1. Hadia manö ngawalö zi sökhi si no lafalua ira si bohou ebua?

 ERO röfi, ribu ndra si bohou ebua nibayagö idanö. Hadia no öhalö gangetula daʼö? Na noa, fao ndra talifusöda ba waʼomuso dödö nirasoimö ba omuso göi dödö Yehowa! (Amd. 27:11) Angeragö atö hadia manö ngawalö zi sökhi si no öfalua ba zilalö. Owölö-ölö ndraʼugö wamahaʼö yaʼugö ba Zura Niʼamoniʼö te ba zi no hauga fakhe. Faduhu dödöu wa Sura Niʼamoniʼö andrö Taromali Lowalangi. Ba sabölö tohude, aboto ba dödöu ba öʼomasiʼö Zamaʼanö Sura Niʼamoniʼö andrö. Itugu tedou waʼomasimö khö Yehowa irege öhalö gangetula ölulu waʼaurimö khönia ba öbayagö ndraʼugö idanö. Sindruhu-ndruhu no angetula si sökhi daʼö!

2. Hadia nitutunöda ba artikel daʼa?

 ² Tatu manö, no oya wanandraigö salua khöu fatua lö tebayagö ndraʼugö idanö. Hizaʼi, me no itugu ebua-bua ndraʼugö, so nasa wanandraigö si bohou salua khöu. Iforege Satana enaʼö lö saʼae öʼomasiʼö Yehowa ba lö öfosumange ia. (Ef. 4:14) Böi tehegö alua zimane daʼö! Hewisa enaʼö lö faröi ndraʼugö khö Yehowa ba tola öfalua mbuʼusa limö khönia? Böi böhöli foromaʼö waʼatedou, ’odödögö enaʼö moʼahonoa waʼaboto ba dödö’ niʼokhögömö. (Heb. 6:1) Hewisa wamaluamö daʼö? Tatutunö ia ba artikel daʼa.

3. Hadia zinangea lafalua ira niha Keriso na no aefa tebayagö ira idanö?

³ Me no aefa tebayagö idanö, fefu ita moguna taʼoʼö mene-mene nibeʼe zinenge sotöi Faulo khö ndra niha Keriso si so ba Nefeso. Ifarou ira enaʼö tobali ira niha Keriso ’soʼahonoa’ ba wamati. (Ef. 4:13) Eluahania, moguna laforomaʼö nasa waʼatedou. Iʼamaedolagö waʼatedou ba wamati andrö Faulo simane faʼatedou mboto nono sawuyu. Tobali fangomuso dödö zatuania nono sawuyu sawena tumbu ba laʼomasiʼö sibai. Hizaʼi, tebai tobali manö ia ono sawuyu sagötö faʼara. Na itugu numalö ginötö, itugu ebua-bua ia ba ”tenga [saʼae] simane iraono”. (1 Ko. 13:11) Simane daʼö göi niha Keriso. Na no aefa tebayagö idanö ita, moguna nasa taforomaʼö waʼatedou ba wamati. Datatutunö hadia manö zanolo yaʼita ba wamalua daʼö.

4. Hadia zanolo yaʼugö ba wangoromaʼö faʼatedou ba wamati? Tutunö. (Filifi 1:9)

⁴ Douʼö waʼomasimö khö Yehowa. Sindruhu-ndruhu wa no öʼomasiʼö Yehowa. Hizaʼi, tola nasa ödouʼö waʼomasimö khönia. Hewisa lalania? Sambua lala nitutunö Waulo no tesura ba Wilifi 1:9. (Baso.) Mangandrö Waulo enaʼö ’monönö waʼomasi’ ba gotalua niha Keriso ba Wilifi. Eluahania, tola göi tadouʼö waʼomasida. Tola tafalua daʼö na taʼokhögö ”waʼaboto ba dödö si tefaudu hegöi fangera-ngera si sökhi”. Na tedou waʼaboto ba dödöda sanandrösa khö Yehowa, tedou göi waʼomasida khönia. Itugu taʼameʼegö tödö gamuatania hegöi fefu zi no ifalua. Buania, itugu terou dödöda wangomusoiʼö tödönia ba lö omasi ita tafalua zi möi fangafökhö dödönia. Taforege wangalui hadia zomasi ia ba hewisa lalada wamalua daʼö.

5-6. Hewisa enaʼö tedou waʼomasida khö Yehowa? Tutunö.

⁵ Tola tadouʼö waʼomasida khö Yehowa na itugu aboto ba dödöda Nononia, si no moʼahonoa ba wamalua amuata Namania. (Heb. 1:3) Lala sabölö sökhi enaʼö aboto ba dödöda haniha Yesu yaʼia na tafahaʼö ita moroi ba zi öfa ngawua Injil. Na lö nibörögömö wombaso Sura Niʼamoniʼö ero maʼökhö, hadia tola öbörögö iadaʼa wombaso zi öfa Injil andrö? Na öbaso waö-waö sanandrösa khö Yesu, osambuaʼö dödömö ba mbua-buania. Duma-dumania, lö alawö niha wangondrasi yaʼia. Iʼomasiʼö ndraono side-ide ba italagui ira. (Mrk. 10:13-16) Sökhi göi gamuatania ba fahuwu sibai ia irege lö alawö ndra nifahaʼönia ba wanutunö ösi dödöra. (Mat. 16:22) Me ifalua daʼö Yesu, no iʼoʼö gamuata Namania si so ba zorugo. Lö alawö göi ita wangondrasi Yehowa. Tola taʼondrasi ia ba wangandrö. Na mangandrö ita, tola tafaehagö khönia fefu nösi dödöda. Faduhu dödöda wa lö ihuku ita. Iʼomasiʼö ba iʼameʼegö tödö ita.—1 Fe. 5:7.

⁶ Ahakhö dödö Yesu ba niha gulidanö. Imane sinenge sotöi Mataiʼo, ”Na ifaigi niha sato, ahakhö dödönia börö me tefakao ba tetiboʼö ira hulö mbiri-biri si lö kubalo.” (Mat. 9:36) Hewisa göi dödö Yehowa? Imane Yesu, ”Simanö göi Namagu si so ba zorugo, lö omasi ia na tekiko fazamösa niha simane ono side-ide andre.” (Mat. 18:14) Sindruhu-ndruhu wa möi fondrara dödöda wehede daʼa! Na itugu aboto ba dödöda sanandrösa khö Yesu, itugu monönö göi waʼomasida khö Yehowa.

7. Hadia mbuania na fariawö ndraʼugö ba niha si no aro ba wamati?

⁷ Na fariawö ndraʼugö khö ndra talifusöda si no aro ba wamati si so ba gangowuloa, monönö waʼomasimö khö Yehowa ba tobali ndraʼugö niha saro ba wamati. Nehegö  hawaʼomuso dödöra. Lö irai maniasa ira me no lahalö gangetula ba wamosumange Yehowa. Sofu hadia manö zi no irai alua khöra sagötö lahalö halöwö khö Yehowa. Andrö khöra wanuturu lala ba ginötö öhalö gangetula si tohude. Böi olifuʼö, ”na ato zanuturu lala, ba mofozu gohitö dödö”.—Amd. 11:14.

8. Hadia nifaluamö na so niʼaombösimö tödö sanandrösa ba nifahaʼö Zura Niʼamoniʼö?

⁸ Lawa waʼaombö dödömö. Simane si no mututunö ba  ngenoli si 2, iʼalui lala Satana enaʼö awuwu wamatimö. Sambua lala niʼogunaʼönia yaʼia daʼö iʼasogö khöu waʼaombö-aombö dödö sanandrösa ba nifahaʼö Zura Niʼamoniʼö. Duma-dumania, te so niha sangumaʼö wa tenga Lowalangi zomböi yaʼita, hizaʼi börö evolusi. Tola manö lö ibeʼe dödöu daʼö me ide-ideʼö, hizaʼi iadaʼa lafahaʼö daʼö ba zekola. Baero daʼö, hulö tefaudu ba tola mufaduhusi tödö nifahaʼö ndra guru sanandrösa ba evolusi. Hizaʼi sindruhunia, te lö irai laʼalui hadia zi tobali tandra wa sindruhunia so Zomböi. Törö tödöu goi-goi nisura ba Gamaedola 18:17, ”Hulö na atulö wamaigida niha si oföna möi mangadu, hizaʼi, awena oroma haniha zatulö na no tohare niha böʼö ba wamareso amadöniwania.” Tobali, moroi na iʼanemaiʼö öfaduhusi tödö hadia nirongou ba zekola, abölö sökhi na öhaogö öfahaʼö ndraʼugö ba zindruhu si so ba Daromali Lowalangi, Sura Niʼamoniʼö ba falua riset. Fahuhuo khö ndra talifusöda si no irai faduhu tödö ba evolusi. Sofu khöra hana wa faduhu dödöra wa so Zomböi sangomasiʼö yaʼita. Fahuhuosa simane daʼö zangaʼaroʼö tödömö wa so Zomböi.

9. Hadia wamahaʼö si tola öhalö moroi ba duma-duma Melissa?

⁹ So mbua si sökhi nitema dalifusöda sotöi Melissa börö me no ifalua riset sanandrösa ba womböwöi. * Imane, ”Na ba zekola, lahaogö lafaʼema ira guru wamahaʼö sanandrösa ba evolusi irege hulö tola mufaduhusi tödö. Ba wamobörö lö omasido ufalua riset, ataʼudo na lö hadöi dane-dane saro ba nifaduhusigu tödö sanandrösa ba womböwöi. Hizaʼi, uʼila wa omasi Yehowa na taʼokhögö dane-dane satulö ba nifaduhusida tödö. Börö daʼö ufalua riset. Ubaso mbuku Apakah  Ada Pencipta yang Mempedulikan Anda?, brosur Benarkah Kehidupan Diciptakan? hegöi Asal Mula Kehidupan—Lima Pertanyaan yang Patut Direnungkan. Sindruhu-ndruhu moguna khögu daʼa. Abölö baga na iʼotarai ba wamobörö ufalua ia.”

10-11. Hadia zanolo yaʼugö enaʼö lö raʼiö ndraʼugö ba gamuata? (1 Tesalonika 4:3, 4)

¹⁰ Timbagö gamuata si raʼiö. Me itugu ebua-bua ndraʼugö, itugu ebua göi wehulu dödö ba wamalua faʼorudu, ba te so niha sondrönisi tödöu wamalua daʼö. Omasi Zatana na öʼoʼö gisö-isö dödömö andrö. Hizaʼi, hadia zanolo yaʼugö ba wolawa gisö-isö dödö daʼö? (Baso 1 Tesalonika 4:3, 4.) Faʼema khö Yehowa nösi dödöu ba ginötö ölau mangandrö khönia. Andrö khönia enaʼö itolo ndraʼugö. (Mat. 6:13) Törö tödöu wa omasi Yehowa wanolo yaʼugö, tenga ba wanguhuku yaʼugö. (Si. 103:13, 14) Tola göi itolo ndraʼugö Sura Niʼamoniʼö. Melissa nitutunöda no mege, iforege ba wanimbagö lala wangera-ngera si raʼiö. Imane, ”Fombaso Sura Niʼamoniʼö ero maʼökhö zanolo yaʼo irege lö awuwu ndraʼo. Daʼö zamasugi ba dödögu wa tana khö Yehowa ndraʼo ba lö omasido uröi ia.”—Si. 119:9.

¹¹ Böi tandraigö wangasiwai abula dödömö ha yaʼugö. Tutunö khö ndra satuamö hadia nirasoimö. Sindruhu wa abua khöda wanutunö ba niha böʼö hadia nirasoida, hizaʼi moguna sibai tafalua daʼö. Imane Melissa, ”Ulau mangandrö enaʼö so khögu waʼabarani, ba aefa daʼö ututunö khö bapagu hadia gabula dödö nirasoigu. Me no ufalua daʼö, urasoi waʼahono dödö. Aboto ba dödögu wa omuso dödö Yehowa ba nifaluagu andre.”

12. Hewisa enaʼö tola öhalö gangetula si sökhi?

¹² Oʼö goi-goi Zura Niʼamoniʼö. Me no ebua-bua ndraʼugö, latehegö khömö ira satuamö ba wangai angetula samösa. Hizaʼi, lö oya nasa zi no öʼila ba waʼauri andre. Hewisa enaʼö lö öhalö gangetula si tola mamakiko fahuwusamö khö Yehowa? (Amd. 22:3) Itutunö talifusöda sotöi Kari hadia zanolo yaʼia ba wangai angetula si sökhi. Aboto ba dödönia wa niha si no aro ba wamati lö moguna khönia daftar hadia zi tola awö zi tebai. Imane wangumaʼö, ”Moroi na ha uʼila hadia zi tola awö zi tebai, abölö sökhi na aboto ba dödögu goi-goi Zura Niʼamoniʼö.” Ba ginötö öbaso Zura Niʼamoniʼö, sofu khöu samösa: ’Hadia nitutunö ayati daʼa sanandrösa ba lala wangera-ngera Yehowa? Hadia tola möi fanologu goi-goi daʼa ba wamalua satulö? Hadia gunania na ufalua goi-goi daʼa?’ (Si. 19:7; Yes. 48:17, 18) Na öbaso Zura Niʼamoniʼö ba öʼangerönusi goi-goinia, tola aoha khömö wangai angetula sangomusoiʼö tödö Yehowa. Na lö tebulö öforomaʼö waʼatedou ba wamati, lö moguna khöu daftar hadia zi tola awö zi tebai börö me no aboto ba dödöu lala wangera-ngera Yehowa ba ngawalö hadia ia.

13. Hewisa wa möi fanolomö zi fahuwu si sökhi? (Amaedola 13:20)

¹³ Fili zi fahuwu khöu sangomasiʼö Yehowa. Simane si no tatutunö, niha si fahuwu khöu tola itoloʼö enaʼö tobali ndraʼugö niha Keriso saro ba wamati. (Baso Gamaedola 13:20.) So samösa dalifusöda sotöi Sara, no irai taya waʼomuso dödönia. Hizaʼi, so zanolo yaʼia irege ifuli isöndra waʼomuso dödö. Imane Sara, ”Usöndra zi fahuwu si sökhi ba ginötö si tefaudu. So samösa dalifusöda ira alawe si bohou ebua si fao khögu ba wamaʼanö famahaʼö ba majalah Manuriaigö. So göi zi fahuwu khögu tanö böʼö sanolo yaʼo ba wameʼe bua gera-era ba gangowuloa. Börö wanolo moroi khöra, ibörögö ufalua wamahaʼö samösa hegöi  fangandrö soroi ba dödö. Iadaʼa, aro wahuwusagu khö Yehowa ba ifuli usöndra waʼomuso dödö.”

14. Hewisa wa tola iʼokhögö zi fahuwu si sökhi Julien?

¹⁴ Moguna öfili zi fahuwu sanolo yaʼugö ba wamalua si sökhi. Hewisa enaʼö ösöndra zi fahuwu simane daʼö? Imane Julien si no tobali satua sokubaloi iadaʼa, ”Me awuyu-wuyu ndraʼo, fahuwudo khö ndra talifusöda si fao khögu ba wanuriaigö. Owölö-ölö sibai ira ba latolo ndraʼo enaʼö uʼila hawaʼomuso dödöda wangai halöwö ba wamati. Ibörögö ubaliʼö ohitö dödögu wangai halöwö safönu inötö. Uʼila wa lö ato zi fahuwu khögu ba zilalö börö me ha ba zi fagölö döfi khögu fahuwudo. Ba gafuriata, usöndra zi fahuwu si sökhi ba Mbetieli. Duma-dumara zanolo yaʼo ba wamili hiburan si sökhi irege itugu ahatö ndraʼo khö Yehowa.”

15. Hadia wamangelama nibeʼe Waulo khö Dimoteo sanandrösa ba wariawösa? (2 Timoteo 2:20-22)

¹⁵ Hewisa na öʼila so niha ba gangowuloa si tebai mubaliʼö si fahuwu si sökhi? Iʼila Faulo wa so ösa niha ba mbanua niha Keriso me abad siföföna si lö aro ba wamati. Börö daʼö, ifangelama Dimoteo enaʼö lö fariawö ia khöra. (Baso 2 Timoteo 2:20-22.) Ebua sibai mböli wahuwusada khö Yehowa. Lö omasi ita tatehegö na so zamakiko fahuwusa si no tafakhai khö Namada si so ba zorugo.—Si. 26:4.

16. Hadia manö gohitö dödö si tola öfili?

¹⁶ Tatugöi gohitö dödöu ba wamati. Fili gohitö dödö sangaʼaroʼö famatimö ba sanolo yaʼugö enaʼö tobali niha Keriso saro ba wamati. (Ef. 3:16) Duma-dumania, tola ödouʼö nasa ginötömö ba wamahaʼö yaʼugö samösa hegöi ba wombaso Sura Niʼamoniʼö. (Si. 1:2, 3) Tola öʼaseseʼö wangandrö ba öfalua daʼö soroi ba dödö. Mazui, öforege enaʼö so khöu waʼatua-tua ba wamili hiburan hegöi ba wangogunaʼö inötö. (Ef. 5:15, 16) Tatu manö, omuso dödö Yehowa ba wamorege nifaluamö enaʼö tedou ndraʼugö ba wamati.

17. Hadia mbuania na ötolo niha böʼö?

¹⁷ Tola tobali ndraʼugö niha Keriso saro ba wamati na ötolo niha böʼö. Imane Yesu, ”Ohahau dödö ba wameʼe moroi ba wanema.”  (Hal. 20:35) Oya mbua nitemamö na öʼogunaʼö ginötö hegöi faʼabölöu ba wanolo niha böʼö. Duma-dumania, tola ötolo ndra talifusöda si no atua hegöi si tebai boto ba mbanua niha Keriso si farahu yaʼugö. Tola ötolo ira ba wowöli soguna khöra hegöi ba wangogunaʼö perangkat elektronik. Na samösa talifusöda ira matua ndraʼugö, tola öbaliʼö ohitö dödöu enaʼö tobali ndraʼugö enoni sohalöwö irege oya zi tola öfalua khö ndra talifusöda. (Fil. 2:4) Tola göi öforomaʼö waʼomasi ba niha böʼö yaʼia na ötutunö khöra duria somuso dödö sanandrösa ba Wamatörö Lowalangi. (Mat. 9:36, 37) Na tola, tatugöi gohitö dödöu ba wangai halöwö safönu inötö.

18. Hadia mbuania na öhalö halöwö safönu inötö?

¹⁸ Na öhalö halöwö safönu inötö, oya ginötöu ba wangoromaʼö faʼatedou ba wamati. Na no tobali perintis, tola teboka khöu mbawandruhö weʼamöi Sekolah bagi Penginjil Kerajaan, mohalöwö ba Mbetieli mazui ba halöwö fangotomosi. Imane samösa talifusöda ira alawe perintis si bohou ebua sotöi Kaitlyn, ”Börö me oya ginötögu wefao khö ndra talifusöda si no aro ba wamati, daʼö zanolo yaʼo irege tedou ndraʼo ba wamati me no aefa tebayagö idanö. Duma-dumara zamarou tödögu ba wangalui faʼaboto ba dödö sabölö abakha moroi ba Zura Niʼamoniʼö, ba tedou waʼatua-tuagu wamahaʼö niha böʼö.”

19. Hadia howu-howu nirasoimö na lö tebulö öforomaʼö waʼatedou ba wamati?

¹⁹ Oya howu-howu si tola örasoi na lö tebulö öforomaʼö waʼatedou ba wamati. Lö öʼogunaʼö waʼabölöu ba wolohi ohitö dödö si lö eluaha. (1 Yo. 2:17) Lö örasoi waʼafatö dödö börö wangai angetula si fasala. Hizaʼi, mofozu waʼaurimö ba ösöndra waʼomuso dödö sindruhu. (Amd. 16:3) Baero daʼö, duma-duma si sökhi nifaluamö tobali famarou dödö khö ndra talifusöda si sara lala wamati, he satua hegöi sawuyu-wuyu. (1 Ti. 4:12) Ba sabölö tohude, tola örasoi waʼahono dödö hegöi faʼohahau dödö sagötö faʼara börö me no öʼomusoiʼö dödö Yehowa ba öfakhai wahuwusa si sökhi khönia.—Amd. 23:15, 16.