1. Hadia zangoromaʼö wa moguna sibai khö Yesu Daromali Lowalangi?

 KHALAIGÖ hewisa me öfondrondrongo samösa wamahaʼö Yesu. Asese itötöi ngawalö ayati Mbuku Niʼamoniʼö si no itöngöni! Mendrua manö ba ngawua wehedenia si oföna me aefa tebayagö ia idanö hegöi fatua lö si mate ia, itötöi ösa ayati. b (5 Mo. 8:3; Si. 31:5; Luk. 4:4; 23:46) Ba zi tölu fakhe a matonga me ifalua halöwö fanuriaigö, asese ibaso ba itötöi ngawalö ayati ba niha sato, ba itutunö göi khöra hadia geluahania.—Mat. 5:17, 18, 21, 22, 27, 28; Luk. 4:16-20.

2. Hadia zanolo Yesu iʼotarai me ide-ide ia irege aboto ba dödönia Daromali Lowalangi? (Faigi gambara ba guli majalah.)

² Ba zi hauga fakhe fatua lö ifalua halöwö fanuriaigö Yesu, no asese ibaso ba ifondrondrongo Daromali Lowalangi. Tatu no ifondrondrongo ayati nitötöi Maria hegöi Yosefo me fahuhuo ira ba nomo. c (5 Mo. 6:6, 7) Möi göi Yesu awö nösi nomonia ba nahia waʼowulo ba ngaluo Sabato. (Luk. 4:16) Me so ia ba daʼö, tatu ihaogö sibai ifondrondrongo me mubaso Zura Niʼamoniʼö. Ba gafuriata, ifahaʼö samösa ia Yesu ba wombaso gölu-gölu Mbuku Niʼamoniʼö. Buania, tofakha ba dödönia ba iʼomasiʼö Daromali Lowalangi. Ifalua göi hadia zi no ifahaʼö  yaʼia. Duma-dumania, nehegö hadia zalua ba gosali me 12 fakhe ndröfi Yesu. Ahöli-höli dödö ndra sangila amakhoita ”börö me oya zaboto ba dödönia hegöi fanema li nibeʼenia”.—Luk. 2:46, 47, 52.

3. Hadia nitutunöda ba artikel daʼa?

³ Tola aboto ba dödöda ba taʼomasiʼö Daromali Lowalangi na asese tabaso ia. Hizaʼi, hewisa enaʼö sindruhu-ndruhu tatema mbua ba wombaso Sura Niʼamoniʼö? Tola tafahaʼö ita ba wehede Yesu khö ndra sangila amakhoita, niha Farizaiʼo, hegöi niha Sadukaiʼo. Asese labaso Zura Niʼamoniʼö ira sondröniaʼö ba agama andrö, hizaʼi lö latema mbua ba nibasora. Ifatunö khöra Yesu tölu lala sinangea lafalua. Ba artikel daʼa, tatutunö hadia niwaʼö Yesu khöra enaʼö (1) aboto ba dödöda nibasoda, (2) tasöndra girö-girö ba wamati, ba (3) tobali ita niha sabölö sökhi.

4. Ba Luka 10:25-29, hadia wamahaʼö si tola tahalö sanandrösa ba wombaso Taromali Lowalangi?

⁴ Moguna aboto ba dödöda hadia nibasoda ba Daromali Lowalangi enaʼö sindruhu-ndruhu tatema mbuania. Nehegö atö huhuo Yesu khö zi samösa niha sangila amakhoita. (Baso Luka 10:25-29.) Isofu khö Yesu hadia zinangea ifalua enaʼö isöndra waʼauri si lö aetu. Börö daʼö, itolo ia Yesu ba wangalui fanema li moroi ba Daromali Lowalangi. Isofu khönia Yesu, ”Hadia zi no tesura ba Goroisa Moze? Hadia zaboto ba dödömö?” Ibeʼe wanema li si tefaudu niha daʼö. Itötöi ayati sanandrösa ba wangomasiʼö Lowalangi hegöi fangomasiʼö awö. (3 Mo. 19:18; 5 Mo. 6:5) Hizaʼi, manofu ia aefa daʼö, ”Haniha zindruhunia nawögu andrö?” Daʼö zangoromaʼö wa lö aboto sibai ba dödönia hadia nibasonia. Lua-luania, lö iʼila hewisa wamalua ayati andrö ba waʼaurinia.

5. Hana wa itugu tofakha ba dödöda Daromali Lowalangi na talau mangandrö ba tadaʼi-daʼi wombaso yaʼia?

⁵ Tola itugu tofakha ba dödöda Daromali Lowalangi na toʼölö ita ba wombaso yaʼia. Tandraigö atö falua wanuturu lala andre. Angandrö fatua lö öbaso Zura Niʼamoniʼö. Moguna khöda wanolo moroi khö Yehowa enaʼö tofakha ba dödöda Daromalinia. Börö daʼö, andrö khönia geheha niʼamoniʼö enaʼö tola öʼosambuaʼö gera-erau. Aefa daʼö, daʼi-daʼi wombaso  yaʼia enaʼö aboto ba dödöu nibasomö. Tola öʼebuaʼö limö ba wombaso mazui öʼoʼö rekaman audionia. Na öfalua daʼö, no öʼogunaʼö dalingamö, tenga ha hörömö, irege tetanögö ba dödöu awö gera-erau Daromali Lowalangi. (Yos. 1:8) Na no aefa öbaso, tola öfuli ölau mangandrö. Faʼema wangandröu saohagölö börö me no ibeʼe Daromalinia Yehowa, ba andrö khönia enaʼö itolo ndraʼugö wamalua hadia zi no öbaso.

6. Hadia mbuania na öʼangerönusi wanofu-nofu ba ösura mbua gera-era nisöndrau moroi ba wombaso Sura Niʼamoniʼö? (Faigi göi gambara.)

⁶ So dombua tö wanuturu lala sanolo yaʼugö enaʼö itugu tofakha ba dödöu Zura Niʼamoniʼö. Na öbaso sambua waö-waö, angeragö wanofu-nofu simane daʼa: ’Haniha manö zabölö mututunö ba waö-waö andrö? Haniha zi fahuhuo? Haʼökhö fahuhuo ia, ba hadia mbörö? Hezo ba hamega alua daʼö?’ Fanofu-nofu simane daʼö zanolo yaʼugö ba wokhalaigö waö-waönia hegöi ba wamotokhi ba dödöu geluahania. Baero daʼö, sura mbua gera-era sadogo-dogo nisöndrau. Na ösura daʼö, amaedola öfaso samösa ndraʼugö ba woʼangeragö  hadia nibasou irege abölö tofakha ba dödöu ba lö alio olifuʼö. Tola ösura wanema li moroi ba wanofu-nofu no mege, hadia manö nisöndrau moroi ba riset nifaluamö, rahu-rahu si tola öhalö, famahaʼönia khöu, mazui hadia nirasoimö. Na ösura zimane daʼö, tola örasoi wa Sura Niʼamoniʼö andrö fehede Lowalangi soguna khöu samösa.

7. Hadia zinangea tafalua na tabaso Zura Niʼamoniʼö, ba hadia mbörö? (Mataiʼo 24:15)

⁷ Enaʼö aboto ba dödöda nösi Daromali Lowalangi, iforomaʼö Yesu wa moguna tahaogö taʼangeragö hadia nibasoda. (Baso Mataiʼo 24:15.) Eluahania, taʼogunaʼö wangera-ngerada enaʼö taʼila gamakhaita mazui faʼafaehu zi sambua bua gera-era moroi ba mbua gera-era tanö böʼö, ba moguna göi taʼila geluaha ngawua wehedenia. Simane niforomaʼö Yesu, sökhi na taʼogunaʼö wangera-ngerada ba wangiʼila salua si no mufaʼeleʼö ba Zura Niʼamoniʼö. Taʼogunaʼö göi wangera-ngerada ba ginötö tabaso faosatö tanö böʼö ba Zura Niʼamoniʼö enaʼö sindruhu-ndruhu tatema mbuania.

8. Hewisa wangogunaʼöda fangera-ngerada ba ginötö tabaso Zura Niʼamoniʼö?

⁸ Tola itolo ita Yehowa ba wangogunaʼö fangera-ngerada. Börö daʼö, andrö wanolo moroi khönia. (Amd. 2:6) Aefa daʼö, moguna öfaudugö nifaluamö simane fangandrömö. Hewisa lalania? Haogö osisiʼö hadia nibasomö, ba angeragö hadia gamakhaitania ba zi no aboto ba dödöu. Si tobali fanolou, tola öʼogunaʼö Wanuturu Lala ba Wamalua Riset khö Ndra Samaduhuʼö Yehowa. Tola itolo ndraʼugö publikasi andrö enaʼö aboto ba dödöu zi sambua ayati ba öʼila hadia wamahaʼönia khöu. (Heb. 5:14) Na öʼogunaʼö wangera-ngeramö ba ginötö öbaso Zura Niʼamoniʼö, tola itugu aboto ba dödömö nösinia.

9. Hadia wamahaʼö si lö lafaduhusi tödö niha Sadukaiʼo?

⁹ Aboto ba dödö niha Sadukaiʼo lima mbuku siföföna ba Mbuku Niʼamoniʼö Heberaiʼo. Hizaʼi, so ösa zindruhu si lö fatema ba dödöra. Duma-dumania, lö faduhu dödöra wa so wanusugi niha si no mate. Me lasofu khö Yesu sanandrösa ba daʼö, imane khöra Yesu, ”Hadia lö irai mibaso zalua ba gotalua ndruʼu sodoi nisura ba mbuku Moze? Me luo daʼö imane Lowalangi khö Moze, ’Lowalangi Gaberahamo ndraʼo, Lowalangi Gizaʼaki, ba Lowalangi Yakobo.’” (Mrk. 12:18, 26) Tatu manö no asese labaso sanandrösa ba ndruʼu sodoi andrö ira niha Sadukaiʼo. Hizaʼi, simane soroma ba wehede Yesu, lö faduhu dödöra wa so wanusugi, hewaʼae na daʼö sambua wamahaʼö si tohude ba Zura Niʼamoniʼö.—Mrk. 12:27; Luk. 20:38. d

10. Hadia zinangea taʼangeragö ba ginötö tabaso Zura Niʼamoniʼö?

¹⁰ Hadia wamahaʼönia? Na tabaso zi sambua ayati mazui waö-waö si so ba Zura Niʼamoniʼö, omasi ita taʼangeragö hadia wamahaʼö si tola tahalö moroi ba daʼö. Baero daʼö, moguna göi taʼodödögö wangalui sindruhu hegöi goi-goi si tobini ba ayati nibasoda, tenga ha dane-dane wamahaʼö manö.

11. Simane nisura ba 2 Timoteo 3:16, 17, hewisa enaʼö tola ösöndra girö-girö ba wamati ba Zura Niʼamoniʼö?

¹¹ Hewisa enaʼö tola ösöndra girö-girö ba wamati ba ginötö öbaso Zura Niʼamoniʼö? Nehegö atö hadia niwaʼö ba 2 Timoteo 3:16, 17. (Baso.) Moloʼö ayati daʼö, ”fefu nösi Mbuku Niʼamoniʼö . . . moguna ia” (1) ba wamahaʼö, (2) ba wangotuʼö, (3) ba wangaʼazökhi, ba (4) wamomaha yaʼita. Tola ötema mbua si öfa ngawalö andre, hewaʼae ba mbuku si lö asese öbaso ba Zura Niʼamoniʼö. Na öbaso Zura Niʼamoniʼö, angeragö hadia wamahaʼö nisöndramö sanandrösa khö Yehowa, ohitö dödönia, mazui goi-goi nibeʼenia. Angeragö göi hewisa wa moguna ayati andrö ba wangotuʼö. Alui hewisa wa tobali fanolomö ayati andrö ba wangiʼila hegöi ba wanimbagö isö-isö dödö mazui amuata si fasala, ba hewisa enaʼö lö faröiʼö khö Yehowa. Nehegö hewisa wa moguna ayati andrö ba wangaʼazökhi, mazui ba wangadölöʼö lala wangera-ngera si fasala. Duma-dumania bua gera-era niha nifalukhaisimö ba wanuriaigö. Ba angerönusi hewisa wa moguna ayati andrö ba wamomaha yaʼugö ba woloʼö lala wangera-ngera Yehowa. Na öfalua fefu daʼö, hasambalö ösöndra ngawalö girö-girö ba wamati, irege itugu oya mbua nitemau ba wombaso Sura Niʼamoniʼö.

12. Hadia mbörö wa iwaʼö Yesu ba niha Farizaiʼo, ”Hadia lö irai mibaso?”

¹² Imane Yesu ba niha Farizaiʼo, ”Hadia lö irai mibaso?” Daʼa zangoromaʼö wa tenga sindruhu-ndruhu aboto ba dödöra Daromali Lowalangi. (Mat. 12:1-7) e Me luo daʼö, lafobahulu ndra nifahaʼö Yesu ira niha Farizaiʼo wa no lasawö goroisa sanandrösa ba ngaluo Sabato. Ibeʼe khöra wanema li Yesu me itötöi dombua duma-duma ba Zura Niʼamoniʼö hegöi si sambua ayati ba mbuku Hosea, ba wangoromaʼö wa lö aboto ba dödö niha Farizaiʼo goi-goi sanandrösa ba ngaluo Sabato ba lö khöra faʼahakhö dödö. Hewaʼae na asese labaso Daromali Lowalangi, lö tobali ira niha sabölö sökhi. Hadia mbörö? Börö me ohitö dödöra ba wombaso ha enaʼö lasuno ira ba laʼalui zala niha böʼö. Lua-luania, lö aboto ba dödöra hadia nibasora.—Mat. 23:23; Yoh. 5:39, 40.

13. Hewisa zinangeania ita ba ginötö tabaso Zura Niʼamoniʼö, ba hadia mbörö?

¹³ Moroi ba wehede Yesu, tafahaʼö ita wa moguna taʼokhögö gamuata si sökhi ba ginötö tabaso Zura Niʼamoniʼö. Böi tobali ita simane niha Farizaiʼo, sombaso Taromali Lowalangi ha enaʼö lasuno ira ba laʼalui zala niha böʼö. Hizaʼi, moguna ’tatemaʼö si fao fangide-ngideʼö daromali nitanö ba dödöda’. (Yak. 1:21) Na so khöda wangide-ngideʼö ba omasi ita lafahaʼö, tola itolo ita Taromali Lowalangi enaʼö tobali niha sabölö sökhi. Tola göi tadouʼö ita ba wangoromaʼö faʼahakhö dödö, faʼasökhi dödö, ba faʼomasi.

14. Hadia zangoromaʼö wa no itolo ita Sura Niʼamoniʼö tobali niha sabölö sökhi? (Faigi göi gambara.)

¹⁴ Lö tobali niha sabölö sökhi ndra niha Farizaiʼo hewaʼae na labaso Daromali Lowalangi.  Oroma daʼö ba gamuatara somasi ’manguhuku niha si lö sala’. (Mat. 12:7) Hewisa göi ita? Hadia no itolo ita Taromali Lowalangi enaʼö tobali niha sabölö sökhi? Tola oroma daʼö ba lala wamaigida niha böʼö hegöi nifaluada khöra. Duma-dumania, hadia asese tafatunöisi zi sökhi niʼokhögö niha böʼö, mazui falömoʼahonoara nifatunöisida? Hadia taforomaʼö waʼahakhö dödö ba taʼefaʼö zala niha böʼö, mazui asese fatahi ba fahöʼö ita khöra? Na tafareso ita simane daʼö, tola taʼila hadia Taromali Lowalangi zamatörö lala wangera-ngerada, nirasoida, hegöi nifaluada.—1 Ti. 4:12, 15; Heb. 4:12.

15. Hewisa dödö Yesu ba Daromali Lowalangi?

¹⁵ Iʼomasiʼö sibai Yesu Daromali Lowalangi, ba no mufaʼeleʼö daʼö ba Zinunö 40:8: ”Omasido wamalua ohitö dödöu, yaʼugö Lowalangigu, bakha ba dödögu so goroisamö.” Buania, lö faröi ia ba wamosumange Yehowa ba irasoi waʼomuso dödö. Simanö göi ita, na tabaso ba taʼomasiʼö Daromali Lowalangi, tola anau gölöda ba tarasoi waʼomuso dödö.—Si. 1:1-3.

16. Hadia manö nifaluamö enaʼö itugu oya mbua nitemamö ba wombaso Sura Niʼamoniʼö? (Faigi kotak ” Fehede Yesu Zanolo Yaʼugö Enaʼö Aboto ba Dödöu Hadia Nibasou”.)

¹⁶ Tefaudu ba wehede hegöi ba duma-duma Yesu, yalötebulö taforege wanöndra bua moroi ba wombaso Sura Niʼamoniʼö. Tola itugu tofakha ba dödöda nösi Zura Niʼamoniʼö na talau mangandrö, tadaʼi-daʼi wombaso, taʼangeragö wanofu-nofu, ba tasura mbua gera-era sadogo-dogo. Tola taʼogunaʼö wangera-ngerada na tahaogö tafahaʼö ita ba nibasoda ba taʼogunaʼö publikasida si teʼodane-dane ba Zura Niʼamoniʼö. Tola itugu oya mbua nitemada ba wombaso Sura Niʼamoniʼö na taʼodödögö wangalui girö-girö ba wamati, ba tola tasöndra daʼö ba ayati si lö asese tabaso. Tola göi tobali ita niha sabölö sökhi na taʼokhögö gamuata satulö ba wombaso Taromali Lowalangi. Na tafalua fefu daʼö, sindruhu-ndruhu tatema mbua ba wombaso Sura Niʼamoniʼö ba itugu ahatö ita khö Yehowa.—Si. 119:17, 18; Yak. 4:8.