1. Hawaʼebua mbölida föna Yehowa?

 KHALAIGÖ na so nawöu sameʼe khöu lukisan si no atua hizaʼi ebua sibai mbölinia. So ösa ba lukisan andrö zi no ibörögö agakuba, taʼunö ba no faböʼö maʼifu laʼa-laʼania. Hewaʼae simanö, miliar mböli lukisan andrö. Tatu örorogö sibai lukisan daʼö ba no sebua böli ia ba wamaigimö. Simane daʼö göi Yehowa, no ibeʼe khöda mbuala sebua böli, yaʼia daʼö faʼauri. Iforomaʼö Yehowa wa ebua sibai mböli waʼaurida me itehegö mate Nononia ba wangöhöli yaʼita.—Yoh. 3:16.

2. Simane nisura ba 2 Korindro 7:1, hadia zomasi Yehowa tafalua?

² Yehowa andrö Umbu waʼauri. (Si. 36:9) Imane sinenge sotöi Faulo, ”Börö ia wa auri ita, maliwa-liwa ita, ba so ita.” (Hal. 17:25, 28) Börö daʼö, faʼaurida andre no buala moroi khö Lowalangi. Ba si fao faʼomasi, ihenaigö fefu zoguna khöda enaʼö lö tebulö auri ita. (Hal. 14:15-17) Iadaʼa, lö ifalua dandra sahöli-höli dödö Yehowa ba wondrorogö faʼaurida. Hizaʼi, omasi ia na taforege ba wondrorogö botoda enaʼö lö mofökhö ba lö tebulö tafosumange ia. (Baso 2 Korindro 7:1.) Hana wa moguna tarorogö mbotoda hegöi faʼaurida, ba hewisa lalania?

3. Hadia mbörö wa tarorogö mbotoda?

³ Sambua dane-dane wa moguna tarorogö mbotoda yaʼia daʼö börö me omasi ita tafosumange Yehowa. (Mrk. 12:30) Omasi ita ’tabeʼe mbotoda tobali sumange sauri, amaedola zumange niʼamoniʼö nitema Lowalangi’. (Rom. 12:1) Börö daʼö, lö tafalua ngawalö hadia ia zi tola mamaʼala botoda. Sindruhu sa, hewaʼae no taforege ba wondrorogö botoda, tola manö mofökhö ita nasa. Hizaʼi, lö taböhöli wondrorogö botoda börö me omasi ita taforomaʼö khö Namada si so ba zorugo wa taʼameʼegö tödö mbuala faʼauri.

4. Hadia gangetula Razo Dawido?

⁴ No irai itutunö Razo Dawido hadia mbörö wa iʼameʼegö tödö sibai mbuala faʼauri moroi khö Lowalangi. Imane, ”Hadia gunania na matedo, na möido mitou ba mbawa lewatö? Hadia tola isuno ndraʼugö gawu-gawu, mazui idunö-dunö waʼalöfaröimö?” (Si. 30:9) Isura ngawua wehede andrö Dawido, te me lö ara tö mate ia. Hewaʼae simanö, ihalö gangetula ba wondrorogö botonia sandrohu faʼaurinia enaʼö lö tebulö isuno Yehowa. Tatu manö fagölö gangetulada.

5. Hadia zi tola tafalua hewaʼae na mofökhö ita mazui no alawa ndröfida?

⁵ Na mofökhö ita mazui na no alawa ndröfida, tola manö lö oya saʼae zi tola tafalua irege tarasoi waʼabu dödö ba faʼafatö dödö. Hizaʼi, böi tatehegö awuwu ita irege lö saʼae tarorogö mbotoda. Hadia mbörö? Börö me tola nasa tasuno Yehowa simane nifalua Razo Dawido hewaʼae na no alawa ndröfida mazui mofökhö ita. Tatu omuso sibai dödöda börö me ba wamaigi Yehowa, no sebua böli ita hewaʼae na alö waʼabölöda! (Mat. 10:29-31) Hewaʼae na mate ita, no ibalo-baloi Yehowa ginötö ba wanusugi yaʼita. (Yob. 14:14, 15) Börö daʼö, gasa-gasa auri ita nasa, dataforege ba wondrorogö botoda hegöi faʼaurida.

6. Hewisa wamaigi Yehowa sanandrösa ba wemanga-manga hegöi ba wamadu-madu?

⁶ Sindruhu sa, Sura Niʼamoniʼö tenga buku wanuturu lala soguna ba mbotoda. Hizaʼi, tola iforomaʼö khöda lala wangera-ngera Yehowa sanandrösa ba mbotoda. Duma-dumania, iʼamenesi ita Sura Niʼamoniʼö enaʼö tafandröndröu ita moroi ba ngawalö zamakiko botoda. (Sango. 11:10) Iwaʼö Sura Niʼamoniʼö wa tebai oluʼa-luʼa ita mazui talafo oya tabadu duo. Tola möi famaʼala mbotoda daʼö awö nosoda. (Amd. 23:20) Omasi Yehowa na so khöda wanaha tödö ba ginötö tatatugöi hadia niʼa mazui nibaduda ba hawaʼoya taʼa mazui tabadu ia.—1 Ko. 6:12; 9:25.

7. Hewisa wa möi fanoloda wehede nisura ba Gamaedola 2:11 ba wangai angetula si sökhi sanandrösa ba mbotoda?

⁷ Tola taforomaʼö wa taʼameʼegö tödö mbuala faʼauri moroi khö Lowalangi na taʼogunaʼö wangera-ngera si sökhi ba wangai angetula sanandrösa ba mbotoda. (Si. 119:99, 100; baso Gamaedola 2:11.) Duma-dumania, tahaogö taʼangeragö hadia niʼada. Na so gö somasi ita, tatu lö taʼa daʼö na tobali fökhöda. No göi taforomaʼö wa so khöda wangera-ngera si sökhi na tatatugöi enaʼö obönö ginötö wemöröda, asese faʼolahraga ita, ba tarorogö mbotoda hegöi omoda.

8. Hewisa wamaigi Yehowa ngawalö hadia ia zoʼamakhaita ba waʼaurida?

⁸ Ibeʼe goroisa ba ndraono Gizaraʼeli Yehowa enaʼö lö mosikho ira ba nomora hegöi ba  nahia wohalöwö. (2 Mo. 21:28, 29; 5 Mo. 22:8) Na so niha samunu awönia hewaʼae na tenga niʼodödögö, no sambua abula dödö sebua daʼö ba hasambalö iluʼi lua-luania. (5 Mo. 19:4, 5) Na so niha samaʼala ono bakha ba dalu hewaʼae na tenga iʼodödögö, hasambalö muhuku ia. (2 Mo. 21:22, 23) Iforomaʼö Sura Niʼamoniʼö wa omasi Yehowa na lö mosikho ita ba wamalua hadia ia.

9. Hadia zi tola tafalua enaʼö lö mosikho ita? (Faigi göi gambara.)

⁹ No taforomaʼö wa taʼameʼegö tödö mbuala faʼauri moroi khö Lowalangi na taforege enaʼö lö mosikho ita ba nomo mazui ba nahia wohalöwö. Duma-dumania, lö tabeʼe gama-gama satarö, bahan kimia, mazui dalu-dalu tanö böʼö ba nahia si tola ikhamö tanga ndraonoda. Tahaogö waniboʼö gama-gama andrö enaʼö lö tobali teʼala. Moguna göi mangelama ita na tafohola galitö, tarino nidanö, mazui taʼogunaʼö wakake otomatis si tola möi famaʼala. Na no tababaya halöwö andrö, böi taröi-röi ia. Baero daʼö, böi taʼohe moto na lö taʼila taʼosambuaʼö  wangera-ngerada. Duma-dumania, te awena sibai tabadu dalu-dalu, duo, mazui manuköu ita. Ba lö göi tafaigi-faigi HP ba ginötö taʼohe moto.

10. Hadia zi tola tafalua fatua lö alua mazui na alua zi lö mudöna-döna si möi famaʼala?

¹⁰ Itaria, tebai tatimbagö na alua zi lö mudöna-döna si möi famaʼala. Duma-dumania, bencana alam, fökhö waba, faʼafawuka, mazui fasuwöta. Na alua fefu daʼö, te tola teʼorifi ita na taʼoʼö fareta mazui fanuturu lala nibeʼe ndra samatörö. (Rom. 13:1, 5-7) Börö me so ösa zi lö mudöna-döna si tola manö alua, moguna taʼoʼö wanuturu lala moroi khö ndra samatörö enaʼö tefaʼanö ita ba wanaögö yaʼia. Duma-dumania, tola tahöna khöda nidanö nibadu, ö si lö alio owoyu, hegöi dalu-dalu.

11. Na so wökhö salio fatöfa, hadia zinangea tafalua?

¹¹ Hadia zinangea tafalua na so wökhö salio fatöfa ba mbanua si toröi yaʼita? Moguna taʼoʼö wanuturu lala moroi khö ndra samatörö. Duma-dumania, tasasai dangada, böi tafahatö-hatö ita ba niha, tafake masker, ba tafalua karantina. Na taʼoʼö wanuturu lala andrö, daʼö zangoromaʼö wa sindruhu-ndruhu taʼameʼegö tödö mbuala faʼauri moroi khö Lowalangi.

12. Hewisa goi-goi ba Gamaedola 14:15 tola itolo ita na oya informasi nirongoda sagötö alua zi lö mudöna-döna?

¹² Na alua zi lö mudöna-döna, tola manö oya informasi si fasala sofeta khö ndra awö-awöda, si falazi omo khöda, mazui ba berita. Lö omasi ita tafaduhusi tödö ”fefu wehede”, hizaʼi moguna tafondrondrongo informasi si tola mufaduhusi tödö moroi khö ndra samatörö mazui khö ndra doto. (Baso Gamaedola 14:15.) Ira Boto Solohe hegöi gödo ndraha, laforege sibai wangalui informasi satulö fatua lö labeʼe wanuturu lala soʼamakhaita ba gangowuloa hegöi ba halöwö fanuriaigö. (Heb. 13:17) Na taʼoʼö wanuturu lala nibeʼera, tola tobali folumöʼöda daʼö hegöi niha böʼö. Baero daʼö, no tarorogö döi si sökhi niʼokhögö ndra Samaduhuʼö Yehowa ba mbanua si toröi yaʼita.—1 Fe. 2:12.

13. Hewisa woloʼöda oroisa Lowalangi sanandrösa ba ndro, ba hewisa wangoromaʼöda wa taʼameʼegö tödö mbuala faʼauri?

¹³ Ato niha sangila wa ira Samaduhuʼö Yehowa laʼameʼegö tödö sibai wangamoniʼö do. Börö me taʼoʼö goroisa Yehowa, lö omasi ita ba wanemaʼö transfusi darah hewaʼae na basaki zalua. (Hal. 15:28, 29) Hizaʼi, tenga daʼö geluahania wa omasi ita mate. Taʼameʼegö tödö mbuala faʼauri moroi khö Lowalangi. Börö daʼö, taforege wangalui fanolo moroi khö ndra doto somasi mamalua sabölö sökhi ba wondrorogö yaʼita ba lö laʼogunaʼö transfusi darah.

14. Hewisa enaʼö lö tatörö operasi sebua?

¹⁴ Na tarorogö mbotoda ba taʼoʼö mene-mene nitutunö ba artikel daʼa, tola manö lö moguna tatörö operasi sebua mazui perawatan medis tanö böʼönia. Ba na sindruhu moguna muʼoperasi ita, lö ebua sibai lua-luania ba alio döhö ita na no aefa muʼoperasi. Baero daʼö, na tarorogö nomo, nahiada wohalöwö, ba taʼoʼö gamakhoita lalu lintas, lö mosikho ita ba lö moguna tatörö operasi.

15. (a) Hana wa moguna taʼohe-ohe kartu DPA si bohou? (Faigi göi gambara.) (b) Simane nitutunö ba video, hewisa enaʼö tola tahalö gangetula sanandrösa ba lala wameʼe dalu-dalu soʼamakhaita ba ndro?

¹⁵ Börö me taʼameʼegö tödö mbuala faʼauri, andrö wa tafoʼösi Surat Kuasa Khusus Perawatan Kesehatan (kartu DPA) ba lö tebulö  taʼohe ia. Ba zura andrö, tatutunö wa lö omasi ita ba wanemaʼö transfusi darah, ba tatutunö göi hadia lala wameʼe dalu-dalu nitemada. Hadia no öfoʼösi kartu DPA mazui hadia so zinangea öbohouni nösinia? Na lö nifoʼösimö mazui öbohouni kartu andrö, böi taha-taha. Na no tasura hadia zomasi ita, tola alio tatema lala wameʼe dalu-dalu soguna khöda. Baero daʼö, tola laʼokhögö lala wangera-ngera satulö ira sohalöwö ba medis ba lö labeʼe khöda dalu-dalu si lö fatema ba wamaigida. b

16. Hadia zi tola tafalua na lö taʼila hewisa lala ba wamoʼösi kartu DPA?

¹⁶ Hewaʼae na awuyu-wuyu ita mazui abölö mbotoda, tola manö alua zi lö mudöna-döna ba mofökhö ita. (Sango. 9:11) Börö daʼö, moguna tafoʼösi kartu DPA. Na lö öʼila hewisa lala wamoʼösi yaʼia, anofu khö ndra satua sokubaloi ba mbanua niha Keriso. No laforege sibai ba wangiʼila hewisa lala ba wamoʼösi kartu andrö, daʼö mbörö wa tola latolo ndraʼugö. Hizaʼi, tenga yaʼira zangai angetula, yaʼugö samösa zotatugöi daʼö. (Gal. 6:4, 5) Si tola lafalua yaʼia daʼö ha ba wamatunö khöu  hadia manö zi tola öfili ba hewisa wanura yaʼia.

17. Hewisa enaʼö lö fatandro ita ba ginötö tahalö gangetula sanandrösa ba wondrorogö botoda?

¹⁷ Oya lala sanandrösa ba wondrorogö boto hegöi perawatan medis sinangea tafili si teʼodane-dane ba dödöda side-ide si no ifahaʼö Sura Niʼamoniʼö. (Hal. 24:16; 1 Ti. 3:9) Ba ginötö tahalö gangetula ba tafatunöisi daʼö ba niha böʼö, moguna taʼoʼö goi-goi ba Wilifi 4:5: ”Böi fatandro ami ba niha fefu.” Na lö fatandro ita, lö talafo taʼaombösi tödö sanandrösa ba mbotoda, ba lö göi tafaso niha böʼö ba woloʼö angetulada. Taʼomasiʼö ba tafosumange ndra talifusöda hewaʼae na faböʼö gangetulara moroi khöda.—Rom. 14:10-12.

18. Hewisa wangoromaʼöda wa taʼameʼegö tödö mbuala faʼauri?

¹⁸ No taforomaʼö wangandrö saohagölö khö Yehowa, Umbu waʼauri, na tarorogö waʼaurida ba tabeʼe wondrege zi sökhi khönia. (Fam. 4:11) Iadaʼa, tataögö nasa ngawalö wökhö hegöi salua si möi famaʼala. Hizaʼi sindruhunia, lö omasi Zomböi yaʼita na simane daʼö waʼaurida. Ba zi lö ara tö, ibeʼe khöda waʼauri si lö aetu ba teʼefaʼö ita moroi ba wökhö hegöi faʼamate. (Fam. 21:4) Gasa-gasa wombaloida buʼusa li andrö, yalötebulö taʼameʼegö tödö mbuala faʼauri ba tafosumange Namada si so ba zorugo sotöi Yehowa!