Laʼila Waʼomasi Niforomaʼö Niha Keriso Sindruhu
YOMARA ba darua nakhinia sotöi Marcelo hegöi Hiver, toröi ira ba mbanua side-ide ba Guatemala. Ibörögö ifahaʼö ia Yomara ba Zura Niʼamoniʼö khö ndra Samaduhuʼö Yehowa, ba gafuriata simane daʼö göi ndra akhinia. Hizaʼi si tobali taha-taha, yaʼira si datölu andrö auʼa, ba lö laʼila labaso hurufo Braille. Börö daʼö, samahaʼö yaʼira ba Zura Niʼamoniʼö zombaso buku wamahaʼö hegöi ayatinia khöra.
Abua göi khöra wangondrasi angowuloa. Enaʼö tola ofeta ira ba Nahia Gangowuloa sahatö, moguna latörö tanö 40 menit. Lö laʼila laʼondrasi nahia gangowuloa na lö hadöi sanolo yaʼira. Börö daʼö, ira talifusöda ba mbanua niha Keriso latolo ira enaʼö tola laʼondrasi gangowuloa. Ba ginötö labeʼe khöra halöwö ba wamaʼema famadumaisi ba gangowuloa barö migu, ira talifusöda tanö böʼö latolo ira enaʼö tola latanö ba dödöra halöwö nibeʼe khöra.
Me baŵa si Lima 2019, ibörögö lafalua gangowuloa ba mbanua si so yaʼira. Me luo daʼö, so sambua fongambatö perintis biasa si findra ba mbanua andrö. Omasi ira ba wamomaha Yomara, Marcelo, hegöi Hiver ba wombaso hegöi ba wanura hurufo Braille, hewaʼae na yaʼira samösa lö laʼila lala wamalua yaʼia. Andrö, möi ira ba perpustakaan ba wamahaʼö yaʼira sanandrösa ba hurufo Braille, ba lafahaʼö göi ira hewisa lala ba wamomaha niha böʼö.
Ibeʼe mbua gera-erania Marcelo ba gangowuloa
Ba zi hauga waŵa, Yomara, Marcelo, hegöi Hiver no laʼila labaso hurufo Braille. Buania, itugu tedou ira ba wamati. a Iadaʼa, yaʼira si datölu no mangai halöwö tobali perintis biasa, ba no mufataro Marcelo tobali enoni. Owölö-ölö ira wamalua halöwö ba wamati ero migu, irege tefarou dödö ndra talifusöda tanö böʼö.
Yaʼira si datölu andre, laʼandrö sibai saohagölö börö wanolo nibeʼe ndra talifusö ba mbanua niha Keriso. Imane Yomara, ”Me awena sibai falukha ndraʼaga khö ndra Samaduhuʼö, no laforomaʼö khöma waʼomasi niha Keriso sindruhu.” Imane göi Marcelo, ”Maʼokhögö zi fahuwu si sökhi ba mbanua niha Keriso, ba no farahu ndraʼaga ba waʼafatalifusöta ba zi sagörö ulidanö niʼosambuaʼö börö waʼomasi.” Yomara hegöi ira akhinia, no labalo-baloi ginötö enaʼö tola laʼila na mubaliʼö gulidanö andre tobali Faradaiso.—Si. 37:10, 11; Yes. 35:5.
a Mufazökhi brosur Belajar Membaca Huruf Braille ba wanolo niha sauʼa mazui balunö, enaʼö tola mombaso ba manura ira ba hurufo Braille.
