1. Hadia wanandraigö salua khö Yosefo, ba hadia nifaluania?

 ALUA wanandraigö sebua khö Yosefo ono Yakobo. Imane khönia si samösa ira alawe, ”Aine, förö ba ngaigu.” Ira alawe andrö foʼomo zokhö yaʼia, Fotifa. Itimbagö wondrönisi dödö andrö Yosefo. Te so niha iadaʼa sangumaʼö, ’Hana wa itimbagö wondrönisi dödö andrö?’ Me luo daʼö, lö hadöi Fotifa, ba ha sawuyu ia ba nomo daʼö. Na lö iʼoʼö niwaʼö ndra alawe daʼö, tola manö teʼala waʼaurinia. Hizaʼi, lö iböhöli wotimbagö fondrönisi dödö andrö. Hadia mbörö? Imane, ”Lö duhu ufalua zi lö sökhi ba fasala ndraʼo föna Lowalangi.”—1 Mo. 39:7-12.

2. Hana wa iʼila Yosefo wa fasala ia föna Lowalangi na orudu ia khö woʼomo zokhö yaʼia?

² Hana wa aboto ba dödö Yosefo na orudu ia khö woʼomo zokhö yaʼia, no amuata ’si lö sökhi’ daʼö ba wamaigi Lowalangi? Ba Goroisa Moze, so sambua fareta sangumaʼö ”böi ohorö”, hizaʼi awena musura daʼö mato 200 fakhe me no aefa alua daʼa khö Yosefo. (2 Mo. 20:14) Hewaʼae simanö, börö me sindruhu-ndruhu aboto ba dödönia Yehowa, iʼila Yosefo wa lö irai fao dödö Yehowa ba gamuata fohorö. Duma-dumania, iʼila hewisa wotatugöi Yehowa fongambatö ba gotalua zi samösa ira matua hegöi ira alawe. No göi irongo wa dua kali itolo Yehowa nenenia Sara me so zedöna mangai Sara moroi khö  Gaberahamo tobali foʼomonia. Ifalua göi zimanö daʼö Lowalangi ba wolumöʼö Rebeka, foʼomo Gizaʼaki. (1 Mo. 2:24; 12:14-20; 20:2-7; 26:6-11) Börö me iʼangerönusi daʼö Yosefo, aboto ba dödönia hadia zatulö hegöi si lö atulö föna Lowalangi. Börö me iʼomasiʼö Lowalanginia, andrö wa ihalö gangetula ba wangomasiʼö hegöi ba wamalua goi-goi Yehowa.

3. Hadia nitutunöda ba artikel daʼa?

³ Hadia öʼomasiʼö zatulö? Tatu manö. Hizaʼi, fefu ita lö moʼahonoa ba na lö mangelama ita tola manö tedönisi gera-erada ba lala wangera-ngera gulidanö sanandrösa ba zatulö. (Yes. 5:20; Rom. 12:2) Börö daʼö, datatutunö hadia geluahania famalua satulö ba hadia gunania na omasi ita wamalua daʼö. So göi tölu lala nitutunöda sanolo yaʼita ba wangaʼaroʼö faʼomasida ba goi-goi Yehowa.

4. Hadia mbua gera-era si fasala niʼokhögö niha sanandrösa ba zatulö?

⁴ Ira sondröniaʼö ba agama me götö Yesu, lawaʼö tödöra wa no lafalua zatulö. Hizaʼi, itegu ira Yesu börö me lafaso niha böʼö ba woloʼö niwaʼöra ba lafazökhi goi-goira samösa sanandrösa ba zatulö hegöi si lö atulö. (Sango. 7:16; Luk. 16:15) Simane daʼö göi niha ba götöda. Lafazökhi goi-goira samösa ba lawaʼö tödöra wa no lafalua zatulö. So khöra waʼasiliyawa, lahuku nawöra ba abölö sökhi ira moroi ba niha böʼö ba wamaigira. Lö omasi Yehowa ba niha simane daʼö. Tenga niha satulö ira ba wamaiginia.

5. Moloʼö Sura Niʼamoniʼö, hadia geluahania wamalua satulö? Beʼe duma-duma.

⁵ Famalua satulö eluahania tafalua zi sökhi moloʼö famaigi Lowalangi Yehowa. Ba Zura Niʼamoniʼö, ngawua wehede ’famalua satulö’ eluahania tafaudugö waʼaurida ba goi-goi salawa, yaʼia daʼö goi-goi Yehowa. Duma-dumania, ifarou ndra sogale Yehowa enaʼö laʼogunaʼö ’waliʼera satulö’. (5 Mo. 25:15) Na so samösa niha Keriso somasi mamalua satulö föna Lowalangi, moguna itörö zindruhu ba lala halöwönia. Niha somasi mamalua satulö, fatuwu ia na iʼila so niha si göna falöʼatulö. Ba ’wangomusoiʼö tödö Yehowa’, niha sangomasiʼö satulö moguna iʼangeragö hewisa wamaigi Yehowa gangetula nihalönia.—Kol. 1:10.

6. Hana faduhu dödöda wa hasambalö atulö goi-goi Yehowa? (Yesaya 55:8, 9)

⁶ Ba Zura Niʼamoniʼö, iʼamaedolagö Yehowa andrö ”Umbu zindruhu”. (Yer. 50:7) Börö me Yehowa andrö Somböi, ha yaʼia zinangea motatugöi goi-goi sanandrösa ba zatulö hegöi si lö atulö. Lö taʼila sibai hadia zatulö hegöi si lö atulö, börö me no aekhu ita ba horö hegöi falömoʼahonoa. Hizaʼi, moʼahonoa Yehowa, andrö wa hasambalö atulö goi-goinia. (Amd. 14:12; baso Yesaya 55:8, 9.) Börö me si fakhili-khili khö Lowalangi ita, andrö wa tola tafaudugö waʼaurida ba goi-goinia satulö. (1 Mo. 1:27) Omasi ita wamalua daʼö. Faʼomasida khö Namada, daʼö zamarou tödöda ba wamorege ba woloʼö duma-dumania.—Ef. 5:1.

7. Hana wa moguna tafalua goi-goi si no mutatugöi? Beʼe duma-duma.

⁷ Tatema mbua na taʼoʼö goi-goi Yehowa sanandrösa ba zatulö hegöi si lö atulö. Hadia mbörö? Khalaigö hadia zalua na so perusahaan samazökhi tomosa sangodaligö goi-goi nifakhoira samösa ba wotatugöi suʼa-suʼa. Lua-luania, tola manö fawuka. Baero daʼö, na so doto mazui matiri si lö moloʼö goi-goi si no mutatugöi ba wameʼe dalu-dalu zofökhö, tola manö faʼamate lua-luania. Ba daʼö taʼila wa tobali folumöʼöda goi-goi si no mutatugöi. Simane daʼö göi, tola tobali folumöʼöda na  taʼoʼö goi-goi Lowalangi sanandrösa ba zatulö hegöi si lö atulö.

8. Hadia howu-howu nitema niha somasi mamalua satulö?

⁸ Ifahowuʼö Yehowa niha samaudugö faʼaurira ba goi-goinia. Ifabuʼu khöra, ”Niha satulö tödö dania zokhö tanö, ba mowanua ira ba daʼö sagötö faʼara.” (Si. 37:29) Hadia tola ökhalaigö hewisa wahasara dödö, faʼatulö hegöi faʼowua-wua dödö nirasoida na fefu niha laʼoʼö goi-goi Yehowa? Omasi Yehowa na örasoi waʼauri simane daʼö. Daʼö mbörö wa taʼomasiʼö goi-goi Yehowa. Hewisa enaʼö itugu taʼomasiʼö mbua-bua andre? Datatutunö tölu lala si tola tafalua.

9. Hadia zanolo yaʼita enaʼö taʼomasiʼö zatulö?

⁹ Lala si 1: Omasiʼö Yehowa samazökhi goi-goi andrö. Enaʼö taʼomasiʼö zatulö, moguna tadouʼö waʼomasida khö Yehowa, samazökhi goi-goi sanandrösa ba zatulö hegöi si lö atulö. Na itugu taʼomasiʼö Yehowa, itugu omasi ita ba wamaudugö faʼaurida ba goi-goinia. Duma-dumania, na laʼomasiʼö Yehowa ira Adamo ba Khawa, tatu lö irai lasawö nifakhoi Yehowa.—1 Mo. 3:1-6, 16-19.

10. Hewisa enaʼö itugu aboto ba dödö Gaberahamo lala wangera-ngera Yehowa?

¹⁰ Tatu manö, lö omasi ita tafalua zala simane Adamo hegöi Khawa. Tola tatimbagö daʼö na lö taböhöli wamahaʼö yaʼita sanandrösa khö Yehowa, taʼameʼegö tödö mbua-buania, ba taforege enaʼö aboto ba dödöda lala wangera-ngerania. Na tafalua daʼö, itugu tedou waʼomasida khö Yehowa. Angeragö duma-duma Gaberahamo. Sindruhu-ndruhu iʼomasiʼö Yehowa. Lö mamadaö ia hewaʼae lö iʼila sibai gangetula nihalö Yehowa. Iforege enaʼö itugu aboto ba dödönia nasa sanandrösa khö Yehowa. Duma-dumania, me ihalö gangetula Yehowa ba wanudugö Sodoma hegöi Gomora, ataʼu Gaberahamo na ifaogö wangohori niha satulö ba niha si lö atulö ”Sanguhuku ösi gulidanö”. Börö me aombö dödö Gaberahamo, andrö mato hauga kali manofu ia khö Yehowa si fao fangide-ngideʼö, ba si fao faʼebolo dödö itema linia Yehowa. Ba gafuriata, aboto ba dödö Gaberahamo wa Yehowa zamareso tödö niha ba lö irai ifaogö wanguhuku niha si sökhi ba niha si lö sökhi.—1 Mo. 18:20-32.

11. Hewisa wangoromaʼö Gaberahamo wa iʼomasiʼö ba ifaduhusi tödö Yehowa?

¹¹ Toröi-röi sibai ba dödö Gaberahamo wahuhuosania khö Yehowa sanandrösa ba mbanua Zodoma hegöi Gomora. Tatu manö itugu iʼomasiʼö ba iʼameʼegö tödö Namania, töra moroi ba zi no ifalua ba zilalö. Ba zi hauga fakhe aefa daʼö, ifuli tetandraigö waʼafahudu dödö Gaberahamo khö Yehowa. Iʼandrö khönia Yehowa enaʼö ibeʼe sumange nono niʼomasiʼönia sotöi Izaʼaki. Börö me no oya waʼaboto ba dödö niʼokhögönia sanandrösa khö Lowalangi, andrö wa lö saʼae manofu-nofu ia. Iʼanemaiʼö ifalua Aberahamo niʼandrö Yehowa khönia. Khalaigö hewisa waʼafökhö dödönia me ifaʼanö zumange andrö. Tatu manö no ihaogö iʼangerönusi Aberahamo hadia zi no ifahaʼö yaʼia sanandrösa khö Yehowa. Aboto ba dödönia wa lö irai ifalua zi lö atulö Yehowa ba hasambalö iforomaʼö waʼomasi. Moloʼö sinenge sotöi Faulo, faduhu dödö Gaberahamo wa tola isusugi Yehowa nono niʼomasiʼönia sotöi Izaʼaki. (Heb. 11:17-19) No fawuʼu li Yehowa wa Izaʼaki dania zi tobali ama ba zi sambua soi. Inönö nasa me luo daʼö, lö hadöi ono Gizaʼaki. Börö me iʼomasiʼö Yehowa Aberahamo, andrö wa faduhu dödönia wa hasambalö ifalua zatulö Amania. Börö wamati  wa tola moloʼö ia hewaʼae na abua daʼö.—1 Mo. 22:1-12.

12. Hewisa woloʼöda duma-duma Gaberahamo? (Si. 73:28)

¹² Hewisa woloʼöda duma-duma Gaberahamo? Simane nifaluania, böi tebulö tafahaʼö ita sanandrösa khö Yehowa. Na tafalua daʼö, itugu taʼomasiʼö ba itugu ahatö ita khönia. (Baso Zinunö 73:28.) Tola göi tafomaha dödöda side-ide ba wangogunaʼö lala wangera-ngera Yehowa. (Heb. 5:14) Buania, na so zondrönisi tödöda wamalua si fasala, tola iʼanemaiʼö tatimbagö daʼö. Fatuwu ita wamalua hadia zi möi fangafökhö dödö Namada ba samakiko fahuwusada khönia. Hizaʼi, hewisa nasa wangoromaʼöda wa taʼomasiʼö waʼatulö?

13. Hewisa lalada wolohi faʼatulö? (Amaedola 15:9)

¹³ Lala si 2: Forege wondrouʼö faʼomasi ba wamalua goi-goi Yehowa ero maʼökhö. Na omasi ita abeʼe mbotoda, moguna asese olahraga ita. Simanö göi, enaʼö itugu taʼomasiʼö goi-goi satulö khö Yehowa, moguna so wamorege nifaluada. Tola tafalua daʼa ero maʼökhö. Lö irai ifaso ita Yehowa. Lö iʼandrö khöda zi tebai tafalua. (Si. 103: 14) Ifaduhuʼö khöda wa ”iʼomasiʼö niha solohi faʼatulö”. (Baso Gamaedola 15:9.) Na omasi ita takhamö gohitö dödö ba wangai halöwö khö Yehowa, moguna taforege ba wamalua daʼö. Simanö göi na omasi ita tagohi waʼatulö, ba si fao faʼebolo dödö itolo ita Yehowa ba wangoromaʼö faʼatedou wamalua bua-bua daʼö ero maʼökhö.—Si. 84:5, 7.

14. Hadia ”mbaru siʼöli faʼatulö dödö” andrö, ba hana wa moguna ia khöda?

¹⁴ Si fao faʼomasi, ifasugi ba dödöda Yehowa wa faʼatulö andrö tenga noro dödö. (1 Yo. 5:3) Hizaʼi, no sambua folumöʼö daʼö ba moguna ia khöda ero maʼökhö. Datatörö tödöda fakake wasuwöta ba wamati nitutunö Waulo. (Ef. 6:14-18) Hadia zolumöʼö tödö zi samösa saradadu? Yaʼia daʼö ”baru siʼöli waʼatulö dödö”, si no amaedola goi-goi satulö khö Yehowa. Simane baru siʼöli solumöʼö tödö zaradadu, tola göi ilumöʼö dödöda  fondrege zabakha goi-goi satulö andrö khö Yehowa. Daʼö mbörö wa moguna sibai tafake fefu fakake wasuwöta farahu ba daʼö mbaru siʼöli faʼatulö dödö!—Amd. 4:23.

15. Hewisa wangogunaʼöda baru siʼöli faʼatulö dödö andrö?

¹⁵ Hewisa wangogunaʼöda baru siʼöli faʼatulö dödö andrö? Tola tafalua daʼö na tahaogö taʼangeragö hadia goi-goi Lowalangi ba ginötö tahalö gangetula sero maʼökhö. Ba ginötö tafili hadia nifahuhuosida, musik nifondrondrongoda, hiburan nifaigida mazui buku nibasoda, moguna tasofu khöda samösa: ’Hadia nifaʼanögu ba dödögu? Hadia zomasi Yehowa ba daʼa? Mazui hadia so zi lö faudu ba zomasi Yehowa simane amuata fohorö, faʼalösökhi, fakhögusa hegöi sangalui tana khönia?’ (Fil. 4:8) Na tafaudugö ba zomasi Yehowa gangetula nihalöda, daʼö geluahania wa no tatehegö ilumöʼö dödöda goi-goi satulö andrö khö Yehowa.

16-17. Hewisa Yesaya 48:18 wameʼe khöda faʼaro dödö wa tola tafalua goi-goi Yehowa ba waʼaurida sagötö faʼara?

¹⁶ Hadia no irai aombö dödöu hadia tola öfalua dania ba waʼauriu goi-goi satulö khö Yehowa sagötö faʼara? Angeragö duma-duma niʼogunaʼö Yehowa nisura ba Yesaya 48:18. (Baso.) Ifabuʼu Yehowa wa faʼatulöda andrö hulö ’ndrulu nasi’. Khalaigö na so ndraʼugö ba ngai nasi ba öʼila-ila me numalö ndrulu nasi ba zinga gawu. Me soʼö ba nahia daʼö, hadia no irai aombö dödöu wa samuza inötö dania tebato ndrulu andrö ba zi lö mudöna-döna? Löʼö! Öʼila wa no alua daʼö ba zi hauga ribu fakhe silalö ba hasambalö simane daʼö ia sagötö faʼara.

¹⁷ Simane dulu nasi andrö, tola göi lö tebulö öfalua zatulö. Hewisa wa tola? Ba ginötö öhalö gangetula, moguna öʼangeragö hadia zomasi Yehowa enaʼö öfalua. Ba falua daʼö. Hewaʼae na abua gangetula nihalömö, hizaʼi hasambalö itoloʼö Amada sebua faʼomasi enaʼö lö tebulö öfalua ba waʼaurimö goi-goi satulö andrö khönia ero maʼökhö.—Yes. 40:29-31.

18. Hana wa tebai tahuku niha böʼö moloʼö goi-goida samösa?

¹⁸ Lala si 3: Touʼö khö Yehowa wamalua fanguhuku. Na taforege wamaudugö faʼaurida ba goi-goi satulö khö Yehowa, böi tahuku niha böʼö mazui tawaʼö tödöda wa ha yaʼita zatulö. Moroi na taʼosiwawöi niha böʼö ba tahuku ira moloʼö goi-goida samösa, moguna tatörö tödöda wa ha Yehowa ”Zanguhuku ösi gulidanö”. (1 Mo. 18:25) Lö göi nitehegö Yehowa khöda wamalua fanguhuku simane daʼö. Imane Yesu, ”Böi mihuku nawömi faböi tehuku ami.”—Mat. 7:1. *

19. Hewisa wangoromaʼö Yosefo faʼafaduhu dödö ba wanguhuku nifalua Yehowa?

¹⁹ Angeragö duma-duma niha satulö tödö sotöi Yosefo. Lö ihuku niha böʼö hewaʼae na lö sökhi nifaluara khönia. Ira talifusönia manö ba laʼuduni ia, lafamawa ia tobali sawuyu ba lalimo namara wa no mate Yosefo. Mato hauga fakhe aefa daʼö, ifuli falukha Yosefo ba nösi nomonia. Iadaʼa no tobali ia sondröniaʼö sebua kuaso. Ba tola manö ihuku mena ndra talifusönia andrö Yosefo ba iforege wolau balö. Ataʼu ndra talifusö Yosefo na ifalua daʼö hewaʼae na sindruhu-ndruhu no maniasa ira ba zi no lafalua khönia. Hizaʼi, imane khöra Yosefo, ”Böi miʼataʼufi. Tenga  Lowalangi ndraʼodo si tola manguhuku yaʼami.” (1 Mo. 37:18-20, 27, 28, 31-35; 50:15-21) Sindruhu-ndruhu iforomaʼö wangide-ngideʼö Yosefo ba itouʼö khö Yehowa wamalua fanguhuku andrö.

20-21. Hewisa enaʼö böi taʼosatulö sibai ita?

²⁰ Simane Yosefo, moguna tatouʼö khö Yehowa wamalua fanguhuku. Duma-dumania, böi tatahö-tahö gohitö dödö ndra talifusöda na lafalua hadia ia. Lö taʼila tabaso dödö niha. Ba ha ”Yehowa zamareso ösi dödö”. (Amd. 16:2) Iʼomasiʼö fefu niha Yehowa. Gofu hewisa lala waʼaurira ba zilalö hegöi si toʼölö lafalua. Ba ifarou göi ita Yehowa enaʼö ”taʼeboloʼö wamokai tödöda”. (2 Ko. 6:13) Taforege ba wangomasiʼö fefu nösi nomoda ba wamati ba böi tahuku ira.

²¹ Baero daʼö, böi göi tahuku niha si tenga si sara lala wamati khöda. (1 Ti. 2:3, 4) Na so zi faʼila khöda si lö mangokhögö faʼafaduhu dödö si fagölö, böi tawaʼö tödöda wa lö irai omasi niha daʼö saʼae wamahaʼö yaʼia ba zindruhu. Na so khöda dödö simane daʼö eluahania asiliyawa ita mazui taʼosatulö sibai ita. Yehowa manö ibeʼe ginötö ba ”niha fefu” enaʼö lafalalini gera-erara. (Hal. 17:30) Moguna göi tatörö tödöda wa ba wamaigi Yehowa, niha sangosatulö andrö no niha si lö atulö.

22. Hana wa tahalö gangetula ba wangomasiʼö sindruhu?

²² Na taʼomasiʼö zatulö moloʼö Yehowa, hasambalö owua-wua dödöda ba tobali ita duma-duma si sökhi ba niha böʼö irege itugu laʼomasiʼö ita ba itugu laʼomasiʼö göi Lowalangida. Böi taböhöli wamalua goi-goi Yehowa satulö. Yafaduhu dödöda wa hasambalö iʼila Yehowa wamorege nifaluada ba omuso dödönia ba waʼatedouda wamalua satulö. Hewaʼae na itugu lafalua zi lö atulö niha gulidanö hizaʼi böi ataʼu ita, moguna tatörö tödöda wa hasambalö ”iʼomasiʼö Yehowa niha satulö”.—Si. 146:8.