo Gideono, Baraki, Dawido, Samueli ba tanö böʼönia. (Heb. 11:32-35) Teʼaroʼö göi wamatida na tabaso waö-waö waʼauri nono mbanua Lowalangi ba götöda iadaʼa. Simane daʼö nirasoi ndra talifusö samaʼoheʼö sura ba gödo sebua. Latutunö ba zura andrö wa laʼandrö sibai saohagölö ba waö-waö waʼauri ndra talifusöda börö me itugu teʼaroʼö wamatira me no aefa labaso daʼö.

7. Hadia wamahaʼö si tola öhalö ba mene-mene Waulo nisura ba Roma 14:19-21?

⁷ Tola tatolo ba tafarou dödö ndra talifusöda na taforege wondrorogö faʼatulö ba mbanua niha Keriso. Na so waʼafaböʼö lala wangera-ngera, böi tabaliʼö daʼö famoto wahasara dödöda. Böi fatandro ita na lö fatimba daʼö ba goi-goi Zura Niʼamoniʼö. Angeragö atö duma-duma daʼa. Ba mbanua niha Keriso ba Roma, so ba daʼö niha Keriso Yahudi hegöi niha Keriso si tenga Yahudi. Börö me tenga barö Goroisa Moze so ira, so zangumaʼö wa lö moguna laʼoʼö goroisa sanandrösa ba wemanga gö. (Mrk. 7:19) Iʼotarai daʼö, so ösa niha Yahudi sangumaʼö wa tola laʼa fefu ngawalö gö. Hizaʼi, so göi zangumaʼö wa tebai lafalua daʼö. Ha börö-börö daʼa, aboto wahasara dödö ba mbanua niha Keriso. Andrö wa iʼamenesi ira Faulo ba wondrorogö faʼatulö. Imane, ”Sökhi na lö muʼa nagole mazui mubadu nagu ba gofu hadia nifaluami, moroi na tobali fangala khö dalifusömi.” (Baso Roma 14:19-21.) Itolo ndra talifusönia Faulo enaʼö laʼila hadia manö lua-luania khöra zamösana hegöi ba mbanua niha Keriso na lafalua daʼö. Ifaudugö göi waʼaurinia enaʼö lö tobali ia fangala ba niha böʼö. (1 Ko. 9:19-22) Tola göi tafarou dödö niha böʼö ba tarorogö waʼatulö na tataha dödöda enaʼö lö tafaso niha böʼö ba woloʼö somasi ita na alua gabula dödö.

8. Hadia nifalua Waulo me so gabula dödö samoto fahasara dödö ba mbanua niha Keriso?

⁸ Tobali duma-duma si sökhi Waulo ba wondrorogö faʼatulö na so waʼafaehu wangera-ngera sanandrösa ba zabölö moguna. Duma-dumania, so ösa ba mbanua niha Keriso me abad siföföna sangumaʼö wa lö tola löʼö lasuna niha Keriso si tenga Yahudi, te enaʼö lö latandrawaisi ira niha baero. (Gal. 6:12) Sindruhunia lö fao dödö Waulo ba lala wangera-ngerara andrö. Hizaʼi, lö ifaso niha ba woloʼö lala wangera-ngerania. Si fao fangide-ngideʼö, iʼandrö wanuturu lala khö ndra sinenge hegöi satua sokubaloi si so ba Yeruzalema. (Hal. 15:1, 2) Buania, larasoi waʼomuso dödö hegöi faʼatulö ira talifusöda ba mbanua niha Keriso.—Hal. 15:30, 31.

9. Hewisa woloʼöda duma-duma Waulo?

⁹ Na alua watitisa sebua, moguna taforege ba wondrorogö faʼatulö. Lalania, yaʼia daʼö na taʼoʼö mene-mene moroi ba niha si no ifataro Yehowa ba wondrorogö banua niha Keriso.  Sasesenia, mene-mene si teʼodane-dane ba Zura Niʼamoniʼö tasöndra ia ba publikasida mazui ba wanuturu lala nihenaigö organisasi. Na taʼosambuaʼö dödöda woloʼö fanuturu lala andrö ba lö tafaso niha ba wanemaʼö lala wangera-ngerada, no taforege wondrorogö faʼatulö ba mbanua niha Keriso.

10. Hadia nasa nifalua Waulo ba wondrorogö faʼatulö ba mbanua niha Keriso?

¹⁰ Iforege nasa wondrorogö faʼatulö Faulo yaʼia me iʼosambuaʼö dödönia ba mbua-bua si sökhi niʼokhögö ndra talifusönia, tenga ba gamuatara si lö baga. Duma-dumania, ba gafuriata zura nifaʼoheʼö Waulo ba Roma, ato ndra talifusöda nitötöinia töi, isuno ira ba itutunö hadia manö mbua-buara si sökhi zamösana. Tola göi taʼoʼö duma-duma Waulo na lö alawö-lawö ita wanutunö mbua-bua si sökhi niʼokhögö ndra talifusöda. Na tafalua daʼö, no taʼaroʼö wahuwusa hegöi faʼomasi ba gotalua ndra talifusöda ba mbanua niha Keriso.

11. Hewisa enaʼö ifuli atulö ita khö ndra talifusöda na no alua watitisa?

¹¹ Hewaʼae no aro ba wamati zi samösa niha Keriso, hizaʼi itaria so zi lö fao dödönia mazui fatiti ia ba niha böʼö. Daʼö zalua khö Waulo hegöi si fahuwu khönia sotöi Baranaba. Alua waʼafaehu wangera-ngera ba gotaluara sanandrösa khö Mareko, hadia fao ia khöra mazui löʼö ba wamalua halöwö utusan injil. Lua-luania, ”abölö-bölö watötöisa” ba gotaluara irege fabali ira. (Hal. 15:37-39) Hizaʼi, ifuli mangatulö Waulo, Baranaba hegöi Mareko. Laforomaʼö wa ebua sibai mböli waʼatulö andrö hegöi fahasara dödö ba mbanua niha Keriso. Ba gafuriata, itutunö Faulo ngawalö zi sökhi sanandrösa khö Mbaranaba hegöi Mareko. (1 Ko. 9:6; Kol. 4:10) Simanö göi ita, moguna taʼanemaiʼö taʼasiwai na so waʼafaehu lala wangera-ngerada khö ndra talifusöda ba mbanua niha Keriso, ba lö göi tebulö taʼosambuaʼö dödöda ba mbua-buara si sökhi. Na tafalua daʼö, no taforege wondrorogö faʼatulö hegöi fahasara dödö.—Ef. 4:3.

12. Hadia manö gabula dödö salua khö ndra talifusöda?

¹² Tola tatolo ba tafarou dödö ndra talifusöda, na taʼaroʼö wamatira khö Yehowa. So ösa ba gotaluara niʼoʼaya nösi nomora si tenga si sara lala wamati, awöra wohalöwö mazui awöra sekola. Tanö böʼönia, göna ira fökhö sabölö-bölö mazui laforege ba wanaögö faʼafatö dödö. So göi zi no ara tebayagö idanö ba labalo-baloi hawaʼara alua gamozua götö danö andre. Daʼö manö zanandraigö famati niha Keriso ba götöda. Daʼö göi gabula dödö nitaögö niha Keriso me abad siföföna. Hadia nifalua Waulo ba wangaʼaroʼö famati ndra talifusönia?

13. Hadia wanolo nibeʼe Waulo ba niha niʼoʼaya börö nifaduhusira tödö?

¹³ Iʼogunaʼö Zura Niʼamoniʼö Faulo ba wangaʼaroʼö famati ndra talifusönia. Duma-dumania, so niha Keriso Yahudi si lö mangila mameʼe fanema li na so nösi nomora si lö faduhu tödö sangumaʼö wa abölö tohude agama Yahudi moroi ba agama niha Keriso. Börö daʼö, tatu möi fangaro niha Keriso zura nifaʼoheʼö Waulo ba niha Heberaiʼo me luo daʼö. Daʼa dane-dane saro sanolo yaʼira enaʼö laʼila hadia wanema li nibeʼera ba nösi nomora si lö faduhu tödö. (Heb. 1:5, 6; 2:2, 3; 9:24, 25) Iadaʼa, tola göi tatolo ndra talifusöda niʼoʼaya. Tatolo ira ba wangogunaʼö publikasi si teʼodane-dane ba Zura Niʼamoniʼö ba wanutunö hadia dane-dane moroi ba nifaduhusira tödö. Duma-dumania, na so zi bohou ebua niʼoʼaya börö me lö laʼowasaini ngaluo waʼatumbu mazui ngaluo sebua tanö böʼö, tola tatolo ira wangalui dane-dane ba nifaduhusira  tödö ba mbuku Lala ba Wanöndra Faʼohahau Dödö Sagötö Faʼara! famahaʼö 44. Tola laʼogunaʼö daʼö ba wanutunö hadia mbörö wa lö lafalua gowasa andrö.

14. Hewaʼae oya ginötö niʼogunaʼö Waulo ba wanuriaigö hegöi ba wamahaʼö, hadia zi lö tebulö ifalua?

¹⁴ Ifarou ndra talifusönia Faulo enaʼö lafalua ”mbua-bua si sökhi” ba wangoromaʼö faʼomasi. (Heb. 10:24) Itolo ndra talifusönia tenga ha ba wehede manö, hizaʼi iforomaʼö daʼö ba nifaluania. Duma-dumania, me göna lofo ndra talifusönia si sara lala wamati ba Yudea, fao ia ba wolohe tolo-tolo. (Hal. 11:27-30) Eluahania, hewaʼae oya ginötö Waulo ba wanuriaigö hegöi ba wamahaʼö, lö tebulö iʼalui lala ba wanolo niha soʼamböta ba zoguna. (Gal. 2:10) Me ifalua daʼö, no iʼaroʼö wamati ndra talifusönia si sara lala wamati enaʼö faduhu dödöra wa lö tebulö ibönökhi zoguna khöra Yehowa. Iadaʼa, no göi taʼaroʼö wamati ndra talifusöda na tabeʼe ginötö, faʼabölö hegöi faʼatua-tuada ba wanolo ira talifusöda si göna bencana. Tola göi tabeʼe dolo-tolo si no aoha gölö fameʼe ba wotuhini halöwö nifalua ba zi sagörö ulidanö. Na tafalua zimane daʼö, no tatolo ndra talifusöda si sara lala wamati enaʼö itugu faduhu dödöra wa lö iröi ira Yehowa.

15-16. Hadia zinangea tafalua ba niha sawuwu famati?

¹⁵ Lö iböhöli Faulo wameʼe famarou dödö ba niha sawuwu famati. Iforomaʼö khöra waʼahakhö dödö, ihaogö-haogö na fahuhuo ia khöra ba ibeʼe wamarou dödö. (Heb. 6:9; 10:39) Duma-dumania, asese iʼogunaʼö ngawua wehede ”yaʼita” ba zura nifaʼoheʼönia ba niha Heberaiʼo. Daʼö zangoromaʼö wa ifaogö ia wamalua mene-mene daʼö. (Heb. 2:1, 3) Simane Faulo, böi göi taböhöli wameʼe famarou dödö ba niha sawuwu famati. Taforomaʼö wa taʼameʼegö tödö ira. Buania, tola larasoi wa taʼomasiʼö  ira ba tola aro wamatira. Na tahaogö-haogö khöra ba sökhi note wehededa, no tobali famarou dödöra daʼö.

¹⁶ Iʼaroʼö dödö ndra talifusönia Faulo wa anehe Yehowa gamuatara si sökhi. (Heb. 10:32-34) Tola göi tafalua zimane daʼö ba ginötö tatolo ndra talifusöda sawuwu famati. Tola taʼandrö khöra enaʼö latutunö hewisa wa tola laʼila zindruhu, ba tafarou dödöra enaʼö latörö-törö tödöra wanolo si no irai latema moroi khö Yehowa. Tafaduhuʼö göi khöra wa lö olifu Yehowa waʼomasi si no laforomaʼö ba zilalö ba lö iröi ira. (Heb. 6:10; 13:5, 6) Fahuhuosa simane daʼö zamasugi ba dödöra enaʼö lö laböhöli wamosumange Lowalangi.

17. Hadia waʼatua-tua sinangea tadouʼö?

¹⁷ Simane tuka samazökhi tomosa, moguna idouʼö waʼatua-tuania ero inötö. Simanö göi ita, moguna tadouʼö waʼatua-tuada ba wanolo hegöi ba wamarou tödö ndra talifusöda. Tola tatolo ira enaʼö anau gölöra wanaögö abula dödö na tatutunö khöra duma-duma niha sanau ölö ba götö föna. No tarorogö waʼatulö na tatutunö mbua-bua si sökhi niʼokhögö ndra talifusöda, lö tafaso enaʼö latemaʼö mbua gera-erada ba taforege wangasiwai fatitisa salua ba gotaluada. Tola göi taʼaroʼö ndra talifusöda ba wamati na tabeʼe khöra ayati si möi famarou dödö, tabeʼe khöra wanolo si tefaudu, ba tafarou dödö niha sawuwu famati.

18. Hadia gangetula nihalöda?

¹⁸ Me fao ita wamazökhi tomosa organisasi, tatu omuso sibai dödöda ba tarasoi waʼahono dödö. Tola göi tarasoi daʼö na tatolo ndra talifusöda enaʼö aro ira ba wamati. Tenga simane tomosa si tola adudu, bua nitemada moroi ba halöwö andre tola tarasoi ia sagötö faʼara! Börö daʼö, datahalö gangetula enaʼö ’böi taböhöli wangaʼaroʼö hegöi ba wamarou tödö simane si no tafalua’.—1 Te. 5:11.