1. Hadia niwaʼö Yesu sanandrösa ba gamozua gulidanö andre, ba hadia mene-mene nibeʼenia khö ndra nifahaʼönia?

 MATO hauga hari fatua lö mate Yesu, so daöfa nifahaʼönia zanofu khönia, ”Hadia dandra . . . gamozua götö daʼa?” (Mat. 24:3) Te omasi ira laʼila hadia zi tobali tandra wa ba zi lö ara tö hasambalö tedudugö Yeruzalema hegöi osalinia. Ifatunö göi Yesu hadia manö ngawalö zalua fatua lö tedudugö Yeruzalema hegöi osalinia. Nitutunö Yesu andrö göi zi tobali tandra gamozua götö danö. Imane Yesu sanandrösa ba gamozua götö danö andre, ”Samösa lö sangila baŵa hegöi inötö, he ira malaʼika ba zorugo, he Ono, ha Ama zangila.” Aefa daʼö, ifangelama göi ndra nifahaʼönia enaʼö ’böi mörö’ ira ba ’böi arörö’.—Mrk. 13:32-37.

2. Hana wa moguna böi mörö niha Keriso me abad siföföna?

² Moguna böi mörö niha Keriso Yahudi me abad siföföna enaʼö tola teʼorifi ira. Ifatunö Yesu khö ndra soloʼö khönia hadia manö dandra sangoromaʼö wa ba zi lö ara tö hasambalö tedudugö Yeruzalema hegöi osalinia. Imane, ”Na miʼila so zaradadu samasui Yeruzalema, eluahania daʼö lö ara tö tedudugö Yeruzalema.” Na alua daʼö, moguna ”moloi ira ba hili”, simane fanuturu lala nibeʼe Yesu khöra. (Luk. 21:20, 21) Niha soloʼö fanuturu lala nibeʼe Yesu andrö teʼorifi ira ba ginötö ladudugö Yeruzalema ira saradadu Romawi.

3. Hadia nitutunöda ba artikel daʼa?

 ³ Ba zi lö ara tö tedudugö göi gulidanö si lö sökhi andre. Simane niha Keriso me abad siföföna, moguna mangelama ita ba böi mörö. Ba artikel daʼa, tatutunö dania: (1) hewisa enaʼö taʼokhögö wangera-ngera si tefaudu na taʼila ngawalö zalua ba gulidanö andre, (2) hana wa moguna tanehegö ita samösa, ba (3) hewisa enaʼö sökhi wangogunaʼöda inötö.

4. Hana wa adöni dödöda ba wangiʼila ngawalö zalua ba gulidanö hegöi amakhaitania ba nifaʼeleʼö Zura Niʼamoniʼö?

⁴ Hasambalö adöni dödöda ba wamaigi ngawalö zalua ba gulidanö andre tefaudu simane si no ifaʼeleʼö Sura Niʼamoniʼö. Itutunö Yesu hadia manö zalua ba gulidanö iadaʼa enaʼö aboto ba dödöda wa no ahatö gamozua götö danö andrö. (Mat. 24:3-14) Iʼamenesi ita sinenge sotöi Fetero enaʼö tanehegö hewisa waʼalua nifaʼeleʼö Zura Niʼamoniʼö andrö irege lö tebulö aro wamatida. (2 Fe. 1:19-21) Aefa daʼö, mubörötaigö göi mbuku safuria ba Zura Niʼamoniʼö faoma fehede, ”Daʼa nifaʼeleʼö Yesu Keriso, nitemania moroi khö Lowalangi ba wangoromaʼö khö ndra sawuyu Lowalangi ngawalö zi lö ara tö alua.” (Fam. 1:1) Tatu manö, daʼö mbörö wa adöni sibai dödöda ba wonehegö ngawalö zalua ba gulidanö andre, ba taʼalui hadia moʼamakhaita daʼö ba nifaʼeleʼö Zura Niʼamoniʼö. Tola göi terou sibai dödöda wanutunö daʼö khö ndra talifusöda.

5. Hadia zi tebai tafalua, ba hadia zi lö tola löʼö tafalua? (Faigi göi gambara.)

⁵ Ba ginötö tadunö-dunö sanandrösa ba nifaʼeleʼö Zura Niʼamoniʼö, tebai tatahö-tahö manö mazui tatatugöi hadia zi tobali rahu-rahunia. Hadia mbörö? Börö me lö omasi ita na aboto wahasara dödö ba gangowuloa ha börö mbua gera-erada. Duma-dumania, te tarongo hewisa zondröniaʼö ba gulidanö andre na ladunö-dunö lala wangasiwaira abula dödö salua, hegöi fangoʼozuira faʼatulö ba faʼahono dödö. Moroi na tahalö rahu-rahu wa salua andrö tefaudu simane nifaʼeleʼö ba 1 Tesalonika 5:3, moguna taʼalui hadia gangombakhata nifaʼanö ba publikasi si bohou mufazökhi. Na taʼodaligö publikasi nifazökhi organisasi Yehowa, hasambalö so khöda wahasara dödö ba ’ha sambua gera-erada’ khö ndra talifusöda.—1 Ko. 1:10; 4:6.

6. Hadia wamahaʼö si tola tahalö moroi ba 2 Fetero 3:11-13?

⁶ Baso 2 Fetero 3:11-13. Mene-mene Wetero zanolo yaʼita enaʼö taʼokhögö lala wangera-ngera si tefaudu ba ginötö tafahaʼö ita ba nifaʼeleʼö Zura Niʼamoniʼö. Iʼamenesi ita enaʼö lö taya ’ba wangera-ngerada waʼatohare ngaluo Yehowa’. Hadia mbörö? Tenga börö me omasi ita taʼila mbaŵa hegöi inötö nitatugöi Yehowa ba wangaʼasogö Hamagedo. Hizaʼi, börö me omasi ita taʼogunaʼö ginötö si so ’ba wamalua amuata satulö ba tafosumange Lowalangi soroi ba dödö’. (Mat. 24:36; Luk. 12:40) Eluahania, moguna tarorogö gamuatada ba tatatugöi wa tafosumange Yehowa andrö börö me sindruhu-ndruhu taʼomasiʼö ia. Börö daʼö, moguna tanehegö ita samösa.

7. Hewisa woloʼöda mene-mene Yesu ba Luka 21:34?

⁷ Iʼamenesi zoloʼö khönia Yesu enaʼö tenga ha lanehegö ngawalö zalua ba gulidanö, hizaʼi enaʼö lanehegö göi ira samösa. Oroma daʼa ba mene-mene nibeʼenia ba Luka 21:34. (Baso.) Ba ayati daʼö, ifangelama ita Yesu enaʼö tanehegö mbua-bua hegöi amuatada. Börö daʼö, moguna taʼila hadia manö dandrawa si tola mamakiko fahuwusada khö Yehowa ba moguna tatimbagö daʼö. Na tafalua daʼö,  ’lö tebulö so ita ba lumö waʼomasi Lowalangi’.—Yud. 20, 21; Amd. 22:3.

8. Hadia mene-mene nibeʼe zinenge sotöi Faulo ba niha Keriso?

⁸ Ifatunö Faulo ba niha Keriso enaʼö lanehegö ira samösa. Duma-dumania, imane ba niha Keriso si so ba Efeso, ”Mifaigi sibai hewisa wanörömi lala andrö, böi sambö fangera-ngera, hizaʼi enaʼö simane niha satua-tua.” (Ef. 5:15, 16) Iforege Satana ba wamakiko fahuwusada khö Yehowa. Börö daʼö, iʼamenesi ita Sura Niʼamoniʼö enaʼö ’aboto ba dödöda hadia zomasi Yehowa’. Na tafalua daʼö, tola talumöʼö ita moroi ba ngawalö nono wana nibeʼe Zatana.—Ef. 5:17.

9. Hewisa enaʼö aboto ba dödöda hadia zomasi Yehowa?

⁹ Lö izara-zara Sura Niʼamoniʼö wanutunö hadia manö dandrawa si tola mamakiko fahuwusada khö Yehowa. Asese sibai tahalö gangetula si lö muhaogö mututunö bakha ba Zura Niʼamoniʼö. Börö daʼö, enaʼö tola tahalö gangetula si fao faʼatua-tua, moguna taforege enaʼö aboto ba dödöda ”hadia zomasi Yehowa”. Hewisa lalania? Moguna tafahaʼö ita ba Daromali Lowalangi ero maʼökhö ba taʼangerönusi ia. Na itugu aboto ba dödöda hadia zomasi Yehowa ba taforege wangokhögö lala ”wangera-ngera Keriso”, tola itugu atua-tua ita ba ginötö tahalö gangetula, hewaʼae na lö mutatugöi sibai daʼö bakha ba Zura Niʼamoniʼö. (1 Ko. 2:14-16) So dandrawa salio taʼila, ba so göi zi löʼö.

10. Hadia manö dandrawa sinangea tatimbagö?

¹⁰ Ngawalö dandrawa sinangea tatimbagö yaʼia daʼö simane fohokhaini ira alawe mazui ira matua, famadu-madu tuo, femanga-manga manö, fangogunaʼö fehede sangafökhöiʼö tödö niha, fariawösa ba niha si lö sökhi, famaigi pornografi, hiburan sangoromaʼö faʼalösökhi, hegöi hiburan tanö böʼö si lö tefaudu. (Si. 101:3) Iʼalu-alui ginötö Afökha ba wamakiko fahuwusada khö Yehowa. (1 Fe. 5:8) Na lö mangelama ita, tola idönisi dödöda hegöi fangera-ngerada Satana irege so khöda waʼafökhö dödö, falimosa, fakhögusa, fatuwu ita ba niha böʼö, fayawasa, ba so ba dödöda wolau balö. (Gal. 5:19-21) Ba wamobörö, tola manö tawaʼö tödöda wa lö salania na so khöda mbua-bua simane daʼö. Hizaʼi, na lö iʼanemaiʼö taheta ia, tola manö monönö daʼö bakha ba dödöda simane tanömö zinanö solangu ba tafalua horö.—Yak. 1:14, 15.

11. Hadia sambua dandrawa si lö alio taʼila, ba hana wa moguna tatimbagö daʼö?

¹¹ Sambua dandrawa si lö alio taʼila yaʼia daʼö fariawösa si lö sökhi. Duma-dumania, mohalöwö ndraʼugö ba niha si tenga Samaduhuʼö Yehowa. Omasiʼö na sökhi lala wangera-ngerania sanandrösa khö ndra Samaduhuʼö Yehowa. Börö daʼö, öhaogö lagumö ba omasiʼö ötolo ia. Ba wamobörö, tola manö ha fasasakali fao ami wemanga ba zi laluo. Hizaʼi, arara manö, asese fao ami. Itaria itutunö zoʼamakhaita ba wohorö. Ba wamobörö, te lö ibeʼe dödöu daʼö. Hizaʼi, arara manö hulö toʼölö ndraʼugö wamondrongo simane daʼö ba fatema ba dödöu. Samuza inötö, ikaoniʼö enaʼö fao ami wamadu kofi me no aefa mohalöwö, ba faoʼö khönia. Ba gafuriata, fagölö lala wangera-ngeramö ba lala wangera-ngerania. Na simane daʼö zalua, tola manö tedönisi dödömö ba woloʼö amuatania. Hadia wamahaʼönia? Sindruhu sa, moguna fahuwu ita ba sökhi laguda ba niha fefu. Hizaʼi, moguna itörö tödöda wa tola manö fagölö gamuatada ba niha si fariawö khöda. (1 Ko. 15:33) Tatu omasi ita ba woloʼö mene-mene Yesu ba wonehegö yaʼita samösa. Daʼö mbörö wa lö fariawö ita ba niha si lö moloʼö goi-goi Yehowa. (2 Ko. 6:15) Aboto ba dödöda wa  tobali tandrawa daʼö khöda ba moguna tatimbagö ia.

12. Hadia zi lö tola löʼö lafalua ira nifahaʼö Yesu gasa-gasa wombaloira faʼadudu Yeruzalema hegöi osalinia?

¹² Omasi Yesu na so nifalua ndra nifahaʼönia gasa-gasa wombaloira faʼadudu Yeruzalema hegöi osalinia. Börö daʼö, ibeʼe khöra halöwö ba wangombakha turia somuso dödö ”iʼotarai Yeruzalema, Yudea ba Samaria maʼasagörö, irugi wondrege danö”. (Hal. 1:6-8) Halöwö sebua sibai daʼö! Börö me no laforege wamalua halöwö andrö, eluahania no lahaogö wangogunaʼö inötö.

13. Hana wa moguna sibai tahaogö wangogunaʼö inötö? (Kolose 4:5)

¹³ Baso Kolose 4:5. Moguna tahaogö wonehegö lalada wangogunaʼö inötö, börö me fefu ita tola manö ’göna khöda zalua si lö mudöna-döna’. (Sango. 9:11) Tola manö mate ita ba zi lö tadöna-döna.

14-15. Hewisa enaʼö tola tahaogö wangogunaʼö inötö? (Heberaiʼo 6:11, 12) (Faigi göi gambara.)

¹⁴ Tola tahaogö wangogunaʼö inötö na tafalua zomasi Yehowa ba taʼaroʼö wahuwusada khönia. (Yoh. 14:21) Moguna ’aro, abölö, ba owölö-ölö ita ba wangai halöwö khö Lowalangi’. (1 Ko. 15:58) Na no tafalua daʼö, lö saʼae maniasa ita dania hewaʼae na tohare gamozua  götö danö andrö, mazui amozua waʼaurida.—Mat. 24:13; Rom. 14:8.

¹⁵ Iadaʼa, lö iböhöli Yesu ba wameʼe fanuturu lala khö ndra nifahaʼönia ba wangombakha sanandrösa ba Wamatörö Lowalangi ba zi sagörö ulidanö. Ba organisasi Yehowa, ibeʼe khöda wamomaha Yesu sanandrösa ba wanuriaigö, ba ihenaigö fefu zoguna khöda ba wanuriaigö turia somuso dödö. (Mat. 28:18-20) No ifalua Yesu zi tobali tana khönia, ba moguna göi tafalua dana khöda. Moguna owölö-ölö ita ba wanuriaigö hegöi ba wamahaʼö niha böʼö. Moguna göi böi mörö ita gasa-gasa wombaloida Yehowa ba wangasiwai amozua götö danö andre. Na taʼoʼö mene-mene ba Heberaiʼo 6:11, 12, tola sindruhu-ndruhu faduhu dödöda ba dötönafö andrö ”irugi gamozua”.—Baso.

16. Hadia gangetulada?

¹⁶ No itatugöi Yehowa hawaʼara ihori gulidanö nifatörö Zatana andre. Ba ginötö daʼö, hasambalö ifalua Yehowa fefu wamaʼeleʼö si no musura ba Zura Niʼamoniʼö. Sindruhu sa, tenga simane faʼalio nidöna-dönada waʼatohare ngaluo Yehowa andrö. Hizaʼi, ”lö zi lö alua ba ginötö si no muhonogöi”! (Hab. 2:3) Börö daʼö, datahalö gangetula enaʼö ’lö taböhöli wombaloi Yehowa’ ba ’si fao faʼebolo dödö tadöna-döna Lowalangi sangorifi yaʼita’.—Mi. 7:7.